Luc 6

Blé mma fianfianle sabbat tyen

(Matt 12:1-8; Marc 2:23-28)

1Lé kun sabbat b'o ti Juif'm bé tyen te'n, ke Jésus nin i sonnzonfue'm béh sinh blé b'o ti ke awié sa'n i fié nun'n, i sonnzonfue'm bé fianfian wié bé nun kuin bé sa nun bé dili. 2Pharisifue (*f4*) wié'm bé usa bé ke: ?Nzu ti ye an yô liké nga bé yômen sabbat tyen nion? 3Jésus kusu usa bé ke: ?Ke awé kuun David nin i minnien mun'n, sa nga bé yôli'n, an nian kennge'en lé? 4Ke bé wluu Nyanmien sua'n nun'n, kpaun bo bé fa teke Nyanmien nyrun bo swran fi diman san Nyanmien nyrun dyranfue'm bé ngunmin tye ye bé di'n, o fali nan o nin i minnien mun ba di. 5Ye o sé bé ke: M bo n katyii Swran'n, min ye n siéli sabbat tyen nion.

Bian sa uwa'n

(Matt 12:9-14; Marc 3:1-6)

6Ke sabbat tyen'n dyuu ékun bo Jésus wlu Nyanmien sua'n nun oh kléh bé liké'n, o wun bian kun bo i sa fama'n ti uwa. 7Mmla kléfue nin Pharisifue'm (*f4*) bé nian Jésus se oh yôh bian so'n i dyuédyué sabbat tyen nun ô, yele ke bé kunnde i wun sa wié bo bé kwla dyran su bé fa senmen. 8Jésus wuun bé akunndan'n, ye o sé bian sa uwa'n ke: Dyaô dyran bé afien le. Ye o dyaô dyrannion. 9Jésus sé bé ke: Nh wusah amun sa kun. ?Bé kwla yô swran yé annze bé yô swran te, bé dé swran annze bé kun swran sabbat tyen? 10O niannian bé nyrun, ye o sé bian so'n ke: Tinnge o sa'n nun. O tinngee nun nan i sa'n wa yô kpa.

11Ya kuun bé dan kpa Jésus wun, nan ba kô bu sa nga béh yôéh'n i akunndan.

Swran blu-nin-nnyon bo Jésus faa bé'n

(Matt 10:1-4; Marc 3:13-19)

12Ke o yôô so'n, lé kun Jésus oo ôka kun su ke o kô kôkô yale klé Nyanmien, o nin i bé kôkô yale lélé alie'n tyeen bé. 13Ke alie'n tyennin'n, o flee i sonnzonfue mun, o fa bé nun blu-nin-nnyon, o ton bé dunman ke i sunmanfue. (*f22*) Swran so'm bé dunman'n ye:

14Simon b'o toen Pierre'n, ye i niaan bian André, nin Jacques, nin Jean, nin Philippe, nin Barthélemy, 15nin Matthieu, nin Thomas, nin Jacques Alphée wa'n, nin Simon bo bé fle i akpuéfue'n, 16nin Jude Jacques wa'n, ye Judas Iscariot b'o fa Jésus maan swran mun'n.

Jésus i nde kanle nin swran'm bé dyuédyué yôle

(Matt 4:23-25)

17O nin bé fin ôka'n su lo dyrali, bé wa dyran lika kpekplekpee kun bo i sonnzonfue kaka kpa bé ô le'n nun, ye swran kpanngban bo bé fin Judée nin Jérusalem, nin Tyr nin Sidon dyénvié nuan lo'n, bé ô le wié. 18Bé ba ke bé wa tié i nde'n, nan o yô bé dyuédyué. Bé nga asie usu b'o satyi swran'n klé bé yale'n, bé nyan bé ti. 19Swran'n kwlaa bé waan béh kenh, afin bé wun ke o yô swran'n kwlaa bé dyuédyué.

Môaé nin nyrennen

(Matt 5:1-12)

20O nieen i sonnzonfue mun o sé bé ke:

Amun bo an ti yalefue'n, amun lie su ti yé, afin Nyanmien men'n nun ninngé kpakpa'm bé ti amun lie!

21Amun bo awé kun amun nde'n, amun lie su ti yé, afin tyen wié amun ku wa yi!

Amun bo amun su sun nde'n, amun lie su ti yé, afin tyen wié amun wa sri!

22Ke swran'm béh kpoh amun, béh kanh amun bô, béh kpeh amun nzôwa, béh satyih amun dunman m bo n katyii Swran'n n ti'n, amun lie su ti yé! 23Ke béh yôh amun so'n, man amun klun dyo, anh si ablé, yele ke amun mô'n o wa yô dan nyanmien su lo, afin ke bé nannan'm bé yôô Nyanmien nuan idyofue'm bé soo.

24Sannge amun anyanbéunfue mun, an yakô, afin amuan dun mmua nyan amun klun ninngé lie'n!

25Amun bo amun ku wa yi nde'n, an yakô, afin tyen wié awé wa kun amun!

Amun bo an su sri nde'n, an yakô, afin tyen wié amun wa katyi senvue, amunh sun!

26Ke swran'n kwlaa béh bôh amun dunman kpa'n, an yakô, afin ke bé nannan'm bé bôô bé bo bé ton bé wun suen ke bé ti Nyanmien nuan idyofue'n, bé dunman soo!

Bé kpofue'm bé klôle

(Matt 5:38-48; 7:12a)

27Sannge nh kanh klé amun bo an tié min nde'n ke, bé nga bé nin amun kun'n, anh klô bé, bé nga bé kpo amun'n, anh yô bé kpa. 28Bé nga bé wua amun amuen'n, anh yra amun nuan man bé, ye bé nga bé yô amun tete'n, anh sre Nyanmien ke o yô kpa man bé. 29Se swran wié kpatyi o nyrun'n, katyi i bué kun'n men. Se swran wié dé o kôndrô'n, nanh sé i ke, nanh mon o kô fo o tralefue'n. 30Swran kwlaa ng'o sre o liké'n, fa men, se swran wié fa liké o sa nun'n, nanh ko i sin ke o fa man o. 31Liké nga an klô ke swran yô man amun'n, anh yô i wunsu man bé. 32?Se bé nga bé klô amun'n, bé ngunmin ye an klô bé'n, nzu ye amunh nyenh nuon? Sa te yôfue'm bé kusu bé klô bé klôfue mun. 33?Se bé nga bé yô amun kpa'n, bé ngunmin ye an yô bé kpa'n, nzu ye amunh nyenh nuon? Sa te yôfue'm bé kusu bé yô i so wié. 34?Ye se swran nga an lafi i su ke se an bô i bôsiaa o yi man amun'n, i ngunmin ye an bô i bôsia'n, nzu ye amunh nyenh nuon? Sa te yôfue'm bé kusu bé bô bé wiéngu sa te yôfue'm bé bôsia, nan bé yô wié man bé. 35Sannge anh klô amun kpofue mun, anh yô bé yé, anh bô swran bôsia, nanh an fa amun nyin sié su ke bé yi man amun. Se an yô so'n, béh yôh amun mô dan, ye amunh katyih Nyanmien Kpli bo liké fi nu'en i sin'n, i wa, afin o yô bé nga bé si'a yé'n, o nin klunwifue'm bé yé. 36Anh si aunnvue, ke amun Si kusu si aunnvue'n sa.

Swran wun nde kanle

(Matt 7:1-5)

37Nanh an kan swran wun nde, ye Nyanmien su ka'an amun wun nde, nanh an bu swran fo, ye Nyanmien su bu'a amun fo, anh yatyi sa nga bé yô amun'n tye, ye Nyanmien kusu oh yatyih amun lie'n tye amuon. 38Anh tye swran liké, ye Nyanmien kusu oh tyeh amun wié, oh manh amun kpanngban ke liké bo bé su, bé tintin su, bé kédyékédyé, o yi bu gua'n sa, afin sulie nga an su nun man swran wié mun'n, i kunngba'n nun ye Nyanmien suh nun man amuon.

39O bu bé nyanndra kun kusu ke: Anyansifue kun kwla tre'e i wiéngu anyansifue kponman, se o yô so'n, bé nnyon'n béh toh kunman nun.

40Swran b'o suan liké'n ti'a dan traman swran b'o klé i liké'n, sannge swran kwlaa b'o wié i liké'n suan'n, o yô ke swran b'o klé i liké'n sa.

41?O yô se ye a wun wla'n b'o ô o niaan'n i nyin su, sannge a wu'an dyanvle'n b'o ô o bobo o nyinma su nion? 42?O bo a wu'an dyanvle'n b'o ô o bobo o nyinma su'n, o yô se ye a sé o niaan'n ke: Min niaan, dyran man n yi o nyin su wla nion? Dunman klôfue, yi dyanvle'n b'o ô o bobo nyin su'n ka, nan a wun asé a yi o niaan'n i nyin su wla'n.

O le waka kun nin i mma

(Matt 7:17-20; 12:34b-35)

43Waka kpa'n o su'a mma tete, ye waka b'o ti'a kpa'n, o su'a mma kpakpa. 44Afin ke waka kun ti'n, ye i mma'n tio. Bé ti'a blofue aloma lôlô su, ye bé ti'a lômin aintonman su. 45Swran kpa'n o yi liké kpakpa b'o ô i awlen b'o ti ke betro sa'n nun, swran te'n kusu yi liké tete i betro'n nun, afin nde kwlaa ng'o ô swran i awlen'n nun'n, ye o fité i nuaan.

Sua kplanfue nnyon

(Matt 7:24-27)

46?Nzu ti ye an fle min, Nannan, Nannan, sannge an yôman liké nga n klé amun nion? 47Swran kwlaa ng'o ba n sin, b'o tié min nde'n, nan o fa su'n, m ma klé amun swran ng'o fe'n. 48O ti ke swran kun b'o su kplan sua sa. O kpe kunman kplôuun, o kpen yebue su, o wle i bô asé yebue so'n su. Nzué dan kun yi ba kpuu, o dii sua so'n, sannge wa yômen liké fi, yele ke bé kpleen kpa. 49Sannge swran ng'o tié min nde'n b'o faman su'n, o ti ke swran b'o kplan sua asie ngben'n su, bo wa wlemen i bô asé'n sa. Nzué dan'n o wa dii sua so'n, kpekuun wa bu mlonmlon.

Currently Selected:

Luc 6: BLNT74

Highlight

Copy