San Juan 18

Tse na̱ Jesús

(Mt. 26:47-56; Mr. 14:43-50; Lc. 22:47-53)

1Ko are Jesús juexin nichjee Ndo Dio, jeꞌe ko chujni bakao bathujin na̱ jinda jithinga diꞌin Cedrón, ko tuenxin jinda jiꞌi, jii naa jngi diginga ntha thuchjuin ko nthi̱ꞌa̱ bigaꞌa Jesús ko chujni bakao. 2Ko Judas, thi bindachro ixin rutse na̱ Jesús, jeꞌe kai bechunxin jngi mee ixin tsjé nthiꞌa Jesús bikao na̱ nthi̱ꞌa̱. 3Mexinxin Judas bijikao anto tsjé xi soldado, ko kanxion xi bagenda niꞌngo, xi ruaꞌan xi daana icha renthe ko xi fariseo, ko bijikao xa ngain jngi mee candil, kanxion nthaa dichjee xa xruꞌi ko thi rukjayaxin xa. 4Aro Jesús ubenuꞌe kain thi jeꞌe rukuꞌen, mexinxin bachrjegexin ni bakao ko bigetan xii binthekii ngatja nthiꞌá ko ndachro ngain xa:

—¿Kensen tethjee ra?

5Ko jeꞌe xa ndachro xa:

—Tethjee ná Jesús thi juixin Nazaret.

Ko Jesús ndachro:

—Jaꞌan thi diꞌin na Jesús.

Ko Judas, thi bindachro ixin rutse na̱ Jesús, xrabeꞌe nthi̱ꞌa̱ kai.

6Ko are Jesús ndachro: “Jaꞌan thi diꞌin na Jesús”, jeꞌe na̱ ngaxinto na̱ ko binthji na̱ ngataꞌa nunthe. 7Mexinxin Jesús kjan banchiangi inaa:

—¿Kensen tethjee ra?

Ko jeꞌe xa ndachro xa:

—Jesús thi juixin Nazaret.

8Ko Jesús ndachro inaa ngain xa:

—Undathjo ra ixin jaꞌan thi diꞌin na Jesús. Ko ja̱ tethjee ni ra jaꞌan, tanchrjanda ra chujni teꞌi satsji na̱.

9Ko jaꞌin bikuenxin thi jeꞌe ndachro: “Suixin Ndudana, thi chujni Suixin bechjana, xruꞌin ni binthatjaan.” 10Kuthimejan Simón Pedro bantsje naa chia taade ko kunchrijiꞌin ndatsjon rajianxiin naa thi xii biꞌin Malco, ko xii mee naa xi ncheꞌe xree xi daana icha renthe. 11Aro Jesús ndachro ngain Pedro:

—Thenchjiꞌan chia taade. Ja̱ Ndudana jitanchrjanda na satho thi anto tangi tsunna jiꞌi, ¿asathoꞌa thi anto tangi tsunna jiꞌi?

Jesús ngathexin kon Anás

(Mt. 26:57-58; Mr. 14:53-54; Lc. 22:54)

12Kuthimejan kain xi soldado, ko xi thetuꞌen xa ko xi baginthenda niꞌngo tse na̱ Jesús ko kuia na̱. 13Ko saꞌo sabikao na̱ Jesús ngain nchianduꞌa Anás, thi kai ndo nchee Caifás, ko Caifás kjui thi daana icha renthe ngain nano mee. 14Ko Caifás jiꞌi thi ndachro ngain chujni judío ixin icha jian nakua xii seꞌen ixin kainxin chujni judío.

Pedro ndachro ixin jeꞌe chunxinꞌa Jesús

(Mt. 26:69-70; Mr. 14:66-68; Lc. 22:55-57)

15Simón Pedro ko inaa chujni bakji ngain na̱ teruee na̱ Jesús. Ko thi daana icha renthe bechunxin thi inaa chujni bikao Simón Pedro, mexinxin kuajanda bixiꞌin ngain patiue Anás. 16Ko Pedro ndabithuꞌe ndujaxin. Aro bachrje thi bikao Simón Pedro ixin nichjee nchri jinda thi dixinxin na̱ patio ixin kuajanda nchra bixiꞌin Pedro. 17Kuthimejan thi nchrii mee banchiangiꞌi nchra Pedro, ko ndachro nchra:

—¿Ajeꞌa jaꞌa kai naa chujni xrakao xii jiꞌa?

Pedro ndachro:

—Naꞌi, jeꞌa jaꞌan.

18Ko are mee anto kin, mexinxin kanxion xi ncheꞌe xree Anás ko xi bagenda niꞌngo dikjaaga xa xruꞌi, ko nthi̱ꞌa̱ tatengathjen xa texixruꞌe xa, ko Pedro kai jixixruꞌe ngayee xa chrika xruꞌi mee.

Anás binchekendueꞌe ñao Jesús

(Mt. 26:59-66; Mr. 14:55-64; Lc. 22:66-71)

19Ko Anás, xi daana icha renthe kuexiꞌin banchiangiꞌi xa Jesús ixin kekaa chujni bakao ko keꞌe banchekueꞌen chujnii. 20Jesús ndachro:

—Jaꞌan nichja ngathexin kon kainxin chujni. Kainxin nchaꞌon binthakuaan chujni ngain niꞌngo ko ngain niꞌngo icha renthe thi xrathe kainxin chujni judío. Ko jaꞌan jeꞌa jimao nichja. 21¿Unda danchiangina jaꞌan? Danchiangiꞌi chujni kuiꞌin thi jaꞌan ndachrjan ko jeꞌe na̱ rundathjo na̱ keꞌe ndathjan na̱, ixin jeꞌe na̱ nuꞌe na̱ thi jaꞌan ndachrjan.

22Are Jesús ndachro jiꞌi, naa xi denda niꞌngo xrangii xa naa thon ruꞌa Jesús ko ndachro xa:

—¿Unda jañaa datheꞌe xi daana icha renthe?

23Ko Jesús ndachro ngain xa:

—Ja̱ chrujan thi jianꞌa ndachrjan, ndachjejin na thi jianꞌa mee, aro ja̱ ndachrjan jian, ¿unda dintja na?

24Kuthimejan Anás ruaꞌan Jesús ngain Caifás, thi daana icha renthe, ko Jesús xra bechria.

Pedro ndachro inaa ixin chunxinꞌa Jesús

(Mt. 26:71-75; Mr. 14:66-72; Lc. 22:58-62)

25Ko Pedro xra tajingathjen ixin jixixruꞌe are banchiangiꞌi na̱ inaa:

—¿Ajeꞌa jaꞌa naa thi chujni bakao xii jiꞌa?

Ko Pedro ndachro:

—Naꞌi, jeꞌa jaꞌan.

26Kuthimejan naa thi ncheꞌe xree Anás, naa thi xra ichoo thi chrijin ndatsjuen, ndachro ngain Pedro:

—¿Nchingo jaꞌa kai bikon ngain xii yaa, nthi̱ꞌa̱ ngagaꞌa ntha thuchjuin?

27Pedro ndachro inaa ixin naꞌi, ko are juexin nichja tsje kunthaxichia.

Jesús ngathexin kon Pilato

(Mt. 27:1-2, 11-14; Mr. 15:1-5; Lc. 23:1-5)

28Kuthimejan ngain nchianduꞌa Caifás bantsjexin na̱ Jesús ixin bikao na̱ ngain nchia nchexin jie̱ xi gobernador. Ko ukuexiꞌin bingasaan ko chujni judío bixinꞌa na̱ ngain nchia duanxin jie̱, ixin ja̱ rugixiꞌin na̱ urukunuꞌe na̱ ixin ithjuaꞌa na̱ ko ichroꞌa rujine na̱ ngain kiai pascua. 29Mexinxin Pilato bachrje ko biganchiangiꞌi na̱:

—¿Keꞌe jianꞌa tjangixin ra xii jiꞌi?

30Jeꞌe na̱ ndachro na̱:

—Ja̱ xii jiꞌi rukjiꞌa naa chujni ncheꞌe jianꞌa, jaꞌan ná rujikianꞌa ná xa ngajin.

31Aro Pilato ndachro ngain na̱:

—Sathjiꞌo ra xa, ko jaꞌa ra ncheꞌe ra jie̱ inchin thetuꞌan ley chunda ra.

Chujni judío ndachro na̱:

—Aro jaꞌan ná chujni judío ná ko xruꞌin juachaxin chunda ná ixin nasuenxon ná chujni.

32Ko jañaa bikuꞌen thi ndachro Jesús, ixin kexreen rugeꞌen. 33Pilato kjan bixiꞌin ngain thi nchexin jie̱ ko baye̱e Jesús ko banchiangiꞌi:

—¿Ajaꞌa thi Rey thetuꞌen chujni judío?

34Jesús ndachro:

—¿Ajaꞌo xraxaon thi danchiangina jiꞌi, o chrujan chujni ndathjo ixin jaꞌan thi rey na?

35Pilato ndachro:

—¿Atuenao ixin jaꞌan judío na? Chujnia ko xi daana thetuꞌan ngain icha xi daana, ni mee ni bikoo nthiꞌi. ¿Mee keꞌe bincheꞌe?

36Ko Jesús ndachro:

—Thi jaꞌan thetuꞌan jeꞌa nthiꞌi ngataꞌa nunthe. Ja̱ rukethuꞌan nthiꞌi, chujni ruena rukjengijna na ko rukajandaꞌa na̱ ixin rutsena chujni judío. Aro thi jaꞌan thetuꞌan jeꞌa ngataꞌa nunthe jiꞌi.

37Ko Pilato ndachro:

—¿A jaꞌa thi rey remee?

Jesús ndachro:

—Jaan, jaꞌan rey na inchin jaꞌa ndachro. Jaꞌan mee kunkjinanxin ko juiꞌi ngataꞌa nunthe jiꞌi ixin banichja thi ndua. Kain chujni dithikaon thi ndua, jeꞌe na̱ thiꞌin na̱ thana.

38Pilato ndachro ngain Jesús:

—¿Kexeꞌe thi ndua mee?

Pilato kuanchrjanda buen na̱ Jesús

(Mt. 27:15-31; Mr. 15:6-20; Lc. 23:13-25)

Ko are juexin ndachro jiꞌi, bachrje inaa ixin bindache chujni judío:

—Jaꞌan xruꞌin thi jianꞌa dithja ngain xii jiꞌi. 39Aro jaꞌa ra ngain kiai pascua kukuaꞌan ra thetunna ra ixin tsanchrjanda kexeꞌo thi teaxiꞌin ngain nduꞌa xiiso. ¿Arinao ra tsanchrjanda thi Rey thetuꞌen chujni judío?

40Kuthimejan kainxin na̱ kjan kuyao na̱ ko ndachro na̱:

—¡Xii yaa naꞌi! ¡Icha jian tanchrjanda Barrabás!

Ko Barrabás kjui naa thi cheꞌe.

Currently Selected:

San Juan 18: plsNT

Highlight

Copy