San Lucas 22
22
On hebreos* tlayekankej san se ueyi onotlatolmakakej para kimiktiskej Jesús
(Mt. 26.1-5,14-16; Mr. 14.1-2,10-11; Jn. 11.45-53)
1Ye nisiu katka para nochiuas on iluitl ijkuak kikuaj on pan yejuan xkipiya tlaxokolilistli*. On iluitl itoka Pascua*. 2Niman intlayekankauan on tiopixkej niman on temachtijkej ikan tlanauatijli kitejtemouiliayaj kenijki kimiktiskej Jesús, san ichtaka*, pampa kinmakajsiyaj on tlakamej.
3Kemaj Satanás ijtik okalak Judas. Judas no itoka Iscariote, niman yejua inuan on majtlaktli uan ome nomachtijkej* tlapouajli katka. 4Yejua oyaj okintato on intlayekankauan on tiopixkej niman on yejuan tlayekankej ipan on ueyitiopan para okintlajtlajtouilito kenijki uelis kinmaktilis Jesús. 5Yejuamej okuelitakej, niman onotlajtolmakakej para Judas kimakaskej tomin. 6Judas teuan onokalaktij, niman opeu kitejtemoua kamanon kuajli para kitemaktilis Jesús ijkuak on tlakamej xnemiskej iuan.
Jesús otlakuaj inuan inomachtijkauan* ipan on iluitl itoka Pascua*
(Mt. 26.17-29; Mr. 14.12-25; Jn. 13.21-30; 1 Co. 11.23-26)
7Oyejkok on tonajli para on iluitl yejuan nochiua ijkuak kikuaj on pan yejuan xkipiya tlaxokolilistli*. Niman ipan on tonajli ika onkaj kiuentlaliaj on borreguito para kikuaj ipan on iluitl Pascua*. 8Niman Jesús okititlan Pedro niman Juan, niman okinnauatij:
—Xuiyan, xchijchiuatij on tlakuajli para tikuaskej ipan in iluitl Pascua*.
9Yejuamej okijlijkej:
—¿Kanon tikneki ma tikchijchiuatij?
10Jesús okinmijlij:
—Ijkuak nemejuamej nenkalakiskej ipan on ueyikalpan, nenkinamikiskej sen tlakatl yejuan kikti sen tsotsokojli ikan atl. Xkuitlapanuikan, hasta ne kampa onkalakis, 11niman iteko on kajli ijkin xkijlikan: “On toTemachtijkau ijkin mitstlajtoltia: ¿Kanon onkaj on kalijtik kampa nikonkuas on tiotlak tlakuajli ipan in iluitl Pascua* inuan on nonomachtijkauan?” 12Niman yejua mechititis sen ueyi kalijtik ne tlapani kampa ye kuajli tlaojonkaj. Ompa xchijchiuakan on tlakuajli.
13Yejuamej tej, oyajkej niman ijki okinextijkej ken Jesús okinmijlij. Ompa okichijchijkej on tlakuajli para otlakuajkej ipan on iluitl Pascua*.
14Niman ijkuak oajsik on hora para tlakuaskej, Jesús onoseuij itech on mesa inuan inomachtijkauan*. 15Kemaj Jesús okinmijlij:
—¡Sanoyej niknekiya nemouan nitlakuas ipan in iluitl pascua, chika xe nitlajyouiya! 16Pampa aman nemechijlia ika xok oksejpa nemouan nikuas hasta on tonajli ijkuak nocumpliros on tlen in tlakuajli kijtosneki ne kampa Dios tlamandaroua.
17Kemaj okontilan sen copa yejuan kipiya vino, niman ijkuak yokimakak tlaxtlauijli Dios, ijkin okijtoj:
—Xkonikan in vino niman xmopanoltilijtiakan. 18Nejua tej, nemechijlia ika xok nemouan nikonis iyayo in uvas hasta ijkuak Dios peuas tlamandaros.
19Kemaj okontilan on pan, niman ijkuak yokimakak tlaxtlauijli Dios, okitlatlapan niman okinmakak. Kemaj ijkin okinmijlij:
—Yejua in pan kijtosneki ken yejua notlalnakayo yejuan nouentlalis nemopampa. Xkuakan in para ika xnechelnamikikan.
20Ijkuak yotlakuajkej, no ijki okinmakak on copa niman okijtoj:
—In tlen aman nenkoniskej ika in copa kijtosneki on yenkuik pacto* yejuan peua ikan noyesyo, niman san nemopampa toyauis.
21’Xkitakan, aman on tlakatl yejuan nechtemaktilis, nouan nemi ipan in mesa. 22Ijkon tej, nejua yejuan oninochiu Tlakatl nimikis ken Dios otlanauatij, pero ¡lástima para on tlakatl yejuan nechtemaktilis!
23Kemaj yejuamej opejkej kinotlajtoltiaj akinon on yejuan kitemaktilis.
Inomachtijkauan Jesús onotenkuikuikej de on akinon más ueyixtias
(Mt. 20.25-28; Mr. 10.42-45)
24Kemaj yejuamej opeu notenkuikuij de on akinon más ueyixtias. 25Pero Jesús okinmijlij:
—On reyes yejuan xhebreos* nochiuaj ken inteko on países niman chikauak kinmandarouaj on tlakamej. Niman on tlayekankej sano yejuamej noteneuaj ken kuajkualtin tlakamej. 26Pero nemejuamej xmechtocaroua ijkon nemouikaskej. Yej okseneka xmouikakan. Yejuan nemotsajlan más ueyixtikaj noneki nouikas ken xueyixtikaj, niman yejuan tlamandaroua noneki nouikas ken on yejuan tepaleuijketl. 27¿Akinon tej, más ueyixtikaj, on tlayekanketl yejuan tlakua ipan mesa, noso on tetlamakaketl? Nikijtoua ika on tlayekanketl yejuan tlakua. Pero nejua, maski ninemotlayekankau, ninemi nemotsajlan ken se yejuan tetlamaka.
28’Nemejuamej nochipa nouan yonentlajyouijtinenkej. 29Yejua ika tej, nejua nemechmaka sen tekiuajyotl ken noTajtsin onechmakak. 30Nenmatliskej niman nentlakuaskej ipan nomesa. Niman nemotlaliskej ipan on uejueyixtokej sietas para nenkinyolkuitiskej niman nenkintlajtlakolmakaskej on majtlaktli uan ome tribus* de Israel.
Jesús okijlij Pedro ika kinenekis yexpa
(Mt. 26.31-35; Mr. 14.27-31; Jn. 13.36-38)
31ToTEKO no okijlij Pedro:
—Simón, Simón, xkaki. Satanás nemoka yotlajtlan para mechtsejtselos ken itlaj trigo kitsejtselouaj, 32pero nejua moka yonitlajtlan itech Dios para maka tikpolos motlaneltok. Niman ijkuak oksejpa yotiuajlaj notech, xkimpaleui mokniuan para ma melajkanemikan.
33Simón okijlij:
—NoTEKO, nejua ninemi listo para mouan nechtsakuaskej niman hasta para mouan nimikis.
34Niman Jesús okijlij:
—Pedro, nejua nimitsijlia ika sano aman ijkuak xe tsajtsi on kaxtil*, tejua tinechnenekis yexpa ika xtinechixmati.
Ye uajlau on tetlatlatalistli
35Kemaj Jesús okinmijlij:
—Ijkuak onemechtitlan niman onemechijlij maka xkitkikan itlaj bolsa, nion tomin, nion kaktin, ¿itlaj omechpoloj?
Yejuamej okijtojkej:
—Ka, xitlaj otechpoloj.
36Kemaj Jesús okinmijlij:
—Pero aman tla tikpiya mobolsa niman motomin, xkikti, niman tla xtikpiya moespada xnamaka motlaken para xkoua moespada. 37Pampa nejua nemechijlia ika on tlen noka tlajkuilolnestikaj ipan on Yektlajkuilojli ika onkaj nochiuas. On Yektlajkuilojli ijkin kijtoua: “Inuan xkuajkualtin tlakamej okipojkej.” Nochi tej, tlen noka tlajkuilolnestikaj nocumpliros.
38Kemaj, yejuamej okijtojkej:
—Xkita toTEKO, nikan onkaj ome espadas.
Yejua okinmijlij:
—¡Ah, xnenkajsikamatij tlinon nikijtosneki! Maski ma ijki.
Jesús okichiu oración ne Getsemaní
(Mt. 26.36-46; Mr. 14.32-42)
39Kemaj Jesús okis, niman oyaj ipan on tepetl itoka Olivos inuan on inomachtijkauan* ken miyekpa okichiu. 40Ijkuak oajsik, okinmijlij on inomachtijkauan*:
—Xchiuakan oración para maka mechtlajkalis Satanás ipan tlajtlakojli.
41Kemaj Jesús okintlalkauij uejka ken se ika mauejka ijkuak tlamotla ikan tetl, niman onotlakuantelkets niman onoueyikatsajtsilij*. 42Niman okijtoj:
—NoTajtsin, tla tikneki, xnechmanaui para maka nikijyouis in tlen sanoyej* teajman. Pero maka nochiuas ken nejua nikneki, yej ma nochiua ken tejua tikneki.
43Kemaj sen ángel yejuan oualeu iluikak, okinotitij niman okimakak yolchikaualistli. 44Niman pampa yejua sanoyej noyolkokojtikatka, más sanoyej chikauak noueyikatsajtsiliaya. Yejua noueyikatsajtsiliaya hasta nitoniaya, niman itonil katka ken yestli yejuan chipiniya ipan tlajli.
45Ijkuak otlan noueyikatsajtsilia, ouajnotelkets, niman oyaj intech inomachtijkauan*. Ijkuak intech oajsik, okintak kochtokej, pampa sanoyej yoajmankasiaukaj. 46Kemaj okimijlij:
—¿Tline* nenkochtokej? Xmokuiteuakan, niman xchiuakan oración para xmechtlanis on tetlatlatalistli.
Jesús okajsikej
(Mt. 26.47-56; Mr. 14.43-50; Jn. 18.2-11)
47Jesús sanken* tlajtojtikatka, ijkuak miyek tlakatl itech oajsik. Niman Judas yejuan inuan on nomachtijkej* tlapouajli katka, uajlaya tlayakapan, niman okinisiuij Jesús para okitenkuaj*. 48Niman Jesús okijlij:
—Judas, ¿ijkon tinechtenkua* para tinechtemaktilia nejua yejuan oninochiu Tlakatl?
49Ijkuak inomachtijkauan* Jesús yejuan ompa iuan nemiyaj okitakej tlen ye nochijtikaj, okijlijkej:
—ToTEKO, ¿ma titeixnamikikan ikan espada?
50Niman semej yejuamej okinakastsontek sen tlakatl itlakeual on más ueyi intlayekankau on tiopixkej. Okitekilij iyekmanakas. 51Pero Jesús okijtoj:
—Xmoteltikan. Ma ijki.
Kemaj Jesús okimatokilij inakas on tlakeuajli niman okipajtij. 52Kemaj ijkin okinmijlij intlayekankauan on tiopixkej, niman on tlayekankej ipan on ueyitiopan niman on ueuetkej tlayekankej yejuan oualajkej okanakoj:
—¿Onennechajsikoj ikan espadas niman kojtin* ken yakaj nitlachteketl yeskia? 53Mojmostla nemouan ninemiya ne ipan iueyitiopan Dios, niman xonennechajsikej, pero ipan in hora Dios mechkauilia nenkichiuaj on tlen nenkinekij. Aman ipoder Satanás tetlani.
Pedro okinenek* Jesús
(Mt. 26.57-58,69-75; Mr. 14.53-54,66-72; Jn. 18.12-18,25-27)
54Kemaj okajsikej Jesús, niman okuikakej ichan on más ueyi intlayekankau on tiopixkej. Niman Pedro san uejka kuitlapanuijtiaya. 55Ompa itlajkotian on kiauak otlatlatijkej, niman iyeualkan on tlitl onotlajtlalijkej, niman Pedro no ompa intsajlan onotlalij. 56Kemaj ijkuak sen siuatekichiuilijketl okitak Pedro yeuatikaj itech on tlitl, okixkechij niman okijtoj:
—In tlakatl no ompa iuan nemiya.
57Pero Pedro okinenek* niman okijtoj:
—Siuatl, nejua xnikixmati.
58Achijtsin más sakin*, kej okse okitak Pedro niman okijlij:
—Tejua no inuan tikistinemiya.
Pero Pedro okijtoj:
—Ka tlakatl, xnejua.
59Kanaj ipan se hora sakin*, kej okse okichikajkaijtoj:
—In tlakatl melauak iuan kistinemiya, pampa yejua no ualeua Galilea.
60Kemaj Pedro okijtoj:
—Tlakatl, xnikmati tlinonon tikijtojtikaj.
Kemaj nimantsin ijkuak Pedro sanken* tlajtojtikatka, otsajtsik on kaxtil*. 61Kemaj toTEKO onomalakachoj niman okontak Pedro. Ijkuakon Pedro okelnamik on tlen yejua yokijlijka: “Sano aman ijkuak xe tsajtsi on kaxtil* tejua tikijtos yexpa ika xtinechixmati.” 62Kemaj Pedro okis ompa niman sanoyej oajmankachokak.
On policías ika ouetskakej niman okuijuitekej Jesús
(Mt. 26.67-68; Mr. 14.65)
63On tlakamej yejuan cuidarouayaj Jesús ika ouetskakej niman okuijuitekej. 64Okixtlapachojkej niman okixayakauijuitekej, niman ijkin okijlijkej:
—Xtlajto tiotlajtojketl. Xtechijli akinon omitsmailij.
65Niman miyek okseki tlamach kijliayaj para kuijuikaltiayaj.
Jesús okuikakej imixpan on más uejueyi tekiuajkej ipan on Sanedrín*
(Mt. 26.59-66; Mr. 14.55-64; Jn. 18.19-24)
66Ijkuak ouajtlanes, on ueuetkej tlayekankej hebreos*, niman intlayekankauan on tiopixkej niman on temachtijkej ikan tlanauatijli onosentlalijkej niman okuikakej Jesús imixpan on más uejueyi tekiuajkej ipan on Sanedrín*. Ompa ijkin okitlajtoltijkej Jesús:
67—Xtechijli tla tejua tiCristo.
Yejua okinmijlij:
—Tla nemechijlis ika nejua niCristo, xnennechneltokaskej. 68Niman tla itlaj nemechtlajtoltis, xnennechnankiliskej nion xnennechmakauaskej. 69Pero desde aman nejua yejuan oninochiu Tlakatl ninotlalis iyekmakopa on Dios yejuan nochi ueli kichiua.
70Kemaj nochimej okijlijkej:
—¿Tla ijkon, tejua titeKoneu itech Dios?
Jesús okinmijlij:
—Kemaj. Ijki ken nemejuamej nenkijtouaj.
71Kemaj yejuamej okijtojkej:
—Xpoliuij más tlateixpanuijkej. Aman sano tejuamej yotikakej tlen kijtoua.
Currently Selected:
San Lucas 22: nguNT
Highlight
Share
Copy
Want to have your highlights saved across all your devices? Sign up or sign in
© 1987, 2012 Wycliffe Bible Translators, Inc. All rights reserved.
