Luka 17
17
1Nwyihoi Yesu wa ci owa bara ge, aza ɓa bwa jaraba cici ntuge ɓa lofi n laifi. Amma aya n oza aba n wo zhin jarabaye nyi. 2-3 Nna she ozaya dna n la n kuta dagmai pa dna n begye ko ɓa wo du afa wahala n wo ɓa sin ntuge wa zhin aɓi anawyi ɓei zhin laifi nyi. Mi ku pmafye gna, “Gnakni ohozado, n wa zhin laifi, zhin wo gafara njesun n wa ɓa gafara.
4“Ko wa zhin ho laifi abwa ngun tnaba nu, nyipyeyi gmanyi woi ɓa ho gafara, sai ha zhin wo.”
Gaiciya Ga N Godiya Yi
5Nwyihoi Yesu abara ɓa ciwo ge, “Yi ye gaiciya ga lo n mwa. Yi ɓa bwa kwo n wuna?”
6Yesu wa ciɓa ge, “Nfya bwa gaiciya ga ye n bwa sun ciwyi, ngye musta byegye (Musta wu ngye fulu nu.) Ko ɓa mi kwa shi shinwan dnagmai ya har kwa shekwoya dna n la. Nfya ga gbe, koɓa ze lo nu.
7-9 “Ndai fyenu wa zhi ofwa, ko wa zhi akni kna, wo to zhin wa sase shi wa ce wa gyi nyagyin, sai wo la wo puwada nya zhin, wa ga wo wa ku gyi kpa, n navun wa kpe wohin nya gyi. Zahoi ta sa wo ami ko wa zhin wo godiya n, ntu ge wo zhin wo tnu-tnu nu.
10“Ko wu lonu n fya vi mi ɓo, fye ta gna ge a ci fye m, ntu ge fye zhin efye tnu-tnu nu.”
11Sanu n ɓa ɓei gyi abye n zan-zan yi ɓai lo Urushelima ɓa si anyajegna ba n kwo gna Samariya aje n Galili yi nyi. 12Sanu ɓa ɓei lo ezhi ho, akuturu ɓa kune ngun awo ɓa ku zhi n kpai. 13Ɓa cige, “Yesu, Dagayi gye yi sun-sun.”
14Yesu wa shi ɓa wye wa cige, “Fyelo prist aba fyei gna wo ge fye la kagna.” Sanu ɓa ɓei lo n zokwo kwa ɓa kagna.
15Zaknayi n ɓami wa jeze ɓe woi ci ge, “Fye ga Shekwoyi mwa-mwa gama mila kagna.” 16Wa miyazhi n Yesu aba woi zhin wo godiya, ntuge ɓo Yesu ɓo zhin wo nyi. Zeye kwa ɓei zhin Samariya za nu.
17Yesu wa nya wo ge, “Mi to kafye gna ofye awo nu m? Azaje zhi n na? 18Zeye nu na bwa jeze ɓe n wo zhin Samariya za nyi, woi zhin Shekwoyi godiya?”
19Nsayi Yesu wa ciwo ge, “Laka ha lo ho nya oho gaiciya ga la ho ka gna.”
Fye Zhin Shiri Ntu Mi Jeze Ɓe Ɓo
20Nwyihoi a Farisiyi ɓa nya Yesu ge, “Shekwoyi be gyi ɓei ya n knisai ya?” Yesu wa ciɓa ge, “Shekwoyi be mi ta ɓe ai gyekwo wye nu m. 21Fye tami fya cige, ko la la n zhi ye m. Kwo kwa n zhi yi m. Gama Shekwoyi bemi dna lo nfye.”
22Nsahoi wa daɓo n wa barai n ko tukwo wa cige, esa ɓelo n fye ɓei ye fya gye mi n nabai fya kunsun n mi, ko n nyipyei gmanyi, amma fye to ɓei gye mi wye m. 23Fye ɓei wo ge mi la jeze ɓe, nge mi gnilo n ya ko kwa n bwai, fye to ɓei ye m, ko kwa fyei lo ge fye zan mi shin. 24Gama sanu mi ɓei jezee fye ɓei kpe sosai. Ko ɓei wu n gye ogma bmiya nu. N kwo zhin kwa bmiya n she nyi. 25Amma dole me sin wahala kpa har to a shan mi ye m.
26Sanu mi ɓei jezeɓe nyi, anyi ɓei wu ngye Nuhu sa nu. 27Gamaɓa ɓei sin ɓai gyi har ɓai ku anyikwo. Ɓa ɓei dagma har sanu Nuhu ɓei lo dna n ya nuwan ɓe aza bwi vinya.
28Njesun anyi ɓei wu ngye Lot sa nu: gama aza ɓei gyi, ɓai sin, ɓai si ɓai knu, ɓai nu fwa, ɓai mi anyaknu 29Har wyi Lot ɓo fa Sodoma nyi. Nsayi ena kun n she kwa gyi ɓa vinya. 30Eh, aza ɓei laɓa lonu nu, har esa mi ɓa jezeɓe n cei nyi.
31Aza nɓa to bei fi n napi m, to ɓato ɓei jeze ɓe m. Aza n ɓa kpelo nfwa, ɓa to ɓo ɓe zhi mi m. 32Fye pa nya ko ɓei zhin Lot nyikwo nyi. 33Zaho-zaho wa wo wye-wyeyi shi kam-kam wo ta bwa ko m. Amma oza wa wo wye-wyeyi ya to, wonu ɓa bwa kwo. 34Nwyiyi aza ɓei fi ngu aba ɓai wan gye, ai la gmanyi o ce gmanyi ya. 35-36 Anyikwoza ngun aba ɓei zhi ɓai zhin tnu-tnu ai la gmanyi o ce gmanyi ya. Kwo ɓei jewu lo nu na zai ɓai kpe n fwa.
37Owo abara ɓa nya wo ge, “Dagayi aɓoye ɓei zhin n kni wyi ya?” Yesu wa ciɓa ge, “Aba zafi shi agulu zhin ɓa she laɓa ɓo nu.”
Currently Selected:
Luka 17: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
