Luk 22

Judas ata taba-lom kamok kamok imi bokoya-lomda: Yi, nata Yesus ayo dap-fatap daalokomi kayi, kalsa kaata ko

Mat 26:1-5, Mak 14:1-2, Jon 11:45-53

1Bret fuulip fasuulin disa kela inin kaami win kaali, boko-lomdip Pasova yo, ken-umbip kaami am uyo mep talan-sulule, 2tunum awem imi kamok kamok so, lo utamsip so, iyo taken-bamdipla, Kalok kanola-lomduwa, Yesus kaa aalum i? kemip. Yale, unang tunum yaapkan kiita, Jerusalam kaptamu tala-tala-ke-lom, ang dinan tala-bilipla kemin, numi balaayin-bamdip yemilip o! kalalip, iyo suun-daa-lomdip maaklo kuwakamin liip kaata fen-bam ilip ko.

3Abip Keriot kayaak Judas ali Yesus ami daang bakaalin tunum talangkal iso nikil maakup okok kemin tunum la, Setaan ayo tal yak Judas ami aket tem un-ilomda ku-mafak-daalala utamala, 4kamok kamok iyo kanolum o, kebip kala, kalba-kup, kulaa din itama, awem tunum kamok kamok iso, lotu am diilim kaptam-ami soldiya imi kamok kamok so, kiimi kalaan din bokoya ko: Nali Yesus kulaa dabaayi yak kipni sikil diim abam-nokoma kaptoop-ami liip kaata fenbi no, yakale, 5kwin! iyo weng sandiwa, imi aket tem kaayo, atin tangbal ma keyilula, iyo bokola-lomdip: Sisol kabak-ami weng kaata, boko-lomdupla dotu kutiip-tup salala kup-tum o, akiwale, fan 6Judas ayo imi weng bokolip ayo, weng san-ilomda, Ayo, yaka-lomda, bokola: Yi, siin atamila, unang tunum yaapkan iyo tiin kuwaalip kala, kala-lomdila kawu, Yesus ayo maaklo dabaayilila, yak kamok kamok kipni sikil diim abak o! yakalala, din liip fen-tal-unema ko.

Daang bakaalin tunum alep ma Pasova inokomip kaami mafek mafek talalu ku-mikil daasip kaata ko

Mat 26:17-25, Mak 14:12-21, Jon 13:21-30

7Kulaa, bret fuu-bilip faskaamin disa ke-bala, inin kaami iintang am uyo daan tiltam tulule, Juda kasel imi kukup uyo ti kanumin kemin, Pasova am daan-laaba kaali, sipsip man iyo aa-bam fuu-bam inin kemin, 8asuk kaami am uyo daanule, Yesus ayo Pita so, Jon so, alep imi bokoya-lomda: Alep kipta dindip Pasova inokomup kaami mafek mafek iyo talalu kutii kemipla, nuyo din unupla alimal tiin-bom inum o, yakale, 9ili bokola-lomdip: Din ilom am kaa doku-bomdup inin kaa talal-bam dotmupla, din unokomip i? akiwa 10ayo bokoya-lomda: Nayo kabak-ami weng ma bokoyokomi kemin, weng san bom iliwa! Alep ibi din Jerusalam aba kem-siliple, okok kemin tunum ma tal ita-mokoma kemin, ami atamipla, ali unang imi ok lan-umbip tap ke ok ket dukum ma tawaal ta talalusip kaptoowu ok iluu kutam dabom diim tii kulii-talaba ami daang tem kawu, yak ami daang bakaalip, din am unokoma kaali, ti kipso aso tam am abale, 11am kayaak ali kutamu bombe kemin bokola-lomdip: Yi, numi kukuyin tunum ayo weng ma kup-ta nuli kulii-tulup kemin, ali bokop-ta-lomda: Kapni am kultamu am anung ma kiin ukuyilawa, nami daang bakaalin tunum iso naso kaptamu bomdup nokol Pasova uyo inamnum o, kalaya tulup o, kala kanum bokola tulup te! kala bokolipla, 12kulaa, am kayaak ayo kipni weng uyo weng sanba-kup, yim-bitam am tip kaptoowu am anung dukum ma kabang-ata kukuyila utam talaalipla, ima fuumin kaami mafek mafek alik ti kaptamu bom-bilip kala, kalalipla, kaptamu inin-inin iyo talal-bam iliwa yo, yaka-lomda 13alep yim-baala din uliwa, Yesus ami weng bokoya tulup ayo, tifan tituun-kup kelu kala, kalale, Pasova kaami inin-inin iyo kaptamu talal-bam fuumip ko.

Yesus ayo daang bakaalin tunum imi bret so, wain wok so, kuyinsa kaata ko

Mat 26:26-30, Mak 14:22-26, 1Kor 11:23-25, 1Kor 10:16-21, Hib 9:19-22

14Bom bii atan uyo yak tem unula, Yesus ayo almi daang bakaalin tunum iso, iyo tal Jerusalam am ukduu kuyinbip kaptamu tiin-bomdipla, ima im-bom ale, 15kulu almi daang bakaalin tunum iyo bokoya-lomda: Nami aket dukum fukunbi kaali, angtiil yol ayo kuluu-lomdi saaknin disa, ilomdila kawu, kipso Pasova ima kaa ina-lomdila yo! kalbi no. 16Nami weng kala bokoyokomi kaa, ibi weng san iliwa. Kamala kulaata nali mafiing mafiing kipso tiin-bom Pasova ayo inbi kaa, tawaal diim kalawaali maso ma inam-nomi disa; kuno kela bom-bili bii, am ma daanula kawu, Atok God ata alik tiin molokoma kaali, Pasova kaami miit ayo ku-fatap-daalokoma kabaku, asuk Pasova uyo maso ma inam-nokomi no, kala-lom kanum bokoyinsa ko.

17Yesus ayo wain ok ayo kaap tem iluu kutii kela God, Ami yaap ke yo anba-kup, kulaa almi daang bakaalin tunum imi kuya bokoya-lomda: Wain ok kalawaali, kuluu-lom ma asiik inamna inamna kelin o, yaka kanoya inam-niple, 18bokoya: Weng selin! Nali kamala kaali, wain ok kalawaali maso ma inam-nokomi disa; kuno kela bom biili dok kanumin diim kabaku God ami unang tunum alik iyo tiin molokoma kawu, asuk tiltam tulu kala, kalaliya kawu, inam-nokomi kayi! yakale, 19kulaa, bret uyo kuluuba-kup, God ami yaap ke yo, anba-kup, lo kutii almi daang bakaalin tunum imi kuya-lom, bokoya-lomda: Bret kalawaali nalmi tiil ultap [kemin, kipni iliim kabak-ata boyon o, kalalila, nalmi tiil kala kuyokomi kaa mep ima bret kuyokomi kaluuli kuluu inamnin aa! Ilom am ma daanula kawu, asuk inokomip kaali, asuk nalmi tiil kuumi aket kaata, fanang daka-bamdiwa inin o, kala-somla ko. 20Kanola Pasova ima ayo inamnip disa kelule, Yesus ayo wain wok ma iluu kuyinba-kup bokoya-lomda: Wain ok kalawaali nalmi kiim alaltap kemin, nami nelip taanila, nami kiim sing-tam-daa tildaak abam-nokomu kaali, ipkal utamiwa yi, Ipni iliim uta boyon o, kalalila, nalmi kiim ayo kamboli sing-tam-daalu kala kalaliwa, yak God ami weng alokso kaa kutiisa uyo, fan tiltam duuk-kup dakat kalu nu, kalokomip kayi! yaka ko.]

21Kanumin sang uyo kanum bokoyinba-kup, weng akal alik ma ayo bokola: Nak-tunum kusal, kibi weng selin. Tunum ma nam-fatap-daa nam-baala yak nami waasi kep-ninsip imi sikil diim abam-nokomi ali naso tiin-bom ima imbup. Kemin, 22siin sawaayak kawu, God ami aket fukunin ayo, Nami Man kaali, dabaali daak unokoma ayo, kanola taanokoma kayi! kalsa. Yale, dok nolin tunum ma ata Dukum Ami Man nam-fatap-daalokoma kaata ti, almi uluum tem diinokoma kayi! kala, Yesus ayo kanum bokoyilala, 23almi daang bakaalin tunum iyo weng sandiwa, nikil iyo aket uluum tabeyule, dik-daala una-tala ke-bam ale, bokolip: Nikil numi iipyak tem kultam bombe kaa, dok kanolin tunum kaata dap-fatap daalokoma ni? Ken-una-tala-kemip ko.

Yesus ami daang bakaalin tunum iyo boko-lomdip, Nuli kawanta ma tiltam dabom ke-lokoma ni?

Mat 18:1-5, 20:25-28, 23:11-12, Mak 9:33-35, Luk 9:46-48, 14:11

24Yesus ami daang bakaalin tunum iyo weng aal dikin-una-tala-ke-bam boko-lomdip: Nulmi tunum kaa, kanata ma tiltam numi dabom ke-lokoma ni? kemipla 25Yesus ayo bokoya-lomda: Tawaal diim kalawaami God ami lak duu-laamin disa tunum kiimi kamok kamok ili tunum unang titil-kup tabin kukup kaata, fuku-bomdiwa tiin saan-tabasip. Kemin, imi aket fukunin kaali, unang tunum kiita, numi tong kaata-kup bakayin o, kal-bomdiwa, disa iip bakayin-bamdip: Nuli unang tunum kipni dong dakaayin tunum o, kem-laabip. Lale, 26ibi imi kukup kanun-umbip kaa kipkal utabip-kup kanumin disa; kemin, dok kanolin kapta talaba tam kaptum kusal imi dabom kelap namti, kabi ti, Nalta-kup o, kalalawa, kaptum kusal kii titil eng kaa bakayin disa; ti ilmi niing alaltap kelawa, kaptum kusal imi ok tabuulin tunum tap tambal-kup tiin molokomap kaata, fan mokso ke-lokomu; le kabi talaba tam kaptum kusal imi kamokim kelap kaa disa kawu tiin-yaamin disa; kaptum kusal imi ok tabuulin tunum kelawa, dong dakaayin-balawa yo! yaka. 27Kemin, tunum win tibin asole, almi okok kemin tunum iso, imi kukup kaali, kipkal utamsip, tiin-bomda naan-balala, ima kutal dakan-bala inba kaata, tunum win tibin elile, yak ima ifa kulii-tala ata tunum win tibin e? Kulaaye? tiin-bomda ima inba kaata, tunum win tibin. Yale, nali kipso laabi kaali, nali ma kanun-umbi dinim; kemin, okok kemin tunum tap ke-lomdila, nali kipni dong dakaayila-yaabi.

28Kukup mafak tiltam nami diim aben-umbu kaa, ibi nili kep-nansip disa; ibi ti suunkup nami diim kaldaku fewa-laabip te! 29-30Kulaa, Atok ami kanop-ninsa ultap ke-somdila, nakal ti ibi kanoyokomi. God alta uldaa-nam-buu-lomda, almi titil ayo kup-ninsa. Kemin, ami win diim kawu unang tunum iyo tiin molokomi. Kemin ultap o. Am ma daanala kawu, ipyo yim-buu-lomdi yim-bii din nami abip kawu, ipso naso maakup tiin-bom ima inbi-lomdup, titil kuyila, nami win diim kawu, Israel imi tunum miit talangkal iyo ipkal taba-lom miit maakup e kala, tiin mola tiin mola ke-lomdip yim-bak-saanokomip o, kala Yesus almi daang bakaalin tunum imi kanum bakayila ko.

Yesus ayo Pita ami bokola-lomda: Kabi bokop-na-lom: Nali kaa ma atamsi disa yo, nokokomap o, ansa kaata ko

Mat 26:31-35, Mak 14:27-31, Jon 13:36-38, Jon 17:9-15, 21:15-17

31Yesus ayo Pita ami bokola-lomda: Nak-tunum Saimon aa, kabi weng san ilawa! Setaan ali alik ibi yam-kuku-bamdala, Awu, kibi God ami man e nalmi man e yokon o kalala, God ami dik-daalaya, God ali, Ayo, kala kemin, tunum ma wiit lap kiiyo foko tam-aba-tildaak-aba ke-bilipla, bulung iyo, takela yak ban-ilomdip, tiil kaata-kup daak kabas diim abebip ilaltap ke, Setaan akal yim-baala tam aba daak aba ke-bam yam-kukulala, ibi kulii daak abokomip kayi! 32Lale, nalile God ami beten kamaan-bam ale bokola-lom: Atok kapyo, Setaan ata Saimon ami dap-kululala kanolokoma kemin, kabi dong dokolapla, ami kukup mafak uyo taba-lomdu ami lak dakaamin kaa ku-mafak-daalamu disa yo, kal-bomdi beten kebi. Kemin, ilomdapla kawu, kabi asuk aket fal-siki-lomdap, aket kup-nokomap kabaku, kapni aket fukunin uyo bam-daap-tokomu kawu, kaptum kusal iyo dong dakaayin-balapya, imi aket fukunin uyo baayilula, titil-fokolik o, kala Yesus ayo Pita ami kanum bakaala ko. 33Pita asiik bokola-lomda: Kamokim aa! Nali ti kapso maakup kuno yim-tama din kalabus am daalalip. Katale, kapni diim kawu ti fep-nami le, kuno kapso alep maakup yelalip. Katale, kuno nakal ti yak kapni diim kawu fep-nami no! kemale, 34Yesus ayo Pita ami bokola-lomda: Pita kawe, kabi talalu weng san ilawa! Nali bokop-ton: Kutim malang tem kawu, awon kakaruk ayo naan-tabin disa ilala, kabi, Ni kaa ma atamsi disa yo, nakan-kaabi du asuumano fak-daalokomap te! aka ko.

Yesus ami daang bakaalin tunum imi bokoya-lomda: Kama kuluwaata kuno bung so kulii-talemin o, yinsa kaata ko

Luk 9:3, 10:4, 23:32-33

35Kulaa, Yesus alami daang bakaalin tunum imi dik-daaya-lomda, Siin kaali, bokoya-lomdi: Ibi moni so, ima men so, yaan-alom kiiso, kulii bomdip, nami ok kaa okok kem-tal-unemin disa yo kala, dil mo-lom, yim-baali tal-unemsip kaa, mafek mafek so ma iiwa-silip ema? kala, dik-daayilale, Yi, disa. Mafek mafek so ma iiwa-sulup disa yo, akiwale, 36Yesus ayo bokoya-lomda: Kamala kula tiinbup kaali, ukol ulmi kusnum. Moni, ima men, kulaa bom-bilip namti, kuno kulii ale, bainat ayo disa yo, kalip namti, iltipni ilim saket kulaata dulduu kulin tiilipla, tunum kusnum ita tam mo-lom kabak-ami moni kaata kuluu-lomdip, bainat ayo mo kulii bomdiwa tal-unemalip kayi! 37Kemin, kibi nami weng kulaa, weng san iliwa! God ami Sukon Tem kabak-ali boko-lomdu:

Kiili kukup mafak kaali, fuut tabin imi kukaayila-yaabip ultap ke, tunum kaami konsip kayi!

kalsu kulaa nalmi sang kulaata bokosu te! God ami Sukon Tem alik nami sang bokosu uyo ti mepso dik-tam-daa tiltam tolon e, kalbu kemin ale, kanolin kukup mafak uyo mepso kukaap-nokomip o, kala kanum bokoyale, 38almi daang bakaalin tunum iyo weng san-ilom bokolip: Kamokim aa, ti kala daatama bainat alep kala bom bilip kalaayo, akiple, Yesus ayo utama yi, Daang bakaalin tunum iyo kukup mafak tildak nami angtiil diim tildak abokomu uyo talalu utamin disa ke-bom bakabip o, kala, kala-lom, bokoya-lomda: Ti, bokoli kemin ti te.

Yesus ayo tam amdu Oliv Tikiin bomda beten kemsa kaata ko

Mat 26:36-46, Mak 14:32-42

39Yesus ayo amdu Oliv Tikiin kawu ti suunkup God ami naan-bam beten kamaalin-kup ken-umba kemin, kaami kutamiip kulu almi kukup kanun-umba kaata-kup kuluu-lomda, daang bakaalin tunum iyo foko kuliila Jerusalam ayo kambo kela, Oliv Tikiin kawu 40alimal din abale bokoya-lomda: Kukup mafak uyo tal yam-kukulon o, kalalula abiltap tal kipni diim abam-nokomu kemin, ibi God kaa beten kamaan-bam, dik-dakaan-biliwa, ata dong dakaayin-balala, ban kemin kukup uyo tal ipni diim abemin kaa, uktayuk o, yimba-kup, 41alami daang bakaalin tunum iyo kulu bom ilipla, keya mep yang kulu tilik duung fakela daak tiin God ayo beten kamaan-bam bokola: 42Atok God kapyo, mep kukup mafak tiltam nami diim talon o, kalbu kuluuyo, kaltapni san kemin, dil molan o, kalap namti, dil molawa kawu, nayo angtiil yol kaa kuluulin disa kelon o. Nali mep kanolin kukup uyo tal nami angtiil diim kaa abemin disa yo, kalbi. Lale, nami fanang daka-bamdi Aatumen kabi kabak-ata dil moyawa, kep-nuk o, kebi kaali, kabi kuluu kanumin disa; kaltapni aket fukunbap kaata-kup kuluu kanumon o, kalolap kaali ti yaap o, kal-bomda beten 43kem-salale, [kulaa, ensel ma tildaak-ilomda dong dokola-lom, dap-titil diilale, 44Yesus ayo kwin! angtiil mamin dukum kaata disa akal ma ok fon tap kelule, aket uluum dukum uyo kuluu-lomda asuk God beten kamaan-bam, almi aket uluum kuluula, kaami sang kaata, bakaan-bam kem-salale, ami mamin ayo kiim tap ke-lom dung-dung-ke-balala,] 45beten kemsi kelale, din ulala, Kwin! almi daang bakaalin tunum namti aket uluum-kup keya-lomdu, daal-kup tabeyu akan-fak-liibip kala kalale, 46kulaa, yam-kafalna tam tiinip bokoya-lomda: Ipyaa! Ibi akan-unemin disa te! Mafek mafek mafak tal yam-kula molokomu kemin, baan tam tiin God kaa naan-bamdiwa yo, kala Yesus ayo kanum bakayila ko.

Judas ata taba-lom Yesus ami dabaala yak waasi imi sikil diim abasa kaata ko

Mat 26:47-56, Mak 14:43-50, Jon 18:3-11

47Yesus ayo kanumin sang bakayin-salale, kulu tunum yaapkan iyo tilip. Judas ali Yesus almi kalaan tunum kelala, nikil talangkal ke-bom tal-banen-umbip ata, kulaa Yesus ami bombe bokon kaayo, liip kukulala tal-ilomdip, kula Judas ayo tal Yesus ayo dap-kiil-mon o, kalala, bital mepso kulu talale, 48Yesus ayo bokola-lomda: Nak-tunum Judas kapyo, kabi tal-ilomdap Dukum Ami Man Nayo, nam-kiila tal-bomdawa, nam-fatap-daa dabaali yak waasi imi sikil diim abamnak o, kalalawa, tal nam-kiil-mon o, kebap ema? kala, kanum bokola ko.

49Yesus ami daang bakaalin tunum aso bom-bilip ili tunum kii, itamip yi, Yesus ayo dap-tal-fukulum o, kalbip kala, kala-lom Yesus ami bokola-lomdip: Kamokim kapyo, nokol nulmi bainat ta ma kuluu-lomdup yemalup yoko? akiwale, 50awem tunum imi dabom ami ok tabuulin tunum ma bombe kemin, daang bakaalin tunum ma ata almi bainat ayo kuluu-lomda, mep tunum kaami talang-kaal tiing tup kaayo, tuk-duu kulaala daak abamnale, 51Yesus ayo atam-ilomda, daang bakaalin tunum imi yim-bak-saan-bam ale, bokoya-lomda: Kaa kanumin disa yo, yaka-lomda, tunum kaami talang-kaal kaayo, kutal-fukula, asuk tambal ma ke-lom mokso kelu ko.

52Kemin, awem tunum imi kamok kamok aye, lotu am diilim kaptam-ami soldiya imi kamok kamok, aa saak yak kamok kamok malo ma kii bom-bilip kiita, tal-ilomdip Yesus ayo dap-tal-fukulum o, kalalip tal tolniwale, Yesus ayo bokoya-lomda: Kipni aket fukunbip kaa nali, Banengim tunum atulim o, kalaliwa, nami atul kaata, ipyo suun-daa-lomdip wan so, bainat so, as sukum so, kiita, daka-bi-lom kulii-tal nam-tal-fukulum o, kalalip baa tal akip-nip o? 53Am yaapkan daan-laabu kaa, nali lotu am diilim kaptam tiin-bomdi unang tunum ili kaa suunkup kukuyin-bilila, kaa nitam nitam ken-umbip. La, ibi tal kaptamu nam-tal-fuku sok dep-nin disa nosip. Kata, kamala kulu God ayo kutamiip kaami miit tiin saanin tunum Setaan ayo kambolala, almi aket fukunin ayo kipni kuya-lom, dong dokoyilala, Kanumum o! kalalipla, Awu, numi liip uyo bombuu nu, kala-lomdipla, baa tal nam-tal-fukulum o, kalalipla, tilip o kala, Yesus ayo kamok kamok imi kanum bokoyila ko.

Yesus kaa, Ni ma atamsi disa yo, kala Pita ami ibakamsa kaata ko

Mat 26:57-58,69-75, Mak 14:53-54,66-72, Jon 18:12-18,25-27

54Yesus ayo kanum bakayinsi kamboyilale, soldiya iyo yak dap-tal-fuku dap-tamalip dibii yak aba din abip tam-ilom awem tunum imi dabom ami am kaptam uniwale, Pita ayo samaan so kaptoowu tip-tal tip-tal yak aba tam 55awem tunum imi dabom ami uti daam tem ula, Okok kemin tunum iyo abip daal iip kabaaku as kuyak daalip kiin-balala, tunum malo ma tal tiin-bomdip wing tiil ayo falala kuyak mobip kaa kalba-kup, akal yang itama iso tiin-bom diil fuumipla, 56ok tabuulin unang ma ukol atam talaalu yi, Ayo tal as dawang falala kalba kabaaku tiinba kala, kala-lomdu tiyak daa talalu atam ale kulaa, tunum kulu tiinbip imi bokoya-lomdu: Kipyo, mep tunum kula tal tiinba kuluwaali, Yesus ami daang bakaalin tunum te! yukule, 57Pita ayo yawaal daa-lom bokowa-lomda: Kupyo, nali tunum kaa ma atamsi disa yo! wakale, 58bom ilanale, tunum ma ayo Pita ami atam ale bokola: Kabi ti mep tunum kaami daang bakaalin tunum te! akale, Pita asiik asuk bokola-lomda: Kapyo, nali ti atin disa te! aka-lomda 59tiin bom ilale, tunum kusnum ma asiik tal bokola-lomda: Nali mep tunum kalawaami weng bakaba kaali, weng seliya, Provins Galili kayaak o, kali kemin, kaali Provins Galili kayaak Yesus ami daang bakaalin tunum o! kala, ti kanum bokola bokola kemale, 60Pita asiik bokola-lomda: Kapyo, kapni weng bakabap kaali, nali weng san-ilomdila, kabak dok kanolin sang kaata ma bakabap o, kalbi disa te! kalale, kulu maak fak-daalin tap, awon kakaruk aalap ayo naan-taba ko. 61Kamokim Yesus ayo kuyaku fal-siki tiyak-daa Pita ayo talalu atafiimale, ayo asuk aket fanang daala yi, Awu, Yesus ami kamasi bokop-na-lomda: Awon kakaruk aalap ayo naan-tabin dinim kama bom ilala, Pita kabi nami sang ayo bokop-na-lom: Ni kaa ma atamsi disa yo, naka-naka kemsi liip asuumano fak-daalokomap o, namba kaali, fan kaa kanoli kala aket fuku-daa-lom 62utama yi, Kwin! Fan, Yesus ami win kaali, kuwaala-lomdi, Kaa ma atamsi disa yo, kali kaali, atin ti kukup mafak kaata kuluu-lomdila, kanum bokoli kawi! kalalala, keya tam daak uti am kaba-lomda dukum-kup iin-bam amama ko.

Soldiya imi Yesus atafiimin weng uyo bakaan-bamdip biwakamsip kaata ko

Mat 26:67-68, Mak 14:65

63Soldiya Yesus ami tiin mobip iyo Yesus ami atafiimin weng bakaan-bam biwakamiple, 64kanolin kukup kaata kanu-bamdip, Yesus ami tiin matum ayo ilim ta kuluu de-lomdip, aa-bamale, atafiimin weng uyo, boko-lom: Kabi kamboyap unang tunum ili bokop-ta-lomdip: Kabi God ami weng ku-fatap-daa bakayin tunum o, ken-umbip. Yale, kabi talalu utamsap namti kulu balap ema? Kapyo, tunum ma tal tela kaata bokoya-lomdap, kaali ata tal nelan i? yakawa, atamum o, akan-kaa-bamdip 65saak weng mafak disa akal almi weng mafak mafak kiita bakaan-bam kemip ko.

Juda kamok kamok iyo Yesus ami dibii-din-ilomdip talalu atafii-bam dik-dakaansip kaata ko

Mat 26:59-66, Mak 14:55-64, Jon 18:19-24

66Kulaa, am daanale kawu, Juda imi kamok kamok iso, awem tunum imi kamok kamok lo utamsip tunum iso, iyo weng bakamum o, kala, tala-tala-ke-lomdip tal ilmi weng bakamin am kaptamu tal tiin-ilomdip, soldiya iyo Yesus ayo dibii-din imi diim daaliple, 67kamok kamok iyo Yesus ami bokola-lomdip: Kalo, kabi bakayan o! Kabi God ami ulduusa tunum Kraist ema? akipla, Yesus asiik bokoya-lomda: Nali bokoya-lomdi: Nali God ami ulduula-nam-buusa tunum Kraist o, kalokomi kaali, ibi kabak tifan bakaba no, kalokomip dinim. 68Kanolin ultap kemin, nakal weng ma dik-daayokomi uyo, ibi maan tiip-nokomip disa. Yale, 69nali weng kulawuuta-kup bokoyon o, kalalila, kamala kulawu kulii yak aba kaptoop unokomu kaali, Dukum Ami Man Nali, Kamokim ami tiin-laamin baan diim ayo kuluu-lomdila, titil-kup tabasa God ami sikil tingtup diim kabaku tiinokomi no, kala kanum bokoyale, 70alik iyo bokola-lomdip: Yak kanum bokolap kaa: Nali God ami Man o, kala bokolap ema? akiwale, Yesus asiik maan tiiyila-lomda: Ipni kabak-ami bokop-nip kabak-ali ti fan te! yakale, 71ilmi weng-kup boko-una-tala-ke-bam bokolip: Nuli almi weng bokola kuu, nulmi talang tem alep alep weng sanup yi, Ali fan ban kemin tunum o, akup kemin, nuli tunum ma fen-bam atamupla, ata Yesus ami sang kaali maso ma bokoyokoma dinim o, kala ilmi weng-kup bakamip ko.

Currently Selected:

Luk 22: TIF

Highlight

Copy