Lukéstar 12

1Kidisájlo o naródos, but šel manúš, paš les, tesnínen‐pes, but kai isí. Ov‐da liljás te vakerél: Nái‐anglé t’arakhjén tumén katár i majá e rašajéngeri, kai isí o dúi‐mujalipé.

2Amí so si učhardó kaphutérdjovel, thai so si garavdó sa kapendžárdjovel.

3Čoká ándo kaló (ándo tamló) so vakjerén, ándo parnó (ándo svétos) kašúndjol; so vakerén e kanénde ándi odája, uprál o kherá ka‐izvakerén.

4Phenáv tuménge, me parnavénge (me amalénge), má‐darán odolkéndar, kai e trupós čhinén, amá pále pánda naští kerén hič.

5Amí kasikaváv tuménge, kástar te trašán. T’ovél tumén okolkéstar traš, ov kai hem aští čhinél, hem pále ándo bengipé tumén čhivél. Va, odolkéstar t’ovél tumén traš.

6Nanái‐ii biknén panšé vrabčjén doné lovéntsa? Amí ni jekhés nána bistrél o Del.

7O balá‐dani te šeréste, sa géndjon, čoká ma trašán: but vrabčjéndar pó‐lačé sinjén.

8Amí tumén phenáv: Ko man pendžarél anglál e manušén, odolkés kapendžarél e Manušéskoro Čhavó anglál e Devléskere angelén.

9Amá ko man nána kapendžarél anglál e manušén, odolkés nána kapendžarél o Del anglál e Devléskere angelén.

10Amí ko vakerél kárig e Manušéskere Čhavés, aští prostíndjovel léske, amí ko e Sfjatoné Duxés akušél, odolkéske naští prostíndjovel.

11Tumén ándi kangerí kána igálen, thai anglál e pristavjénde thai anglál e gradinačalnikénde, ma‐xan xolí so kavakerén, savó džewábi kadén.

12Sóske kasikavél tumén o Sfjáti Dúxos andékhora, so te phenén.

13Phenél léske jek murš: Ábe Baréja, phen‐ta me phraléske, ta te ulavél mántsa savé lové, thai šéxja kai amaré dadéstar alé léske.

14Phenél léske: Múrša‐ba, ko kerdjás man súdnikos ta te ulaváv asál túke?

15Amí phenél e averénge: Dikhén‐ta: t’arakhjén tumén katár i žádnost, sostár níko nána dživél (traisarél) katár o barvalipé.

16Vakerél, phenél lénge jek paramísi: Siné jek barvaló manúš, isí‐da léske jek livádja barvalí,

17Kórkoŗo mislínel, phenél: So te keráv? Nanái mánge káte kídav o plódos.

18Phenél: Akavká te keráv: Kaphagáv mo távanos, jek pó‐baró te keráv, othé so uló mánge me barvalipnása berabér sa kakídav.

19Me duxéske kaphenáv: Duxéja‐mo, but mangín but beršénge isí túke, ma‐ker butí akaná, te xas, te piés, te lošánes.

20Amí phenél léske o Del: Levavdó kai sinján, adiká rat kalél tútar to vogí o Del, thai so kidinján káske k’oovél?

21Čoká ovél kána dek dženó kídel‐peske mangín, amí katár o Del nanái barvaló.

22Amá phenáv tuménge: Ma‐xan xolí asál tumaré džiipnáske, so kaxán, ni asál e trupóske, so ka‐urjavén.

23E xabnástar pó‐lačó isí o džiipé, e urjaibnástar pó‐lačó isí o trúpos.

24Dikhén‐ta e kargjén (garvanjén), nána čhivén o giv, nána kíden, nanái lénge ambári, távanos nanái, amí parvarél len o Del. Amí tumé e garvanjéndar kití var pó‐lačé sinjén?

25Ko aští kerél ta t’ovél jek kuní‐da pó‐vučó, mislindós naští kerél.

26Amí xaŗí xaŗí te naští kerés, so xas xolí ta te kerés so pó‐baró, thai pharó‐da isí?

27Dikhén‐ta e krinjén, (zambákja, luludjá) sar ovén thai bárjon; nána butjarén, nána motínen (nána khuvén). Amí phenáv tuménge: O Súliman (Sólomon), baró thai ašavdó kai sas, nána urjavdó sas sar asalké luludjáte.

28I čar‐da, avdiés kai bárjola ándi livádja, thai tasjá andé furnjá kačhívdjola, la‐da urjavél o Del, sar te na urjavél tumén, ábe bipakjanálen.

29Adžuká tumé‐da nanái te phučén: So‐li kaxás, so‐li kapiás; má‐uvén baribnása.

30Čoká kerén o gadžé, odovká‐da sa róden. Amí lačés džanél o Dad tumaró, kai mangén asalká.

31Amí nái‐anglé te róden, ta t’arakhjén o thagaripé e Devléskoro, thai pósle sa adavká kadéndjovel tuménge.

32Má‐darán, tsíkni tŭ́lpa, sostár mangél tumaró Dad te del tumén jek thagaripé.

33Bikinén‐ta so si tuménge, den‐ta e čoŗénge páres. Kerén‐ta tuménge gonén kai nána phúrjon thai mangín ándo nébos kai nána našáldjovel, káte nána avén o čorá, káte nána izxáljol džuvénde.

34Káte si to mangín, othé‐da k’oovél to vogí.

35Patjarkjarén‐ta tumaré xerá, šéxja, tharénta o fenérja, ándo vastá‐da t’ikerén.

36T’ovén sar džené kai žarén dži kai avél e biavéstar o Džamutró, ta te phuterén léske andékhora o vudár, kána čalavél.

37Baxtalé odolká xizmetkjárja, kai len arakhjél o Góspodos ándo žaribé (ándo nebéti). Čačés phenáv tuménge, mamúi kaavél, kabešavél len, maŗó ta te xan, nakindós kaslužínel len.

38T’aavél‐da ándo dúito nebéti, ili t’aavél ándo tréto nebéti thai t’arakhjél len čoká, baxtalé t’ovén odolká xizmetkjárja.

39Amí te džanén: E kheréskoro šeró te džanélas‐bi kití saxáti k’aavél o čor, ne‐li kakerél nebéti, nána kamukjél e čorén, ta te phagjén thai andré te den?

40Tumé‐da čoká gotóvo t’ovén, sostár k’aavél e Manušéskoro Čhavó, kití saxáti nána džanés, odovká saxáti kaavél.

41Phenél léske o Pétres: Góspodi, vakerés‐li aménge adavká, ili saoŗénge‐da?

42Phenél: Ko isí o vérno thai o godiavér xizmetdžís, thovél les o Góspodos uprál pe familiáte, ta te del lénge maŗó te xan kána trebínel.

43Baxtaló odovká slúga, kai les čoká k’arakhjél o Góspodos kána avél.

44Čačés phenáv tuménge: Kalél, kathovél les načálnikos uprál saoŗengerénde.

45Amí te phenél odovká slúga pe godjáte: Nána avél o Góspodos, lel, mudarél e xizmetkjarjén thai e sluginjén, xal piél, mató ovél,

46Andékhora kaavél adalké slugáskoro Góspodos ándo bidžanló vréme, kalél les, kadél les nagráda maškár e bipakjanénde.

47Odovká slúga kai džanélas so mangélas o Góspodos, amí nána hazîrladínel, so mangél nána kerél, odovká but dabá kaxál.

48Amí te na džanélas‐bi, xaŗí dabá kadikhél. Káske but dénjovel, léstar but ka‐izmángljovel. Káske diné but, pó‐but kamangén léstar.

49Áke aljóm, jag te bičhaláv e dünjáske, ne‐li mangáv ta te thábjol?

50Trébe te bóldjovav pó‐anglé jekhé bolipnása; amí trašáv dži kai na isponíndjovel.

51Mislínen tumé kai aljóm ta te dav lačipé thai míros e dünjáske? Phenáv tuménge: Nanái! Amí te dav maribé e dünjáske.

52Sostár akaná jekhé kheréste nána k’ovén lačés panš džené jekhethané. Amí k’oovén o trin kárig e donénde, o dúi‐da kárig e trinénde.

53O dad kárig e čhavéste, o čhavó kárig e dadéste, i dai kárig e čhaiáte, i čhai kárig e daiáte, i sasúj kárig lákere čhavéskere ŗomnjáte, adiká‐da kárig láte.

54Phenél‐da e narodóske: Jek balúti kána dikhés andé nebéskere rigáte, káte uxtjél o kham, džanés, phenés: Kaperél o brišín. Thai perél.

55I balvál kána dikhés kai phúdel katár o júgos, džanés k’oovél tatipé. Thai ovél.

56Litsemértsos, so si so nanái e dünjáskere nebóste sa axáljoves, amí adavká zamáni nan’ axáljoves?

57Amí kórkoŗo, so lačó si, sóstar nána džanés te sudínes?

58E düšmanjésa berabér kána džas mamúi e thagarés, ker‐ta lésa jek kundráti, ta te na igalél tut anglál e hakemjéste, ov‐da bičhalél tut e pristavjéste, ov‐da bičhalél tut e zandanjáte.

59Phenáv túke: Athár nána k’ íkljos dži ka te platínes e lovéndar o nái‐tsikno kotór.

Currently Selected:

Lukéstar 12: ARL1912

Highlight

Copy