Luka 22
22
Ai Pa Yesu Kulu
1To esa wo vi ntu a Yahudiyi agmada ɓo (nɓa zhin ɓai pa esa n Shekwoyi ɓei knu n ɓai n Masar nyi.) A yikwo ge Idin Paska. Esanu n ɓa ɓei zhin ɓai gyi bredi n koto n yist nyi m. 2Sai pirist dnagmai ɓedo a Yahudiyi malemi ɓa zhin atna ntuge ɓa wu wo, amma ɓa ɓei zhin ɓai wo aza dna.
3Nsayi Shetam wa lo Yahuda Iskariyoti bugba. Wo ɓei zhin Yesu bara nu. 4Wa lo wa daɓo n prist dnagmai hoi ɓedo n zai n wo zhin wa gu aduwa nyakun nyi, she ɓa ɓa zhin ɓa wan Yesu nwu. 5A daɓa n mwa har ɓaku ye ntuge ɓa gawo agyiwye. 6Yahuda kwa wa ye n agyiwye n ɓa ɓe tuwo nyi. Tunyi sayi wa la ɓa woi dna esa manayi wye n wo ɓa ga Yesu nɓa kun n tna aza kpei.
7Ewyi ka ɓe n ɓa zhin agmada n Bredi ntna yist nya nyi, esayi ɓa zhin ɓa wu a kugya ntu paska yi ɓo. 8Yesu wa tnu Birtus ɓedo n Yohanna yi nge ɓalo ɓo zhin shiri n paska yi ntuge ɓa gyi.
9Ɓa nya wo ge, “Ho cei pma yi zhin ko shiri n kni bwai a?”
10Wa ciɓa ge shi fye lofi n zhimi fye ɓo gye ozaho n nuwan shakun shi. Fye viwolo n puwa n wo ɓa lo dna nyi.
11Fye gna puwa da ge, ma cige wo wufye nyakun n miɓa ɓe ntuge ma gyi paska ɓedo n mi abarai nyi.
12Wo ɓa wu fye nyakun dotu ho. To fye zhin shiri ɓo nu.
13Shi ɓa ɓei lo ɓa gye nyaho-nyahoi dai-dai shi Yesu ɓei gna ɓa n wu nyi. Ɓa zhin paska shiri ɓo.
Nyagyi Kmamnayi
14Shi ɓa ɓei ku zo esa si n ɓa ɓa gyi paska n cei. Yesu wa sase n wo aba ɓedo n wo abarai. 15Wa ciɓa ge, “Awomi pua lo n mwa n nabai ma gyi paska nyagyi ye n fyei, kafin mi gye azhin. 16Gama ma gnafye gaiciya mita je kwo gyi n fyei m, sai dai n eshe esanu n kwo ɓei nu daidai nyi.”
17Nsayi Yesu wala kap, wato aba n anab nuwan ɓei fi nyi, wa zhin godiya ga Shekwoyi wa cige, “Fye gwo fya sin fyei ce ga je. 18Gama ma gnafye mita shan anab nuwan ye sin m, Sai Shekwoyi ebemi la ɓe.”
19Nsa yi wa la bredi wa zhin Shekwoyi godiya wa gnakwo ajeya wa gaɓa wa cige, “Deye, kwo nu zhin omi nayi (n Shekwoyi n cei ga ntu fyeɓo nyi.) Fye zhin ko lonu ci-ci fyei pa mi ɓo.”
20Njesun lonu wa gaɓa kap ɓai ku nyagyi gyi wa cige, “Kap ye n kohin kwo nu zhin Shekwoyi alkawali woi-woi n wo kwoi tuze n mi ami n a cei zeya ntu fye ɓo nyi.) 21Amma fye wo ɓoho oza n wo ɓa gami n a Yahudiyi akun nyi wo tulo woi gyi nyagyi n gnisun n miyi. 22Gama oza Nugun ɓa fi shi Shekwoyi n cei katu lo, amma ayya oza yi n wo ɓa gami n ɓa akun nyi.”
23Nsayi ɓa zhi cei wo ɓa ko nyikadonu n ɓa woi ye wa zhin ɓo lo nu.
24Esanu n ɓa ɓei ku paska zo zhin ɓai zhi n abaho, Yesu abara ɓa naɓo naje yi, ko nyikadonu ɓo zhin oza dnagmai n (Shekwoyi ebe mi).
25Yesu wa ciɓa ge, “Asu anyi nya ɓa n ikoi lo tu n oɓa aza tukwo, Aza n ɓa gyibe kwa a yiɓa ge aza nugun-do. 26Amma deye to wulo lonu n fyei m. Amma oza n wo zhin zad-nagmai lo nfye, to, wu ngye oɓi nawyi. Oza n wo zhin gnabyelo kwa, to, wola ze ngye fyenu. 27Nyikadonu du loʼa? Oza n wo saseshi woi gyi nyagyi nyi, ko oza n wo ga nyagyi ga-ga nyiʼa? Ai ozanu n wo sase shi nyi. Amma mi dna n fya tantasi ngye oza nu n wo ku nyagyi ga nyi. 28Fye ku kunsun n mi vinya n mi anyipyei jaraba nya. 29Njesun shi omi dada la iko gami nge mi gyibe nyi, to miɓa zhin alkawali ye n fyei. 30Fye ɓei gyi fyei sin dna n omi ebemi. Fye ɓei kpe n abegyi ashinkpegye fyei da a Islailayi vinya owa.
31“N sa dohoi Yesu wa ci Siman ge, ‘Siman, Siman, kna tnubua ha wo shetam la izini gwo, ntuge wa zhin fye jaraba nfye vinya shi fanuyi zhin wa kun osin ya n awyi-byegye nyi. 32Amma miku adduwa zhin ga ho, Siman n nabai n ho gaiciyaga ta shan-shan m. Amma esanu ho ɓei jezeɓe dami, to, mi cei pma hoi mi oho azaje zhi.’ ”
33Bitrus wa cige, “Dagayi, mi la ye ntuge malo purusuna ngnisun n hoi, har ma ma fi ngnisun n hoi.”
Ala Yesu Wan
34Amma Yesu wa ciwo ge, “Bitrus, Pise nugba ta cheku n naiye m, Sai dai hola mi aɓo na har abwa ngun ata.”
35Nsayi Yesu wa ciɓa ge, “Esanu n mi ɓei tnu n fyei ntna agyiwye ko pwakun, ko kwa ntna abuadanyi, fye ɓei ku gyi nyaho san a?” Ɓa cige, “awo.”
36Yesu wa ciɓa ge, “To, nsaiye dai zaho-zahoi n wo n agyiwyei lo kwo kwa apwakun, wola la. Oza n wo to n ebeyakwoi lo m, to, wo kun owo eje ntuge wa si, ebeyakwo. 37Gama ma gnafye, dole ɓeda kwa nu n acei kafi n Littafi ge, Aɓei ɓewo do n alaifi dayi. Gama ɓeda n kwo kafi n mi tukwo nyi kola wo vi-vi kwa nu.”
38Owo abara ɓa ciwo ge, “To ai yi n abeyakwoi shi nyi ngun aba.” Yesu wa cige ɓaku kun lonu.
39Yesu wa fa zhimi shi wo ɓei zhin woi zhin ci-ci, wa lo Zaitun pe. Owo abara ɓa kun lo ngnisun n woi. 40Esanu wo ɓei si aba n wo zhin wa shi nyi wa ciɓa ge, “Fye zhin aduwa n nabai to fya kayafi n jaraba m.”
41Nsayi wa lo n kpai fyewyi wa ce akwo-kwo, wa zhin aduwa wacige, 42“Dada, n haye fa wahala ye kwa dumi ya, to kwa ɓe ma ba m. Amma to vi omi ɓemwi sai-dai oho nya.” 43Malaika gmi n she nsayi wa ɓe wa mi wo gni; 44Dna n wahalayi Yesu wa zhin aduwa n gaiciya, har amisa ɓa kpe ngye ami kolo kawai, ɓai kunya zhi nkni. 45Esanu n wo ɓei laka n aduwa zhin ɓa wa lo wa gye owo abara zhi ɓai wan gye. Ai ku ɓa ɓe ce n wahalai.
46Wa nyaɓa ge, “Kni nu zhin fyei wan gyeʼa? Fye kukala fya zhin aduwa n nabai to fya kayafi n jara ba m.”
47Esanu Yesu ɓei ye gni wo daɓo, aza n mwa ɓa ɓe, Yahuda Yesu bara yi owo nu ɓei gyi ɓe nabye, wa ɓe wa zhin Yesu sumba, ngye nugun-do. 48Yesu wa ci ge, “Yahuda ho ga Oza Nugun n sumbai nu?” 49Amma Yesu abara n ɓaɓei zhi n woi nyi, ɓai gye enya nkwoye kwa zhin ɓa, “Dagayi, yi zhin ampanyi n abeyakwoi ya ce ɓa ya?”
50Zaknayi nɓa mi wa zun prist dnagmayi fyenu tnubua bwaizhe nya ya.
51Amma Yesu wa ciwo ge, “To zhin aɓoye pya m.” Wa to zayi tnubua bwa kwa wo kagna. 52Nsayi Yesu wa ci a prist dnagmai, ɓedo n adan-doka aduwa nyakun nya yi, har ɓedo n atukwodai n ɓa ɓei ɓe ntuge ɓa wan wo nyi ge, “fye ɓe zhi n abeyakwoi n abusi shi ge na? Fye ye fya wan evi nu? 53Ai mi ɓei gnisun n fyei n aduwa nyakun fyegyi-fyegyi, amma to fya wan mi m. Amma deye kwonu zhin efye sa, esanu n shetan iko zhin tnu-tnu lo.”
Bitrus Wa Na Yesu Yekpa Bo
54Nsayi ɓa wan Yesu ɓa lo n woi n pirist dnagmai puwa. Bitrus wa viwo n kpai. 55Ena ɓei fin zhi n puwayi a tan-tansin, ɓai sase zhi ɓai wye. Bitrus wa ɓe wa sase shi n gnisun n ɓai.
56Esanu oɓi nyikoi ho n wo zhin tnu-tnu n puwa yi, ɓei gye Bitrus shi n ena ba. Wa shi Bitrus awye zu uuu wa cige, “Ai zeye kunsun lo n woi nu.”
57Amma Bitrus wa naɓo wa cige, “Aʼa mita kpewo ye lo m.”
58Esa fyewyi ozaho wa gye Bitrus njesun wa ciwo ge, “Ai ho zhin gmanyi nu n gnisun n ɓai.” Amma Bitrus wa cige, “Sam.”
59Ngye awa-gmanyi avun, zaho wa gyitu, woi cige, “Ai ata mi a naɓo ge zeye kunsun lo n woi ntuge wo zhin Galili yi zanu.”
60Amma Bitrus wa cige, “Kai ozaye, mita kpe oɓoye lo n ho gni hoi da m, Sam, sam.” Esanu wo ɓei gni woi daɓo n cei nyi, pise-nugba kwa cekwu.
61Yesu wa shi Bitrus awye, nsayi Bitrus wa pa Dagayi ɓeda shi wo ɓei da ge, “Kafin pise kwo cheku n naiye ho ɓei na ma ɓo har abwa ngun ata.” 62Bitrus wa gmiya, wa cibwi n wyei kana.
63Aza n ɓa ɓei zhi ɓai gu Yesu nyi, ɓa kpe wo agye, ɓa luwo. 64Ɓa guwo awye ɓa luwo, ɓa ciwo ge, “Nyikado nu na lu hoʼa?” 65Har ɓa gnawo aɓeda nukwoyi laɓa.
66Shi of ye ɓei gyi, a prist dnagmai ɓedo n amalami attaurat nyai ɓedo n atukwodayi ɓa yezhi a ɓe n Yesu n ɓa tan-tasin. 67Ɓa nyawo ge, “Gna yi, ho zhin Masifu nu?” Wa ciɓa ge, N ma gnafye, fyeta gami gaiciya m. 68Nma nyafye ɓeda fyeta gami amsa m. 69Amma daga nsaiye, Oza N ugun ɓa sase tu n Shekwoyi bwai-zhe-bwa iko da.
70Ɓa nyawo n oɓogmanyi ge, “Ho zhin Shekwoyi nugun nu?” Wa dnaoɓgbe wa cige, “Fyeku da ge mi zhin wo nu.”
71Nsayi ɓa cige, “Ai yita shan seida ho ye lo m. Gama yiku wo n yi a tnubuai woi da n wo gbei. Yiku wo n yi a tnubuai woi da n wo gbei.”
Currently Selected:
Luka 22: GAW
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.