Mak 13

Yesus Ipe Omwen Surok Mandra‑an Ti Sa We Hatparan

(Matyu 24.1-2 pe Luk 21.5-6)

1Yesus iyeu odo lon omwen surok mandra‑an pe illa ise kiu. Iy ise ndre mahun ti pe disaipel Tadan homou madan ile ndre omwen surok pe imesi‑iy ihpah, “Ye orkom. Tisa, omwen surok ti mandra‑an le. Rahyen tadan ti ndre ilsou lakopwi. Sa hotmon um sim pe sim holto lon sariyen ti ile ke pat, pe we handranon hendretapar pwi.”

2Yesus ipe ihpah, “Eneltuwe um mandra‑ane sim pe sim holto kitih? Sih pat we kindrimin ndruhun pwi. Sa we hatparan ndre sulo‑on odo ndrohu’ su pe we hesarpat hala poi.”

Yesus Ipe Su Lewen Ti We Hokun Pede‑en Sulo‑on

(Matyu 24.3-14 pe Luk 21.7-19)

3Yesus imin pwoi odo malal Oliv. Malal erti honto eriy ti pe henendre‑et ile hodoh ile pule‑en omwen surok odo Yerusalem. Pita kopwi, ndrodan ndre Jems pe Jon pe Andrew hala koson, pe hapa ile Tadan ihpah, 4“Tisa, apahran kile ta odu. Sane Ou ampa kiti we hehir kalmene‑e sa? Pe sa mandra‑an we kihir ki‑in munen oh pe sane Ou ampa kiti we hehir?”

5Yesus ipe ile ta su ihpah, “Edempahar pe mada’ oduu kise eleng, kihne sa lau hadawiwihi oduu. 6Lau sulo‑on we hopo sane kile rongo pe hapa kihpah, ‘Yu ti Iy,’ pe we hoposahi sa lau sulo‑on. 7Oduu we atahrung kaunan pahun odo lok mukehe pe pahun odo lok alau, odoke otnoh kolwii. Sane kiti Lapan ipe we hehir, odoke iy erti rang omur ti pwi. 8Kantri we hopo pahun. King homou we kipu pahun kile pule‑en king homou. Nunuw mandra‑ane we hehir odo lokpoi. Pe song we honum. Sane kiti hahpa ndre ngendre‑en ndre pedih ipe kitou nedun pe inehkalmanan.

9“Oduu lewi ti mada’ oduu kise eleng. Sa we hondrotowe oduu pe we helilyan oduu. Sa we hapwi oduu odo lon omwen surok. Oduu ti lau Todo, ile pe sa we herwi oduu atla mada’ sa king pe kapman, pe uh ndre etlato mada’ su eri etpehre gutnius Todo. 10Gutnius Todo ti we ndre kinna ta sa lau ndre sulo‑on odo lokpoi oh, kinum pe rang omur we kihir. 11Pe uh sa hohrus kile ta oduu pe hokuni oduu kile madan kot, eri nombrun atawene hudut kile nolou sa oduu we atpa tih. Nolou sa ndre kihir pala’ oduu eri atpa kopwi, odosa sohou ndre oduu atpa ti suhwo’ oduu pwi. Lapan Mulwen we kiduwe tawene kile ta oduu pe oduu etsohou kile tan kot.

12“Sa ndramat se we helilyan ke ndre tinto’ su, pe we hahtakalan sa lau hapwi su hamat. Sa tamai ti we hopo kihpa erti kile ta su nedu’ su ti yi. Pe su kom ti we hehmbore su tama’ su, pe tine’ su, pe we hehtakalan sa lau hapwi su hamat. 13Sa ndre sulo‑on we anan ke sa oduu odosa oduu ti Todo tih. Odoke iy si ta oduu ndre kipkwe uu kenon ndre rang omur, eri Lapan we kikuni iy.”

Hangka‑an Mo‑on Mo‑on We Kihir Yerusalem

(Matyu 24.15-28 pe Luk 21.20-24)

14“Oduu we edeltuwe hangka‑an mo‑on mo‑on we kihir, pe lok ndre ka‑an ti idu eriy, eri ndruhun ti pwi.” (Ou si ndre ompo ritim nolou kuti ohtunom kehii.) “Kidu ka‑an mo‑on kuti kihir, eri ou si ndre emin distrik odo Yuda ti oportai owou ala puliy. 15Ou si ndre enemiyau emin mbrungyen um, eri nombrun ala yi lon um pe altakun hangka‑an. 16Si kamal ndre kimpo marai kimin langah ti kile yi um pe kiltakun hene pulngiyen kolwii. 17Kidu mundrun eriy, eri su pedih ndre ndriye’ su pe su pedih ndre nedu’ su mapwi hossus ti we hehnengkarundrum lakopwi. 18Etsurok Lapan, kile pe sane kuti hehir kidu lon ahai pe lengin kolwii, 19odosa, idu ke ndre Lapan itou sane uu pe isito mahkele, eri handrai hangka‑an mo‑on mo‑on ihpa erti indrihir mapwi. Pe we omur ti we hangka‑an kindrehluwen pwi. 20Odoke Lapan indremendrele rangen ka‑an mo‑on kuti inna murun. Kile Lapan kindretawe kihpa kuti pwi, eri ndramat ndre sulo‑on we hamat. Odoke Lapan kolon ile ta su lau ndre Iy ipe Tadan su, ile pe Iy indrahnan rangen ka‑an mo‑on kuti indrila murun.

21“We kidu mundrun ka‑an mo‑on mo‑on kihir kudu, eri uh homou lau kipe kihpah, ‘Etndre‑et, Iy kuti Kristus!’ o, ‘Etndre‑et, Iy ilto!’ eri otpo bilip kile tadan kolwii. 22Odosa, kristus taheweh pe profet taheweh, eri sulo‑on we hehir. Pe su we hopo mirakulo sulo‑on, hapa kile pe herwi su ndramat ndre Lapan ipe Tadan tih. Ipe ye su hanon, eri su we herwi su lau lewen Lapan. 23Ile pe oduu mada’ oduu kise eleng, ndrike’ oduu kidu pwoi pe edempahar. Yu undrepahran homosa ndre we hehir omur ti inna ta oduu indrinum.”

Kinum Ti Pe Nedun Ndramat We Kihir

(Matyu 24.29-31 pe Luk 21.25-28)

24Suhwon Yesus ile ta su disaipel ti ile lakopwi yi ihpah, “Kidu ndruwen sane pede‑en kuti honum eri,

“‘Mundroi we kilik,

ndrou we kindrinai pwi,

25pudiy we hadaketi odo parar,

pe nunuw mandra‑an we kihir lom parar,

pe sane ndre sulo‑on odo lom parar we hodut.’#13.25 Nolou kuti iyin Aisaiah 13.10 pe 34.4

26“Pe kidu iy ndre sane odo lom parar hohmo‑on, eri sa ndramat we heltuwe Nedun Ndramat kise pwoi odo lon kohut, ndrodan ndre puko‑on pe raman mandra‑an. 27Iy we kihtakalan su engel Tadan we hala lokpoi ndre mandra‑an, pe hadaparngan sa ndramat ndre Lapan ipe Tadan su tih.”

Sane Kurti Kalmene‑en Ihpe ndre Kei Fik

(Matyu 24.32-35 pe Luk 21.29-33)

28“Kei ndre fik ti oduu we etakun se tawene odo eriy. Uh kei kuti nombrun hehir, eri oduu tuno’ oduu ihpa ndre lok ka we kimndroi elwe‑en. 29Sane kuti ihpa ke eriy. Uh oduu etndroni sane Yu umpehre kuti hehir, eri oduu tuno’ oduu ihpa ndre mundrun Nedun Ndramat ti mukehe kopwi kah kihir. 30Yu kupwe ndre ndrokene kile ta oduu! Sa ndramat odo mahkele ti we se mapwi hodo, pe sane ndre sulo‑on kuti we hehir. 31Lok eleng pe lokpoi ti we hornum, odoke nolwu‑u ti we kindrinum pwi.”

Homou Tunon Mundrun Pwi

(Matyu 24.36-44)

32“Homou tunon mundrun sane kuti pwi. We kihir rang sa eri homou tunon pwi. Meseren ndre lukumwen eri homou tunon pwi. Su engel odo heven tuno’ su pwi. Nedun ti tunon pwi yi. Taman kopwi Iy ke homou tunon. 33Ile pe mada’ oduu kise eleng pe attatilen oduu kile huyen, odo oduu tuno’ oduu mundrun pwi tih. 34Ihpa ndre orngon homou iyeu ile lok alau pe ipe ile ta su lewen marai tadan mada’ su ise sane tadan. Pe iy itlangan marai handrai handrai hala ta su. Pe iy ipe ile tan iy lau ndre madan iso pohngkiu ti madan kiseu kehii.

35“Ile pe oduu mada’ oduu kiseu kehii, odosa taman um we kise maping, ndre pehon, ndre pwi lukumwen, eri oduu tuno’ oduu pwi. 36Kihne oduu edemetir pe edehretek tadan kihir. 37Nolou Yu umpa kurti ile ta oduu, pe ile ta sa ndramat ndre sulo‑on. Oduu etmin pe mada’ oduu kiseu.”

Currently Selected:

Mak 13: KTM

Highlight

Copy