Joannostir 13
13
Džeļ, 13.
1Angil Patradžinako svenkos Iisusos, džinindoi, so javdža Leskīri štunda pšedžal da svetostir ko Dād, sikadža keribnasa, so, miļidža Peskīren saje isis ano svetos, žin ko koncos miļidža len.
2Te beļveļakīro rikirindoi, kedi beng uže čhudža an Jūdasko Iskariotosko Simanisko čhāveskīro dži pšedel Les
3Iisusos, džinindoi, so Dād saro otdija an Leskīri vasta, te so Jov vijavdža Davlestir te džala ko Dēvel,
4Ušča beļveļakīrestir, lija Pestir, telle opratuno idžos, te, lel rešņika, pšephandžapes.
5Pošļi čhordža paņing ane moribnaskīri, te lija morel pīre sigļaibnangīrenge te khosel rešņikasa, sajasa isis phephandlopes.
6Javela ko Simanis Petris; te dova rakirla Leske: Raija! Tuke hobi mores mīre pīre?
7Iisusos phendža leske ano otpheniben: so Me kērava, kana tu nadžines, ne haļosa pošļi.
8Petris rakirla Leske: namoresa mīre pīre ņigdi. Iisusos otphendža leske, keļi namorava tut, najāla tuke džeļ Mansa.
9Simonis Petris rakirla Leske: Raija! na feņu mīre pīre, ne vasta te šēro nin.
10Iisusos rakirla leske: mordeske čhebi feņu pīre moren, vašo dova so čisto isi sāro; te nin tume čista, ne na sāre.
11Hai džindža Jov Peskīres pšedibnaskīres, vašo dova phendža: na sāre tume čista.
12Kedi mordža lengīre pīre te urjadža Peskīro idžos, togi, noko bešča, te phendža lenge: hobi džinen nin, so Me tumenge kērdžom?
13Tume dena goli Man Sikļakirbnaskīreske te Raske, te čačo rakirna tume; hai Me dova isom.
14Te jake, keļi Me, Raij te Sikļakirbnaskīro, mordžom pīre tumenge, togi tumenge čebi nin morēn pīre jek vavreske.
15Hai Me sikadžom tumenge, sobi tume kēren dova, so Me kērdžom tumenge.
16Lašņes, lašņes rakirava tumenge: bučkirdo nāni bāredir peskīre rastir, te sav bičādo nāni bāredir dolestir kon les bičadža.
17Keļi dava džinen tume, švenčume tume, kedi phečkirna tume.
18Na sārendir tumendir rakirava; Me džinav, sajen vilijom. Ne mephečkirenpen Čhinibena: habnaskīro Mansa māro hadija pe Mange peskīro pīro (David. gili, 40, 10).
19Kana phenava tumenge, angil poskil dava nanojavdžapes, kedi dava jāla, tume sobi pačan, so dava Me.
20Lašņes, lašņes rakirava tumenge: dolibnaskīro doles, sajes Me bičava. Man dolela: ne dolibnaskīro Man dolela bičaibnaskīres Man.
21Kedi phendža dava, Iisusos jača zalīno duhosa, te švatkindža, te phendža: Lašņes, lašņes rakirava tumenge, so jek tumendir pšedela Man.
22Togi sikļaibnangīre dikhle jek pe vavreske, nahalindoi, konestir Jov rakirla.
23Jek Leskīre sikļaibnangīrendir, sajes miļidža Iisusos, bešča ke Iisuskīro kolin.
24Simonos Petris leske kērdža znač, sobi phučel, kon dava sajestir rakirla.
25Jov, dopeija ko Iisuskīro kolin, te phendža Leske: Raija! kon dava?
26Iisusos otphendža: dova, koneske Me, območinava kuskos māro, te podava. Te, ob močinel kuskos, podija Ijudoske Simonoskīre čhāveske Iskariotoske.
27Te pošļi da kuskos gija an leske beng. Togi Iisusos phendža leske: so kēresa, kēr signedir.
28Ne nikon dolendir saje doi isis bešle nahalīne, ke so Jov dava phendža leske.
29Ne jake sir Ijudoske isis tiknori, vašo dova vār dufindle, so Iisusos rakirla leske: kin, so menge čhebi ko svenkos, vai sočimoņi del bogenge.
30Jov, dolija kuskos, zaras vigija: ne isis rat. Kedi jov vigija.
31Iisusos phendža: kana proslavindžapes Čhāvo mānušeskīro, te Dēvel proslavindžāpes an Leske.
32Keļi Dēvel proslaviddžapes an Leske, togi Dēvel proslavini Les an Peske, te sig proslavini Les.
33Čhāve! uže nahāra Mange tumensa javav. Tume Man rodena, te, sir phendžom Me Judenge, so, karīg Me džava, tume našti dojāven, te jake rakirava kana tumenge.
34Dopheniben nevo dava tumenge miļinen jek vavres: sir Me iemiļidžom tomen, jake te tume miļinen jek vavres.
35Pe dova haļona sāre, so tume Mīre sikļaibnangīre, keļi tume rikirna miluma maškir tumenge.
36Simanis Petris phendža Leske: Raija! kai Tu džasa? Iisusos otphendža leske! kai Me džava, tu našti kana pal Mange javes, ne pošļi javesa pal Mange.
37Petris phendža Leske: Raija! vasoske me našti džav kana pal Tuke? me mīro džīben čhuva vaš Tuke.
38Iisusos otphendža leske: džīben tīro vaš Mange čhuvesa? lašņes, lašņes rakirava tuke: navigabala bašno, sir otphenesatut Mandir trin moli.
Currently Selected:
Joannostir 13: LET1933
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society 1933, 2016
