Mak 10

Lo Odo Somendrih Osou

(Matyu 19.1-12 pe Luk 16.18)

1Yesus itlang odo lok erti pe ile distrik odo Yudea. Inum pe Iy ihtor wo Yordan ile hodoh, pe sa lau sulo‑on hala hun Iy. Iy idetuhne su ile nolwo‑on Lapan ihpa ndre Iy impo munen tih.

2Su Paraseo hala hu Yesus pe hapa hahnan Iy kipe handrai nolou odo lon lo kihrut. Su hapa ile Tadan ihpah, “Yesus, kehe apa eh. Lo ta tidu ti ipe we sa kamal ha‑as mbrulu’ sa ha‑au ndre pwi?”

3Yesus ipe ihpah, “Moses ti iduwe Lo sa ile taduu?”

4Su hapa ihpah, “Moses ti ipe huyen. Moses ipe uh homou kamal ipe ki‑es mbrulun ke‑eu, eri iy kamal erti we kidetorwe nolou odo somendrih osou, kinum pe kiduwe kile lumwen iy pedih ti pe ki‑es iy ke‑eu.”

5Odoke Yesus ipe ile ta su ihpa, “Oduu ti lau odo tahrung nolou pwi, ile pe Moses idetorwe Lo erti pe iduwei ile ta oduu. Odoke iy erti Lo ta Lapan pwi. 6Idu ndre lin eri nolou ti ihpa, ‘Lapan ihnan su hala pedih pe kamal.’ 7‘Iy eti uu pe kamal ina‑au odo hun taman pe tinen pe inohtok ile ndrodan mbrulun, 8pe horu harla ke ndramat homou.’#10.8 Endre-et Lin 1.27 pe Lin 2.24. Ile pe horu ti ndramat rumuu pwi. Horu ti ndramat ke homou. 9Ile pe homosa ndre Lapan indrehtungon inna hondroh, eri ndramat kisomondrihi kolwii.”

10Inum ti pe Yesus pe su disaipel hala yi ndre um. Pe su disaipel hehndremte Iy ile yi ndre Lo odo osou inemendrih tih. 11Yesus ipe ile ta su ihpah, “Iy lau ndre ki‑es mbrulun pe kesou pedih homou yi ti indrahnan to‑ir mandra‑an ile pule‑en mbrulun. 12Pe iy pedih ndre ke‑eu ta mbrulun pe kesou kamal homou yi ti indrahnan to‑ir mandra‑an yi.”

Yesus pe Su Kom Mone

(Matyu 19.13-15 pe Luk 18.15-17)

13Sa lau hokuni su kom mone hala hu Yesus. Su hapa Yesus kiduwe lumwen kile pule‑e’ su. Odoke su disaipel hehrurute idu pule‑e’ sa lau kutih. 14Yesus iltuwei punou ta su disaipel kuti, pe Iy ihwak ana’ su pe ipe ihpah, “Su kom mone ti hasa hu Yu. Oduu adahnan su kolwii, odosa kapman ta Lapan ti ta su lau ndre hahpa ndre su kom kutih. 15Yu kupwe ndre ndrokene kile ta oduu, iy si lau ndre kindretakuni kapman ta Lapan kihpa ndre su kom mone hentakun ti pwi, eri we kindrimin lon pwi. Pwi ndre pwi tih.” 16Inum pe Iy ikuni su kom mone ti hala kanahan. Iy iduwe lumwen ile pule‑e’ su homou homou pe isurkon su.

Orngon Homou Tadan Sane Sulo‑on

(Matyu 19.16-30 pe Luk 18.18-30)

17Yesus itlang pe illa iyeu, pe orngon homou ihtot ile pe pandrulku‑un ile poi idu purmadan, pe ihndremte Yesus ihpah, “Tisa huyen, yu we kupu homosa lakopwi pe we kule heven?”

18Yesus ihndremte iy ihpah, “Ihpa kehe pe ou apa Yu huye? Homou ndramat huyen pwi, tapake Lapan kopwi ti huyen. 19Ou ti tunom Lo tih: ‘Nombrun etruhe ndramat kimet. Oduu tasou ti etmetir ndrodan mbrulu’ oduu koson. Oduu etpahna kolwii. Oduu etaheweh kot kolwii. Oduu etruwi sane ta ndramat homou ke porah kolwii. Oduu etso pahndran tamai pe tinei pe etahrung nolou ta su.’#10.19 Endre-et Kisim Bek 20.12‑16”

20Orngon kuti ipe ile ta Yesus ihpah, “Tisa, idu ke ndre yu mapwi kom uu pe isito mahkele, eri yu undretumbru‑e handrai Lo kiti pwi.”

21Yesus indre‑et ile tadan pe ihwaso‑on iy. Iy ipe ile tan orngon kuti ihpah, “Handrai kopwi yi ou tadam mapwi. Ala pe ekuni tadam sane ndre sulo‑on pe sa lau hesihnen ta sa. Pe moni ou okuni odo sane tadam ti eduwe kile ta sa lau ndranuno, kile pe ou we tadam sane sulo‑on odo heven. Kinum pe ou asa owus Yu.”

22Orngon ti ihrungi nolou ta Yesus kuti pe iy madan ihmo‑on. Iy ikarundrum iy lakopwi pe iyeu, odosa iy ti tadan sane sulo‑on sulo‑on.

23Yesus indre‑et ile ta su disaipel Tadan pe ipe ihpa, “Sa lau ndre ta sa sane sulo‑on ti hehnengkarundrum, odosa su we hapa hala lon kapman ta Lapan odoke iy erti we kinna mangsan ewehen kile ta su pwi.”

24Su disaipel hehretek ile nolou kutih. Odoke Yesus ipe yi ihpah, “Oduu nedu, mangsan ewehen pwi. Ou si ndre apa ala lon kapman ta Lapan ti we ndre ekeles kile keles. 25Kamel we ki‑us lon ngaden sou ti mangsan ewehen ile tadan. Odoke ke iy lau ndre tadan sane sulo‑on pe ipe kile heven eri we mangsan puko‑on lakopwi.”

26Nolou Yesus ipe kuti ihnan su disaipel hehretek pe tawene ta su ihrut ile puko‑on lakopwi. Homou madan ile ta homou pe hapa ihpa, “Orkom! Homou lau kindranon kinna lok huyen pwi.”

27Yesus indre‑et ile ta su pe ipe ihpah, “Ndramat eri indranon pwi, odoke Lapan eri kenon kipu sane ndre sulo‑on.”

28Pita ipe ile ta Yesus ihpah, “Odu ada‑au ta sa murwo’ odu, emwe’ odu, pe tadu sane ndre sulo‑on pe etndresa hun Ou, pe edenu‑us Ou.”

29Yesus ipe ihpah, “Ndre ndrokene ndre ndrokene. Iy si ndre kiduwe ndruwen kile tan tinton pe timso‑on su, kiduwe ndruwen kile tan taman pe tinen, ke‑eu ta su nedun, pe ke‑eu odo lonen, odosa iy idawonon Yu pe ipu marai odo Gutnius ta Lapan, 30eri tadan sane ti we hehir kile sulo‑on sulo‑on. Iy mapwi ndre kimin lokpoi eri Lapan we kihngahang iy sane sulo‑on sulo‑on, we kihluwen sane ndre iy tadan munen tih. Lapan we kihlingi iy um sulo‑on, tinton sulo‑on, timso‑on sulo‑on, tinen sulo‑on, nedun sulo‑on pe poi sulo‑on. (Odoke sa ndramat we hampa ke iy pe henahnan mandro‑on killa mo‑on.) Pe ndre omur ti iy we kile lok huyen ndroda Lapan. 31Sa lau sulo‑on ndre mahkele he‑en munen eri we hala omur, pe sa lau sulo‑on ndre hodo omur mahkele, eri we hala munen.”

Kah Patoloh Yesus Ipe Iy We Kimet pe Kitlang Yi

(Matyu 20.17-19 pe Luk 18.31-34)

32Yesus pe su disaipel tadan kah hehir sal ndre illa Yerusalem, pe su kah henelila hala eriy. Yesus inelila iyin munen. Tawene ta su disaipel ti ihrut pe su hentawene hudut. Sa lau ndre ho‑us su ti honoh. Yesus ikuni su ndre sungoh‑pe‑rumuu ti hala mahun odo ta sa lau, pe petsih yi Iy inen homosa ka we kihir kile tadan odo Yerusalem. 33Iy ipe ihpah, “Atahrung. Tidu kah titlalih Yerusalem. Odo Yerusalem, eri sa ka we heduwe Nedun Ndramat ilih lumwe’ su pris mandra‑ane pe su tisa odo Lo. Sa ka we helilyan Iy kidu kot, pe sa ka we heduwe nolou kile hondroh pe heruhe Iy kimet. Kinum pe sa ka we heduwe Iy kile ta sa lau odo lok hokor yi, 34pe sa lau hokor yi we hetulyan Iy, we hehngowen Iy, we hemburnguhi Iy, we heruhe Iy kile wisiu#10.34 wisiu. Wisiu odo roh ndramat ta su Rom ti osukei handrai puko‑on, pe sorun osukei kuti sa hentawe petpedun haen hosso eriy. Ile nolou Inglis ti sa hoyuw whip., pe we hapwi Iy kimet. Pe rang tul ndre kilnum oh pe Iy we kitlang yi.”

Hehndremte tan Jems Horu Jon

(Matyu 20.20-28)

35Inum pe horu nedun Sebedi, Jems horu Jon, harla hu Yesus pe harpa ile Tadan ihpah, “Tisa, oru arpa erehndremte Ou kile ka‑an handrai, pe oru waso‑o’ oru Ou eduwe taru.”

36Yesus ihpa, “Oruu waso‑o’ oruu homosa?”

37Horu harahpah, “Uh Ou ala King odo lokpoi, eri oru waso‑o’ oru Ou eduwe oru homou ndruhun kise lumwem mudon pe homou kise lumwem kamweu.”

38Yesus ipe ile ta horu ihpah, “Oruu ti tuno’ oruu homosa oruu erenehndremte kiti pwi. Oruu ti aranon eri‑ing homosa ndre Yu ka we ku‑ing tih? Yu ti we kulnget pede‑en pe kumwet, pe oruu ti we aranon arahpa ndre Yu tih?”

39Horu harahpa, “Oru aranon.”

Yesus ipe ile ta horu, “Ndre ndrokene, oruu ti we artakun pede‑en kihpa ndre Yu. 40Odoke hehndremte taruu ti Yu kundranon kundripa hangka‑an odo eriy pwi. Iy si we kimin lumwe mudon o kamweu ti sane ta Lapan. Lapan Iy ndre Iy indripa ipe si we kimin sia kehe pe si we kimin sia kehe.”

41Su disaipel ndre sungoh ti hohtuno su ndremte tan Jems horu Jon ile ta Yesus, pe su hopo loroh ile ta horu. 42Yesus iyuwen su ndre sulo‑on pe ipe ile ta su ihpah, “Oduu tuno’ oduu ihpa ndre sa lok ndre tuno’ sa Lapan pwi ti ta sa ndramat hene‑en poho’ sa, pe sa lau ndre sulo‑on hentahrung ke iy. Iy kipe sa hopo homosa, eri sa we hehrung ke iy. 43Odoke oduu ti we etndrahpa erti pwi. Uh iy si ta oduu ipe kile mandra‑an, eri iy we kile lewen marai ta sa ndre sulo‑on. 44Pe uh iy si ta oduu ipe ki‑in mune’ oduu, eri iy we kile hono‑on marai ke porah ta sa lau ndre sulo‑on. 45Odosa, oduu etndre‑et kile tan Nedun Ndramat ti oh. Nedun Ndramat ti insa odo kile pe sa ndramat hopo maryan ti pwi. Iy ise ti we kipu marya’ sa ndramat, pe we kimet, kile pe we kisihnen yi ndre sa sulo‑on.”

Yesus Ihnan Madan Orngon Homou Jeriko ile Huyen

(Matyu 20.29-34 pe Luk 18.35-43)

46Yesus pe su disaipel Tadan hehir taon odo Jeriko. Inum pe su hatlang odo Jeriko, pe sa lau sulo‑on ho‑us su. Su hasa ngerin taon ti pe orngon homou imin eriy. Orngon ti rangan Bartimeus. (Taman ti rangan Timeus.) Bartimeus ti madan pwi, ile pe iy immin ngerin sal pe iyuw moni pe sane ile ta sa lau ndre henehrik tih. 47Iy ihrungi ihpa ndre Yesus odo Nasaret ke ipei, ile pe iy iyuw ile puko‑on ihpah, “Yesus, Ou Nedun Devit,#10.47 Nedun Devit. Iy kuti rangai ndre su Yuda hoyuw Mesaiah (Kristus) ile eriy tih. akarndrundrumwi yu.”

48Sa lau sulo‑on hehyek anan, hapa iy kimin kopwi. Odoke iy iyuw ile puko‑on lakopwi, “Nedun Devit, akarndrundrumwi yu!”

49Yesus ihndro pe ipe ihpah, “Etyuwen iy kise.”

Ile pe sa hoyuw ile tadan pe hapa ihpah, “Ndrinem keweh. Odo eleng. Iy iyyuw ou.” 50Iy ipiyen siot elwe‑en tadan iyeu, iy indreh idu eleng pe ile hu Yesus.

51Yesus ipe ihpah, “Ou ereh sa?”

Orngon madan pwi ti ihpah, “Tisa, yu upwe modo kihir pe kundre‑et sane.”

52Yesus ipe ile tadan ihpah, “Eri huyen, ou ka owou. Bilip tadam indrahnan ou ala huyem.” Idu ke ndre erti pe iy madan ile huyen pe indre‑et lok, pe iyus Yesus odo sal ile Yerusalem.#10.52 sal ile Yerusalam. 10.32‑52 ti sane hehir idu kalmene‑en Yesus inu‑us sal pe ke ile Yerusalem.

Currently Selected:

Mak 10: KTM

Highlight

Copy