Matta 20
20
1Fye wo ɓe-sisi do Shekwoyi ʼbemi nya. Ekni da ho ɓo gmi n labmi-labmi yi woi ye aza ɓa zhin tnu-tnu wo fa. 2Ba ku shiri zhin ge wo ɓa gba ɓa ₦20 n nyipyei gmanyi wa lo ɓai na tnu-tnu ba. 3Dna sado, woi du wonya ya, wa gye azado zhi ɓai ye tnu-tnu.
4Wa tnu ɓai nwo fa, wa gna ɓa ge wo ɓei gba ɓa nya wagye kwo bmiya nyipyei yi lazo. 5N nyi-pyei yi na tukwo, n jesun ngye sinkna gun ata sa, wa je azado ku wa lo cei, wa bwa ɓa ɓo gmanyi-gmanyi nu gna.
6Ngye sinkna gun atnu wyeshei, wa lo zhimi wa gye azaho zhi n tna tnu-tnu, wa nya ɓa ge, “Knihin nu zhin fyei zhi n tna tnu-tnu, har nyipyei zo ye vinya?”
7“Ɓa gna wo ge, ‘Ntu ge zaho to ga yi tnu-tnu m.’ Wa gna ɓa ge, ‘To fye lo daza n mi fa.’
8“N wyeshei, wa gna gyiwye gbai ge wo yi aza ɓe cei wa gba ɓa, wa ya gba naza a kmaknayi! 9Aza na ɓo ku ɓa n sinkna gun atnui nyi, wa gba ɓa ₦20. 10Shi aza kmisunyi ɓo ɓe, ɓa gye ge ɓa ɓa gwo ndu ɓo. Ama ɓa gwo naira shiba-shiba (₦20) nu ce.”
11-12 Ɓa ya wyice ɓai gna, “Aza dohi ɓa bwa tnu-tnuʼzhin awa gmanyi nu, hoi ga ɓa naira shiba (₦20) ngye yi, eyi n nyipyei ku zo kpe yi nyi.”
13Wa gna gmanyi nɓami, “Mi nugundo, ai mi to zhin ho ɓe nukwoyi m. Ho to ku ye ge ho ɓa zhin tnu-tnu nya wyi-zon tu naira shiba-shiba tukwon? 14Gwo ha lo. Emi nubo-zhin nu ma gba za vinya nsun dai-dai. 15Ko zhin laifi nu ma ga za ma gyiwye ndei mi ye lo? Ho ɓagyi minagyi shi mi zhin ɓo manayi? 16Nlonu kwo ɓa ze ge kmaknayi ɓa ze kmisunyi, kmisunyi njesun ɓa ze kmaknayi.”
Tile Tukwoda Wa Zhin Bauta
17Shi Yesu ɓo wan zan woi lo Urushelima, wa ku wo abara awo-cei-aba wa pmiya gni ɓai. 18Wa gna ɓa nya kwo ɓo zhin wo n bwai. “Aɓo ga mi dna na pirist yakwo akun, ɓedo na Yahudawayi atukwodai, ɓa da mi wa efyi nya, ɓa zun mi ʼkni. 19Bai la mi ga dna na Romayi asoja akun, ɓai kpe ma gye, ɓa zun mi du, nyi-pyei tayi miye laka n wye-wyei jesun.”
20Yakubu n Yohanna yi, Zebedi anugun, Eɓa ʼya ɓe n ɓai n Yesu aba, wa ya shi, wa gyiwye.
21Yesu wa nya wo ge, “Ho ye kninya?” Wa gna Yesu ge, “N ho ebe-mi, ho ɓa ye ema nugun ngun-aba ɓai sase na shin-kpegye, eza gmanyi nho bwai-zhe, eza gmanyi n bwai-pmi?”
22Ama Yesu wa gna wo ge, “Ho ta kpe ɓe ye lo nho nya min.” Wa pmi da Yakubu n Yohanna yi wa nya ɓa ge, “Fye ɓa mi fya sin n kofi azhin-nya n mi ye ma sin nyi?” Ɓa gna, “E, yi ɓa mi!”
23Wa gna ɓa, “Fye ɓa ku sin nkwo. Ama mi ta mi ma da, aza n ɓa ɓei sase kpe na shinkpegye n wo Vivi n Mi yi m. Aba deye zhin ntu naza ɓo nu n mi Dada wa ga ɓa.”
24Abara je gun awo a gyi minagyi, nɓo yi n Yakub n Yohanna yi ɓo nya nyi.
25Yesu wa yi ɓa zhi vinya n wo aba wa gna ɓa, “N na byedo aba, asu zhin ɓa wu ikwo. Zadnagmai doho-dohoyi a ka ikwo wu naza ba nɓa kafi n wo sinta. 26Ama nfya ba, ko wu lo gbo. Zaho-zahoi n wo ye wa ze zadnagmai nfye mi, tile wa ze fyenu n fya ba. 27Ndei ho ye ha tu na za she vinya, tile ha zhin bauta ngye fyenu. 28Tile efya-ɓo zhin-zhin ɓa wu gye Mi nya, ntu ge Emi, Za Nugun, to ɓe ntu ge azhin mi bauta nu n, ama ma zhin bauta, ma ga mi wye-wyei ngye nya-doshan ntu naza begye ɓo.”
29Shi ɓa ɓo fa Jeriko, deji kwa vi Wo lo.
30Awyebua yi ho gun-aba, n sase zhi n zokwo gbe, ɓa wo ge Yesu duya ɓelo n zokwoyi. Ɓa la begye tu ɓai gna, “Dagayi, Osu Dauda Nugun, gye yi sun-sun.”
31Aza-yezhi ɓa gna ɓa ge ɓa ku ce pyi, ama ɓa gna begye la-latu.
32-33 Shi Yesu ɓo si ɓa aba, wa kpe gni zokwo wa nya ɓa ge, “Fye ye ma zhin fye knihin na?” Ɓa gna, “Dagayi, yi ye ya gye wyeba nu.”
34Oɓa sun-sun a wan Yesu, wa to ɓa wye bwa. Nsayi-sayi yi, ɓa gye wyeba, ɓa vi Wo.
Currently Selected:
Matta 20: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
