Matta 18
18
Fye Ku Ze Ngye Aɓi Nawyi
1Sa fyewyi abara ɓe Yesu aba ɓa nya wo ɓo ntu ʼza ɓo nwo ɓei zhin za-dnagmai dudu yi n Shekwoyi ʼbe mi.
2Yesu wa yi ʼɓi nawyi ɓe cei dna ɓa tasin. 3Wa gna, “Sai fya ye abui n Shekwoyi aba, fya fwa alaifi, fya ze ngye aɓi, n to lo nu n, fye ta lo Shekwoyi ʼbe mi m. 4Ntu ce nu, eza n wa gba wohin ngye ɓinai ye, wo nu ɓei zhin ʼza-dnagmayi du-duyi n Shekwoyi ʼbe mi. 5Njesun eza wa gwo ɓinai lai ntu mi ʼye ɓo, wo gwo Mi nu. 6Ama ndei eza zhin ɓinai n wo kpema Mi wa fwa gaiciya ga ɓo ko ɓa gna bmiya a gyi wo ata wyigwo nya n begye a she wo ya dna n ʼla.
7“Aiya nanyi aba ntu kwo aɓo nukwoi ɓo, tile a jaraba ɓe, ama aiya n za aba n wa ɓe n jaraba bonyi cenya yi. 8Ntu ce nu ndei oho bwa ko pita ɓa zhin ho ha zhin laifi, sai ha zunkoya ha ko sheya. Ko gna bmiya lo ha lo ʼshe n bwai zun-zunyi ya ko pita ndoi n ho ɓa lo ana pyi nha bwai ɓedo na pitai gun aba.
9“Ndei ewye ɓa zhin ha zhin laifi, sai ha bi ko ya ha ko sheya. Ko gna bmiya lo ha lo ʼshe n wyei gmanyi da ho dna na napyi nawyei gun aba.
10“Fye zhin peceiye to fya ci aɓi naiye wyegbam. Ntu ge oɓa amalaika ʼshe zhin ɓa lo mi Dada aba cici. 11Emi, Masihu, ma ɓe ntu gema gni abwi-bwi yi nu.
12“Ndei eza n akni yi tagyi, gmanyi kni kwa bwi, wo ta fwa shi ciwa-gmanyi-cei-ciwagmanyi wa lo ape sepa wo zan gmanyi shin nkwa bwi nyin? 13Nwa ko gye, wo ɓa dagma n mwa ntu ko ɓo, ndu shi ciwa-gmanyi-cei-ciwagmanyi nɓa cefyi napi n lafiyai nyi. 14Nlo nu; Emi Dada ɓomwi nu to gmanyi dna na ɓi naiye wa bwi m.
Yi Zhin Aje Gafara
15“Ndei oho zado wa zhin ho laifi, lo wa aba ho gna wo. N wa wo ho, wa ku wo laifi da, ho la wo jeze ɓe cei. 16Ama n wo to wo n, ha la ʼza gmanyi ko gun aba fya lo ha jewo wo laifi wu ntuge asaida-da ɓai wo. 17Ndei wo to go wo laifin, ha lo n ɓedai-yi n Ikklisiya. N Ikklisiya daɓo kwa ku daho, to wa du wa yen, Ikklisiya wo ze ngye tna-viyi, to a zhin jedoɓe nwoi m. 18Ma gna fye-nyaho-nyahoi nfya ko pa nanyi, a la ko pa n ʼshe, nyaho-nyahoi nfya loya nanyi, aɓa ko loya n ʼshe.
19“Ma je fye gna, ndei aza gun aba ku gbe gun nanyi ye ɓa gyiwye ntu nyaho ɓo, Emi Dada n Wo dna ʼshe nyi, Wo ɓa zhin ko ga fye. 20Ntu ge aba naza gun aba ko gun ata yezhi ntu ge ɓa zhin minya nu, Mi dna lo nɓa tasin.”
21Bitrus wa ɓe wa nya wo ge, “Dagayi, miɓa zhin mi zado gafara abwa knihin nu woi ya zhin mi laifiʼa? Abwa tnaba?”
22Yesu wa gna wo, “Awo! Abwa tnaba har shi-tnaba.”
23Aɓa mi a mwi Shekwoyi bemi do nʼsu yi n wo ɓo ye wa ku wa gyiwye do, wa gye nya wo ceyi. 24Dna nanya dokumi, a ɓe wo ntada hoi n wo ɓo cei shi ₦10,000,000. 25To wa mi nwo gban, osu wa gna a la wo kun ɓedo n wo nyikwoi na ɓi yi, n na nyai n wo cei vinya. 26“Ama zahi wa yashi wa gyi ʼsu kni, ‘woi kwa mwi kpe wohin, wa gna, ʼsuku-suku, bwa hankuri n mi yi, miɓa gba ta yi vinya.’
27“Osu hi wa gye wo sun-sun wa wo loya, wa ku eta yi zo wo.
28“Ama she zahi ɓo gmiya nʼsu aba, wa lo zaha ʼba n wo ɓo tai shi wo ce ₦2,000, wa ta bwa shi wo n sha wa gna wo ge wo gba wo ta, n sai-sai ye.
29“Eta-dahi wa ya shi wa ɓa wo ge, ‘Zhin hankuri ha gami ʼsa fyewyi, mi ɓa gba ho vinya.’
30“Ama to wa fwan, wa la wo wa wo dna n kurkuku, sai ge wa zo eta yi gba vinya.
31“Zahi a-nugundo ɓa lo ɓa gna osu ɓo ko ku zhin. 32Osu wa yi wo n wo ɓei ku ʼta zo wo nyi, wa ci wo ge, ‘Oho, bugba nukwoyi da, mi ku hota yakwo yi zo ho vinya, ntu ge ha gna mi gye ho sun-sun. 33Ko to ɓei kunce ha gye ho zado sun-sun ngye shi ma gye ho sun-sun?’
34“Osu minagyi kwa laka wa wo dna na wahala ba sai wa zo etahi gba ce vinya. 35N lo nu Emi Dada eshe nya zhin fye n fyeto ye nfya bugbai, fya zhin fya zaje gafara m.”
Currently Selected:
Matta 18: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
