Mateo 27

Kjuikaán sin Jesús ti itjen Pilato

(Mr. 15:1; Lc. 23:1-2; Jn. 18:28-32)

1Ndá ti ó kꞌuínkaséña la kaín sin ncha̱tꞌá tꞌe̱to̱an la ko ti sin tꞌe̱to̱an kuènté ti sin judío mé kjuénka̱yáxin sin kixin itsꞌen ti chꞌin Jesús. 2Ndá kjuínchenteto sin chꞌan la sákjuíko sin ti itjen chꞌin Poncio Pilato, gobernador romano.

Ikꞌuén Judas

3 # Hch. 1:18, 19. *A̱ndá Judas, ti nkexro kjuínchekji ti chꞌin Jesús, kꞌuíkon kixin tsꞌóñá sin ti chꞌin Jesús, la imá náxrjónhña kóhen chꞌan kixin jehe chꞌan kjuínchekji chꞌan ti chꞌin Jesús, la sákjuikehen chꞌan ti sin ncha̱tꞌá tꞌe̱to̱an la ko ti sin táda ti treinta chichaon plata tsíkákja chꞌan. 4La ndáchro chꞌan:

―Kjuásian ijie̱ kixin kjui̱ntakjia ijnko nkexro tjóá chóntahya ijie̱.

A̱ndá ti sin ncha̱tꞌá kjuáte̱he, ndáchro:

―Janhan la nonahñana tíha. Tíha la ijie̱ kuèntá.

5Ndá Judas ikꞌue ti chichaon a nkaxehen ti ni̱nko, ndá sákjuí chꞌan la kꞌóñá chꞌan a̱sén chꞌan.

6Ndá ti ncha̱tꞌá tꞌe̱to̱an la kjuejo ti chichaon la ndáchro:

―Ti chichaon í la kóxi̱xi̱n ijni̱é chojni la xitjahya tsochrꞌáxenheni ti caja kuènté ofrenda.

7Ndá nkoko̱a kjuénka̱yáxin sin la kꞌue̱naxín sin ijnko nonte itꞌin No̱nte̱e ti chꞌin Chꞌéna Nchísén kixin ntiha tsoxravá ti chojni tsíkji̱xi̱n ikjín. 8La kjuínchekꞌin sin ti nonte a Nonte kuènté Ijni̱, la hasta ijie na̱xa̱ xi̱kaha itꞌin. 9#Zac. 11:12, 13.*Mé xi̱kaha xiteyá ti nkehe tsíndáchro ti profeta Jeremías: “Kuakja sin ti treinta chichaon plata, ti chichaon kjuajon ti sin israelita kuènté ti nkexro a, 10la kꞌue̱naxín sin ti nonte kuènté ti nkexro chꞌéna nchísén kixin xi̱kaha kjuínchexiteyá sin ti nkehe kꞌue̱to̱an Ìnchéni.”

Jesús kjuákꞌe nkayakon ti gobernador Pilato

(Mr. 15:2-5; Lc. 23:3-5; Jn. 18:33-38)

11Ndá sákjuíko sin ti chꞌin Jesús ti itjen ti gobernador la ntiha kjuanchankíhi sin chꞌan:

―¿Á jaha ti Rey kuènté ti sin judío ní?

Ndá chꞌin Jesús kjuáte̱he, ndáchro:

―Ó jaha ndáchrua.

12La xi̱kaha ti sin ncha̱tꞌá tꞌe̱to̱an la ko ti sin táda tꞌe̱to̱an mé kjuanchia sin ijie̱, kjánchó chꞌin Jesús la ninkehó kjuáte̱hya.

13A̱ndá chꞌin Pilato ndáchro:

―¿Á tienhña kaín ti nkehe ndáchro sin tjanchia sin ijie̱ ní?

14Kjánchó chꞌin Jesús la ninkehó kjuáte̱hya chꞌan la ti gobernador la imá kóxakohen chꞌan.

Kꞌuítoan kixin itsꞌen Jesús

(Mr. 15:6-20; Lc. 23:13-25; Jn. 18:38—19:16)

15A̱ndá ti kia Pascua mé ti gobernador la kuéhen takítsjexín ndo̱echjiso ijnko chojni tjechjina. La kaín ti chojni tónkotsé ntiha mé tjanchia nkexro tsꞌaxrje. 16Ndá ntiha mé tjechjina ijnko nkexro, kaín chojni chóxin kixin jehya ijnko chojni jína, mé itꞌin Barrabás. 17A̱ndá ti ó kónkotsé itsjé chojni la chꞌin Pilato kjuanchankí:

―¿Nkexro tjinkáonra tsꞌatjánta, á Barrabás o̱ á Jesús, ti nkexro nchekꞌin sin Cristo?

18Mé xi̱kaha kjuanchankí chꞌan kixin ó nohe chꞌan kixin ti kjuanchia sin ijie̱ la kixin kjuachji̱no̱xíhin chónta sin.

19A̱ndá Pilato na̱xa̱ tjetja̱xi̱n ti nchekito̱exíxin iji̱é chojni la ti ichjin kuènté chꞌan la kꞌue̱tue̱hen ijnko chojni tsjichronka kixin chrókji̱atéhya chꞌan ninkehó ti nkehe tso̱hen ti nkexro jína kixin náxrjónhña kꞌuíkonxín tjan kotáchrién tjan kuènté ti nkexro a.

20Kjánchó ti ncha̱tꞌá tꞌe̱to̱an la ko ti sin táda mé nixje̱he̱ kaín ti chojni tsíkóchjina kixin chrókjuanchia sin kixin chrókꞌuaxrje ti chꞌin Barrabás, la chrókꞌuen chꞌin Jesús. 21Ndá ti gobernador kjuanchankí ínaá, ndáchro:

―¿Nkexro ti yaá sin tjejó ntihi tjinkáonra tsꞌatjánta?

Ndá kjuáte̱he sin, ndáchro sin:

―Barrabás.

22A̱ndá chꞌin Pilato mé kjuanchankí chꞌan:

―¿A̱ndá nkehe si̱tꞌaha̱ Jesús, ti nkexro nchekꞌinra Cristo?

Ndá kaín sin kjuáte̱he sin:

―¡Tsjakꞌenkáni chꞌan ntacruz!

23Ndá chꞌin Pilato kjuanchankí, ndáchro:

―¿Xá nkehe ijie̱ kjuíchꞌe ti nkexro i?

Ndá jehe sin la a̱ntsí itsen, kꞌóyako sin, ndáchro sin:

―¡Tsjakꞌenkáni chꞌan ntacruz!

24 # Dt. 21:6-9. *A̱ndá ti ó kꞌuíkon chꞌin Pilato kixin í tsjinkíhya sin ti nkehe tjenka̱yáxin sin, la a̱ntsí kꞌuíxité sin, nínkaon sin; la kjuanchia chꞌan ìnta̱, la nkayakon kaín ti sin tsíkónkotsé ntiha kꞌónti chꞌan itja chꞌan. La ndáchro chꞌan:

―Janhan la chontahya ijie̱ ti itsꞌen ti nkexro i. Jahara iji̱ára kixin tjinkáonra itsꞌen chꞌan.

25Ndá kaín sin kjuáte̱he sin:

―Jeheni la ko xje̱eni tsamáni ti ijie̱ ti itsꞌen ti nkexro i.

26Ndá kuíto̱he chꞌan kixin tsꞌaxrje ti chꞌin Barrabás. La kꞌue̱to̱an chꞌan kixin tsjate sin ti chꞌin Jesús ndá kjuínchekꞌayéhe̱ chꞌan sin kixin tsja̱kꞌe̱nka̱ni sin chꞌan ntacruz.

27A̱ndá ti sin soldado la sákjuíko sin ti chꞌin Jesús ti palacio kuènté ti gobernador. La ntiha kónkotsé kaín ti sin soldado romano la kua̱ntátjen sin ti jehe chꞌan. 28Ndá kuakitsjehe sin chꞌan ti iké chꞌan la kjuínchekꞌinkáya sin chꞌan ijnko ika kjátse tié. 29Ndá kjuíchꞌénaxín sin ntachꞌi̱ ijnko corona la kjua̱kꞌe̱nka̱ya sin ikja chꞌan la ko kjuakꞌenkáya sin ijnko inta ti itja chꞌan chjina. Ndá kꞌuejóxin sin tochꞌin sin nkayakon chꞌan la kjuanoá sin chꞌan, ndáchro sin:

―Nkochríxín tsjakꞌe tsétue̱hén ti sin judío.

30La kuikjajin sin nda̱té sin nkayakon chꞌan la kuákja sin ti inta tjexraá chꞌan la chjéhe sin ti ikja chꞌan. 31Ndá ti ó kjuixin kjuanoá sin chꞌan la kuakitsjehe sin chꞌan ti ika kjátse tié la kjuínchekꞌinkáya sin chꞌan ti iké chꞌan. Ndá sákjui̱ko sin chꞌan kixin tsjakꞌenkáni chꞌan ntacruz.

Kjuákꞌenkáni Jesús ntacruz

(Mr. 15:21-32; Lc. 23:26-43; Jn. 19:17-27)

32A̱ndá kꞌuaxrjexín sin ntiha la xéta sin ijnko nkexro tsíkji̱xi̱n chjasin Cirene, mé itꞌin Simón. La kꞌue̱tue̱hen sin kixin tsamá chꞌan ti ntacruz tsjakꞌenkáni chꞌin Jesús.

33Ndá kjuíji sin ijnko nketí itꞌin Gólgota, mé ti ngive̱e sin la tꞌaxrjexín Hueso Ikja Chojni. 34#Sal. 69:21.*Ndá ntiha chjéhe sin chꞌin Jesús xranvino tsíkjiko xro̱a̱n itsjá, kjánchó jehe chꞌan la kꞌuihya chꞌan.

35 # Sal. 22:18. *Ndá ti sin soldado ti ó kjuixin kjua̱kꞌe̱nka̱ni sin chꞌan ti ntacruz, la kjuíchꞌexín sin suerte ti iké chꞌan kixin tso̱nohe sin nkexro tsákja. Mé xi̱kaha xiteyá ti nkehe nixja ti sin kꞌuéchronka itén Díos ósé, ndáchro: “Kjuíchꞌexín sin suerte ti kaná.” 36Ndá ntiha kꞌuejótja̱xi̱n ti sin soldado kixin tsꞌayakohen sin chꞌan. 37Ndá ikja ti ntacruz la kjuákꞌenkáni sin ijnko nta ndáchro:

“Tíhi mé Jesús, Rey kuènté ti sin judío.”

38Kja̱xin ntiha kꞌuejóyáni sin ntacruz yaá sin che̱e, ijnko la itja chꞌan chjina la íjnko la itja chꞌan ikjon. 39#Sal. 22:7; 109:25.*Ndá kaín ti sin tꞌatsínka ntiha mé kjuanoá sin chꞌan, ti̱nka̱tji̱a̱ sin ikja sin 40#Mt. 26:61; Jn. 2:19.*la ndáchro sin:

―Jaha ndáchrua kixin chrókꞌóxika ti ni̱nko la iní ña̱o ó chrókjui̱chꞌénaxián ínaá. Ti chaxín jaha ti Xje̱en Díos la jahuá tꞌinka̱jinxián ti ntacruz méhe̱.

41La xi̱kaha kja̱xin ndáchro ti sin ncha̱tꞌá tꞌe̱to̱an, ti sin tjako ti ley la ko ti sin fariseo, kjuanoá sin chꞌan la ndáchro sin:

42―Kjuínchekaá chꞌan ókjé chojni, ndá jehe chꞌan la xitjahya sinchekaá chꞌan a̱sén chꞌan. Ti chaxín jehe chꞌan ti Rey kuènté Israel la jehó chꞌan chrókꞌuinkaji̱nxi̱n chꞌan ti ntacruz, ndá kja̱xini tsitekaoni ti jehe chꞌan. 43#Sal. 22:8.*Jehe chꞌan la ndáchro chꞌan kixin Díos tjinki̱tsa ti jehe chꞌan; ti chaxín tjue̱he Díos ti jehe chꞌan la sinchekaá ti jehe chꞌan kixin tsíndáchro chꞌan kixin jehe chꞌan mé Xje̱en Díos.

44La kja̱xin ti xíche̱e tjejóyáni ntacruz kꞌuándaxíhi̱n sin ti jehe chꞌan.

Ikꞌuén Jesús

(Mr. 15:33-41; Lc. 23:44-49; Jn. 19:28-30)

45Ndá ndesi chonkíxin la ko hasta las tres kójín mé kꞌuíxin tie kuènté chjasintajni. 46#Sal. 22:1.*Ndá éxi las tres kójín la chꞌin Jesús itsen kꞌuéya chꞌan, ndáchro chꞌan:

―Elí, Elí, ¿lama sabactani? ―mé tíha tꞌaxrjexín: Itꞌéni, Itꞌéni, ¿nkekuènté kuíto̱heni jehóni?

47Ndá iso ti sin tjejóntaxín ntiha kuíhin sin xi̱kaha, la ndáchro sin:

―Ti nkexro a la tꞌéye̱he̱ ti profeta Elías.

48 # Sal. 69:21. *Ndá ijnko ti sin tjejó ntiha la kuinká chꞌan sákjuikakja ijnko kachjo̱n la chrꞌankí chꞌan ti vinagre, la kjua̱kꞌe̱chóntehe chꞌan ijnko inta kjíjin ndá kjuínchechrìin chꞌan kixin chrókꞌui ti chꞌin Jesús.

49Ndá íso sin ndáchro sin:

―Ti̱to̱héra. Tsotsjeheni á itsi Elías sinchekaá ti jehe chꞌan ―ichro sin.

50Ndá chꞌin Jesús ínaá itsen kꞌuéya chꞌan, ndá ikꞌuén chꞌan. 51#Ex. 26:31-33.*Ndá tuénxín ti hora a la kꞌuichje ti ika tjenkákuèxín nkaxehen ni̱nko, kꞌóna yaá ndesi noi la ko hasta nonte. La kꞌuínki nonte la xitje̱he̱ itjo̱. 52La ko xitje̱he̱ ti tòye̱ tsíxravá chojni la xechón itsjé ti sin kꞌuékinkáchónki Díos. 53La kꞌuaxrjexín sin ti tsíxravá sin, la ti ó xechón chꞌin Jesús la kꞌuíxehen sin ti chjasin tjóá, Jerusalén la ntiha itsjé chojni xéta sin.

54Ndá ti capitán la ko ti sin kꞌuejó ntiha, tꞌayakohen chꞌin Jesús, ti ó kꞌuíkon sin kꞌuínki nonte la kaín ti nkehe kóhen la imá chrakon sin, la ndáchro sin:

―Chaxín ti nkexro í la Xje̱en Díos.

55 # Lc. 8:2, 3. *Kja̱xin ikjín kꞌuejó itsjé chojnichjin, tjejótsjehe sin. Jehe sin mé kꞌuéchréhe̱ sin chꞌin Jesús, kjui̱xi̱n sin ndesi Galilea kixin kꞌuekjínki̱tsa sin chꞌan. 56Ntiha kjuákꞌe kja̱xin ti tjan María Magdalena, ti tjan María, ìñé chꞌin Jacobo la ko José la ko ìñé ti xje̱en chꞌin Zebedeo.

Ti xravá Jesús

(Mr. 15:42-47; Lc. 23:50-56; Jn. 19:38-42)

57Ndá ti ó ndá kóntó mé ikui ijnko nkexro itꞌin José, ijnko nkexro chónta itsjé chichaon tsíkji̱xi̱n Arimatea. Jehe chꞌan kja̱xin kꞌuéchréhe̱ chꞌan ti chꞌin Jesús. 58Jehe chꞌan mé kjuitsjehe chꞌan ti chꞌin Pilato la kjuanchia chꞌan ti cuerpo kuènté chꞌin Jesús. Ndá chꞌin Pilato mé kjuajon kjuachaxin kixin tsꞌijin ti cuerpo. 59Ndá chꞌin José mé kuakjijin ti cuerpo la kjuínchekꞌísímá ijnko ika tjóá. 60La kjuakꞌe chꞌan ijnko tòye̱ ni̱xin kuènté chꞌan tsíkjichꞌéna chꞌan senó. Ndá kꞌuekjèxi̱n chꞌan ijnko ixro̱ ijié ndója ti itjo̱, ndá sákjuí chꞌan. 61Mé ntiha kja̱xin kꞌuejótja̱xi̱n ti tjan María Magdalena la ko ti íjnko tjan María chokꞌèxín itjen ti tòye̱.

Ti sin soldado kꞌuayakohen ti tòye̱ xravá Jesús

62Ndá ti ña̱o chrꞌéxi̱n ti ó kjuixin kjuasiyóxin sin nkehe kuènté ti ña̱o to̱kꞌéhe chojni, la ti sin ncha̱tꞌá tꞌe̱to̱an la ko ti sin fariseo mé kuitsjehe sin ti chꞌin Pilato 63#Mt. 16:21; 17:23; 20:19; Mr. 8:31; 9:31; 10:33, 34; Lc. 9:22; 18:31-33.*landá ndáchro sin:

―Xraxinkaoni kixin ti na̱xa̱ kjuákꞌechón ti nkexro chꞌia la ndáchro kixin níxin ña̱o la tsoxechón chꞌan, ichro chꞌan. 64Méxra̱ tétue̱hén ti sin soldado kixin tsꞌayakohen sin ti tòye̱ tsoxítjajia ti níxin ña̱o. Ti náhí, la sítie itsi ti sin kꞌuájiko chꞌan la tseé sin ti cuerpo kuènté chꞌan la chrꞌéxi̱n tsondáchro sin kixin ó tsíxechón ti nkexro a, tsixro sin sichꞌia sin. Ndá xi̱kaha a̱ntsí taó tso̱hen ke ti sa̱oxén.

65Ndá ti chꞌin Pilato, la ndáchro:

―Ntihi tjejó iso soldado. Sátjikoára sin tsꞌayakohen sin ti tòye̱ éxi tjinkáonra.

66Ndá sákjui̱ sin la kjuákꞌe sin ijnko sello chritaón ti ixro̱ tekjèxín ti tòye̱ la kuíto̱he sin ti sin soldado ntiha kixin tsꞌayakohen sin.

Currently Selected:

Mateo 27: poeNTplus

Highlight

Copy