Lizsij dih Gaihcij 33

Yajgoz caeuq Hijsauj doxraen

1Yajgoz daj lizgyae couh yawjraen Hijsauj daiq baenx seiqbak vunz yiengq de mwnqneix byaij daeuj. De couh vaiqdi dawz gyoengq lwg de faen hawj Liqyaq, Lahgyez caeuq song meh yahnoix de daiq, 2vanzlij hawj song meh yahnoix gag daiq gij lwg bonjfaenh de byaij daixdaeuz, Liqyaq caeuq gij lwg de byaij gaen gajlaeng gyoengqde, hawj Lahgyez caeuq Yozswz byaij ceiq gajlaeng. 3Yajgoz bonjfaenh de byaij ceiq daixdaeuz. De itmienh byaij, itmienh gvih roengz doem bae sax, sax miz caet mbat baenx lai, cij byaij daengz daeggo de mwnq. 4Hijsauj raen Yajgoz le, couh rumj hwnjdaeuj umj dawz de, caiq got dawz gij hoz de, cup de. Song boux cungj doxgot hwj, angq hwj daej hwnjdaeuj lo.

5Gajlaeng Hijsauj yawjraen gaen youq baixlaeng Yajgoz dih vunzbazmeh caeuq lwgngez, couh cam naeuz: “Gaen mwngz daeuj hih doengh gyoengq vunz neix dwg byawz lah?”

Yajgoz han naeuz: “Gyoengq lwg neix dwg Cangqdiq soengq hawj bouxhoiq mwngz he.” 6Yiengq song meh yahnoix de couh daiq gij lwg de goqdaeuj baiq Hijsauj. 7Liqyaq caemh daiq gij lwg de goqdaeuj baiq. Gajlaeng Lahgyez caemh daiq Yozswz goqdaeuj baiq Hijsauj.

8Hijsauj caiq cam naeuz: “Haxbaenh gou youq dangjroen nyangz hih gyoengq doenghduz nej, dwg guxmaz lah?”

Yajgoz han naeuz: “Gyoengq doenghduz mwnq dwg gou soengq hawj mwngz lah, muengh mwngz hozroengz mbouj aeuqheiq gou.”

9Hijsauj naeuz: “Nuengx hax, gou gijmaz cungj miz lo; vanzlij dwg mwngz gag louz bax!”

10Yiengq, Yajgoz caiq han naeuz: “Mbouj hah, hauhnaeuz mwngz yawjhwnj gou, couh cingj mwngz sou gij laex gou. Seizneix mwngz doiq gou baenxlai ndei; gou ndaej raen naj mwngz caemh luj ndaej raen naj Cangqdiq lo! 11Cingj mwngz sou gij laex gou soengq hawj mwngz hih bax! Cangqdiq soengq fuk hawj gou, sawjhawj gou yienghyiengh cungj miz.” Yajgoz yienghneix gouz sam gouz seiq le, Hijsauj cij sou gij laex de.

12Gajlaeng Hijsauj naeuz: “Yiengq raeuz itheij maj bax! Gou byaij gaxgonq mwngz.”

13Yajgoz han naeuz: “Bouxcawj gou hax, mwngz caemh rox gyoengq lwgngez vanzlij iq, caiq gyacangq cwzlwg iq, yiengzlwg iq, vanzlij gw nauq; gou ij cauqguq gyoengqde. Hauhnaeuz caiq hawj gyoengqde ganj ngoenz roen laem, hoengjlau gyoengq cwzlwg hah yiengzlwg hah cungj rai baeg lah. 14Bouxcawj hax, cingj mwngz sien maj gaxgonq bax. Gou ij youq gajlaeng menhmenh byaij, yawjyawj lwgngez hah, cwz hah, yiengz hah; gyoengqde byaij ndaej geijlai vaiq, raeuz couh byaij geijlai vaiq, itcig byaij bae daengz dieg Sih'wj caeuq bouxcawj gou doxraennaj.”

15Hijsauj caiq naeuz: “Ndaej hah, yiengq gou louz geij boux vunz hawj mwngz, hawj gyoengqde soengq mwngz ma.”

Hoeng Yajgoz dauq han naeuz: “Mboujyungh lo! Vihmaz ij yienghneix guh nej? Cijaeu mwngz mbouj yiem gou couh ndaej lo.”

16Hijsauj ngoenz mwnq couh sien dauqlaeng maj Sih'wj gaxgonq. 17Hoeng, Yajgoz nej, de dauq yiengq Suhgoz bae, youq mwnq hwnq ranz hwj camqciz youq, caemh youq mwnq dap diengz hawj gyoengq cukseng youq. Yiengq mwnq dieg mwnq couh heuh Suhgoz. (‘Suhgoz’ couh dwg ‘diengz’ dih iqswh.) Yajgoz youq Suhgoz youq duenh he le, cij bae Siqgiemq.

18Yajgoz dajlwh Bahdanj-Yaqlanz ma mwhde, itloh bingzbingz an'an ma daengz Gyahnamz diqgih dih aen singz Siqgiemq, youq henz singz neix cap yingz youq. 19Mwnq dieg cap yingz mwnq dwg aeu bak gaiq ngaenz laeng gyoengq lwg Hahmaz cawx ma he. (Hahmaz couh dwg daxboh Siqgiemq.) 20Yajgoz youq mwnq caeb aen daiz dajbwiz he, an coh hawj aen de heuh Ihliq-Ihlozih-Hijswzlez (couh dwg ‘Cangqdiq, Hijswzlez dih Cangqdiq’ dih iqswh).

Currently Selected:

Lizsij dih Gaihcij 33: YBNT

Highlight

Copy