San Lucas 12

Jesús tjaago ixin thi kunxon ncheꞌe chujni aro nduaꞌa

1Are mee xrathe anto tsjé no̱ chujni, ko ixin anto tsjé na̱ anto kunxinka choo na̱ suji. Ko Jesús saꞌo ndachro ngain thi chujni bakao:

—Tsjeꞌe ra ixin ncheꞌa ra inchin ncheꞌe xi fariseo ixin kunxon jian xa aro jeꞌa ndua. 2Ixin xruꞌin thi jima ko rukununxinꞌa, ko xruꞌin thi dema ko rukununxinꞌa. 3Mexinxin, kain thi jaꞌa ra nichja ra are naxin xeꞌe, tsununxin are usingasaan, ko kain thi jaꞌa ra nichja ra jimao maski tajijee nchia, kai tsununxin nui ngataꞌa nchiandui ra.

Kensen jikininxin ruxraguen ni

(Mt. 10:28-31)

4’Jaꞌa ra xro jian dakjiꞌan, jaꞌan rindathjo ra ixin xraguenꞌa ra chujni naduenxon chujni ixin chujni mee chroꞌa sincheꞌe icha. 5Aro jaꞌan rundathjo ra kensen ruxraguꞌen ra: Xraguꞌen ra jeꞌo Ndo Dio ixin jeꞌo jeꞌe ndo thi nchao nasuenxon nthauꞌa ra ko ruruaꞌan ra ngain xruꞌi dangaꞌa. Jaan, xraguꞌen ra jeꞌo Ndo Dio.

6’¿Kejaꞌin renthe naꞌo kunthuachjan, a jeꞌa jeꞌo renthe yoo tuminchjan? Aro Ndo Dio xruꞌin kunthuachjan teꞌi tjañeꞌe ndo. 7Xrajeꞌo jiꞌi tuꞌen ngajin ra, Ndo Dio nuꞌe ndo kejaꞌin xrajaa ra chunda ra. Mexinxin xraonꞌa ra ixin jaꞌa ra icha renthe ra ke tsjé kunthuachjan.

Thi chujni nichja ixin chunthia ngain Jesús

(Mt. 10:32-33; 12:32; 10:19-20)

8’Jaꞌan rundathjo ra ixin kexeꞌo chujni rundachro nthiꞌi ngataꞌa nunthe ixin jaꞌan jian na, kai jaꞌan thi Xii juixin ngajni, rundachrjan ngathexin kon kain angeel Ndo Dio ixin jeꞌe chujnina. 9Aro chujni rundachro ngathexin kon icha chujni ixin jeꞌe chunxinꞌa na, kai jaꞌan rundachrjan ngathexin kon kain angeel Ndo Dio ixin chunxinꞌa jeꞌe.

10’Ko kexeꞌo chujni runichja jianꞌa ixin jaꞌan, thi Xii juixin ngajni, nchao sinthatjañaa, aro thi chujni runichja jianꞌa ixin Espíritu Santo xruꞌin nchaꞌon sitjañeꞌe na̱.

11’Are tsjiꞌo ra na̱ ngain niꞌngo o ngain xi ncheꞌe jie̱, o ngain icha xi thetuꞌan, taꞌa ra juachjaon ixin kexreen rundachro ra ngain xa, ko taꞌa ra juachjaon ixin kexreen runichja ra, 12ixin are sinkee nchaꞌon jaꞌa ra runichja ra, Espíritu Santo sinthaxraxaon ra keꞌe rundachro ra.

Thi kuꞌen thi xii anto bechunda ko baxraxraonꞌa thi bancheꞌe

13Naa thi beꞌe ngayee kain chujni ndachro ngain Jesús:

—Suixin ke tjaago, dindache xan chian ruchjana xan thi kuinthuꞌe na ná ndudana ná.

14Aro Jesús ndachro:

—¿Kensen bakeꞌe na jaꞌan ixin tsuncheyaꞌa ra thi jikininxin ra?

15Ko kai ndachro:

—Tsjeꞌe ra ixin sinthaxruxianꞌa ra ruchunda ra tsjé tumi, ixin chujni techon na̱, jeꞌa ixin thi tsjé techunda na̱.

16Kuthimejan Jesús kuekin naa thi kuꞌen:

—Beꞌe naa xii tsjé tumi bechunda, ko anto guan ngain jngiꞌi xa. 17Kuthimejan thi xii mee beꞌe xraxaon: “¿Kexreen sinthaꞌa jaꞌan? Chundaꞌa thinoo tsenchianxin kain nuana.” 18Jeꞌe xraxaon ko ndachro: “Ununa kexreen sinthaꞌa. Sinthaxanthe thi dechjian nuana ixin sinthachjian inaa thi icha jié, ko nthi̱ꞌa̱ tsenchjiꞌan kainxin nuana ko kain thi jaꞌan chunda. 19Kuthimejan rundathjan ansenna: Jaꞌa uchunda anto tsjé thi jichjian ixin sinthe anto tsjé nano. Jai nchejugaꞌa, jinthe, diꞌi ko chaꞌa.” 20Aro Ndo Dio ndachro ngain xii mee: “Jaꞌa thinxinꞌa. Ngain thie jiꞌi seꞌen jaꞌa, ko kain thi kuenchjiꞌan, ¿kensen sithuꞌe?” 21Jañaa tuꞌen thi chujni anto tsjé tumi chunda, aro jeꞌe xruꞌin chunda ngathexin kon Ndo Dio.

Taꞌa ra juachjaon kexreen sinthe ra

(Mt. 6:25-34)

22Kuthimejan ndachro Jesús ngain chujni bakao:

—Jaꞌan rundathjo ra taꞌa ra juachjaon ixin kexreen sinthe ra, ko keꞌe sinthe ra ko keꞌe luntho sinthengaꞌa ra. 23Thi techon ni yaa icha renthe ke thi jine ni, ko nthauꞌe ni icha renthe ke lunthue ni. 24Tsjeꞌe ra kunthaꞌa, ko mee xruꞌin thenga ba ko xruꞌin nua datsiin ba, ko chundaꞌa ba thi thenchjianxin ba, aro ixinꞌa mee, Ndo Dio chjee ba thi jine ba. ¡Ko ajeꞌa jaꞌa ra icha renthe ra ke kunthua! 25¿Axraxaon ra ixin anto ta ra juachjaon, unchao sangi ra icha ke thi jikininxin ra? 26Mexinxin ja̱ chroꞌa ncheꞌe ra thi tangiꞌa, ¿unda ta ra juachjaon ixin thi icha tangi?

27’Tsjeꞌe ra jian kexreen dangi kain tsjo ngataon jngi, kain tsjo mee ncheꞌa tsjo xra ko tajinꞌa tsjo chjon. Ko jaꞌan rundathjo ixin rey Salomón, ke jeꞌe anto chrjuin bagitsaa, aro xruꞌin nchaꞌon betsaa inchin naa tsjo jiꞌi. 28Ja̱ Ndo Dio jañaa nchetsaa kain ka, ke jeꞌo jai jii ngain jngi ko ndue undaruche ka ngain xruꞌi, ¡mee jaꞌa ra aruchjaꞌa ra ndo kain thi rugundaꞌa ra, maski jaꞌa ra xra jianꞌa chunthia ra ngain ndo! 29Mexinxin, taꞌa ra juachjaon ixin keꞌe sinthe ra ko keꞌe siꞌi ra. 30Ixin chujni ngain nunthe jiꞌi ta na̱ juachjaon ixin kain yaa, aro jaꞌa ra chunda ra naa Ndudaa ra nthi̱ꞌa̱ ngajni, ko jeꞌe ndo unuꞌe ndo ixin jaꞌa ra rugundaꞌa ra kain yaa. 31Aro kain nchaꞌon thjee ra thi thetuꞌan Ndo Dio, ko jamee sayéꞌe ra thi rugundaꞌa ra.

Thi renthe jii ngajni

(Mt. 6:19-21)

32’Xraonꞌa ra jaꞌa ra xro nchinnchinchjanꞌna, ixin maski tsjéꞌa ra, Ndudaa ra ndo thjen ngajni, ruchjaa ra ndo thi jeꞌe ndo thetuꞌan ndo. 33Nchekji ra kain thi chunda ra ko thjengijna ra chujni rugundeꞌe, ko jañaa tenchechjian ra thi dinga tumi ko xruꞌin nchaꞌon sichje, mee ruchro ixin ngajni uchunda ra thi icha renthe ko thi renthe mee xruꞌin nchaꞌon tsjexin, ixin nthi̱ꞌa̱ xi cheꞌe sijiꞌa xa ko kuchii sinchexantheꞌa. 34Ko xraxaon ra ixin thi jii tumia ra, kai nthi̱ꞌa̱ jii ansean ra.

Ni ncheꞌe xra

35’Dantsjeꞌa ra lunthue xra, ko nchegangaꞌa ra xruꞌi ndangasaꞌan ra. 36Ko ncheꞌe ra inchin ni ncheꞌe xra techuꞌen xi najnii, ixin rukjanxin xa ngain naa kiai thi kutheꞌe na̱. Ixin are siji xa ko singa xa jeꞌe na̱ santhjee na̱ nchia. 37Anto chrjuin ixin thi ni ncheꞌe xra sithja xi najnii ixin tajitsjeꞌe na̱. Ndua thi jaꞌan rindathjo ra ixin xi najni setjaxin xa lunthue xa ko rundachro xa ixin sinthe na̱ ngain nthanchaon ko jeꞌe xa tsekia xa thi sine na̱. 38Maski jeꞌe xi najni mee tsii xa ngusine thie o nduuyo, anto chrjuin ixin ni ncheꞌe xra teꞌi tatechuꞌen na̱ xi najnii na̱. 39Aro thinxin ra jiꞌi, ja̱ xi najnii naa nchia rukunuꞌe xa keꞌe hora rukii xi cheꞌe, xi najni mee ruchuꞌen xa ko rukajandaꞌa xa rukee xi cheꞌe. 40Kai jaꞌa ra tadinthetsjeꞌe ra, ixin jaꞌan, thi Xii juixin ngajni, siꞌi inaa are jaꞌa ra texraxaonꞌa ra ixin jaꞌan siꞌi.

Thi ncheꞌe xra dithikaonꞌa

(Mt. 24:45-51)

41Kuthimejan Pedro banchiangi ngain Jesús ko ndachro:

—¿A bindachro thi kuꞌen jiꞌi ixin jaꞌan ná, o ixin kain ni te nthiꞌi?

42Jesús ndachro:

—Naa thi ncheꞌe xra dithikaon jian ko thinxin jian, mee thi jikininxin tsintueꞌe xi najni kain ni ncheꞌe xra, ko kai ruchjee na̱ sine na̱ are jikininxin sine na̱. 43Anto chrjuin ixin thi ncheꞌe xra are tsii xi najnii, jeꞌe jincheꞌe inchin bituꞌen. 44Ndua thi rundathjo ra, xi najni mee rundachro xa ngain thi ncheꞌe xra, ixin jeꞌe senda kain thi jichunda xa. 45Aro ja̱ thi ncheꞌe xra mee seꞌe ruxraxaon ko rundachro: “Xi najnina dakaꞌa tsii xa.” Kuthimejan jeꞌe tsexiꞌin sintja kain xi ncheꞌe xree ko kain nchri ncheꞌe xree xi najnii, ko seꞌe sine ko siꞌi ko rukuan, 46kuthimejan xi najni tsii xa ngain naa nchaꞌon ko ngain naa hora ke jeꞌe nueꞌa, ko xi najni anto suji jie̱ sincheꞌe xa ngain thi ncheꞌe xra yaa, jañaa inchin jie̱ dayee thi chujni dithikaonꞌa.

47’Ko thi ncheꞌe xra nuꞌe keꞌe rinao xi najnii, aro rinaoꞌa ncheꞌe thi ubituꞌen, thi ncheꞌe xra mee anto suji sikaon. 48Aro thi ncheꞌe xra nueꞌa keꞌe rinao xi najnii, ko ncheꞌe chrujan jikininxin suꞌen jie̱, mee icha sujiꞌa sikaon. Ko thi chujni dayee icha tsjé, ruxranchieꞌe icha tsjé.

Chujni tuñauꞌe choo na̱ ixin Jesús

(Mt. 10:34-36)

49’Jaꞌan juiꞌi ixin sinthakaon xruꞌi ngataꞌa nunthe. ¡Ko jaꞌan rujinaꞌo ixin urugakaon xruꞌi mee! 50Rugunda anto tangi tsunna, ko mee inchin ja̱ rugithe na̱. Ko anto taa juachjaon sithjaja nchaꞌon tsuꞌen jiꞌi. 51¿A xraxaon ra ixin jaꞌan juiꞌi ixin chrjuin sakao choo chujni ngataꞌa nunthe jiꞌi? Aro jaꞌan rindathjo ra, naꞌi ixin chujni tsuñauꞌe choo na̱ ixin jaꞌan. 52Jai naꞌo chujni ngain naa nchia ruchjeeya na̱ ixin jaꞌan, nii na̱ sithikaon na na̱ jaꞌan, ko yoo na̱ sithikaonꞌa na na̱ o yoo na̱ sithikaon na na̱ jaꞌan, ko nii na̱ sithikaonꞌa na na̱. 53Ixin jaꞌan, naa ndudaꞌa runingakuꞌen ndo xeꞌen ndo, ko naa chjan runingakuꞌen xan ndudee xan. Naa janaꞌa runingakuꞌen jan nchrichjeꞌe jan, ko xan nchrii runingakuꞌen xan janee xan. Naa janchaꞌa runingakuꞌen jan nchri deindeꞌe jan, ko nchri deinda runingakuꞌen nchra janchee nchra.

Thi naꞌa dikunxin jituꞌen ngain nchaꞌon teꞌi

(Mt. 16:1-4; Mr. 8:11-13)

54Kai ndachro Jesús ngain chujni:

—Are jaꞌa ra dikon ra ixin thjui chrinxin thjui thi detaunxin nchaꞌon, jaꞌa ra ndachro ra ixin utsii chrin, ko jamee tuꞌen. 55Ko are tja chrintho no sur, jaꞌa ra ndachro ra ixin sania sua, ko ndua jamee tuꞌen. 56¡Jaꞌa ra ncheꞌa ra thi ndachro ra! Jaꞌa ra nuꞌa ra datsueꞌen ra keꞌe tsuꞌen ngajni ko ngataꞌa nunthe, ¿ko unda thinxinꞌa ra thi jituꞌen ngain nchaꞌon te ra jai?

Ncheꞌe ra ixin jian dakjioꞌo ra thi ningakuꞌan ra

(Mt. 5:25-26)

57’¿Unda tsjeꞌa ra a jian thi tencheꞌe ra? 58Ja̱ naa chujni sichro jie̱ ixin jaꞌa ko tsjiꞌo ngain xi ncheꞌe jie̱, icha jian ngatjao nthiꞌá tjao choo ra ixin kexreen tsuꞌen ixin itsjioꞌa ngain xi ncheꞌe jie̱. Ja̱ naꞌi, xi ncheꞌe jie̱ rundache xi tenda nduꞌa xiiso ko tsiaxiꞌan xa. 59Ko jaꞌan rindathjo ixin chroꞌa sachrjexin nthi̱ꞌa̱ tsjengaja ꞌna kainxin tumi rika, kuthimejan sachrje.

Currently Selected:

San Lucas 12: plsNT

Highlight

Copy