Yohanes Uram 16

“Ninyi aryi sunsi malyi kiminingsingnyi ababyi, sunci Nisi tanglona kum uca milibnindarur,” ebmou uram

16:1-4

1Ebmou cok, Er Yesus biryi Er miliramnyi nang asi ato ebmou. “Niryi sunti, ‘Dib en uram takloboka wanikminikingnyei,’ tenen a dib en uram nirya asi lak ebmasin. 2Ninyi ara sunda Ni milinin nang ati, ‘Nun li,’ tenen, ‘Musa Uram etererdan ai tubto wekmunyei,’ eboka yakdonokwansing. Ura, ton nang ara sunti, ‘Obkwayeb,’ tenebsingiryok, ‘Obibyi uca, Er Imtamnyi kanya teleb kubkwande,’ tenebkwaming. Ato tenen kunubkwaming talak ara dam kubmar ati ebmasin. 3A nang ara Ni Nai ab Ni ab kum bingsunung deyok aryi, sunda Ni milinin nang ati, ‘Obtibyi,’ tenen domkiringkwansing. 4A dinyi kunubkwansir talak kum yanmar ba, Niryi sunsi minob ebmasin. Ara, sunci, ‘Ato-ato kuboka malyi kibdeibkwansing,’ tenen minob bikwandum ati lak ebmasin. Uca, ninyi aryi sunsi domkirikwansing talak sirya yaci ura, sunci, ‘Nun Du biryi minob sirya lak ebmasou,’ teneibkwandum. Yuma kobdob sun ab tonkwa kuramoubwe talak ara ato dinyi lak kum ebmasise ani, ukuryok lak ebmasin,” ebmou.

“Er Imtamnyi Kanya Roh Kudus ara ato-ato kuboka wa ibde binkwansir,” ebmou uram

16:5-16

5Ebmou cok, Yesus biryi Er miliramnyi nang asi ato ebmou. “Ura, ukuryok ara Ni tamurbinkwan ara Ni Nai bokwetebnounyi dam tamuboka welebinkwan. Ato ebmasin bok, sun kankan aryi tentoknyi bibabyi, ‘Nai Du, dantam binkwandim do?’ eboka kum asibdenmanurum. 6Niryi, ‘Bokdankwayeb,’ ebmasin ati, sun kanya ara mambul weik kubmasir. 7Ba, Niryi sunsi dib en uram ton ebkwinsin ati diboka kekebdarur. Sun kanya mambul weik kubmasir bok, Ni ab sun ab bongdana ara teleb akwe kubkwande ati ebman. Ni binyi ura, Er Imtamnyi Kanya Roh Kudus asi bokwetebkwansin. Kum bitinyi uca, Roh Kudus ara sun dongtam tikoka milisururnyi sun dam kum yasute. 8Ura, Roh Kudus yuryangaci ura, Erci sun tukwetam malyi kun nang asi tatab-tatab ebci uca, ‘Malyi dinyi kuramoubwe se,’ tenebkwaming. Tonda, Erci Niti, ‘Er Imtamnyi biryi teleb tenerur dinyi kunubde kunururnyi,’ eboka lak eterebkwande. Tonda, Roh Kudus aryi, ‘Er Imtamnyi biryi malyi deyok liliboka wenebkwande,’ eboka lak eterebkwande. 9Sun tukwetam nang ara Nisi dib kum teneraning ati Roh Kudus aryi tatab-tatab eboka, ‘Malyi dinyi tenen kurandum se,’ ebkwande. 10Tonda, Nira Ni Nai Imtamnyi dam tamurbinkwan ati, sunci Nisi asing kum eibkwanurum. A deyok aryi Roh Kudus aryi sun tukwetam nang asi lak eterebci uca, a nang aryi, ‘Nunda Er Imtamnyi urasintam aryi teleb dinyi kunubde kum kunub se,’ tenen bikdankwaming. 11Tonda, Roh Kudus ara, ‘Er Imtamnyi biryi malyi deyok liliboka wenebkwande,’ eboka eterebkwansir. Ara, Er Imtamnyi biryi isa sienyi Iblis bira malyi kurmurun nang deyoknyi biti, ‘Wenebkwan,’ tenebmou ati ato ebmasin.

12Niryi sunti, ‘Dib en uram yuk-yuk ilinto eterebtabaktinyi,’ tenebman bok, sunci a uram yuk-yuk bita kum bikdobkwandum ati, ukuryok kum eterebkwinsin. 13Ura, Er Imtamnyi Kanya Roh Kudus yuryangaci ura, Erda dib en uram eteresururnyi biryi sunsi dib en uram nirya lak eterebkwansir. Erci Er kanya yuk aryi tenebmaci tok kum eterebkwansir. Eda, Er Imtamnyi biryi ebmaci uram kekebmaci ura, eterebmurubkwansir. Tonda, Roh Kudus aryi aminda kunubkwande dinyi nirya sunsi lak ebde binkwansir. 14Roh Kudus ara Nisi erebdeibkwanir ati ebman. Ara, Niryi ebnyi tok, Erci Ni uram ebmuruboka sun nirya asi eterebkwansir biriman aryi Nisi erebdeibkwanir. 15Er Imtamnyi taruk kubmaci dinyi nirya ara Erci Ni taruk dam karebmanou. Ara, Niryi Roh Kudus asi, ‘Ato-ato eboka eterebdum,’ ena mikib ababyi Nisi karebmanou. A deyok aryi, Niryi ato ebmasin. Niryi ebnyi tok, Roh Kudus aryi ebmuruboka sun nirya asi eterebkwansir.

16Uki mitikanun mabmabyi ani, sunci Nisi asing tuba kum eibkwanurum. Ura, uki mitik nun tubto mabmamunyi ani, sunci Nisi asing tubto eibkwanurum.” Yesus biryi ato ebmou.

Er miliramnyi nang kanya mambul asi Yesus biryi katabum ebdeibmou cok, Erci, “Sun kanya mambul kubsici ani, aminda aryi kilkil weik kubkwansir,” ebmou uram

16:17-33

17Ura, Yesus miliramnyi nang sun kanya ara kankana kubmou ati, sun kankan aryi ton nang ara ato eboka asibdanmai. “Unato ati Erci ato ebmasir, ‘Uki mitikanun mabmabyi ani, sunci Nisi asing tuba kum eibkwanurum. Ura, uki mitikanun tubto mabmamunyi ani, sunci Nisi asing tubto eibkwanurum.’ Tonda, unato ati Erci, ‘Ni Nai dam tamurbinkwan ati ato ebmasin,’ ebmasir do?” 18Asibmurubdanmai cok, sunci ato eboka asibdanmai. Erci, “ ‘Uki mitikanun mabmabyi ani,’ ebmasir ara unato ati ato ebmasir do? Nun Du biryi ebmasir uram deyok ati nun kum bikmab,” ebdanmai.

19Ura, Yesus biryi, “Asirdena asibdeniting,” tenen bikmou ati, Erci sunsi ato eboka asibdenmou. “Niryi sunsi ebmasin uram deyok ati sun kanya kankana kubmasir do? Ati, Niryi, ‘Uki mitikanun mabmabyi ani, sunci Nisi asing tuba kum eibkwanurum,’ ebmasin ati kankana kubmasir do? Tonda, ‘Ura, uki mitikanun tubto mabmamunyi ani, sunci Nisi asing tubto eibkwanurum,’ ebmasin ati kankana kubmasir do? 20Niryi sunsi dib en uram ebkwinsin ati diboka kekebdarur. Ni binmanyi ura, sunci engena weik engebkwandum. Ba, sun malyi kurmurun nang kanya ara kilkil weik kubkwande. Ura, sunda Ni milinin nang kanya mambul weik kubsici ani, kilkil weik tubto kubkwansir. 21Mundu bon ner ara mi deibkwamaci uki tum berekde ba, mi deyok aryi, u weik yirande. Ura, mi sirya deibmaci ura, mi deyok aryi, u yin dinyi ton mambul dinyi ton erci tuba kum teneibkwande. Eda, erci, ‘Ni mi deibman,’ tenebmaci ba, er kanya kilkil weik kubkwande. 22Ura, mi deirin ner kurande to sunda Ni milinin nang ababyi neiktoto kubkwandum. Ara, ukuryok aryi kubde baramuncok, mambul kanya borandum. Ani, aminda aryi Ni sun ab tubto ebdankwamib talak ara sun kanya kilkil weik kubkwansir. Kilkil weik kubkwansir ati, ninyi tentok ababyi sunsi mambul tubto kum kubdeibkwansir. 23Ni ab sun ab tubto ebdankwayeb uki tum berekmaci ura, sunci Niti asirdena ton kum asibdenkwanurum. Niryi sunsi dib en uram ebkwinsin ati diboka kekebdarur. Sunci Ni si deici aryi molobmamunyi tok Ni Nai Imtamnyi biryi kunubkwansir. 24Minob aryi kuboka ukuryok ababyi sunci Er Imtamnyi bisi molorandau cok, sunci Ni si deici aryi kum molorandau. Ani, ukuryok aryi kuboka Ni si deici aryi molobkwandarur. Ati, sunci Er Imtamnyi bisi molobmunyi uca, Erci sunsi karebkwansir. Sun molobmamunyi tok dobdobkwandum cok, sun kanya ara sunglona kum uca kilkil weik kubkwansir.

25Niryi sunsi kiklina uram deici aryi eteransise ani, aminda aryi kiklina uram deici aryi tuba kum eterebkwansin. Ara, dib en uram anmalakoka lak eterebkwan talak sirya berekmar ati, Niryi Ni Nai deyok ati dib en uram anmalakoka lak eterebkwansin. 26A kubkwayeb uki tum berekci ura, Niryi sunti molormilibkwansin ati kum ebman. Eda, sunci Ni si deici aryi Er Imtamnyi bisi anmalakoka molobkwandum. 27Ni Nai Imtamnyi bira sunti boukwe weik kusurur ati, Erci sun molobmamunyi tok karebkwansir. Ara, sunci Nira sun Du biti boukwe weik kuranurum ati, Ni Nai biryi sunti boukwe weik kusurur. Tonda, sunci Niti, ‘Er Imtamnyi bokwetebnounyi,’ dib teneranurum ati Ni Nai biryi sunti boukwe weik kusurur. 28Nira Er Imtamnyi dam kuranse ani, tukwetam yuryase. Ani, ukuryok ara tukwetam aryi anaboka Ni Nai Imtamnyi dam tubto tamurbinkwan,” ebmou.

29Er Yesus biryi ato ebmou ba, Er miliramnyi nang aryi Ersi ato ebmai. “Ukuryok ara kiklina uram kum ebmarim cok, lak botoboka ena uram akwe eterebmasirim. 30Kanda nun Du biryi utotoa nirya bingdumnyi kurum ati nun ukuryok sirya bikdobmab. Ninyi aryi asirdena kum asibdingnyi ababyi, Kanci sun kanya aryi tenen dinyi sirya bikmarim. A deyok aryi, nunci Kanti, ‘Er Imtamnyi biryi bokdonokmounyi,’ tenen dib tenebmakib,” ebmai.

31Ato ebmai bok, Er Yesus biryi sunsi ato ebmou. “Uki ilinto ara katabum ena kum uca Nisi dib teneranindau ani, ukuryok ara katabum eboka dib tenebmasurum do? 32Ba, sunda Nisi milinin nang nirya ara dantam-dantam binsekwandum talak berekwamar ati ebman. Ara, sun nirya aryi, ‘Nun damnyi lebdandobtibyi,’ tenen sun ai yuk-yuk binsekwandum bok, Ni yuk kubkwan. Ni yuk kubkwan asi ninyi aryi Nisi taleboka tabwe debkwaning. Ato ebman cok, Ni yuk kum kubkwan ati ebman. Ni Nai Imtamnyi bira Ni ab tonkwa kununumnyi bira a talak ababyi Ni ab tonkwa kubkwanim.

33Niryi sunsi a dinyi nirya lak eterebmasin ara sunti, ‘Ni biriman aryi neik kanya boboka antaniboka kubkwanung,’ tenen eterebmasin. Sunda Ni miliranurum nang ara tukwetam tuba kurandum asi ninyi aryi mambul dinyi kibdeibkwansing. Mambul dinyi kibdeibsingnyi ababyi, sun kanya katabum ebdeibdandarur. Nira sun Du biryi sun malyi kurmurun nang dinyi nirya asi muna kibdongobman ati sun kanya katabum ebdeibdandarur.” Ato eboka Yesus biryi Er miliramnyi nang kanya asi katabum ebdeibmou.

Currently Selected:

Yohanes Uram 16: MTG

Highlight

Copy