Marcos 6

Chꞌin Jesús kjuákꞌe Nazaret

(Mt. 13:53-58; Lc. 4:16-30)

1A̱ndá kꞌuaxrjexín chꞌin Jesús ti chjasin a, la ikjan chꞌan Nazaret, ti chjasin kꞌuánkíxin chꞌan la ko kja̱xin chréhe̱ ti sin xriko chꞌan. 2Ndá ti ña̱o to̱kꞌéhe sin la kjuako chꞌan ti nchia tónkotséxin ti sin Judío la nchónhña chojni kuíhin la ndáchro sin:

―¿Nketí tsíxrako̱he̱ ti nkexro i? ¿Nketí kui̱xi̱n ti kjuaxrexinkaon chónta chꞌan la ko ti kjuaxroan tjasin chꞌan? 3¿Á jehya tíhi ti nkexro chꞌéna nkehe inta, la ti ìñé chꞌan mé María, la ti kícho chꞌan Jacobo, José, Judas la ko Simón ní? ¿A̱ jehya kja̱xin ntihi tjejó ti sin kícho chꞌan ichjin ní?

Mé xi̱kaha ichro sin kuitekakuenhña sin chꞌan. 4#Jn. 4:44.*A̱ndá chꞌin Jesús ndáchro:

―Kaín chojni tjikosáyehe sin ijnko nkexro chronka itén Díos. Kjánchó ti sin chjasin kuènté chꞌan la ko kaín ti sin kjéhya chꞌan la ko ti sin ndo̱e chꞌan la chóntehya kjuasàya ti jehe chꞌan.

5Méxra̱ ninkehó kjuaxroan xitjahya kjuasin chꞌan ntiha, jehó kjuakꞌetja tja chꞌan iso ti sin níhi tjejó ntiha, la kuito̱he sin jína. 6Ndá imá kꞌuává chꞌan kixin titekakonhña sin. La kꞌuáji chꞌan ti chjasin ntsíntsí chjinaxón ntiha kjuako chꞌan.

Ti ixra̱ kuítoehen ti teyó sin

(Mt. 10:5-15; Lc. 9:1-6)

7A̱ndá Jesús kꞌuéye̱he̱ ti teyó sin. Ndá kꞌue̱to̱an chꞌan kixin yayaá sin sátsji sin la ko kja̱xin kjuajon chꞌan kjuachaxin kixin tsakítsje sin ncha̱kuén jínahña chónta chojni. 8La ko kꞌue̱to̱an chꞌan kixin ninkehó tsjikohya sin kuènté nti̱a; jehó ti inta tjixín sin la ko tsjikohya sin kabolsa la ko nkehe sinie sin la ko chichaon; 9jehó tsjiko sin ti to̱ka̱te̱ xranka sin la ko ti ika chrꞌinkáya sin ó, jehya tsákja sin íso nkehe. 10La kja̱xin ndáchro chꞌan:

―Ti tsjasánra ijnko nchia tsoxrajon kjuachaxin la ntahó tito̱hara. Ndá ti ó kjuixin ti ixra̱ ndá sátsjixinra ntiha. 11#Hch. 13:51.#Lc. 10:4-11.*Ti tsjasánra ijnko nchia ndá tsjajonhña sin kjuachaxin tsꞌejora ntiha la ko tsotjinkakonhña sin tsihin sin ti nkehe tsonixjara, la tꞌaxrjéxinra ntiha, la tꞌoxènjinra ti inche chónta to̱tára kixin xi̱kaha tsjáko̱xi̱nra kixin nduáhya kjuíchꞌe ti sin a. Chaxín ndáxrja̱n kixin ti ña̱o tsito̱exín iji̱é chojni la a̱ntsí tsjasóte sin ke ti sin kꞌuejó Sodoma ko Gomorra.

12Ndá sákjuí sin la nkákja̱ko̱he̱ sin ti chojni kixin chrókuíto̱he sin iji̱é sin. 13#Stg. 5:14.*La ko kja̱xin kuakitsje sin itsjé ncha̱kuén jínahña chónta chojni. La itsjé chojni níhi la kuikjajin sin aceite ikja, la kuito̱he sin jína.

Ti Ikꞌuén Juan Bautista

(Mt. 14:1-12; Lc. 9:7-9)

14 # Mt. 16:14; Mr. 8:28; Lc. 9:19. *A̱ndá ti rey Herodes mé kuíhin ti kjuaxroan kjuasin chꞌin Jesús. La ndáchro:

―Kjá Juan Bautista la tsíxechón kixin xi̱kaha ti kjuachaxin chónta ti nkexro a.

15A̱ndá iso sin ndáchro:

―Kjá tíhi la chꞌin Elías.

A̱ndá íso sin ndáchro:

―Kjá tíha la ijnko ti nkexro kꞌuékjako itén Díos ósé o̱ nkojín ti sin a ―ichro sin.

16Ndá ti ó kuíhin chꞌin Herodes la ndáchro:

―Tíhi la kjá Juan ti nkexro kuéto̱an chrijin ikja, la ó tsíxechón chꞌan ijie ―ichro chꞌin Herodes.

17 # Lc. 3:19, 20. *Kixin ti chꞌin Herodes mé tsíkꞌe̱to̱an kixin tsjakꞌechjina chꞌin Juan la cadena tso̱ntetoxín chꞌan kixin xi̱kaha tsíkjanchia ti tjan Herodías. Kꞌuéchjién ti chꞌin Felipe, sa̱vé ti chꞌin Herodes, ndá ti chꞌin Herodes mé kuákja chꞌan ti tjan a kixin tsꞌóna ichjién chꞌan. 18La Juan tsíndáche ti chꞌin Herodes:

―Kohya kjuachaxin tsochonta ichjién ti kichua.

19Mé xi̱kaha ti tjan Herodías la imá kónínkaon tjan la kjuénka̱yáxin tjan chrókꞌóñá tjan ti chꞌin Juan, kjánchó xitjahya 20kixin ti chꞌin Herodes mé chráko̱nhe̱n ti chꞌin Juan kixin ó nohe chꞌan kixin ti nkexro a la jína la ko tjóá a̱sén, méxra̱ kuíto̱ehya chꞌan kixin jehe tjan chrókꞌóñá tjan. La kjónté kanhñó tienxín chꞌan, la kóxríhi̱n chꞌan ti nkehe kuíhin chꞌan kjuako ti chꞌin Juan. 21A̱ndá ti ña̱o kié ti chꞌin Herodes, la kꞌuéye̱he̱ chꞌan kaín ti sin tꞌe̱to̱an la ko ti sin tꞌe̱tue̱hen ti sin soldado la ko ti sin tꞌe̱to̱an kuènté Galilea kixin itsi sin ti kia. 22Ndá kꞌuíxehen ti xje̱en tjan Herodías ti tjejó sin la ité tjan, la imá kóxríhi̱n chꞌin Herodes la ko kaín ti sin tjejónieko chꞌan nkexrín ité tjan. La chꞌin Herodes ndáche chꞌan ti tjarisoá:

―Tjánchíá ti nkehe tjinkaoan la tsotjahá.

23Ndá kꞌuákjenxi̱n chꞌan ihni̱é Díos la ndáchro chꞌan:

―Kaín ti nkehe tsjanchia la tsotjahá, kjónté nko̱siñe ti chjasin tꞌe̱to̱an janhan. 24Ndá ti ó kuíhin tjan xi̱kaha la sákjuí tjan kjuanchankíhi tjan ti ìñé tjan, ndáchro tjan:

―¿Nkehe chrókjuanchiani?

Ndá ti ìñé tjan la ndáchro:

―Tjanchia ti ikja Juan Bautista.

25Ndá ti tjarisoá la tjoka kꞌuíxehen tjan ntiha la ndáche tjan ti rey:

―Tjinkaoni tsjánjua ikja Juan Bautista tsjakꞌenkáya ijnko plato ―ichro tjan.

26Ndá ti rey la imá kꞌuává chꞌan kixin xi̱kaha kjuanchia tjan, kjánchó ó kjuínchenohe chꞌan Díos la ko ó kuíhin kaín sin ti nkehe ndáchro chꞌan, la xitjahya tsondáchro chꞌan: “Náhí.” 27La tuénxín kꞌue̱tue̱hen chꞌan ijnko soldado kixin tsji̱ka̱o ti ikja chꞌin Juan. 28Ndá ti soldado la sákjuí ndo̱echjiso, la kóchríjin chꞌan ikja ti chꞌin Juan. La kjui̱ka̱o chꞌan tjenkáya ijnko plato ndá kuákja ti tjarisoá. Ndá jehe tjan sákjuikehen tjan ti ìñé tjan.

29Ndá ti ó kuíhin ti sin kuékꞌajiko chꞌin Juan ti nkehe kóhen la sákjuikjanchia sin ti cuerpo ndá sákjuikja̱vá sin.

Kjónie inꞌó mil chojni

(Mt. 14:13-21; Lc. 9:10-17; Jn. 6:1-14)

30A̱ndá chrꞌéxi̱n la ikjui ti sin kꞌuájiko chꞌin Jesús, la chrónka sin ti ixra̱ kjuíchꞌe sin la ko nkexrín kjuako sin. 31Ndá ndáchro chꞌin Jesús:

―Tsꞌaxrjentáni sátsjini nte̱je̱ ti kohya chojni ndá tso̱kꞌáhara intsí ―ichro chꞌan.

Kixin ni xrokjuahya tsꞌejó sin sinie sin kixin nchónhña chojni sasítji̱ la ko síti. 32Ndá chꞌin Jesús la ko ti sin kꞌuájiko chꞌan, kꞌui̱tꞌótjen sin ijnko ntabarco la sákjuí sin ijnko nonte kohya chojni. 33Kjánchó itsjé chojni kꞌuíkon kixin sákjuí sin la kjuátso̱an sin ti chꞌin Jesús. Ndá to̱tó sin xrákua̱xi̱n sin chjasén sin la senó sin kjuíji sin ti chrínta nda̱ñao tsjiji chꞌin Jesús. 34#Nm. 27:17; 1Rs. 22:17; 2Cr. 18:16; Ez. 34:5; Mt. 9:36.*Ndá ti kꞌuínkaji̱xi̱n chꞌin Jesús ti ntabarco ndá kꞌuíkon chꞌan kixin nchónhña chojni siín ntiha la kui̱konoéhe̱ chꞌan sin kixin tjejó sin éxi kolélo chóntahya nkexro tsꞌayakohen. Ndá kjuankíxin kjua̱ko̱he̱ chꞌan sin nchónhña nkehe. 35Ndá ó kóntanonte la ti sin kꞌuájiko chꞌin Jesús a mé kóchjinehe sin chꞌan, la ndáchro sin:

―Ó kóntanonte la kohya nkehe ntihi, 36méxra̱ ndáche sin kixin sátsji sin ti chjasin intsí chjino, la tsꞌe̱na sin nkehe sinie sin kixin ntihi la kohya nkehe sinie sin ―ichro ti sin kꞌuájiko chꞌan.

37A̱ndá chꞌin Jesús, ndáchro:

―Jahara chje̱héra sin nkehe sinie sin ―ichro chꞌan.

Ndá kjuáte̱he sin, ndáchro sin:

―¿Á tsjikꞌe̱nani yaá ciento denario nio̱tja̱ tsochjéheni sin sinie sin ní?

38Ndá chꞌin Jesús ndáche ti sin a:

―Titsjehéra, ¿nkekja̱ín nio̱tja̱ chontara?

Ndá sákjuitsjehe sin la ndáchro sin:

―Jehó inꞌó nio̱tja̱ la ko yaá koche ó ―ichro sin.

39Ndá kꞌue̱to̱an chꞌan kixin kaín sin chrókꞌuejótja̱xi̱n sin chritaón ti kayoa. 40Ndá kónkojié sin nkojnko ciento sin la ko nkojnko cincuenta sin kꞌuejótja̱xi̱n sin. 41La chꞌin Jesús kuákja ti inꞌó nio̱tja̱ la ko ti yaá koche ndá konta chꞌan nka̱jní la chjéhe chꞌan Díos kjuasáya. Ndá kóchrítꞌo̱ chꞌan ti nio̱tja̱, la chjéhe chꞌan ti sin kꞌuájiko chꞌan kixin tsꞌóxika̱ye̱he sin sinie ti sin tjejó ntiha la ko kja̱xin kóchrítꞌo̱ chꞌan ti yaá koche ndá kꞌóxika̱ye̱he sin kixin sinie sin kaín sin. 42Ndá kaín sin kjónie sin la kókje̱he sin. 43Ndá kjuixin, la kjuenájín sin ti to̱tꞌo̱ nio̱tja̱ la ko ti koche tsíxéhe̱ la kjuínchekaón sin teyó ntaxra. 44La ti sin kjónie mé inꞌó mil chojnindoa.

Chꞌin Jesús itji chritaón nda̱ñao

(Mt. 14:22-27; Jn. 6:16-21)

45Ndá tuénxín la kꞌue̱tue̱hen chꞌan ti sin kꞌuájiko chꞌan kixin tsꞌi̱tꞌótjen sin ti ntabarco la tsꞌátòye̱ sin ti nda̱ñao, sátsji sin ti chjasin Betsaida. A̱ndá jehe chꞌan la na̱xa̱ kuíto̱he chꞌan nixje̱he̱ chꞌan kaín ti sin kꞌuejó ntiha. 46Ndá ti ó kjuixin nixje̱he̱ chꞌan sin, la chrìin chꞌan ijnko ijna̱ kixin tsonixje̱he̱ chꞌan Díos. 47Ndá ti ó kꞌuíxin tie la ti ntabarco la mé ó kjuíji nko̱siñe nda̱ñao, la jehó chꞌan kuíto̱he chꞌan ti nonte ntiha. 48Ndá kꞌuíkon chꞌan kixin imá ixra̱ tjiko sin ti ntabarco kixin imá chjéhe xri̱nto̱. Ndá ti na̱ndóye la sákjuichréhe̱ chꞌan sin. Tetjixin chꞌan to̱té chꞌan ti nda̱ñao, la kóchjina chꞌan ti tjejó sin la chrókꞌuatsínké chꞌan, sáchrokjui chꞌan. 49Ndá ti ó kꞌuíkon sin kixin tjetjitaón chꞌan ti ìnta̱, la kjuénka̱yáxin sin kixin kjuacha sin la kꞌóyako sin 50kixin kaín sin kꞌuíkon sin la chrákon sin. Ndá tuénxín nixja chꞌan, ndáchro chꞌan:

―Janhan, chrakonhñara.

51Ndá kꞌui̱tꞌótjen chꞌan ti ntabarco, ndá ti xri̱nto̱ la ó kꞌuixratá. Ndá imá chrákon sin kixin xi̱kaha kóhen 52kixin na̱xa̱ kienxínhña sin ti kjuaxroan kjuasin chꞌan kuènté ti nio̱tja̱ kixin na̱xa̱ kaínhña a̱sén sin titekaon sin chꞌan.

Chꞌin Jesús mé kjuínchekito̱he jína ti sin Genesaret

(Mt. 14:34-36)

53Ndá ti ó kꞌuatsínka sin ti nda̱ñao, la kjuíji sin Genesaret ndá kjua̱kꞌe̱chro̱e sin ti ntabarco chrínta nta̱. 54Ndá ti ó kꞌuínkaji̱nxi̱n sin ti ntabarco la ti sin tjejó ntiha la tjoka kjuátso̱an sin ti chꞌin Jesús. 55Ndá sákjuí sin nkuíxín ntiha la kjuankíxin tinkátsénkí sin ti sin si̱níhi chónta sin kjui̱ka̱o sin, ti itjen chꞌan. 56La kaín nketí kjuíji chꞌan, á chjasin intsí o̱ chjasin ijié, o̱ no̱nte̱e sin la kóchjinako sin ti si̱níhi chrínta nti̱a. La chrónoéhe̱ sin ti chꞌin Jesús kixin kjónté chrínta ti iké chꞌan ó chrókuákóxi̱n sin. Ndá kaín ti sin kuákóxi̱n ti iké chꞌan mé kuito̱he sin jína.

Currently Selected:

Marcos 6: poeNTplus

Highlight

Copy