Lizsij dih Gaihcij 31

Cangqdiq hawj Yajgoz maj dieg cojgoeng de

1Yajgoz dingqri vunz naeuz doengh daeglwg Lahbanh gangj naeuz: “Yajgoz ciengj aeu gij gyadangq daxboh raeuz liux; de sojmiz dih cienzcaiz cungj dwg dajlaeng gij gyadangq daxboh raeuz ndaej hih.” 2Mwhde, Yajgoz caemh gag roxnginh Lahbanh doiq de mbouj luj gaxgonq yienghmwnq caen lo.

3Gajlaeng Yehhozvaz couh doiq Yajgoz naeuz: “Mwngz ij maj laeng dieg daxgoeng mwngz hah, daxboh mwngz hah, gij beixnuengx mwngz hah mwnq bae. Gou caemh caeuq mwngz youq, cauqguq mwngz.”

4Yiengq Yajgoz couh baij vunz maj naeuz Lahgyez caeuq Liqyaq, hawj song boux de bae mwnq dieg ciengx yiengz mwnq cimh de. 5Yajgoz couh doiq song boux de naeuz: “Gou roxnginh daxboh faenhsou doiq gou mbouj luj gaxgonq yienghmwnq ndei lo, hoeng, baujcuk baujyouh daxboh gou dih Cangqdiq itcig cungj caeuq gou youq, cauqguq gou. 6Song boux faenhsou caemh rox, gou caenh gij goengrengz gou ma bang daxboh faenhsou lo, 7hoeng de vanzlij coemx gou. Gannaeuz de mbatmbat gaij gij ngaenzhong gou lah, hoeng, mboujguenj de baenzlawz, Cangqdiq vanzlij mboujcwnj de sienghaih gou. 8Sou yawj hux, hauhnaeuz daxboh faenhsou naeuz: ‘Miz baenx demj dih yiengz couh suenq gij ngaenzhong mwngz,’ yiengq baenx gyoengq yiengz cungj roengz miz baenx demj dih yiengzlwg; hauhnaeuz de naeuz: ‘Miz raizbanq dih yiengz couh suenq gij ngaenzhong mwngz,’ yiengq baenx gyoengq yiengz cungj roengz miz raizbanq dih yiengzlwg. 9Couh dwg yienghneix Cangqdiq dawz doengh duz daxboh faenhsou dued ma soengq hawj gou.

10“Miz mbat he, daeng gyoengq yiengz boiqcungj mwhde, gou miz mbat fangxngwnzloq he, loqraen doengh duz yiengzgoeng gwih youq gwnz gumq duz yiengzmeh he, cungj dwg miz baenx demj hah, miz raizbanq hah. 11Youq ndaw loq gou, bouxcai Cangqdiq heuh gou naeuz: ‘Yajgoz!’ Gou han naeuz: ‘Aex!’ 12De naeuz: ‘Hawjm'z yawj hux, sojmiz gwih youq gwnz gumq duz yiengzmeh dih yiengzgoeng cungj dwg miz baenx demj caeuq miz raizbanq he. Mboujguenj Lahbanh baenzlawz doiq mwngz, gou cungj yawjraen, cungj rox. 13Gou couh dwg youq Bwzdwzliq mwnq yienh hawj mwngz raen dih Cangqdiq, couh dwg youq mwnq mwngz aeu youz ma raix hwnj gwnz ngauq rin gijnenqbeih bae guh geiqhauh, caiq doiq gou baujcingq goq dih mwnq. Seizneix mwngz ij majcangq maj laeng dieg bohmeh mwngz.’”

14Yiengq Lahgyez caeuq Liqyaq cungj majcangq han naeuz: “Ndaej hah, ndaej hah, fanjcingq raeuz youq ranz daxboh caemh mbouj faen ndaej gijmaz gyadangq. 15De mbouj dwg yawj raeuz dangq bouxwnq bouxrog maz? De dawz raeuz ma vuenh gij ngaenzhong mwngz, caemh lujnaeuz de dawz raeuz hai le, caiq gag gyan aeu gij ngaenz de.#31:15 Couh dwg Lahbanh mbouj ciuq mwhde dih laehbeih; baenjlaiz Lahbanh wnggai hawj song dahlwg de gyaqcang, hoeng de mij hawj. 16Sojhij Cangqdiq dajlaeng daxboh dued ndaej ma dih gyadangq, cungj dwg gij raeuz caeuq gyoengq lwg raeuz. Seizneix mboujguenj Cangqdiq raengq mwngz guh gijmaz, mwngz cungj ciuq de bae guh bax!”

Yajgoz caegcaeg deuz okma

17 Yiengq Yajgoz couh soujsib ndei doxgaiq, caiq hawj gij lwg gij yah de gwih lozdoz, 18caemh duq de youq Bahdanj-Yaqlanz soj ndaej dih doenghduz, caeuq daiq de rom ndaej dih doxgaiq, couh maj dieg Gyahnamz laeng daxboh de Hijsaj lo. 19Mwhde, Lahbanh mbouj youq ranz, bae daet fwn yiengz lo. Lahgyez couh swngzgei caeg aeu duz you ndaw ranz daxboh de. 20Yajgoz muenz Lahbanh, mbouj naeuz de ni; 21de daiq de sojmiz dih gyadangq, nyungjnyungj nyatnyat caegcaeg deuz, deuz goq diuz dah Youqfazlahdij, yiengq rungh Gihlez bae.

Lahbanh boenq Yajgoz

22Daengz ngoenz daixsam, miz vunz naeuz Lahbanh ni, naeuz: “Yajgoz caeg deuz lo.”

23Yiengq Lahbanh couh daiq baenx gyoengq beixnuengx de bae boenq Yajgoz, boenq daengz daixcaet ngoenz, youq Gihlez cij boenq ndaej dawz. 24Ngoenz mwnq singjngwnz, Cangqdiq hawj Lahbanh fangxngwnzloq, daezsingj de naeuz: “Mwngz ij siujsim! Mbouj ndaej sienghaih Yajgoz, daiqlienz haep cungj mbouj ndaej haep de.” 25Mwhde Yajgoz youq rungh Gihlez dap bungz youq. Lahbanh boenq dawz Yajgoz le, de caemh caeuq gyoengq vunz de youq mwnq dap bungz youq.

26Gajlaeng, Lahbanh cam Yajgoz naeuz: “Mwngz vihmaz ij yienghneix guh, yienghneix yaeuh gou, doiq song dahlwg gou caenh lujnaeuz hoenxciengq yienghmwnq gaemh dawz, daiq gyoengqde deuz nej? 27Mwngz vihmaz muenz gou caegcaeg deuz? Hauhnaeuz mwngz sien naeuz gou ni nex, gou caemh vuenvuen heijheij soengq faenhsou bae, caiq ndaek gyong, ndaek laz, danz gimz, ciengq go, soengq faenhsou bae laem hwx. 28Mwngz caemh mbouj hawj gou cup dahlwg gou caeuq doenghheij lan vaihseng gou. Mwngz yienghneix guh cingqcaen gaeuq ngawz lo. 29Seizneix mwngz ngaiz gou boenq dawz lo. Baenjlaiz gou seizbienh ndaej sienghaih faenhsou hih, hoeng ngoenzlwenz singjngwnz boux Cangqdiq daxboh mwngz doiq gou naeuz: ‘Mwngz ij siujsim! Mboujcwnj mwngz haep Yajgoz.’ 30Gou rox naeuz mwngz siengj ranz daxboh mwngz lo, cungj ngengh ij maj, yiengq mwngz couh bae bax. Hoeng, mwngz vihmaz ij caeg aeu duz you ndaw ranz gou nej?”

31Yajgoz han naeuz: “Gou caegcaeg deuz, dwg lau mwngz dajlaeng gou dued aeu dahlwg mwngz maj hah. 32Hoeng gou caemh mij caeg aeu mwngz saek gaiq doxgaiq hah. Mwngz youq dangqnaj gij beixnuengx raeuz cimhcimh yawj, cimhraen gijmaz dwg gij doxgaiq mwngz hih, couh dawz bae bax. Hauhnaeuz mwngz youq laeng bouxlawz mo ndaej raen duz you mwngz nex, bouxlawz couh ngaiz gajrai!” Gizsaed Yajgoz gaenhbaenj mbouj rox Lahgyez caeg aeu duz you daxboh de.

33Gajlaeng, Lahbanh couh gaihcij sousou diemjdiemj. De sien haeuj aen cangqbungz Yajgoz bae diemj gaxgonq, cij daengz aen Liqyaq, caiq daengz aen song dahhoiq gyoengqde bae diemj, hoeng cungj mij diemj ndaej raen saek gaiq. Yiengq de caiq haeuj aen cangqbungz Lahgyez bae diemj. 34Gizsaed Lahgyez gaenq dawz duz you yo haeuj aen daeh'an duz lozdoz bae lo. De yo le, couh naengh youq gwnz de hwj, hawj Lahbanh cimh baenx cenz cangqbungz cungj mij cimh ndaej raen saek yiengh. 35Lahgyez doiq daxboh de naeuz: “Boh hax, seizneix gou ndangdaej mbouj fungbienh; mboujeiqseiq lo, mbouj ndaej youq dangqnaj mwngz ndwn hwnjdaeuj. Cingj mwngz gaejyungh aeuqheiq.” Lahbanh dauqcawq diemj, dauqcawq cimh, cungj mij cimh ndaej raen duz you ndaw ranz de.

36Gajlaeng Yajgoz hujheiq dengxdengx hwj saemjcam Lahbanh naeuz: “Gou dauqdaej famh gijmaz coih, famh gijmaz faz hawj mwngz daeuj boenq gou luj boenq vunzfamh nwih? 37Mwngz diemj gij doxgaiq gou liux, diemj ndaej raen gijmaz nex? Diemj ndaej raen, couh dawz okdaeuj coengq youq dangqnaj gyoengq beixnuengx gou caeuq gyoengq beixnuengx mwngz hah, hawj gyoengqde bingzbingz song boux raeuz yawj.

38“Gou youq laeng mwngz youq baenx ngeihcib bi. Youq ngeihcib bi neix daeuj, gij menzyiengzmeh caeuq gij yiengzbyameh mwngz mij ngaiz lon goq saek duz lwg. Gannaeuz gou ndaej miz gienz gaj gw gij yiengzgoeng mwngz, hoeng, gou cungj mij gaj gw saek duz. 39Daiqlienz ngaiz duz nyaen haeb rai hih yiengz, gou cungj mij dawz bae hawj mwngz yawj; gou gag boiz. Hoeng, mwngz nej? Mboujlwnh doengxngoenz doengxngwnz#31:39 Ciuq mwhde dih laehbeih, hauhnaeuz doengxngwnz ngaiz vunz caeg aeu yiengz mij vunz raen, yiengq boux ciengx yiengz mwnq ndaej doiq bouxcawj mwnq baujcingq naeuz bonjfaenh de mij caeg aeu yiengz, yienghneix couh mbouj ngaiz boiz hawj bouxcawj lo. ngaiz vunz caeg aeu hih yiengz, mwngz cungj daeuj heuh gou aeu.

40“Gou siengzseiz doengxngoenz souh ndit souh hwngq, ij rai dwgrengz; singjngwnz singjhaemh nit hwj ninz ra mbouj laep. 41Gou youq laeng mwngz baenx ngeihcib bi, vih ij aeu song dahlwg mwngz, begbeg bang mwngz guh baenx cibseiq bi hong. Vihliux gyoengq yiengz mwngz, gou swqhaeuh mwngz roek bi. Mwngz caiq siengzseiz gaij gij ngaenzhong gou. 42Hauhnaeuz mbouj dwg boux miz vi hawj vunz roxnginh lau hih Cangqdiq, baujhuq daxgoeng gou Yaqbwzlahhanj caeuq daxboh gou Hijsaj dih Cangqdiq caeuq gou youq nex, mwngz gaengjdingq hawj gou baet fawz hoengq maj. Caeklaiq hwx, caeklaiq Cangqdiq yawjraen gij haemzhoj gou caeuq gij dwgrengz gou, couh youq ngoenzlwenz singjngwnz de buenq hawj mwngz miz coih.”

Yajgoz caeuq Lahbanh gangj ndei, dingh ndei diuzgyenq

43Lahbanh dingq Yajgoz yienghneix naeuz le, couh han de naeuz: “Lwgsau lwgsau gou, vaihseng vaihseng gou, yiengz cix dwg yiengz gou; youq dangqnaj mwngz sojmiz dih cungj dwg gij gou liux. Hoeng ngoenzneix gou ij ndaej dawz gyoengqde baenzlawz yiengh bae? 44Daeuj, mboujyienz raeuz song boux doxdingh ndei, guh raeuz gajlaeng dih baengzgawq.”

45Yiengq Yajgoz couh dawz ngauq rin he ma laeb guh geiqhauh. 46De caiq doiq gyoengq vunz ndaw ranz de naeuz: “Faenhsou aeu rin ma dong guh baenx dong hwj.” Gajlaeng gyoengqde couh dong baenx dong rin. Dong ndei le, couh youq henz dong rin de caezgya gw haeux.

47-48Gajlaeng, Lahbanh couh doiq Yajgoz naeuz: “Ngoenzneix dong rin neix couh dwg guh mwngz caeuq gou doxdingh ndei dih baengzgawq.” [47]Couh vih yienghneix, Lahbanh couh gag aeu gij vah bonjfaenh de ma an dong rin neix heuh Ihgyahwj-Sajhahduqdah; Yajgoz caemh gag aeu gij vah bonjfaenh de ma an dong rin neix heuh Gyahlaeqdwz. (Song gij coh neix cungj dwg ‘dong rin guh baengzgawq’ dih iqswh.) [48b]Sojhij mwnq dieg neix couh heuh Gyahlaeqdwz. 49Lahbanh caemhcaiq naeuz: “Daengj raeuz song boux doxbiek le, muengh Yehhozvaz gyenhciq raeuz song boux.” Yiengq mwnq dieg neix caemh heuh Mijswhbah. (‘Mijswhbah’ couh dwg ‘gyenhciq dap’ dih iqswh.)

50Lahbanh caiq naeuz: “Hauhnaeuz mwngz yawj doengh dahlwg gou mbouj dij, cixnaeuz caiq aeu daixlingh mehyah nex, cungjsuenq naeuz mij vunz rox, hoeng, mwngz ijaeu ndaejgeiq, Cangqdiq youq cungqgyan gyenhciq raeuz song boux. 51Mwngz yawj, laeb youq cungqgyan song boux raeuz dih dong rin caeuq ngauq rin laeb guh geiqniemh neix 52cungj dwg gyoengqraeuz dih baengzgawq. Gou gyenhgyez mbouj yamq cauhgoq dong rin caeuq ngauq rin laeb guh geiqniemh neix bae haih mwngz, mwngz caemh mbouj ndaej yamq goq dong rin caeuq ngauq rin laeb guh geiqniemh neix daeuj haih gou. 53Muengh Yaqbwzlahhanj sinq dih cwnz caeuq Nazhoq sinq dih cwnz buenqdingh song boux raeuz deng caeuq mbouj deng.” Gajlaeng Yajgoz couh yiengq daxboh de Hijsaj soj soenhgingq dih Cangqdiq, couh dwg boux miz vi hawj vunz roxnginh lau hih Cangqdiq baujcingq yienghneix guh, 54caemh youq gwnz bya dajcoengq bwiz Cangqdiq, caiq cingj song mbiengj hih beixnuengx itheij gw laeuj.#31:54 Gw laeuj mwhde caemh gw gij noh dajbwiz. Couh dwg yungh cungj fap neix ma biujsiq song mbiengj cungj dingh ndei dih iqswh. Gw le, gyoengqde caemh youq gwnz bya doz haemh.

55Daengz haet daixngeih daihcaeux, Lahbanh hwnq le, couh cup doengh gyoengq lan vaihseng de caeuq dahlwg de. Gajlaeng de couh maj ranz lo.

Currently Selected:

Lizsij dih Gaihcij 31: YBNT

Highlight

Copy