Luka 13
13
Abokunmi Ayepmayi
1Nsayi nabari kwa ɓeda Yesu ge, Bilatus ku ayahudawa ho wu ai kun n Galili, sanu a ɓei fi ai zhin sadaka n Shekwoyi nyakun.
2Yesu wa nya aza ge, “fye gye lo ge oɓa nu zhin alaifi da lo n du n Galili? Cenu zhin ɓai sin wahala ye?
3“Aʼa, kwo to wo lo nu m. Amma fye tagye lo ngye fye ɓa fi n fye hin m, akpe ge fya fa alaifi, fya ɓe da Shekwoyi m?
4“Aza ngun awo cei nyimwa-nyimwa n ɓa ɓei fi, sanu Siluwan nyakun ɓei miya kpe a nyi mwa? Oɓa nu ɓei zhin alaifida n du Urushelima? 5Awo, kwo to wo lo nu m. Amma fye ɓa fi ce, akpe ge fya ye abui.”
6Nsayi wa ga ɓa misali ye, “Oza ɓei n lemu shinwan gni n wo fwa wa ɓe woi pmigye cici ko kwo ku gyi, am-ma to wa gye nyaho m. 7Navun wa gna wo bara ge wo mi koya, wa cige, ‘mila pmi ko har aye ngnu ata, am-ma kwo to gyi m. Ai kwo gni koi gwo aba nu n yi ɓa shi odo nyi.’
8“Owo bara wa ciwo ge, ‘Dagayi ato miko ya kpa m. Fako har eye gmanyi, ma fi kwo taki ma gye. 9Nkwo ɓei gyi, to, amma nkwo to ɓei gyi m, sai mo zun koya.’ ”
10Sanu Yesu ɓei dna woi wu nya n aduwa nyakun n satiwyi. 11Wa gye nyikwoza ho n dna wahala. Wo zan-zan n bmatu har aye awo cei nyimwa-nyimwa, to woi mi woi gni agni m.
12Yesu wa yi wo, waciwo ge, “Nyikwoza, ala ho kagna n ho nyasan.” 13Wa to wo bwa, Nsayi sayi nyikwozayi wa kpe gni. Wa zhin Shekwoyi godiya sosai.
14Amma a duwa-nyakun tukoda, ɓo ku minagyi gyi n woi, ntuge wo ɓei ka za gna n Satiwyi. Wa cige, “anyipyei lo ngu tnai ntu tnu-tnu ɓo. Ko to bmiya lo a ka za gna n Satiwyi m.”
15Amma Yesu wa ciwo ge, “Zagbolo! Ho ta lo anakwo ya n Satiwyi ntuge ɓa sin nuwan?” 16To, kwo to bmiya lo ma lo nyikwoza deye ya n Shetan lawo pa har aye awo-cei nyimwa-nyimwa nyin?
17Owo ɓedaye ɓo ku vinko ga owo anuwun yi. Kwa da aza mwa n ɓa ɓei ce nyi.
18Nsayi wa ya ɓa wu njesun n Shekwoyi bemi tukwo wa cige, “Shekwoyi bemi wu n wuna? Ma zhin ko misali n kni ya? 19Kwo wu lo ngye mustard byegye nu, n kwo bwa sun cewyi nyi. Sanu ko pa kwo zhin kwa mwa sosai har alu ɓai ya kpe kwo. 20-21 Shekwoyi bemi wulo ngye yist nu n na zhin a fi n bredi nyi. Ata zhin a gye kwo wyen sai dai agye bredi koi sun kawai.”
22Yesu wa zan n azhi dnagmayi n azhi ɓiɓi yi, woi zhin ɓa waʼazi. Amma wo ɓei na wyei ce n Urushelima bwa nu.
23Zaho wa nya wo ge, “Aza ciwyi nu ɓei pwo ko?”
24-25 Yesu wa cige, “Abokunmi eshe nya bwa sun ciwyi nu. La hoi yi n nabai ho lo. Gama aza mwa ɓei ye ntuge ɓa lo fi, amma sanu puwa da ɓei gu aba ato ɓei shan aba bwa m. Nsayi oza n wo ɓei gni woi ci ge Dagayi gu mi abaya, Dagayi ɓei ciwo ge, ‘Mi ta kpe hoye lo m.’
26“Amma fye ɓei cige, ‘Ai yi ɓei ku nyagyi gyi n hoi, har ha wu yi nya n yi a zokwo.’
27“Amma wo ɓei cige, ‘Mita kpe fyeye lo m. Fye tami fyaɓe ya m, gama fye zhin alaifi danu.’
28“Fye ɓei ci bwi n mwa fyei gyi anyikna. Gama fye ɓei gye Ibrahim, Ishaku n Yakubu yi n be mi ɓedo n anabi yi vinya. 29Gama aza ɓei ɓe n anyi vinya n nabai ɓei sase ɓo. 30Ma gna fye gaiciya aza n ɓa ta bwa mwa-mwa lo n sai ye m, ɓa ɓei gwo ko nwyiyi, aza n ɓa bwa mwa-mwa kwa ɓa to ɓei zhin aza mwa-mwa da nu, n shan sun m.”
31Esafyewyi a Farisiyi ɓa ɓe, ɓa gna Yesu ge, “Hiridus cei pma lo wa gye ho wye. Kwo kamata lo ha busi.”
32Yesu wa cige, Fyelo fye gna ɓeda yi ge, mi ɓa kun alijenu ya mi zhin aɓo wowo yi, n naiye n su yi har wyigyei kafin mi si aba n mi lo. 33Eh, n naiye, nsu, har n wyigyei yi ntu ge koto bmiya lo a wu Shekwoyi anabi m, sai n Urushelima.
34Oh, Urushelima, Urushelima ezhi nko wu anabi nyi. Ezhi nkwo kni aza kuta n na tnu ɓai n ɓa aba nyi. Miɓa zhin wuna gama mi zhin ma ye ntuge ma ye fye zhi, shi pese zhin kwa ye ekwo aɓi zhi nyi, amma fyeta ye lo m. 35To naiye, mila fye puwa yashi fye, Fye ta shan mi wye gye njesun m, akpege fya ci ge, “Sanu n ɓei ga oza n wo ɓe dna Shekwoyi ye nyi.”
Currently Selected:
Luka 13: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
