Marc 1

Jean baptême yôfue'n i Nyanmien nde kanle

(Matt 3:1-12; Luc 3:1-9, 15-18; Jean 1:19-28)

1Jésus-Christ, [Nyanmien Wa'n] i dyasin fe'n i bôbôle'n ye.

2Bé klee Nyanmien nuan idyofue Ésaïe i fluwa'n nun ke:

«Nian, nh sunmanh min ndôlô bôfue'n, oh dunh mmua o nyrun,

Oh kôh yô wo atin'n kpa.

3I ye o kpan blô lo nion, o sé ke:

Anh siésié é Min'n i akpo'n,

Anh yô i atin'm bé séiin, anh tréké su.»

4I so'n su ye Jean baptême yôfue'n bali blô lo, o kan kléé bé ke bé katyi bé nzuen'n, ye bé yô baptême nzué'n nun, nan Nyanmien yatyi sa nga bé yôlii'n tye bé nion. 5Judée men wunmuan'n nin Jérusalemfue'n kwlaa bé oo Jean wun lo. Ke bé kaan sa te nga bé yôli'n, o yô bé baptême Jourdain nzué ba'n nun.

6Chameau ndre trale ô Jean wun, ye kplô kun tyi i afien. Lalô nin wema nzué ye o dio. 7Ke oh kanh nde'n, o sé ke: Swran kun b'o le nyrun tra min'n o ô sien o su ba, ke n kan asé n nyanndyi i ngbabua nyanman'n, min nin i so yôle'n fataman. 8N lie'n, n yôli amun baptême nzué'n nun, sannge i lie'n, o wa fa Nyanmien Wawe'n yô amun baptême.

Jésus i baptême yôle

(Matt 3:13-17; Luc 3:21-22)

9I ble so'n nun Jésus fin Nazareth Galilée men'n nun bali, nan Jean wa yô i baptême Jourdain'n nun. 10Ke Jésus fin nzué'n nun fitéh'n, i ôsu kunngba'n nun o wuun ke nyanmien su lo'n su ti muaan, ye Nyanmien Wawe'n dyre i su ke aublé sa. 11O tii swran kun nen nyanmien su lo, o sé ke: A ti min awlen su Ba, o su ye man fa n wla'n kwlaa a guaa.

Jésus i lakale

(Matt 4:1-11; Luc 4:1-13)

12Kpekuun Nyanmien Wawe'n fa Jésus oo blô lo. 13O dii lé ablanan blô lo, Satan (*f6*) kô lekeleke. O nin blô nnen mun ye bé ô loo, ye ange'm bé sui.

Jésus i dyunman bôbôle Galilée lo

(Matt 4:12-17; Luc 4:14-15)

14Ke bé wlaa Jean bisua'n, i sin Jésus oo Galilée men'n nun. O kan Nyanmien i dyasin fe'n, 15o sé ke: Ble'n i nuan a yia, ye Nyanmien i siéle ble'n wa mantan. Anh katyi amun nzuen'n, anh lafi Nyanmien i dyasin fe'n su.

Dyué kunfue nnan bo Jésus bé'n

(Matt 4:18-22; Luc 5:1-11)

16Ke oh sinh Galilée fete'n nuan'n, o wuun Simon nin i niaan André ke bé su gua bé lala'n fete'n nun, afin bé ti dyué kunfue. 17Jésus sé bé ke: Anh bla'a su n su, nh fah amun katyi swran'm bé trafue ke dyué trafue sa. 18Kpekuun bé yatyii bé lala'm bé le, ye bé suu i suo. 19Ke o oli i nyrun louun kan'n, o wuun Zébédée i wa Jacques nin i niaan Jean, bé kusu bé ô bé alié'n nun bé su tanndan bé lala'm bé nun. 20O flee bé, kpekuun bé katyii bé si Zébédée nin dyunman difue mun alié'n nun, nan ba su i su.

Bian bo asie usu satyilii'n

(Luc 4:31-37)

21Bé oo klo'n bo bé flee Capernaüm'n su. Sabbat b'o ti bé tyen te'n, Jésus wluu Nyanmien sua'n nun, o kléé liké. I liké b'o klé bé'n bô bé nuan, yele ke i nde b'o kan'n, o klé bé ke o le sin dyranfue, 22o ti'a ke mmla kléfue'm bé lie'n sa.

23Ke oh yôh so'n, bian kun bo asie usu b'o satyi swran'n wa satyii'n, o ô Nyanmien sua'n nun le, 24o kpan sé ke: ?Jésus bo a fin Nazareth, nzu sa ye o ô é nin wo yé afieon? A baa é nunnunle. N si o kpa, a ti Nyanmien i Swran. 25Jésus idyolii, o sé i ke: Muon nuan le, dyaô bian nga su. 26Asie usu'n tee bian so'n i asé, o kplili, o kpaan kéklé, o dyaôô i su. 27Swran'n kwlaa bé nuan bôô bé wun, i so'n ti, bé usaa bé wun ke: ?Nzu sa yele nga? ?Liké ufle ye o su kléo? O kwla asie usu bo bé satyi swran'n, bé srôé! 28Kpekuun i dunman'n fuu Galilée men'n kwlaa nun.

Jésus yôô Pierre sia bla'n i dyuédyué

(Matt 8:14-15; Luc 4:38-39)

29Ke bé fin Nyanmien sua le fitéli'n, bé nin Jacques nin Jean bé oo Simon nin André bé awlô lo. 30Ayre guaa Simon sia bla'n i wun, nan wa la. Bé ken i nde kléé Jésus. 31O wunngéé i wun le, o utii i sa'n nun, o meen i su. Ayre'n tuu i wun ye o kunnde liké maan béo.

Jésus yôô tukpatyefue kpanngban bé dyuédyué

(Matt 8:16-17; Luc 4:40-41)

32Nnosua ke wia'n toli'n, bé faa tukpatyefue nin swran bo asie usu a satyi bé'n kwlaa blelii. 33Klo'n sufue'n kwlaa bé yiaa anuan'n nun le. 34O yôô tukpatyefue kpanngban bo bé tukpatye'n ti fanunfanun'n bé dyuédyué. O man asie usu kpanngban kusu bé dyaôô swran'm bé su, sannge o ma'an bé atin ke bé idyo, afin bé sii.

Jésus i Galilée lo Nyanmien nde kanle

(Luc 4:42-44)

35Nglemun nde kpa'n ke lika'n te dun'n, o dyaô fitéli, o oo blô lo lika kun b'o ti diin'n nun, o nin Nyanmien bé kô kôkô yale. 36Simon nin bé nga bé nin i ô le'n, bé kunndee. 37Ke bé wunniin'n, bé sé i ke: Swran'n kwlaa bé su kunnde o. 38O sé bé ke: Anh man é o klo nga bé mantanmantan wa'n bé su, nan n kan nde lo wié, afin i so'n ti ye m balio. 39Ye o oo Galilée men'n i lika'n kwlaa, o kan nde Nyanmien sua'm bé nun, o man asie usu'm bé dyaô swran'm bé su.

Jésus yôô kôkôwéfue kun dyuédyué

(Matt 8:1-4; Luc 5:12-16)

40Kôkôwéfue kun bee i wun le, o kôtô i bô, o sre i aunnvue su, o sé i ke: Yatyi, yô man n kôkôwé'n wié wéiin. 41O yôô Jésus annvo, o tinnge i sa'n kenniin, o sé i ke: Man ti, mon o kôkôwé'n wié wéiin. 42Kpekuun kôkôwé'n wa wié i wun, ye i wunnen'n yôô trékétrékéo. 43I ôsu kunngba'n nun Jésus séé i ke o o, o wle i su nun kpa ke, 44o nien i wun kpa nanh mon o kan nde so'n klé swran fi, sannge o fe i wun kô klé Nyanmien nyrun dyranfue'n, ye o fe i wun asô bôle liké bo Moïse kléli'n fa man, man bé wun ke wa yô dyuédyué. 45Sannge ke bian so'n fitéli tye'n, ye o too nde so'n dyo bôle su truu lika'n kwlaa nuon, lélé Jésus wa kwla yi'e i wun nglô klo fi su kun. O ka klo nuan tiwa le, ye swran'm bé fin lika'n kwlaa bé bee i wun le.

Currently Selected:

Marc 1: BLNT74

Highlight

Copy