Lin 28

1Aisak iyuwen Yakop, ipwo-es iy, pe ipe ile tadan, “Okun homou pedih odo Kenan kolwii. 2Ala ndre Mesopotemia yi, lonen papum ke Betuel, pe olkun homou nedun yahim ke Laban pihin. 3We Lapan Mandra-an kihnuwii ou pe kipuko-on ou kile osou tadam pe we ou ala taman kom sulo-on, pe we ou ala taman lok sulo-on. 4Iy we kipu huyen kile tadam pe su yayam, ihpa ndre Iy ipu ile tan Abraham. Lok keti Lapan iduwe ile tan Abraham ndre pihe, pe ou we asatakunii.”

5Aisak iduwe Yakop iyeu ile hu Laban ile Mesopotemia. Laban ti timso-on Rebekah, tinen Yakop horu Iso. Laban pe Rebekah ti tama' horu Betuel, iy odo Aram.

Iso Iyesuwon Pedih Homou Yi

6Iso ihtunon ihpa ndre Aisak iduwe puko-on ile ta Yakop, pe iduwe iy indra-au inna Mesopotemia ilpondrih mbrulun. Iy ihtunon ihpa ndre Aisak ipatihi iy, pe isinip anan ipe we iy kindrasou homou pedih odo Kenan pwi. 7Iy ihtunon ihpa ndre Yakop ihrung taman horu tinen pe indra-au inna Mesopotemia. 8Iso ke ihtunon ihpa ndre taman eri mboren horu harasou odo Kenan. 9Ile pe iy iyeu ile ndrongon Ismael, nedun Abraham, pe iyesuwon pedih homou yi rangan Mahalat. Mahalat eri timso-on ti Nebaiot, pe tama’ horu eri Ismael.

Yakop Imihmih odo Betel

10Yakop itlang iyeu odo Berseba pe illa ile wuron Harran ea. 11Lok ile pehon eri pe iy ihir ile lok sehir pe iyin ndre eriy. Iy ipu ndralulumwen ile pat sih pe imtir. 12Iy imih pe indroni keserek indreh ndre pwoi uu pe inna ndre lom parar eleng, pe su engel halla eleng pe hassa pwoi odo eriy. 13Eri pe Lapan indru idu koson pe ipe ihpa, “Yu ti Lapan, Lapan tan Abraham pe tan Aisak. Yu we kuduwe kile tadam pe yayam su lok ndre ou ka enemetir ewen eriy kurtih. 14Yayam su we hohor kihpa ndre wahun poi. Pe su we hasarpat hala rai pe ahai, kup pe tolau. Pe tapake ou pe yayam su we adahnan pe Yu we kupu huyen kile ta sa lau ndre sulo-on odo lokpoi. 15Antawonon, ou ala kehe ndre kehe eri Yu we kummwin ndrodan ou pe we modo kiso tadam, pe we kuduwe ou asamandro asa ndre pule-en lok kurti yi. Yu we kundra-au tadam pwi, kenon ndre Yu kundrahnan sane ndre sulo-on kihpa ndre yu undrepandranan su ile tadam tih.”

16Yakop itlang pe ipe ihpa, “Lapan ti imin kerti! Iy ti imin lok kerti, odoke yu tuno hepe pwi!” 17Iy mundren inuh ihmo-on pe ipe ihpa, “Lok kerti hono-on nuhnoh sih! Kerti we omwen Lapan! Pe iy kerti we pohngkiu ndre illa heven ti ndreh.”

18Yakop itlang maping ndre lik, ikuni pat ndre iy palan imin eriy, idotinen idu eleng pe iduwe ile kalmene-en sane ndre hehir kurtih. Inum ti pe iy itndrangan ndronun oliv ile eriy, eri pe 19irson rangan lok erti ile Betel.#28.19 Betel ile nolou Hibru eri: Omwen Lapan. Lok rangan munen eri Lus.

20Inum pe Yakop ipu poromis ile ta Lapan, “Uh ipe ye Ou emin ndroda yu pe madam kiso todo kile lilo-o yu unelila-an kudu, pe entudou ono song pe pulngiyen mundre 21uu kenon ndre yu kusihir ndre lonen tomo yi, pe hangka-an herut kindrihir todo pwi, eri we Ou ala Lapan todo. 22Kelim ile pat ndre yu undratawei, eri we kile ndruhun surok killa ndrongon Ou. Pe sane Ou anahngahang yu, eri yu we kuntawe hondroh odo lon sungoh hondroh hondroh, killa ndre Tadam yi.”

Currently Selected:

Lin 28: KTM

Highlight

Copy