Keriben 3

III

O Trito Šero

1Akanak o Petros h’o Janos avle jekhethāne andre kangeri, he ehas o čiros te pes mangen ke mro Devel, odova ehi, o eña andro d’ives.

2He ehas varehavo manuš, so has bango pal peskri daj, he anenas les, he thovenas les sako d’ives paš o kangerakro vudār, havo bučolas, Šukar, kaj te mangel o lōve e gāǧendar, have ǧanas andri kangeri.

3He kana dikhelas e Petros h’e Janos har ǧan andre kangeri, mangelas lōve.

4He o Petros dikhelas pre leste phusade jakhentsa e Janoha, he phend’as, Dikh pr’amende!

5He denas pe lende trat’, he užārelas, kaj vareso lendar lela.

6Pales o Petros phend’as, Nāne man somnakaj, nāne mange rup, ale so hi mange dava tut. Andro Nav e Ježišiskro Kristoskro andral e Nazareta, ušt’i! he phir!

7He l’il’as leskro čāčo vast, he hazdiñas les upre, he najekvar leskre prre, he leskre tikne kokala andro prre ehas sast’ārde.

8He adava xut’il’as upre, terd’il’as, ǧalas, he gēl’as lentsa andre kangeri, phirelas, xut’elas, he hašārelas mre Devles.

9He savore manuša les dikhenas, har phirel he har hašārel mre Devles.

10Jon ǧānenas, kaj odova ehi ada manuš, havo bešelas paš o šukar vudār a kangerakro te mangel o lōve, he phrāde lengre jakha angal odova, so leske pēl’as.

11He kana o bango manuš, havo ehas sast’ārdo, ikerelas e Petros h’e Janos, savore manuša prastil’onas jekhethāne ke lende andro anglūno vudār, havo bučolas e Salomonoskro, he dikhenas phrāde jakhentsa.

12He kana o Petros adava dikl’as, phend’as pāle ko gāǧe, Tumen, o Izraelskā manuša, soske pr’adava dikhen bāre jakhentsa, he soske den tumāre jakha pr’amende, har amen amāra zōraha te kerd’amas, kaj ada manuš phirel?

13O Bāro Devel e Abrahamoskro, h’e Izākoskro, h’e Jakuboskro, o Devel amāre dadengro hašārelas peskre čhāves Ježišis, havones tumen phandl’an andre, he na pringārd’an les angal o Pilātos, kana jov les kamelas te mukel.

14Tumen na prinǧārd’an e Devleskre čāče manušes, he kamenas te muken jekhe manušes, so mudārel.

15He tumen našad’an e Najbārederes, havones mro Devel l’il’as avri e mūlendar, he amen sam, so’ dova dikl’am.

16Oda manuš, so tumen dikhen he prinǧāren, pat’alas leskre Naveske, he odoleske ehi sasto; čāčes, o pat’aviben, so ehi paš leste, diñas leske najfeder sast’ipen angal tumende savorende.

17Ak‐akanak, o phrala, ǧānav, kaj tumāre biǧānl’ipnaha kerd’an tumen oda būti, so kerde tumāre najbāreder manuša.

18Akadala būt’a, have o Devel sikad’as angleder e mostar savore leskre Devleskre Manušendar, kaj e Kristos avel bāri dukh, ehi kerde.

19Odoleske laǧan tumen! he irinen tumen, kaj te tumāre bilāče keribena t ’avena mukle, kana avela o d’ives e sast’āripnaskro angal mro Raj!

20He jov bičhavela e Ježišis Kristos, havo angleder ehas tumenge sikl’ārdo.

21Havones lela o uprūno devel andro d’ives kana ǧana savore būt’a pāle, so phenelas o Devel e mostar savore Devleskre Manušengre kathar o anglūno d’ives har pes kerd’as e phuv.

22Odoleske o Mojžišis čāčes phend’as e dadenge, O Bāro Devel lela upre vaš tumende tumāre phralendar jekhe Devleskre Manušes har mé. Tumen šunena savoro, so tumenge phenela.

23He avela auka, kaj sako manuš, havo na šunela akada Devleskre Manušes, avela našado e ǧenendar.

24Jō, savore Devleskre Manuša kathar o Samuelis, he odola, have aven pāle, adetsi have vakerenas, auka vakerenas angal odova.

25Tumen san o čhāvore kathar o Devleskre Manuša, he kathar i sovel, havi diñas mro Devel amāre dadenge, kana phend’as e Abrahamoske, He savore čhāvenge, so ’hi tutar, t ’avel baxt he sast’ipen.

26Mro Devel l’il’as upre peskre čhāves Ježišis angleder tumenge; bičhad’as les tumenge, kaj tumenge te del i baxt, he kaj sakones tumendar te paruvel kathar o bilāčo keriben.

Currently Selected:

Keriben 3: MOR1936

Highlight

Copy