Lizsij dih Gaihcij 27
27
Hijsaj ijvanh rai gvaqseiq mwhde raengq Hijsauj
1Hijsaj laux le, song cehra de cungj rava foenjfoenj myox myadmyad liux lo, yawj cungj mbouj raen saek di laem lo. Miz ngoenz he, de hawj vunz heuh daeglwg daeuz de Hijsauj daeuj daengz dangqnaj de. De couh naeuz: “Lwg hax!”
Hijsauj han naeuz: “Ox! Guxmaz lah?”
2De caiq naeuz: “Mwngz yawj lux, gou gaenq laux liux lo; mbouj rox ij lix ndaej geijlai caez laem lo. 3Seizneix mwngz dawz gij dwk nyaen soj yungh dih doxgaiq, gung hah, naq hah, bae rogndoi rognaz dwk nyaen ma. 4Dwk ma le, couh ciuq gou haenj gw hih loengh. Loengh ndei le, dawz daeuj hawj gou gw, domh gou mijyaengz rai cihsenz, sien hoh fuk hawj mwngz gaenq.”#27:4 Youq ciuhgonq, dwzbez dwg mwh vunz ij rai he, hoh fuk dih iqswh gig laeg, mboujdanh dwg maqmuengh dih daiqbiuj, engq dwg cungj daiq miz rengz he, rox daengz gajlaeng dih saeh he. Gangj okdaeuj le, couh mbouj ndaej sou haeujma laem lo. Yiengq Hijsauj couh ok rogndoi rognaz bae dwk nyaen lo.
Liqbwzgyah son Yajgoz coemx Hijsaj
5Mwh Hijsaj doiq daeglwg de gangj hih gij vah mwnq, Liqbwzgyah dingqri lo. Yiengq, daengj Hijsauj bae dwk nyaen le, 6Liqbwzgyah couh gangj naeuz daeglwg iq de Yajgoz ni, naeuz: “Gou dingqri daxboh mwngz doiq daeggo mwngz naeuz: 7‘Mwngz bae dwk nyaen ma, loengh feihgw hwj hawj gou; domh gou seizneix vanz mijyaengz rai, gou ij youq dangqnaj Yehhozvaz hoh fuk hawj mwngz.’” 8Liqbwzgyah caiq naeuz: “Lwg hah! Seizneix mwngz dingq gou gangj, ciuq gij vah gou bae guh. 9Mwngz seizneix majcangq bae daengz gyoengq yiengz mwnq genj aeu song duz yiengzlwg cix biz cix oiq he ma hawj gou; gou couh ciuq daxboh mwngz haenj gw hih yienghmwnq ma loengh. 10Loengh ndaej le, mwngz couh dawz bae hawj daxboh mwngz gw, hawj de mijyaengz rai cihsenz sien hoh fuk hawj mwngz.”
11Hoeng, Yajgoz doiq daxmeh de naeuz: “Daeggo gou baenx ndang cungj dwg miz fwn; gou nej, gou cenz ndang cungj ngaeuz ngamxngamh. 12Dingjlingz daxboh mo deng gou, rox naeuz gou yaeuh de, daengz mwhmwnq gou mboujdanh mbouj ndaej hoh fuk, dauqfanj ngaiz mang.”
13Daxmeh de han naeuz: “Lwg hah, mwngz gaejyungh you; hauhnaeuz mwngz ngaiz mang nex, couh youz gou rap bax! Mwngz caenhrox ciuq gou gangj hih yienghmwnq bae guh ndaej lo; bae ying yiengz ma hawj gou.” 14Yiengq, Yajgoz couh bae ying yiengz ma hawj daxmeh de. Daxmeh de couh ciuq daxboh de haenj gw hih yienghmwnq loengh.
15Loengh ndei le, de couh dawz dauq buh daeglwg daeuz de, coengq youq laeng de hih dauq ceiq ndei he, aeu ma hawj daeglwg iq de daenj, 16caemhcaiq aeu gij naeng yiengz ngamq gaj mwnq, lij daiq fwn he, daeuj duk gij fawz caeuq gij hoz mwnq ngaeuz he hwj. 17Yiengq le, couh dawz de loengh ndei hih nohyiengz caeuq menqbauh, dawz daeuj hawj Yajgoz.
Yajgoz coemx daxboh de
18Yajgoz byaij bae daengz daxboh de mwnq, heuh sing he: “Boh!”
Boh de han naeuz: “Aex, lwg hax, mwngz dwg byawz lah?”
19Yajgoz han naeuz: “Gou dwg daeglwg daeuz mwngz Hijsauj hah. Gou gaenq ciuq mwngz raengq hih guh ndei lo. Cingj mwngz hwnq hwnjdaeuj, hwnq hwnjdaeuj naengh ndei hwj gw gij nohnyaen gou dwk ndaej ma he hax; gw ndaej le, ndaej hoh fuk hawj gou lo.”
20Gajlaeng, Hijsaj cam naeuz: “Yoq? Lwg hah, mwngz guxmaz ndaej baenx vaiq, couh dwk ndaej nyaen ma lah?”
Yajgoz han naeuz: “Dwg Yehhozvaz, Cangqdiq mwngz bang gou lah.”
21Hijsaj caiq doiq Yajgoz naeuz: “Lwg hax, mwngz dep gou dineix daeuj, daengj gou laxlax momo mwngz yawj, yawjyawj mwngz cingqcaen dwg daeglwg daeuz gou haz.” 22Yiengq, Yajgoz couh byaij bae dep daxboh de. Daxboh de couh momo laxlax de naeuz: “Geizheih, sing dwg sing Yajgoz; fawz dwg fawz Hijsauj.” 23Aenvih gij fawz Yajgoz caemh luj gij fawz Hijsauj yienghmwnq fwn nyumjnyumq, Hijsaj gaenhbaenj nginh mbouj ok de dwg Yajgoz, couh ijvanh hoh fuk hawj de. 24Hoeng, Hijsaj vanzlij caiq cam de naeuz: “Mwngz cingqcaen dwg daeglwg daeuz gou Hijsauj haz?”
Yajgoz caiq han naeuz: “Dwg hah! Gou dwg hah!”
Hoh fuk hawj Yajgoz
25Gajlaeng Hijsaj couh naeuz: “Lwg hah, dawz nohnyaen goqdaeuj hawj gou gw; daengj gou gw sat le, couh hoh fuk hawj mwngz.”
Yiengq Yajgoz couh dawz daxmeh loengh hih nohyiengz ndenq hawj de, caemhcaiq aeu laeuj hawj de gw. 26Gw sat le, Hijsaj doiq Yajgoz naeuz: “Lwg hax, mwngz daeuj gotgot gou bax.”
27Yajgoz caemh bae got daxboh de, yiengq daxboh de mupraen gij heiq rang diuz buh de le, couh hoh fuk hawj de naeuz: “Gij heiq rang gwnz ndang daeglwg gou hax, caemh rang luj Yehhozvaz soengq raemxfwn hawj reih le gij rang mwnq baenxlai rang.
28Muengh Cangqdiq soengq hawj mwngz gij raemxraiz#27:28 Mwnq dieg neix siengzseiz rengx, fwn doek noix, gauq roengzraiz cij ndaej. gwnzmbwn,
Gij doem biz lajdeih, haeux mienh fungcuk, laeuj lai raixcaix, gaiqgaiq cungj miz.
29Muengh ciencien fanhfanh minzcuz swqhaeuh mwngz,
Ciencien fanhfanh guekgya cungj daeuj baiq mwngz sax mwngz.
Mwngz ndaej guenjciq beixnuengx mwngz;
Doengh daih gajlaeng daxmeh mwngz cungj daeuj baiqbaiq saxsax doengh daih gajlaeng mwngz.
Bouxlawz mang mwngz hih, bouxlawz caemh ngaiz mang;
Bouxlawz hoh fuk hawj mwngz hih, bouxlawz caemh ndaej miz fuk.”
Hijsauj gouz daxboh hoh fuk hawj de
30Hijsaj hoh fuk hawj Yajgoz sat le, Yajgoz ngamqngamq dajlaeng daxboh de mwnq ok ma, daeggo de Hijsauj caemh ngamqngamq luj letlet bae dwk nyaen ma. 31Yiengq, Hijsauj caemh loengh ndei le, couh dawz bae hawj daxboh de, naeuz: “Boh! Cingj mwngz hwnq daeuj; gw gij nohnyaen gou bang mwngz dwk ndaej ma he hax. Gw sat le, couh hoh fuk hawj gou bax!”
32Hijsaj dingq le, couh doeksaet hwj cam naeuz: “Mwngz dwg bouxlawz hax?”
Hijsauj han naeuz: “Gou dwg daeglwg daeuz mwngz Hijsauj hah.”
33Hijsaj dingq gawq vah neix le, cungj simvueng hwj ndang saenz dedded naeuz: “Yiengq mwngz mijyaengz daeuj cihsenz, dwg byawz aeu nohnyaen daeuj hawj gou gw lah? Gou gaenq gw lo, caemhcaiq hoh fuk hawj de lo. Baezneix de gaengjdingq miz fuk; gij fuk neix itcig dwg de ndaej.”
34Hijsauj dingq daxboh de naeuz yienghneix le, couh coengq sing hwj daej engxengx hwnjdaeuj, gouz daxboh de naeuz: “Gou nej? Boh hax, gouz mwngz caemh hoh fuk hawj gou bax!”
35Hoeng, Hijsaj han naeuz: “Daegnuengx mwngz gvijgvij gvaiqgvaiq, daeuj coemx gou aeu gij fuk mwngz lo.”
36Gajlaeng Hijsauj aeuqheiq hwj naeuz: “Couh dwg lo, gvaiq mbouj ndaej gij coh de heuh Yajgoz, ngamqluj; de coemx gou song mbat lo! Gaxgonq de coemx gou, dued aeu gij gienz lwgdaeuz gou; seizneix caemhcaiq dued aeu gij fuk gou.” Hijsauj caiq cam daxboh de naeuz: “Boh hax, mwngz cungj mij louz saek di fuk hoh hawj gou haahx?”
37Gajlaeng Hijsaj han naeuz: “Gou gaenq laeb de guh bouxcawj mwngz lo; mwngz caeuq sojmiz hih gyoengq beixnuengx de cungj dwg guh gij hoiq de. Caemh nyok hawj de gaiqgaiq cungj miz, bibi cungj miz doengh go haeux caeuq buzdauz ndaej ngauz laeuj. Lwg hax! Gou seizneix vanzlij miz gijmaz ndaej hawj mwngz nex?”
38Hijsauj caiq cam naeuz: “Boh hax, mwngz cijngamq miz yiengh fuk he ndaej hox maz? Boh hax boh, gouzgouz mwngz caemh hoh fuk hawj gou bax!” Gangj sat le, caiq coengq sing daej engxengx.
39Gajlaeng daxboh de raen Hijsauj yienghneix le, couh doiq de naeuz:
Mwngz youq dih deixfueng, mbouj dwg doem biz;
Gij raemxraiz gwnzmbwn mbouj caiq doek hawj mwngz.
40Mwngz ij gauq bae hangz vunz gw,
Caiq ngaiz swqhaeuh daegnuengx mwngz.
Hoeng, cungj ij miz ngoenz daengz mwngz dingx mbouj ndaej he.
Daengz mwhmwnq, mwngz couh fanj hwnjdaeuj, ndaej luet ek lo;
Mwngz mbouj caiq ngaiz daegnuengx mwngz guenjciq laem lo.
Yajgoz deuz bae Bahdanj-Yaqlanz
41Hijsauj couh vih daxboh de hoh fuk hawj Yajgoz, de couh haemzcaeuz Yajgoz, couh gag naemj naeuz: “Fanjcingq daxboh ijvanh rai lo; daengj daengz de rai gvaqseiq le, couh gajrai Yajgoz bae.”
42Gajlaeng miz vunz naeuz Liqbwzgyah ni, naeuz Hijsauj giqvaq ij gaj Yajgoz. Yiengq, Liqbwzgyah couh baij vunz bae heuh daeglwg iq de daeuj, doiq de naeuz: “Daeggo mwngz ijsiengj gaj mwngz ma boixhaemz.” 43De caiq naeuz: “Lwg hax! Mwngz seizneix ij dingq gij vah gou, ciuq gij vah gou bae guh. Seizneix mwngz majcangq deuz bae Hahlanz, laeng daeggo gou Lahbanh mwnq bae youq. 44Camqciz laeng de youq duenh he gaenq; daengj daengz daeggo mwngz hozroengz mbouj aeuqheiq, 45caemh lumz gaxgonq mwngz doiq de soj guh hih saeh le, gou menhcij baij vunz bae ciep mwngz ma. Gou hozbiet ngoenz he ngaiz vwt bae song daeglwg nej?”#27:45 Liqbwzgyah naeuz ‘ngoenz he ngaiz vwt bae song boux lwg’ dih iqswh aiq dwg de siengj daengz hauhnaeuz Hijsauj gajrai Yajgoz nex, yiengq Hijsauj caemh ngaiz buenq de gaj daegnuengx de miz coih, caemh ngaiz buenq hawj de rai.
46Yiengq, Liqbwzgyah caemh ijsiengj hawj Hijsaj miz ndaek cungj naeuz Yajgoz wnggai bae he; de couh doiq Hijsaj naeuz: “Vih Hijsauj hih song mehyah Hwz cuz vunz neix, guh hwj gou cungj simnyap ij rai bae. Hauhnaeuz Yajgoz caemh aeu gij lwgsau Hwz cuz vunz mwnqneix ma guh yah nex, gou cingxnyienh rai hoh luh; youq lij miz maz iqswh laem!”
Currently Selected:
Lizsij dih Gaihcij 27: YBNT
Highlight
Share
Copy
Want to have your highlights saved across all your devices? Sign up or sign in
© New Bridge Publishing Company Limited
