Lukéstar 18
18
1Jekhé paramisjása phenél lénge kai trébe sa te molínas amén e Devléske, a te na uvás záili.
2Čoká: Siné jekhé dizjáte jek murš, ov‐da hakémi isí. Amí e Devléstar nána darál, e manušéndar nána ladžál.
3Siné‐da adalké dizjáte jek phivlí, avél paš les, e hakemjés, phenél: Molínav‐man túke, ta t’ arakhés (te zaštištínes) man me düsmanjéstar.
4Amí odovká sa na mangélas. Amí pósle kórkoŗo péske xoratínel, phenél: E Devléstar nána daráv, e gadžéndar nána ladžáv,
5Amí adiká phivlí nána mukhjél man, k’arakháv (kazaštištínav) la, ta te na exmínel‐pes pále mántsa, thai te na khinjarél man.
6Amí o Del phenél: Šunés‐li, so phenél adavká bilačó hakémi?
7Savé manušén o Del rodinjás pes, ne‐li kaspasínel len, oví palál but tsíros spasínel?
8Tuménge phenáv sígo sígo kaarakhjél len, kaspasínel. Amí e Manušéskoro Čhavó kána pále andé dünjás uxljél, mislínen tumé kai othé pakjoibé kaarakhjél?
9Adiká‐da paramísi vakerél odolkénge, kai astarén‐pes baré, thai mislínen: amé lačé manúš sinjám, sa o avér džené bilačé.
10Siné dúi džené, džan n’oopré ki kangerí, ta te molínen‐pes. O jek‐da isí jek rašái, o avér isí jek gümrükdžís.
11O rašái térdjol, molínel‐pes, čokáčoká: Blagodarínav‐man túke, Dévla, sostár nána sinjóm sar o avér manušá, ol kai čorá isí, bilačé isí, phiravdé (pirjané) isí, ili sar adavká gümrükdžís.
12Ándo kurkó du‐var ačháv bokhaló, me manginéstar‐da o déšto kotór e čoŗénge dav.
13Amí o gürümkdžís durál térdjol, pe jakhéntsa‐dani nána dikhél n’oopré ándo nébos, thai po bŭrk hem čalavél, hem vakerél: Dévla, mánge bezexengeréske te kerés haláli to lačipé.
14Phenáv tuménge: Adavká geló‐peske opravdimé kheré, amí odovká nanái. Sóske ko barjarél (phukjarél) pes, odolkés kateljarén, a ko teljarél pes, odolkés kabarjarén.
15Igalén léske, e Isúske, tsikné čhavén, ta te dokačínel len. Amí léskere amalá kána dikhén, léntsa xoljánen.
16Amá o Ísus len vikínel, phenél: Mukén‐ta t’aavén paš mánde o tsíkne čhavé, thai léntsa ma‐xan xolí, sóske asalkéndar kerdó isí o thagaribé e Devléskoro.
17Čačés phenáv tuménge: Ko nána dikhél o thagaripé e Devléskoro sar jek čhavó dikhél, odovká naští del andré.
18Phučél léstar jek baró: Abé Lačó Učítelo, so te keráv, ta te kazandínav o thagaripé e Devléskoro?
19Ov‐da phenél léske: So tu phenés mánge: Lačó. Níko nanái lačó, sámo kórkoŗo o Del lačó isí.
20Džanés o zakónos: Nanái te phiravés‐tut, nanái te mudarés níkas, nanái te čorés hič, nanái te des bičačunó šahidlékji, te dadés, te dajá tešrífi te kerés.
21Ov‐da phenél: Sa adavká katár o ternipé kerdjóm.
22Šunél o Ísus, phenél: Pánda jek isí, ta te kerés: Bikín‐ta sa, so si túke, e čoŗénge‐da te des, čoká baró mangín k’oovél túke ándo nébos. Thai t’aavés, palál mánde te džas.
23Šundjás adavká, bibaxtaló uló, sostár but barvaló sas.
24O Ísus léskoro bibaxtalibé kána dikhél, vakerél: Sar pharó ovél, ta te den andré o barvalé ándo thagaribé e Devléskoro.
25Pó‐lesno džal ándi suvjákeri xev o verbljúdos, amí te na džal ándo thagaribé e Devléskoro jek barvaló manúš.
26Odolká kai šunén, vakerén: Abé savó manúš aští del andré?
27Phenél lénge o Ísus: So naští kerél o manúš, o Del aští kerél.
28Togái phenél o Pétres: Áke mukhljám sa, palál túte geljám.
29Vakerél lénge adavká: Čačés phenáv tuménge: Ko po kher, pe dadés thai e dajá, pe phralén ili pe ŗomnjá thai pe čhavén asál e Devléskere thagaripnáske mukhljás,
30Oví adalké dünjáste but drom po‐but ka‐ikerél, thai ándo nébos‐da kabešél palál o meribé.
31Akaná e deš‐u‐donén igalél jekhé thané, vakerél lénge: Áke kadžás ándi Dis Jerusalím, so si e prorokéndar pišimé turjál e Manušéskere Čhavéste sa ka‐isponíndjovel.
32Sóske ka‐igálen les mamúi e gadžén, kaaprasán les, kamasán uprál les, kačungarén (čungáden) léske anglál e mos.
33Kamarén les thai kamudarén les, ko tréto diés kamuxtjél napálpale.
34Ol‐da hič nána axáljon, so phenél lénge, thai o vakeribé léskoro sar garavdó léndar isí, nána džanén so vakerél.
35E droméste bešél jek murš koŗó, sa mangél páres, thai ov Jerixonéstar nána dur sas.
36Šunél o koŗó kai anglál džal o naródos, phučél dekátar, ko si adavká kai nakjél.
37Vakerén léske: Nakjél o Ísus o Nazarethános.
38Ov‐da pištínel: Abé Ísus, tu kai sinján o Čho Davidéskoro, prostín‐ta mánge.
39O džené kai anglé nakjénas, vakerén léske: Táine, ma vikíne (láljof‐ta). Amí o koŗó sa pó‐zoralés vikínel: Ábe Ísus, tu kai sinján e Davidéskoro Čho, prostín‐ta mánge.
40Térdjol o Ísus, vakerél: Néka igálen les paš man. Igálen. Ov‐da léstar phučél:
41So mangés ta te keráv túke? Vakerél adavká: Góspodi, ta te dikháv.
42Phenél léske o Ísus: T’ovél túke to dikhibé. Spasindjás tut to pakjoibé.
43Andékhora aští dikhél o koŗó, džal palál les, e Devlés ašarindós. O naródos‐da hem dikhél hem e Devlés ašarél.
Currently Selected:
Lukéstar 18: ARL1912
Highlight
Share
Copy
Want to have your highlights saved across all your devices? Sign up or sign in
© British and Foreign Bible Society
