San Lucas 13

Thi tsinthueꞌa thi jianꞌa ncheꞌe ndasitjaan

1Are mee nthi̱ꞌa̱ binthekunchieꞌen kanxion chujni ngain ko kuekiin na̱ Jesús ixin Pilato naguenxon kanxion xi Galilea ngain xrajeꞌo nchaꞌon are teduen xa kuxiigo banchendusen xa ngain Ndo Dio. Ko nthiꞌa binthji jnii xa thi binthji jnii kuxiigo. 2Ko Jesús ndachro ngain chujni kuekiin jiꞌi:

—¿Axraxaon ra ixin jiꞌi kuꞌen xii teꞌi ixin icha jianꞌa xa ke kain chujni ngain rajnee xa? 3Jaꞌan rindathjo ra ixin jeꞌa jamee. Ko ja̱ tsinthueꞌa ra thi jianꞌa tencheꞌe ra, kain ra ndasitjaan ra inchin jeꞌe na̱. 4¿O xraxaon ra ixin thi thejni chujni ndabeꞌen are betsingatja na̱ thi toree Siloé, a chujni mee icha jianꞌa na̱ ke kain chujni binthe Jerusalén? 5Jaꞌan rindathjo ra ixin jeꞌa jamee. Ko ja̱ tsinthueꞌa ra thi jianꞌa tencheꞌe ra, kai seꞌen ra inchin jeꞌe na̱.

Thi kuꞌen naa ntha higo bajonꞌa thuchjuin

6Ko Jesús kuekin ixin ntha higo ko ndachro:

—Naa xii bechunda xa naa ntha higo ngagee ntha uva ngain jngiꞌi xa ko kjui xa bitsjeꞌe xa aujichunda ntha thuchjuin, aro xruꞌin thuchjuin bithja xa ngagaꞌa ntha. 7Kuthimejan ndachro xa ngain thi xii jinda jngi mee: “Tsjeꞌe, jaꞌan unii nano thjiꞌi dikjee thuchjuin ngain nthaa jiꞌi, ko xruꞌin nchaꞌon dithja thuchjuin. Tunchrijin ntha: ¿unda xra seꞌe ntha ngataꞌa jngiꞌna ja̱ xruꞌin thuchjuin dajon ntha?” 8Aro thi xii jinda jngi mee ndachro: “Nchana, xra thinthuꞌe ntha nano jiꞌi, ko sinthandangia ntha jinche ko tsingungia ntha nchexee kuleko. 9Ko jamee usajon ntha thuchjuin, aro ja̱ naꞌi, kuthimejan dikunchrijin ntha.”

Jesús binchexrueꞌen naa thi nchrii ngain nchaꞌon nchejugaꞌa ni

10Naa nchaꞌon nchejugaꞌa ni, Jesús jitjaago ixin Ndo Dio ngain naa niꞌngo. 11Ko nthi̱ꞌa̱ beꞌe naa nchrii beniꞌi nchra thejni nano. Naa espíritu jianꞌa ndadinchechatho nchra, ko chroꞌa baxendua nchra. 12Ko are Jesús bikon nchrii jiꞌi, jeꞌe ndachro ngain nchra:

—Jaꞌa ukuxruaꞌan ixin thi chin barichunda.

13Ko jeꞌe kuentaꞌa raa ngataꞌa nchrii mee, ko tuin jeꞌe nchra xendua nchra ko kuexiꞌin nchra binchesayeꞌe nchra Ndo Dio. 14Aro xi thetuꞌan ngain niꞌngo guñao xa ixin Jesús binchexrueꞌen thi nchrii mee ngain thi nchaꞌon nchejugaꞌa ni. Mexinxin ndachro xa ngain kain chujni te nthi̱ꞌa̱:

—Jii inkjaon nchaꞌon thi jikininxin duan xra; ngain nchaꞌon mee siꞌi ra ixin tsuxruaꞌan ra ko jeꞌa ngain nchaꞌon nchejugaꞌa ni.

15Kuthimejan Jesús ndachro ngain xii mee:

—Jaꞌa ra xro kunxon jian ra, aro nduaꞌa, ¿atunxindangeꞌa ra kuxinthaꞌa ra o kuluchuꞌa ra ixin thjiꞌo ra ba digiꞌi ba jinda ngain nchaꞌon nchejugaꞌa ni? 16Ko nchrii jiꞌi xra chujnii Abraham, ko nchiijin dikia nchra thejni nano kunixin chin jiꞌi, ¿ko ajeꞌa jian ixin jaꞌan sinthaxruan nchra ixin thi chin yaa nchra ngain nchaꞌon nchejugaꞌa ni?

17Are Jesús ndachro jiꞌi, kainxin chujni ningakuꞌen anto kusuee na̱, ko icha chujni anto chee na̱ ixin bikon na̱ kain thi jian bincheꞌe Jesús.

Tseꞌe ka diꞌin mostaza

(Mt. 13:31-32; Mr. 4:30-32)

18Kuthimejan ndachro Jesús:

—¿Keꞌe sinthakaninxin thi thetuꞌan Ndo Dio? 19Mee inchin tseꞌe naa ka diꞌin mostaza thenga naa xii ngain jngiꞌi xa. Ko ka mee dangi ka inchin naa nthaa jié, ko kunthua nchechjian ba kakee ba ngagaꞌa nthaa mee.

Thi nchegeꞌen nchue niuthja

(Mt. 13:33)

20Kai ndachro Jesús:

—¿Keꞌe inaa sinthakaninxin thi thetuꞌan Ndo Dio? 21Mee inchin thi nchegeꞌen nchue niuthja ko naa naniita tse ko dakeꞌe nchion ngain nchue niuthja, ko deꞌen nguii ncho.

Nthadijexin nchia jno

(Mt. 7:13-14, 21-23)

22Are sakjan Jesús Jerusalén, jeꞌe binchekueꞌen chujni ixin Ndo Dio ngain rajna ko ngain rajnanchjan jeꞌe bagatho. 23Ko naa chujni banchiangi ngain Jesús ko ndachro:

—¿A tsjéꞌa chujni thi rukjan inaa chujni narua?

Ko Jesús ndachro:

24—Tsjeꞌe ra kexreen aro dixinxin ra ngain nthajno dijexin nchia. Jaꞌan rindathjo ra ixin tsjé chujni sinao na̱ sixinxin na̱ nthi̱ꞌa̱ aro chroꞌa sixiꞌin na̱. 25Ko are thi nchianduꞌa singathjen ko tsejee nchia, ko jaꞌa ra xro sithuꞌa ra nduja, singa ra ko rundachro ra: “Nchana, danthjena ni ra nchia.” Aro jeꞌe rundachro: “Jaꞌan chunxinꞌa ra ko nunaꞌa thinoo juixin ra.” 26Kuthimejan jaꞌa ra tsexiꞌin ra rundachro ra: “Jaꞌan ná juine ná ko biꞌi ná ngajin Suixin, ko Suixin thi banchekuanna ni ra ixin Ndo Dio ngaa nthiee rajnana ná.” 27Aro jeꞌe rundachro: “Jaꞌan undathjo ra ixin nunaꞌa thinoo juixin ra. Sathjixin ra nthiꞌi, xro ncheꞌe ra jianꞌa.” 28Nthi̱ꞌa̱ jaꞌa ra rutsjanga ra ko sinetaon neno ra are sikon ra ixin Abraham, Isaac, Jacob, kunixin kain ni bagayee juajnee Ndo Dio te ngajni, thi thetuꞌan Ndo Dio, ko Ndo Dio tsanchrjandaꞌa ra ixin sinthe ra nthi̱ꞌa̱. 29Ixin are mee tsixin chujni kain nunthe, tsixin na̱ no thi chrinxin nchaꞌon, no thi diataunxin nchaꞌon, ko no norte ko no sur ixin sinthe na̱ sine na̱, nthi̱ꞌa̱ thi thetuꞌan Ndo Dio. 30Are mee tsjé chujni rentheꞌa, tsurenthe na̱, ko kain chujni jai tunuꞌe ixin anto renthe, are mee tsurentheꞌa na̱.

Jesús tsjangaxin Jerusalén

(Mt. 23:37-39)

31Nchaꞌon maꞌo kunchieꞌen kanxion xi fariseo ko binthendachro xa ngain Jesús:

—Sathjixin nthiꞌi ixin Herodes rinao suen suixin.

32Aro Jesús ndachro ngain xa:

—Thji ra ko ndache ra xi ncheyaxon mee ixin jai ko ndue sengixin espíritu jianꞌa ngain chujni, ko sinthaxingamaa chujni niꞌi, ko rejngi utsjena xrana. 33Aro jaꞌan xra rugunda ruruaa nthiana jai, ndue ko rejngi, ixin chroꞌa senxin naa thi dayee juajnee Ndo Dio kjínxin Jerusalén.

34’¡Jaꞌa rajna Jerusalén, jaꞌa thi naduenxon kain ni dayee juajnee Ndo Dio ko taxin xro thi chujni thiaꞌo juajnee ndo, ni ruaꞌan ndo! ¡Jaꞌan anto tsjé nthiꞌa binaꞌo rugatse chujnia inchin kuchia datse ba xeꞌen ba ngangi neneꞌe ba, aro jaꞌa binaoꞌa! 35Tsjexin ra, rajnaa ra ndasithuꞌe rajna jeꞌo rajna, ko rundathjo ra ixin irukjanꞌa ra sikon ni ra, tsija nchaꞌon are jaꞌa ra rundachro ra: “Anto jian thi ruaꞌan Ndo Dio ko juaꞌo juachaxiin ndo.”

Currently Selected:

San Lucas 13: plsNT

Highlight

Copy