Luuk 21

A Tatavai Sina Saxa Tefin Nakmaal

Maak 12:41-44

1Layaan nane kaalum xolai, nane xalum a mu mataa piran aava ri taxa timin a tatavai siri lana mo ina tifiaana maana tatavaian la lifu lotu. 2Nane xalum a saxa tefin nakmaal vaxa i taxa tatavai pana ro faat modak paaliu. 3Na Yesus a kuus, “Ne xuus tuunei nami, a tefin nakmaal aanabe' a tatavai pana mo molava paaliu sena xasanofuna xapiak. 4Senaso nari mu piran, ri tatavai pana xavil mon ti lana fafanaian siri. Taasaxa nane ve a tefin valagof e a tatavai pana maana mo xapiak sina.”

Na Yesus A Ferawai Pana Maana Mo I Taa Savat La Fataxapiak Ina Yaan

Matiu 24; Maak 13; Matiu 10:17-22

5Saxano fefeng si Yesus ri taxa lo ferawai pana xakaaluman aava magaaf faroxo ina lifu lotu. A lifu aave ri famaus faroxoi paaliuane pana maana faat roxo e pana maana tatavaian roxo malaan sena ʻgolʼ. 6Taasaxa na Yesus a kuus, “A mo mi taxa xalume naboxo, saxa yaan i taa filimaan e mi taa pife xalum ta saxa faat ina i taa mati laa'ui xulun' ta xasa faat, nari xapiak ri taa tagalas xe lapia.”

7E ri fine, “Mataa ina Fepitaa, laso ta yaan tuuna a maana mo aanabe' ri taa savat? E a so ta mo i taa fakalimaan a yaan layaan a maana mo aanabe' ri taa savat?”

8E nane sui nari, “Faxatang faroxo ulaa ri tamaa bit nami. Senaso a maana rabuna xaves ri taa filimaan lapaana isaak e ri taa kuus o ‘Nenia ve ne Mataa Failai’, e ‘A yaan ina kawaasanan ve i taxa faasilak.’ Ai, taasaxa muta usi nari. 9E layaan mi taa langai pana maana fevisan, muta mataut. A maana mo aanabe' ri taa savat paamua taasaxa fataxapiak ina yaan i taa pife savat monabe' mon.”

10-11E mui nane kuus xe siri, “A maana mu bina ri taa fevisan nari. Ri taa toxan a maana mara'ulia molava, a song molava e a maana buk giisan lava ri taa savat la maana mu bina. E ti laa'ui la xunavata a maana mo famataut e maana fakalimaanan molava ri taa savat.

12“Paamuina yaan aave ri taa yot nami e ri taa vil pengan nami. Ri taa lisan nami xe lana mu lifu ina faxuvulan e lana bina ina vipisan. Ri taa fatiginei nami la nona mu king e mu paamua ina gavamen sena isaak mon. 13E voxo mi fexaxaas sena xuus nari pana maana faisok sina Piran. 14Taasaxa, lana lamonan simi mi muta lamon faaxaves pana so ta mo mi taa kuusane. 15Senaso ne taa tavai nami pana ferawaian e texaasan aava mu xaiyaas simi ri taa pife faaxolusane. 16A mu tamami e mu ninami, mu timi e mu fesing simi ri taa pet lisan nami e saxanofuna imi ri taa punuk nami. 17A mu rabuna xapiak ri taa baian nami senaso mi namkai sega. 18Taasaxa mi taa waan faroxo; piau ta fui la putumi i taa malit. 19Tamo mi taa tigina fatateak vulai lana namkaian simi, mi taa siak a toyan xe vulai.”

Na Yesus A Ferawai Pana Kawaasanaan Na Jerusalem

20“Layaan mi xalum a mu rabuna ina rawen, ri taxa kaliuan na Jerusalem, mi taa texaas o a yaan ina kawaasanaana fo faasilak. 21Lana yaan aave a mu rabuna ti la maana mu bina pe Judia aava ri taxa fakaliuan na Jerusalem, ri taa sinuf xe xuluna maana mu put e nari aava ri waan pe Jerusalem, ri taa ta'ulan a bina aave. Nari aava ri taxa waan lamalei se Jerusalem ri taa pife laak xe lana. 22Senaso a yaan ina fakasanaman aanabe' a yaan aava mu rabuna ina kuus fatuxai, ri fo ferawai pana. 23A lagafan molava paaliu i taa savat sina lutefin ri tiva e nari aava ri taxa fasus a rafulak siri. Sena maraleian sina Piran xe siri mu Juda i taa toxan a maana lagafan molava paaliu ri taa savat. 24Ri taa punuk nari lana fevisan. E ri taa yot nari e lisan nari xe la bina ina vipisan la maana bina xapiak. A rabuna aava ri pife Juda, ri taa paasan xolan na Jerusalem fefexaxaas a yaan aava Piran fo kuusane.

25“I taa toxan a maana fakalimaanan lana ngaas, fulun e la maana vapara. Xuluna xavala a mu rabuna ri taa mataut e ri taa pife texaas o malaafaa a xaing i taxa tibur falava. 26A mu rabuna xapiak ri taa maat faxavil pana matautan layaan ri xalum a maana mo ti laa'ui la vata ri taxa radakui senaso ri pife texaas sena so ta mo i taa savat la xavala. 27Lana yaan aave ri taa xalum a Natuna Mataa i taxa filimaan lana vata pana gutan e pana malang molava paaliu. 28Layaan a maana mo aanabe' ri taxa savat, tigina fatateak lana namkaian simi senaso a fakaxupaan nami i taxa filimaan faasilak.”

29-30Nane xuus nari pana ferawaian paap aanabe': “Layaan mi xalum a novala taxa rul mi texaas o a yaan ina fenamo i taa savat. 31E layaan mi xalum a maana mo aave ri taxa savat, mi taa texaas o a fatataganan sina Piran fo faasilak.

32“Ne kuus tuuna xe simi o a mu rabuna xapiak aanabe' ri taa pife malit xapiak paamuina yaan a maana mo aanabe' ri taa savat. 33A xunavata e xavala re taa taxapus, taasaxa maana ferawaian siak ri taa waan vulai.

34“Faxatang faroxo! A pife roxo tamo no taa lalamon faagut sena maana mo ti la xavala malaan sena mu fenamo, numaana raarum tateak e a maana lagafan ina toyan nabe' e a yaan aave i taa savat fa'ipulan nano malaan sena vio aava sangas vaang laak marasaxa lana filung. 35A maana mo aanabe' i taa savat e piau paaliu ta mataa i taa sinufane. 36E voxo, faxatang faroxo vulai e fenung talo no fexaxaas sena sinufan a maana mo aava i taa savat e no taa tigina la nona Natuna Mataa.”

37Maana yaan xapiak na Yesus taxa fepitaa la lifu lotu e maana vung nane ta'ulai xena falet xe xuluna Put Olif. 38E la paanen lolof a maana rabuna xaves ri fuuna savat soxote xena langaiaana fepitaian sina pe lana lifu lotu.

Currently Selected:

Luuk 21: TFSP

Highlight

Copy