Mak 16
16
Yesus Itlang Yi
(Matyu 28.1-8 pe Luk 24.1-12 pe Jon 20.1-10)
1Sabat inum ti idu mundroi ile pwoi odo Sarere pehon. Eri pe Maria odo Makdala, Maria tinen Jems, pe Salome hala pe hesihnen ndronun sane ndre menehun huye’ sa tih. Su hapa we hokuni hala pe halara‑ai kile mundren Yesus.
2Ile pe idu Sande maping ndre lik eri su hala ngat. 3Su ma ndre honu‑us sal ti hapa ihpah, “Kede si lau we kihnuwii tidu pe kinurwon pat ke‑eu odo pohngat tih?” 4Odoke su hapa mada’ su kile ti pe pat mandra‑an ndre idu pohngat ti indra‑au, pe lon ngat idu kopwi. 5Su hoportai hala pe ndresale hala lon ngat. Pe su hehretek tan orngon homou eleheu iduwe kolos peren pe imin pwoi imin lon ngat, ile lumwei mudon ea.
6Pe iy ipe ile ta su ihpah, “Oduu edehretek kolwii. Yu tuno, oduu ti edempondrih Yesus odo Nasaret ndre sa hopo nilim Iy ise kei tondrih pe Iy imet tih. Iy indrimin keti pwi! Iy indretalang yi! Etndre‑et oh, ndruhun ndre sa heduwe Iy iyin eriy ti kutih. 7Oduu atla ndrongom Pita pe su disaipel se yi ti, pe etlaninen kile ta su. Atlapa kile ta su kihpah, “Iy we kinemunen kile Galili. Oduu we atla pe atlandre‑et Iy odo eriy, ihpa ndre Iy ipe pihe ile ta oduu tih.”
8Su pedih ti honoh ile mo‑on. Su henehreretek pe hohtot ha‑au. Su hendreninen inna ta homou lau pwi odosa su honoh ile mo‑on.
# 16.8 Idu 16.9‑20 eri sa sape ndramat sulo‑on hapa Mak indritatorwei pwi. Su hapa ndramat homou yi idetorwei idu omur. Sa sape ndramat se hapa nolou sehir murun yi into ndruhun nolou ertih. Nolou erti ihpah, “Ile pe su pedih kuti halpa ile tam Pita pe su se yi tih. Su henen nolou ndre orngon eleheu imin ngat ipe ile ta su tih. Ndre omur ti pe Yesus Iy ndre Iy ile pe ipe ile ta su, ipe su hala lokpoi ndre mandra‑an pe henen. Yesus ipe su henen nolwo‑on Lapan ndre Lapan ipe kikuni yi ndre sa ndramat hala hun Iy tih. Nolou kuti nolwo‑on Lapan pe we kindrinum pwi.” Yesus Ihir Ile Madan Maria Odo Makdala
(Matyu 28.9-10 pe Jon 20.11-18)
9Yesus itlang yi idu Sande maping ndrelik. Pe Iy ihir ile ndrongo Maria odo Makdala. Pihe ti Yesus iyes sinel ndre ndrotulmuu odo pule‑en tih. 10Maria odo Makdala ile pe ilninen ile ta su lewen Yesus. Su hantang pe henemutuu hodo, 11pe Maria odo Makdala ilninen ile ta su. Iy inen ipe Yesus ti inna ndre moren pe ihir ndrongon iy. Odoke su hondrupo bilip ile tadan pwi.
Yesus Ihir Ndrongo Horu Disaipel Rumuu Odo Sal
(Luk 24.13-35)
12Idu ndruwen kurti pe horu disaipel rumuu herenelila odo sal, pe Yesus ihir ndrongo horu ile handrai yi. 13Pe horu harlaninen ile ta su disaipel se yi tih. Odoke su hondrupo bilip ile ta horu pwi.
Yesus Ihir Ile hu Su Disaipel Ndre Sungoh-pe-Homou
(Matyu 28.16-20 pe Luk 24.36-49 pe Jon 20.19-23)
14Inum pe Yesus ke ilihir ile ndrongo su disaipel ndre sungoh-pe-homou. Su hana‑an song, idu Iy ihir ile hu su tih. Iy ihrurute ile ta su, odosa su tasu bilip pwi. Pe idu sa henen ile ta su, hapa Iy indretalang yi ti pe su hondrupo bilip pwi yi.
15Pe Yesus ipe ile ta su ihpah, “Oduu atla lokpoi ndre mandra‑an pe etninen gutnius kile ta sa ndramat ndre sulo‑on. 16Ndramat ndre kipu bilip pe kipu baptais, eri Lapan we kikuni iy yi. Odoke iy ndramat ndre kindripo bilip pwi, eri we Lapan ki‑es iy. 17Lapan we kiduwe puko‑on kile ta su ndre hopo bilip ti pe su we hepupu‑uh mirakulo. Su we ha‑as sinel kile rongo, pe su we hosohou nolou handrai yi. 18Su we hondrutou mot. Su we he‑ing sane ndre ihnanan ndramat imat, odoke we handrimat pwi. Su we heduwe lumwe’ su kile pule‑e’ sa lau sik, pe sa we hala huye’ sa.”
Maryan Yesus Indrinum pe Lapan Ikuni Iy Ile ndre Heven
(Luk 24.50-53 pe Aposel 1.9-11)
19Lapan Yesus isohou ile ta su oh, pe Lapan ikuni Iy ile heven. Pe Iy ile ndre ndruhun ise lumwen Lapan mudon. 20Inum pe su disaipel hala lok ndre sulo‑on. Pe hepehre Nolwo‑on Lapan ile ta sa lau. Lapan immin ndroda su disaipel, pe inahnan mirakulo hehir, ile pe sa lau henehtuno sa ihpa ndre Nolwo‑on Lapan su hentudou ti ndre ndrokene lakopwi.
Currently Selected:
Mak 16: KTM
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.