Yohanes Uram 13

Er Yesus biryi Er miliramnyi nang yan me ilikeibmou uram

13:1-17

1Weik kwalina tum si Paskah berekwamwe ba, Er Yesus biryi, “Ni dibkwan talak dam kubmar,” tenen bikdanmou. Ara, Erci, “Tukwetam aryi kuboka anabdobnyi ura, Ni Nai Imtamnyi dam welebinkwan,” tenen bikdanmou. Ura, Erci Er miliramnyi nang asi iya boukwe weik kimnamwe to, Erci Er boukwe tenen dinyi sunti diboka lak kibdeibmou.

2Lukunda yibkoi yina ara sirya yangabminikdobmai cok, kum yibmai. Bok, isa sienyi si Iblis biryi Yesus miliramunyi si Yudas Iskariot er kanya dam murmurubdongobmou uca, erci, “Yesus bisi kikibnyi ba, ninyi aryi Ersi taruk taleboka obting,” tenen kubmou. 3Ura, Yesus biryi, “Er Imtamnyi biryi mikib dinyi utotoa nirya ara Ni taruk dam karebmanou,” tenen bikdanmou. Tonda, Erci Erdamnyi biti, “Er Imtamnyi bokwetebnounyi kununci, Er Imtamnyi dam tubto tamuboka welebinkwan,” tenen bikdanmou. 4A dinyi nirya asi bikdanmouci, Yesus biryi tikokmou ura, Er alib ongon aling ara kwiriblobmouci, me ilikoka kilin aling asi Er der ai arikoka labkwetebmou. 5Sirya arikdanmou ura, Erci me ilingna me asi kwebtaleboka weik me ilingna moyok umbura dikdongobmou. Sirya dikdongobmou ura, Erci Er miliramnyi nang yan me ilikde yibinmou. Me sirya ilikeibmou ura, der ai arikoka labkwetebmou me kilina aryi sun yan kilibde yibanmou.

6Me ilikde yibanmou ani, Erci Simon Petrus yan me ilikeibkun tenen ku asi, Simon Petrus biryi ato ebmou. “Nai Du, Kanci ni yan me ilikwamanirim do? Ato kubniminyei se,” ebmou. 7Ato ebmou ba, Yesus biryi ersi ato ebmou. “Niryi kan yan me ilikeibkwinkin deyok ara ukuryok diboka kum bikmarim bok, aminda ara diboka bikwandim,” ebmou. 8Ebmou bok, Petrus biryi, “Ato tenen kum,” ebmou. “Kanci ni yan me ilikniminyei.” Ato ebmou ura, Er Yesus biryi ersi ato ebmou. “Niryi kansi me kum ilikmakinyi uca, kanci Ni kisal dangsin dinyi kum dobdobkwandim.” 9Ura, Petrus biryi ato ebmou. “Nai Du, ato ura, Kanci ni yan ur me iliknurum. Tonda, ni taruk ab ni kisok ababyi me ilikdeibnurum.” 10Ura, Er Yesus biryi ersi ato ebmou. “Sun nirya ara me sirya kekdob nang ato kurandum ati yan akwe me ilikmasin. Sun nong kisok taruk nirya ara kekdob dinyi akwe kurur. Sun nirya ara me kekdob nang ato kurandum bok, sun kankan ara me kengdona kumnyi ton bukmar,” ebmou. 11Ara, Er Yesus biryi, “Ni milin nang kankan ninyi tentok aryi Nisi kikibkwanir,” tenen bikmou. A deyok aryi, Erci sunsi, “Sun kankan ara me kengdona kumnyi ton a bukmar,” ebmou.

12Ura, Er miliramnyi nang yan yuk-yuk me ilikeibde yibanmou ani, sirya ilikeibmou ura, Er Yesus biryi Er alib ongon aling tubto ongobdobmouci, co lamna dam bukamwe sokon tubto burbinmou. Ura, sunsi ato eboka asibdenmou, “Niryi sun yan me ilikeibmasin ara sunda unato ati me ilikmasir tenen sun ton bikmarum do?” eboka sunsi asibdenmou. 13Ura, ton ato ebmou, “Nira sun Nai sun eteresinanyi kunun ati, sunci Niti, ‘Nai ninyi eterenanyi,’ eboka, ‘Nun Du Erebdobnyi,’ enindarur. Nira sun eterenanyi ton Erebdobnyi ton diboka kunun ati sunci Niti ato eboka namnanurum ara kikibto eboka namnanurum. 14Ati, Nira sun arungdeirisinanyi ton sun eteresinanyi ton kunun cok, Niryi sunda Ni milinin nang asi yan me ilikeibmasin. Ati, sunda Ni wa irmilinin nang ababyi neiktoto sun mamun yan me ilingdana teleb. 15Niryi sun yan me ilikeibmasin ara sunti kiklibdeiboka me ilikeibmasin ati, sunbabyi neiktoto sun damnyi luknubdongobdandoka sun mamun dirlilirdana teleb. 16Niryi sunsi dib en uram ebkwinsin ati diboka kekendarur. Er wa irmilinanyi bira er wa arungdeirinanyi bisibkaboka Erebdobnyi ton kum kurur. Tonda, yuk nang uram ermuruna bobananyi bira erci bokdonokmar uram damnyi bisibkaboka Erebdobnyi ton kum kurur. 17Ati, Niryi sunsi ato eboka lak eterebmasin ati sunci kunubdarur. Sirya kunubmunyi uca, Er Imtamnyi biryi sunsi kisal dakwansir,” ebmou.

Er Yesus biryi, “Sun kankan aryi ninyi tentoknyi biryi Nisi kikibkwanir,” eboka Er miliramnyi nang asi minob lak eterebmou uram

13:18-30

18Ato ebmou bok, Er Yesus biryi Er miliramnyi nang asi ato ebmou. “Sun kankan ara me keksekdobman kumnyi ton kurur ati ebmasin. Ara, sun nirya ara keksekdobman kum nang kurandum ati kum ebmasin. Niryi sun kankan aryi wibdeibmasin nang asi diboka bingsunun ati ebman. Eda, sun kankan ara tonyi biryi keksekdobman kumnyi bitonyi kurur. Er Imtamnyi Uram ara minob kerek sekeibmou uram umbura aryi anyi biti ato ebmou.

‘Ni ab tonkwa roti yibmanimnyi bira Niti, “Obkwan,” teneninanyi kibmar.’ (Mazmur 41:8)

Ati, anyi biryi Nisi kikibkwanir ara Er Imtamnyi Uram kunubkwande ati Nisi kikibkwanir.

19Kikibkwanir tum kum berekmar bok, Niryi sunsi a dinyi minob lak ebman. Ara, sirya kunubci ura, sunci Niti, ‘Iya kam kururnyi,’ tenen bikwanurum ati Niryi a dinyi minob lak ebmasin. 20Niryi sunsi dib en uram ton lak eterebkwinsin ati diboka kekebdarur. Unanyi-unaner ara Niryi bokdonoknyi nang ati, ‘Ni kwit yabwe,’ tenen dobdobsingnyi ura, a nang ara Nibabyi sintum dobdobkwaning. Tonda, unanyi-unaner ara Niti, ‘Nun Du,’ tenen dobdobningnyi ura, a nang ara Ni Nai Imtamnyi bibabyi sintum dobdobkwaming,” ebmou.

21Er Yesus biryi ato ebmou ura, Er kanya mambul weik kibmou ba, Erci ato eboka lak ebmou. “Niryi sunsi dib en uram ebkwinsin ati diboka kekebdarur. Sunda Ni miliranurum nang kankan ara tonyi biryi Nisi kikibkwanir.” 22Ato ebmou ura, Er miliramnyi nang aryi, “Unanyi biti ato ebmasir do?” tenen kum bikmai cok, sun mamum asing dibdanmai. 23Ura, Er miliramnyi nang kankan ara Yesus biryi iya boukwe weik kuramunyi ton kuramwe. Anyi bira Er Yesus sokon bukmou dam bukmou. 24Bukmou asi er kwit Simon Petrus biryi er ngang dukum ebmou cok, anyi bisi ato ebmou. “ ‘Kanci ebmasirim deyok ara nun kum bikmab ati lak ebsurum,’ eboka nun Du bisi asibderum,” ebmou. 25Uca, Yohanes bira Yesus dam liknibdongoboka erci Yesus bisi ato eboka asibdenmou. “Nai du. Kanci, ‘Ni kikibkwaniranyi bira anyi,’ eboka lak ebsurum,” ebmou. 26Ura, Er Yesus biryi ersi ato ebmou. “Niryi a roti tobdoba talebman asi anggur du yung me asi dongobkun ura, tonyi bisi karebkun. Roti tobdoba karebkunyi bira Ni kikibkwaniranyi kubmar.” Ebmou uca, Erci roti tobdoba talebmou asi anggur du yung me asi dongobmou ura, Yudas Iskariot bisi karebmou. Ara, ninyi si Simon Iskariot er mi asi karebmou. 27Roti tobdoba asi sirya karebmou ura, isa sienyi Iblis bira Yudas er kanya wekmou. Ura, Yesus biryi ersi ato ebmou. “Kanci tenebmoumwe to minola kunubdum,” ebmou. 28Ato ebmou bok, sun Er Yesus miliramnyi nang Er ab tonkwa yibmai nang yuk nang ara, “Kikibkwande ati tenebmou ati ato ebmou,” tenen kum bikmai. 29Ton nang ara, “Weik kwalina Paskah kwalibkwayeb ati ton dinyi suklobmar ati kanci dekdum,” ebdeibmar ati tenebmai. Yudas bira co bok talenanyi kuramwe ati, ato tenebmai. Yuk nang ara, “Sun kwaning atan nang asi yina dekeiboka karebdum,” ebdeibmar ati tenebmai. 30Ura, Yudas biryi roti sirya dobdobmou ura, erci anaboka bindobmou. Ara, lukunda kubmou ba, er bindobmou.

Er Yesus biryi Petrus bisi, “Kanci Niti, ‘Ni walwal,’ ebkwanirim,” minob lak ebmou uram

13:31-38

31Ura, Yudas sirya binmou ura, Er Yesus biryi ato ebmou. “Er Imtamnyi biryi Ni Ninyi Dasinyi biti, ‘Iya Erebdobnyi kurur,’ eboka lak kibdeibkwande ati ukuryok bikman. Tonda, Nira Ninyi Dasinyi biryi Er Imtamnyi biti, ‘Iya Erebdobnyi kurur,’ eboka lak kibdeibkwan. 32Niryi Er Imtamnyi biti, ‘Iya Erebdobnyi kurur,’ tenen dinyi lak kibdeibnyi uca, Er Imtamnyi bibabyi neiktoto ukurlona kum uca Niti, ‘Iya Erebdobnyi kurur,’ tenen dinyi lak kibdeibkwanir.

33Ni mabwe. Ni ab sun ab mitik talak tonkwa kubibyi ura, bokdankwayeb. Ni binmanyi ura, sunci Nisi ingkiriknumuncok, kum eibkwanurum. Niryi sun Yahudi yala nang asi eterebmase to sunbabyi eterebmasin. Ni binkwan dam ara sun binman kum kubkwandum. 34Niryi sunsi ukuryok arungna uram ton eboka arukdeibkwinsin. Sun mamun boukwe weik kibdandarur ati ebman. Niryi sunsi boukwe kusunun to, sunbabyi neiktoto sun mamun boukwe weik kibdandarur. 35Sunci sun mamun boukwe kibdamunyi uca, ninyi nirya aryi sunti, ‘Yesus milin nang kunung,’ tenen bikwansing,” ebmou.

36Ura, Simon Petrus biryi ato eboka asibdenmou. “Nai Du, Kan dantam binkwandim do?” Ura, Yesus biryi ersi ato ebmou. “Ni binkwan dam ara sun ukuryok binman kum kubkwandum. Eda, aminda aryi kanci miliboka neik dam yankwandim,” ebmou. 37Ebmou ba, Petrus biryi ato ebmou. “Nai Du, unato ati niryi Kansi ukuryok kum milibkitinyi do? Ninyi aryi nisi obningnyi ababyi, niryi Kansi miliboka libkwankin,” ebmou. 38Ebmou bok, Yesus biryi ato ebmou, “Kanci Niti liboka kandamnyi karebdatum do? Ato tenen kum. Maka kirim ara ngalungna kum uca, kanci Niti, ‘Anyi biti ni walwal,’ ebkwanirim. Ara, ambutum kum berekur bok, kanci liki winiryi ebmincok, ‘Anyi biti ni walwal,’ ebkwanirim.” Yesus biryi Petrus bisi ato ebmou.

Currently Selected:

Yohanes Uram 13: MTG

Highlight

Copy