Joannostir 18
18
Džeļ, 18.
1Dava pheni, Iisusos vigija Peskīre sikļaibnangīrensa pekorīg reka Kedron, kai isis bār, an saji zagija Kokoro te sikļaibnangīre Leskīre.
2Džindža nin da stetos Ijuda, Lesko nodibnaskīro; vašo dova so Iisusos sajek doi zakedelaspes Peskīre sikļaibnangīrensa.
3Te jake Ijuda, lel džeļ voiskakīre muršen te slugen rašangīre bāredīrendir te farisejen, te javel doi jāgengīrensa te švatlo momoļensa te voiskakīre kotirensa.
4Iisusos, sāro džinidoi so lensa jāla, vigija, te phendža lenge: kones tume rodena?
5Leske otphendle: Iisusos Nazaraņinos. Iisusos rakirla lenge: dava Me. Te lensa tardija nin Ijuda, bikibnaskīro Les.
6Te kedi phendža lenge: dava Me, jone otļipindle pāle te pēne pe phu.
7Noko phuča len: kones tume rodena? Jone phendle: Iisusos Nazaraņinos.
8Iisusos otphendža: Me phendžom tumenge, so dava Me; te jake, keļi Man rodena, otmukhen len, medžan, —
9Mejālpes lav, rakirdo lenge dolendir, sajen Tu Mange dijan, Me nikones nazgiņakirdžom.
10Simanoske Petriske, isis kurtala, te tirdija avri la, te mardža rašenge bāredīreske bučkirdes, te otčingirdža leske lačo kan. Lav bučkirdeskīro isis Malah.
11Ne Iisusos phendža Petriske: čhu kurtala pāle; hobi Mange napjav kupka, saji dija Mange Dād?
12Togi voiskakīre murša te deše šelengo bāredīr te Judengīre slugi līne Iisusos, te phandle Les.
13Te lidžīne Les vāgo ko Annos; hai jov isis romņako dād Kaiafoske, sav isis an do berš rašango bāredīr.
14Dava isis Kaiafos, sav dija godi Judenge, so fedīr jeke mānušeske mērel vaše mānušenge.
15Pale Iisuske gīne Simonos Petris te vār sikļaibnangīro; da sikļaibnangīro isis pinčkirdo rašange bāredīreske, te zagija Iisusosa ano rašango bāredīresko khēr.
16Ne Petris tardija avri palo udār. Togi do vār sikļaibnangīro, savo isis pinčkirdo rašange bāredīreske, vigija, te phendža do udārenge rakhibnaskīrjake, te zajandža Petris.
17Te doi bučkīrdi udārenge rakhibnaskīri rakirla. Petriske: te tu feņu na da manušeskīre sikļaibnagīrendir? Jov phendža: na.
18Te bučkirde te do slugi, zakērde jāg, vašo dova so isis šil, tardīne te tačkirdepen. Petris nin tardija lensa te tačkirdžapes.
19Rašango bāredīr phuča Iisusstir vaš Leskīre sikļaibnangīrenge te vaš Lesko sikļaiben.
20Iisusos otphendža leske: Me rakirdžom svetoske čistes; Me sajek sikļakirdžom ano sinagogi te ane Davlesko tremos, kai sajek Judi zadžanapen, te čhorahanes narakirdžom niso.
21So tu Mandir phučesa? phuč šunibnagīredir, so Me rakiržom lenge; dik, jone džinen, so Me rakirdžom.
22Kedi Jov phendža dava, jek slugendir, paše tardindoi, mardža Iisusos pire ščoka, phenidoi: jake Tu otphenesa rašange bāredīreske?
23Iisusos otphendža leske: keļi Me phendžom hindes, posiskav, so hindo; ne keļi mišto, so tu māresa Man?
24Anna bičadža Les phandles ko rašango bāredīr Kaiafos.
25Simionos Petris tardija te tatija. Doi phendle leske: naisan Leskīre sikļaibnangīrendir nin Tu? Jov otpendžapes te phendza: na.
26Jek rašange bāredīreskīre bučkirdendir, semenca doleske, sajeske Petris otčingirdža kan, rakirla: hobi me tut nadikšom Lesa ane bār?
27Petris noko otpendžapes; te zārās zagabadža bašno.
28Kaiafostir lidžīne Iisusos ane pretorija, Isis tašarla; te jone nazagīne ane pretorija, sobi jān ražume, te vaštuven han Patradžinakīre jerhos.
29Pilatos vigija ke jone te phendža: pe so tume dena da mānušeskīri bang?
30Jone phendle leske otpeniben: keļi Jov najavdžasis hindo kēribnaskīro, me nanodijamas Les tuke.
31Pilatos phendža lenge: len Les tume, te pe tumāro dopheniben sendinen Les. Judi phendle leske: menge nāni otmukhlo pšedas pe šmerč nikones, —
32Mejal Iisuskīro lav pšečkirdo, savo Jov phendža, dijindoi mehaļon, saje šmerčasa Jov merla.
33Togi Pilatos noko zagija ane pretorija, te kherdža Iisusos, te phendža Leske: Tu Judengīro Kraļis?
34Iisusos otphendža Leske: tu tutir dava rakiresa, vai vār tuke phendle Mandir?
35Pilatos otphendža: hobi me isom Judos? Tīre mānuša te rašange bāredīra pšedīne Tut mange; so Tu kērdžan?
36Iisusos otphendža: Mīro kraļuma nāni da svetostir; keļi da svetostir jāl Mīro kraļuma, togi slugi Mīre zatardīnesis vaš Mange, sobi Me najavav pšedīno Judenge; ne kana kraļuma Mīro nāni dārig.
37Pilatos phendža Leske: tejake Tu kraļis? Iisusos otphendža: tu rakiresa, so Me kraļis. Me pe dova ločijom te pe dova jāvdžom ano svetos, sobi švatkinav vašo čačipen; svako, kon isi lašņumastir, šunela glos Mīri.
38Pilatos phendža Leske: so isi lašņuma? kedi phendža dava, noko vigija ko Judi te phendža lenge: Me nisai bang na lačava an Leske.
39Tumenge isi ponoš, sobi me jekhes otmukhav tumenge pe Patradžin; hobi kamena, otmukha tumenge Judengīre Kraļis?
40Togi noko zadīne glos sāre, rakirindoi: na Les, ne Varavas. Varavos isis rozboiņikos.
Currently Selected:
Joannostir 18: LET1933
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1933, 2016
