Matta 15
15
Awyidna N Naɓo Bwashi Yi
1Afarisiyi na Yahudawayi atukwodayi, ɓa kun n Urushelima ɓa ɓe ntu ge ɓa nya Yesu aɓenya-nya.
2Ɓa nya wo ge, “Kninyi nu zhin to ho abara yi vi a Yahudawayi akunnun ko-koyi ma? Ntu ge ɓa ta gye ɓa nuwan lo n kunnu yi ge, ɓa nabwa ɓa kpe nyagyi gyi m.” 3Wa dnaɓegbe ge, “Kninyi nu zhin efya kunnu yi zun Shekwoyi ʼwa gna? 4Ntu ge Shekwoyi ʼwa gna ge, ‘Ga ho dada mwa-mwa n ho ʼya yi, ezaho-zahoi wa kni wa zamayi akmi, wo ɓa fi.’ 5-6 Ama fya gna, ‘Ko oha zamayi fyi n sangyi, zanyikwoci ha ku gyi agyiwye gaga ko a Ikklisiya ha fa ɓa fi n sangyi?’ Nlo nu zanyikoci awyidna wun Shekwoyi owa ya, n wa gna eza wo ga wa zamayi mwa-mwa woi lura ɓai nyi. 7Efye akoce-dnayi anabi Ishaya ɓo ku anabci zhin dai-dai tu fye tukwo, 8‘Aza deye gna, ɓa ga mi mwa-mwa, ama oɓa bugba mwa kpa lo n mi yi! 9Eɓa latu to na pmayi lo n, ntu ge ɓa wu awyidna nu n na zhin maimako Shekwoyi nya.’ ”
10Yesu wa yi azaye-zhi wa gna ɓa ge, “Fye wo ɓo mi da, fya zhin kukari fya bwa awyega. 11Fye ta tu cegye ntu ge fya gyi nyagyi cegye da m. Nya fye da nyi, kwo nu ze fya cegye da.”
12Owa bara ɓe ɓa gna wo ge, “Ho la bugba wun a Farisiyi ya ntu ɓeda ɓo nha da nyi.”
13-14 Yesu wa gna ɓa, “Shiwan doho-dohoi mi Dada nu to shi kon, a ɓa shi kwo ya, ntu ce nu fa ɓa. Ɓa zhin awyebuayi nu, ɓai gni awyebuayi busi oɓa vinya, ɓaɓa kaya fyi bwokun.”
15Bitrus wa nya Yesu ɓo ge, wo wu ɓeda ye awyega n wa da ge, eza ta tu cegye ge wo gyi nyagyi cegye da nu m. 16Yesu wa nya wo ge, “Ho to kpe ganyin? 17Ho ta gye nyagyi n ho gyi, ko lo nubo nu, kwa je kunya na miyin? 18Ama aɓeda nukwoyi kun n bugba nukwoyi nu, ɓa tu ʼza cegye n wo da ɓa nyi. 19N bugba nu na nubo-zhin nukwoyi kun, za wu, anagbai zhin, evi, akata-ce, ntukwo mwa yi. 20Aɓo deye nu tu za cegye, ama nya to lo n kwo ɓa tu ho zafun cegye ge, ha gyi nyagyi n tna bwana yi m.”
Aɓo Wo-woyi
21Yesu wa gmi n knihi wa lo har milu shitnu, wa lo Tayar n Sida. 22Kaʼana nyikwo ho n dna ɓo, wa ɓe Yesu aba wa gna wo ge, “Gye mi sun-sun, O Dagayi, Osu Dauda Nugun! Emi nyigun lo n zafun nukwoyi koi gnawo gna-gna cici.”
23Ama to Yesu wa dna wo ɓegbe m. Owa bara gna wo ge, “Nya wo ya, gye wo gna yi gna-gna lo nwo wyegyi yi.”
24Yesu wa gna nyikwozayi ge, “A tnu miyi ma bma a Yahudawayi nu zhin, toge abye do m.”
25Ama wa ɓe wa ya shi wa ga wo mwa-mwa, wa je wo wyegyi, “Dagayi bma mi zhin.”
26Yesu wa gna wo ge, “Ko to bmiya a la aɓi nyagyi a ga amwi m.”
27Nyikwozahi wa gna, “A wo lo nu, ama awyiwoyi n ɓa kaya zhi n tebur sinta nyi, a zhin a fa amwi ɓiyi ɓa gyi.”
28Yesu wa gna wo, “Nyikoza, oho gaiciya ga mwa lo, nya ho ye, a la ga ho.”
29Nsayi Yesu wa jeze lo Galili ʼla, wa gun lo pe wa sase tu ɓo. 30Deji kwa ɓe wo na zabmazhi yi, awyebuayi, atakpe-ɓeda n na nyasan yi gbo-gbo a ku ɓa ya zhi n Yesu abye, wa ɓa ka gna vinya. 31Ɓe wowoyi. Atakpe-ɓedai daɓo, aza n ɓa ɓo na bwai ko apita gmanyi-gmanyi, ɓai bwa awoi-woyi, aza bmazhi yi zan-zan ɓai gyagna laɓa, awyebuayi gya wyeba laɓa, Cawo deji, ɓai la Shekwoyi Isralila nya tu.
32Yesu wa yi wo abara wa gna ɓa ge “Aza ye sun-sun wan mi lo, ɓaku anyipyei bwa gun ata n miyi, ɓai to nyagyi ce lo n, mi ta ye ma gna ɓa mi lo nun, kada azaho zunfyi zokwo.”
33Owo abara nya wo ge, “Yi ɓa bwa nyagyi na n zhabui ye ya ga deji yakwo ye ɓa gyia?”
34Yesu wa nya ɓa ge, “Fye nyagyi shi lo nsun na? Ɓa gna bredi ngun tnaba n nabmiya yi fyewyi.”
35Yesu wa gna aza vinya ge ɓa ku sa-se zhi ʼkni. 36Wa go bredi tnaba yi na bmiya yi, wa zhin Shekwoyi godiya, wa sa ko ya ga wo abara ɓa pmi ɓa ga ʼza. 37-38 Zaho-zahoi wa gyi nubo a wo fu. Anugbayi vinya ɓo nyi 4,000, gbo na nyikozayi n na ɓi yi. Awyiwoi n ɓa ɓo ce a ye ɓa zhi, ɓa nu a chekun tnaba.
39Yesu wa gna aza ami, wa lo ʼya ɓa piya lo Magadan ʼkni.
Currently Selected:
Matta 15: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
