Mateo 28

Xechón Jesús

(Mr. 16:1-8; Lc. 24:1-12; Jn. 20:1-10)

1A̱ndá ti ó kꞌuatsínka ti ña̱o to̱kꞌéhe chojni, chjina tsꞌinkaséña, ti ña̱o xránkíxixín semana, la ti tjan María Magdalena la ko ti íjnko tjan María mé sákjuitsjehe sin ti tsíkji̱xravá chꞌin Jesús. 2Ndá xrína̱hña imá kꞌuínki nonte kixin ijnko ángel kuènté Ìnchéni mé kꞌuínkaji̱nxi̱n nka̱jní la ikui ti tsíxravá chꞌin Jesús la kjuakjìin ti ixro̱ tjekjèxin ti tòye̱, la kjuákꞌekjen chꞌan chritaón ti ixro̱ a. 3Ti ángel mé imá tjáki̱ni tsjehe éxi ijnko xrohi la ti iké chꞌan la imá tjóá tsjehe éxi chrintá. 4Ndá ti ó kꞌuíkon ti sin soldado xi̱kaha la xrànka̱ sin, chrakon sin la éxi ikꞌuén sin xi̱kaha. 5Ndá ti ángel mé ndáche ti chojnichjin:

―Chrakonhñara. Nóna kixin xritjéyára ti chꞌin Jesús ti nkexro kjuákꞌenkáni ntacruz. 6Í kohya chꞌan ntihi, ó xechón chꞌan ínaá éxi chrónka chꞌan senó. Xrákira tsjehéra ti kjuákꞌe sin chꞌan, í kohya chꞌan. 7Méxra̱ tjoka sátjira la chenkara ti sin kꞌuájiko chꞌan: “Ti nkexro la ó xechón. La ó kuitóxin chꞌan nti̱a sátsji chꞌan Galilea. Ntiha tsꞌikonra chꞌan.” Mé kaín tíha kꞌuítoana tso̱tjo̱nkara ―ichro ti ángel.

8Ndá ti chojnichjin la tjoka sákjuixin sin ti tsíxravá chꞌin Jesús, la chrákon sin, kjánchó chéhe̱ sin, la sákjuichenka sin ti sin kꞌuájiko chꞌin Jesús. 9Ndá titàya̱ xéta sin ti chꞌin Jesús la nixje̱he̱ sin chꞌan. Ndá jehe sin la kóchjina sin la kjóa sin to̱té chꞌan la kjuíkosáyehe sin chꞌan. 10Ndá chꞌin Jesús, ndáchro:

―Chrakonhñara, sátjira chenkara ti sin kíchóni kixin sátsji̱ sin Galilea, ntiha tsꞌikon sin ti janhan.

Ti nkehe chrónka ti sin soldado

11Ndá ti ó sátsíkji ti chojnichjin, la iso ti sin soldado kꞌuayakohen ti tsíxravá chꞌin Jesús mé sákjuí sin ti chjasin Jerusalén la chenka sin ti ncha̱tꞌá tꞌe̱to̱an kaín ti nkehe kóhen ti kꞌuejó sin ntiha. 12Ndá ti sin ncha̱tꞌá tꞌe̱to̱an la nixje̱he̱ sin ti sin táda la nkoko̱a kjuénka̱yáxin sin la chjéhe sin itsjé chichaon ti sin soldado, 13la ndáchro sin:

―Chro̱nkara kixin ti ó tie na̱xa̱ tjejochri̱nra la ikui ti sin kꞌuájiko chꞌin Jesús, la kueé sin ti cuerpo kuènté chꞌan, ichrora. 14A̱ndá ti tso̱nohe ti gobernador ti nkehe kóhen, la jeheni tsonixje̱he̱ni chꞌan kixin tso̱nínkakuanhñara chꞌan ―ichro ti sin ncha̱tꞌá.

15Ndá ti sin soldado la kuákja ti chichaon la sákjuí sin la xi̱kaha kjuíchꞌe sin éxi kꞌuítuehen sin. La xi̱kaha chronka ti sin judío hasta ijie ña̱o.

Ti nkehe kꞌue̱to̱an Jesús

(Mr. 16:14-18; Lc. 24:36-49; Jn. 20:19-23)

16 # Mt. 26:32; Mr. 14:28. *A̱ndá ti tejnko sin kꞌuájiko chꞌin Jesús mé sákjui̱ sin Galilea ti ijna̱ tsíkꞌe̱to̱an chꞌin Jesús. 17Ndá ti ó kꞌuíkon sin chꞌan la kjuíkosáyehe sin chꞌan, kjónté iso sin la kjuénka̱yáxin kixin á chaxín jehe chꞌan o̱ náhí. 18Ndá chꞌin Jesús kóchjinehe chꞌan ti jehe sin la ndáchro chꞌan:

―Díos kjuajon kaín kjuachaxin nkaya nka̱jní la ko chjasintajni. 19#Hch. 1:8.*Méxra̱ sátjira kaín nación la tjákohéra chojni kixin tsitekaon sin ti janhan. Tíki̱texínra sin kjuachaxíen ihni̱é Itꞌéni Díos, ihni̱é ti Xje̱en chꞌan la ko ti Ncha̱kuén chꞌan. 20Tjákohéra sin kixin sinchexiteyá sin kaín ti nkehe kuéto̱an. Ndá janhan tsjakꞌé tsꞌejóni nkochríxín hasta tsjeje̱ chjasintajni.

Mé xi̱kaha tso̱hen.

Currently Selected:

Mateo 28: poeNTplus

Highlight

Copy