Lukahtar 18

Paramiči e molbatar e phivljaćiratar thaj e dovavatar e livarnengjiratar thaj e carinikongjiratar. O Isuso ćidel e čhavor̄en trujal pehte. O darape e barvalimahtar. E trito vorba e darane perimahtar. Sastaripe e kor̄ehko.

1Vov sikadah lengje jekh paramiči sar trubuj te molin pe e Devlehće tha te na ćhinjon, te na ačhadon.

2Thaj dijah vorba: Ande jekh foro sah varesavo baro raj, jekh krisi, savo niči darala e Devlehtar, a e manušendar niči ladžala.

3Ande gova foro sah jekh phivli tha voj lehte avilah vaćarindo: Arakh ma katar mrno dušmano.

4Maj anglal niči kamlah te ašunel la. A maj palal vov vaćardah peha: Me e Devlehtar niči darav, a e manušendar niči ladžav.

5A gaja phivli niči mukel ma thaj h̄oljarel ma djive po djive. Thaj te na avel mae maj but, me kam arakhav la e dušmanohtar, te na del ma h̄oli.

6Akana vaćardah o Del: Ašunen so, ake, vaćarel gova raj, o bičačo krisi.

7A zar o Del niči arakhela e Dušmanohtar gole manušen save paćan ande lehte thaj save molin pe lehće o djive tha e jrat.

8Phenav tumee kaj vov sigende kam arakhel len. A kana avela pale e manušehko čhavo, da li vov kam arakhel paćape pe gaja phuv.

9Palal mothodah jekh paramiči e avere manušengje save paćaje, ićarde ande pehte kaj si paćavne, a sa ćerena džungalipe.

10Duj džene dije ande khangjiri te molin pe e Devlehće, jekh sah rašaj, lilvarno, a cariniko o dujto.

11O rašaj ačhilah the lijah te e Devlehće moli pe gadija: Devla, ašarav tut, kaj naj sem gasavo sar e aver manuša, sar e čora e bipaćamne, e bimohće h̄alh̄ane jal sar o cariniko gava.

12Niči h̄av, šućarav duj drom ande efta djive, ulavav e čor̄engje e dešengo kotor katar sa so si ma.

13A gova cariniko ačhela durehte, niči kamlah thaj niči tromajah ni e jakha te vazdel upre po del, pa čaladah pe ando kolin vaćarindo: Devla, av lačhe ilehko mangje bangjehće, došalo sem.

14Mothovav tume kaj gava gjelo tar ke po ćher šukarimaha thaj čače odjehko, a gova aver naj gasavo. Saijekh manuš savo vazdinajvol korkor̄e upre, gova kam perel tele, a gova so pehtar muklinajvol, gova kam vazdinajvol upre.

15Akana ande lehte čhavor̄en te astarel len e najenca. A kana dikhle len lehće amala, darade len thaj tradije len kothar.

16A o Isuso akhardah len, dijah len muj, tha vaćardah: Muken e čhavor̄en te aven mande, na h̄an tumen lenca, kaj pala gasave si e Devlehko thagaripe.

17Thaj mothovav tumengje čače: Gova savo niči dikhel e Devlehko thagaripe sar dikhen le e cinone čhavor̄e, gova našti del ande lehte andre.

18Phučlah le jekh barvalo, šorutno: Lačhe sikavneja, so kam te ćerav me te therav o džumindipe bi e merimahko, o trajo biagorehko.

19A o Isuso mothodah lehće: Sostar tu mae pheneh: lačheja? Niko inaj lačho, jekh Del korkor̄e si lačho.

20Tu džaneh e zakonujra: Na rode e avrehće r̄omnjen, na mudar, na čor, na te vaćareh bangjipe sar svedoko, paća će da tha će dade.

21A vov phendah: Sa me gova ćerdem katar mo ternipe, ciknor̄al.

22A kana o Isuso gova ašundah, phendah lehće: Trubuj te ćereh gova. Bićin sa gova so si tu thaj ulav e čor̄engje, thaj kam avel tu pale gaći barvalipe paša o Del, thaj av pala mande.

23Thaj kana vov gova ašundah, avilah lehće pharipe po odji, kaj vov sah but barvalo.

24A kana o Isuso dikhlah le dukhade odjehće phendah lehće: Baro kam avel o pharipe jekhe barvalehće te del andre ande Devlehko thagaripe.

25Maj loćhe kam nakhel e kamila krozo e sujvaće kanor̄e, nego so kam del jekh barvalo ande e Devlehko thagaripe.

26A gola save ašunena, phušle: A ko šaj del andre te avel spasime.

27A o Isuso lengje phendah: So našti ćeren e manuša, šaj o Del ćerel.

28A o Petre phendah: Aketalam, amen sa muklam thaj gjelam tar pala tute.

29Čačimaha phenav tume: Naj ni jekh dženo savo mukel po ćher, pe dade thaj pe da, pe phralen thaj pe phejen, pe r̄omnja thaj pe čhavor̄en pala e Devlehko thagaripe.

30Svakone gasavehće kam avel pe gaja phuv maj but, a pe gova aver them, po del, kam avel le džuvipe bi e merimahko.

31Akana vov ćidijah pire dešudo amalen thaj mothodah lengje: Ake, amen džah tar upre ando Jerusalimo thaj sa kam gova avel gaja sar e prorokujra thode ande lila pala e manušehko čhavo.

32Von kam den le ande va golengje save niči paćan ando Del thaj kam ćeren phirasa leha, kam asan lehće thaj kam čhungarden pe lehko muj.

33Von kam le maren thaj mudaren, a vov kam o trito djive pale uštel katar e mule.

34A gala niči haćarde golehtar khanči, a gaja vorba lengje sah garuduni thaj von niči džangle so sah lengje phendino.

35Thaj kana vov pašilah ko Jerihono, dikhlah vov jekhe kor̄e kaj bešel po drom thaj mangel love.

36A kana o kor̄o ašundah kaj varesave manuša nakhen, vov phučlah: So si godova?

37Thaj mothode lehće kaj nakhel o Isuso e Nazaretohko.

38A o kor̄o lijah te akharel, te del muj: Ej, čhaveja e Davidohćireja! Avta lačhe odjehko mangje e kor̄ehće.

39A gola save džana angle, darade e kor̄e thaj vaćarde lehće te na del vorba. A vov pale maj zurale dijah vorba: Ej, čhaveja e Davidohćereja! Dikh pe ma, smiluvisajvo pe mande, kor̄ehte.

40Akana o Isuso ačhilah thaj phendah nek anen le e kor̄e. A kana o bijakhengo lehte pašilah, phučlah le.

41Dindo vorba: So kameh te ćerav tuće? A o kor̄o phendah: Bareja, kamam te dikhav.

42A o Isuso phendah lehće: Nek ćire jakha dikhen, ćiro paćavipe sastardah tu.

43A o bijakhengo jekhvaratar dikhlah pe pe jakha thaj lijah te džal pala lehte, gjilabindo e Devlehće, ašarindo le. A vi sa gola džene save dikhle gova ašarde, hvalisarde e Devle.

Currently Selected:

Lukahtar 18: GURB1938

Highlight

Copy