Luka 21
21
1Nsayi Yesu wa shi awye wa gye agyi-wye da zhi ɓai zhin sadaka n adduwa nyakun. 2Njesun wa gye nyigbayi ho n wo to ɓei n nyahoi m, woi ya a sisin-kwobo fi ngun aba.
3Yesu wa cige, “Ma gnafye, Nyigbayi ye n wo to n nyahoi lo nyi m, wo ku agyiwye ga n du Arzllida ye. 4Gama azaye n ɓa ɓei ga sadaka ɓai kni-kni ɓai ceyafi nu. Amma owoi da wo ga nyaho-nyahoi vinya n wo cei lo nu.”
5Azaho n wo abara mi ɓa zhi ɓai da shi adduwa nyakun ɓei bmiya gni n wu. Nkwo akutayi kpaje daidai ɓedo n nyigun yi n kwo ɓei zhin kpe n nyakun pa. Yesu wa ciɓa ge,
6“Duk anyaye n fye gye vinya nyi esa ɓelo n kuta gmanyi to ɓei ce tu n do m. A ɓei la ɓa kmaya vinya n na je.”
7Nsayi ɓa nyawo ge, “Malami kwo ɓei zhin lonu n knisayi ya? Kni nu ɓei zhin n nabai yi kpe ge esa lasi nkoɓo zhin lo nuʼa?”
8Yesu wa ci ɓa ge, “Fye zhin peceiye, Fye to ku ze aza gbeloi, gama aza nmwa ɓa ɓe dna n mi ye, ɓai cige eminu zhin Kristi. Esa lasi, amma fyeto vi ɓa m. 9Fye to wo dna esanu fya wo ge a sun akun lo, ko kwa ai shan asu do. Gama ko zhin dole nu aɓoye pya ɓa zhin kpa, amma kwo to wu ge esa kmaknayi la ga m.” 10Wa godiya wa ciɓa ge, “Akni gbo-gbo ɓei sunkun n ɓa jei, Asu ɓei kun kpe aje. 11A ɓei woge ekni shan-shan lo laɓa, koi saya koi wu aza, mikun ɓei la lakpe ɓedo n anyasan yi gbo-gbo, fye ɓei gye aɓo nukwoyi ɓai ga atuze n she.
12“Amma kafin anyagye ɓa zhin a ɓei wan fye, ai zhin fye zamba, ai lo n fyei n na aduwa nyakun ntuge a dafye owa, ai gufye fi n purusuna, ai lo n fyei n asu abye gbo-gbo ntu mi ɓo. 13Nsayi kwa okwonu ɓe zhin ofye sa, fyei da nabari manayi ye. 14Fye ku shiri zhin esa ye nyi to fyei sa aɓo n amsai n fye ɓa gna ɓa m. 15Ntuge mi ɓei ga fye ɓeda n ɓeyekpe yi nfya nuwuyi to ɓei mi ɓai na ofye ɓeda aɓo m. 16Ofya dada, nfya dnagmai, n fya zai, n fya nugundo yi, ɓa ɓei gafye n tukwoda aba har ɓo wu azaho n fye. 17Zaho-zahoi ɓei la ze ofye nuwuyi ntu mi ɓo. 18Amma tukwoyi gmanyi nfye tukwo to ɓei kaya kwa bwi m.
19“Fye ku zhi dai-dai ntuge fye ɓei gni fyehin n lonu nu.
20“Esanu fye ɓei gye Urushelima shekna gni n na soja yi, to, fye ɓei kpe ge esa la si a la kwo ya. 21To aza nɓa fi n Yahudiya kwa ɓo busi lo ape. Aza nɓa filo n zhimi kwa ɓo kun ya. Aza n ɓa lo n fwa to ɓo zhi api m. 22Gama anyipyei ye ɓanu zhin anyipye yi ta-ta nya, n nabai lit-tafi ɓeda kwa nu. 23Ayya n anyikwo aba nɓa zhi lo n nuboyi ɓedo n aɓiya dai n ɓa na aɓi shilo nakun. Esa nukwoi ɓa ɓe da ekni ye. Shekwoyi minagyi ɓei tu n aza. 24Aɓei wu azaho n abeyakwoyi. Aɓei lo n azahoi n knido ɓaku ze oɓa fyenu. Aza nɓa ta kpe Shekwoyi ye m, ɓa ɓei zhin Urushelima chaka chaka har oɓa sa kwa nu.
25“Aɓei gye tuze nyipyei n apyai har du na kpasu yi. Dna n anyi akni vinya ɓei zhi ɓai wo dna laɓa, ɓai wo aɓeci dna n ko kun n ɓela nyi. 26Aza ɓei zunfi laɓa, shi ɓa zhi ɓai pmi nya nkwo ɓelo n nabye, gama eshe to ɓei shan sun n kwohin wan shi m. 27N anya deye avun vinya nsayi oza Nugun wato Kristi wo ɓe dna n anyi n iko yi.
28“Esanu nfya gye aɓoye ɓai zhin, to, fya ku zhi n shiri zhin sosai ntuge ofye gni-gni la wo vi-vi yi.”
29Nsayi Yesu wa gnaɓa misali ye wa cige, “Fye pa shinwan ɓo n na yikwo ge gbayi nyi, ɓedo n ashiriwan aje yi.
30“Esanu nfya gye ɓai ci afintolo, wa gu aduwa nyakun nyi, shi. 31To kwo wu lonu she fye ɓei gye aɓoye vinya ɓai zhin, to, fye ɓei kpe ge Shekwoyi bemi kola ga ɓe.
32“Fye pa ge anya ye vinya ɓa zhin kafin aza nɓa fi n anyi ye nyi ɓa fi vinya. 33Eshe ɓedo n kni ɓa ɓa duya, amma omi ɓeda kwo ta duya m kpe-kpe.
34“Fye zhin peceiye, Fye to fa agmada n jesin yi har ɓedo n damuwa anyi nya ɓa ku fye gnagna m, kada nyipye yi ɓei ɓe to fyei dna ce m. 35Gama kwo ɓei ɓe shi agam zhin kwa wan za nyi nu, koye ɓe da aza n anyi ye. 36Fye zhin peceiye, fyei zhin aduwa n nabai n fye ɓa bwa akala fyei kunya n aɓoye vinya n lafiya yi. N nabai fye zhi n oza Nugun aba dai-dai.”
37Yesu ɓe zo owo anyipyei kmaknayi lonu woi wunya dna aduwa nyakun. Esanu wyeshe a she wo ɓei zhin wa gmiya wa lo Zaitun pe, har labmi. 38Aza kwa ɓalo haikali n labmi-labmi ntuge ɓa wo owo ɓeda.
Currently Selected:
Luka 21: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
