Yohanna 9
9
Yesu La Za Kagna Nna Ɓei Ma Nna Wyebua Yi
1Esa nu wo ɓei lo n zokwo, wa gye wyebua-yi ho, nna ɓei pma wo ma nna wyebua-yi.
2Owo abara ɓa nya wo ɓo ge, “Male, nyikado laifi nu ɓo zhin a ma oza deye n zhin wyebua yiʼa? Owo azamayi, laifi na?”
3Yesu wa gna ɓa ge, “Zaho-zahoi laifi nu to n, ko owo ko owa zamayi m, ama ntuge a wu Shekwoyi iko. 4Tile ya zhin omi Dada tnu-tnu, nwa ga yi nyi, nyipyei ye tu sukwo la ga zhin n zaho-zahoi ta mi wa je tnu-tnu zhin m. 5Mi ye dna anyi mi, omi nu zhin buzangna anyi nya.”
6Shi wo ɓo zo da lonu, wa kni akni zhin nkni, wa fu owun wa pmiya wyebua-yi nawye, 7Wa gna wo ge, “Lo Siluwan nuwan zundna ho fu nuwan.” 8Wa jeze ɓe to aza ɓai kpe wo yem. Du nwo azajeyi to ɓai kpe wo yem. Ɓai nya aje ge, “wyebuayi, nyaɓayi hi nu bwa lo ya?”
9Azaho ɓa gna ge, “Owo nu, azaho ge owonu to m, zadogbe nu,” ama wa gna a ge, “Omi nu.”
10Ɓa nya wo ge, “Kwa ze wuna hoi gye wyeba?”
11Wa gna ɓage, “Oza nna yi wo ge Yesu nyi, owo na fu amwi woi tna mi nawye woi gna mi ge mi lo Siluwan nuwan zundna mi fu nuwan, awye yi kpe mi ya, mi-i gye wyeba.”
12Ɓa nya wo ge ozaho gni na? Wa gna ɓa ge, Mi takpe lo m.
13Ɓa la wo lo cei, nna Afarisiyi aba. 14Aɓo deye vinya ɓo zhin n Satiwyi nu. 15Afarisiyi ɓa nya wo ɓo, shi kwa ze woi gye wyeba. Wohin wa wu a, shi Yesu Bo zhin wo n wu.
16Azaho nɓa mi, ɓa gna ge, “Woto zhin oza nu n Shekwoyi wa tnu cei yim. Ntu kniɓeyi nu woi zhin tnu-tnu n nyipyeyi sun-sun yiʼa?” Azadoho ɓa gna, “Ai laifi da ta mi wa zhin aɓo wo-woyi yem.” Deye kwa ɓe ɓa n naje-gna-yi.
17Ɓa nya wo ɓo ge, “Oza nwa kpe ho awye ya nyi ho gye ge wo zhin nyikanuʼa?” Wa gna ɓa ge, “Wo zhin anabi nu.”
18To a Yahudiyi ɓa ga gaiciya ge wo ɓo zhin wyebuayi num. Ntu cenu ɓa yi wo azamayi, ɓa nya ɓa ɓo. 19Ɓa nya ge, Ofye ɓi nu gni ya? Wo ɓo zhin wyebuayi nu? Kwa ze nwuna woi gye wyeba?
20Ɓa gna ge, “Eyi ɓi nu gni, Wo ɓei zhin wyebuayi nu tunyi nwo mama-wyi. 21Ama, shi kwa ze woi gni woi gye wyeba nyi, ko oza nwa kpe wo awyeya, yi ta kpe lo n. Wo la sun za, nwo ɓa daɓo n wohin, fye nya wo ɓo!” 22Ɓa to ɓo ye ɓa da m, ntuge ɓa ɓo wo Ayahudiyi ʼdna nu, ntuge ɓa ɓo ku da ge, Oza nwa gna ge Yesu zhin Kristi nu, a ɓa wo gmi ya aduwa nyakun. 23Ce nu ɓo zhin owo azamayi ɓa gna ge, ɓa ta kpe lon, wo la sun za, fye nya wo ɓo.
24Ayahudiyi ɓa je zahi yi ɓa gna wo ge, “Ga Shekwoyi mwa-mwa, to ge Yesu m, yi kpe lo ge Yesu zhin laifi da nu.”
25Wohin wa gna ɓa ge, “Mi ta kpe lo ko wo zhin laifi da nu ko oza manayi m. Ama onya gmanyi nmi kpe, okwo nu ge mi ɓei zhin wyebuayi nu, ama nsayi ye mi gye wyeba lo.”
26Har sayi ye ɓa je wo ɓo nya, “Wa zhin ho wuna? Wa ka ho gna n wuna?”
27Wa gna ɓa ge, “Ɓe ma shin fye gna nyi fye to won? Knihi nu zhin fyei je mi ɓo nya? Fye ye ge ma je da nu? Fye ye ge fya ze owo aviyi nu ce?”
28Ɓa kni wo akmi, ɓa gna, Ho nu zhin wo viyi, ama yi zhin Musa aviyi nu. 29Yi kpe lo ge Shekwoyi ɓo ku ɓoda n Musa yi, ama oza deye da yita kpe aba lo n wo gmi m.
30Ozahi wa ci ɓa ge, “Ko zhin ɓo wowoyi nu! Fye ta kpe aba lo n wo gmi m. Ama wo la awye kpe mi ya.
31“Yi kpe lo ge Shekwoyi ta wo laifi da aduwa m, ama oza n wo wo Shekwoyi dna, Shekwoyi zhin wa wo wo. 32Shi Shekwoyi ɓo zhin anyi, fye shin gye ozaho woi kpe oza awyeya, nna ɓo ma wo nna wyeibua yi? 33Wo to ɓei gna wo zhin Shekwoyi za nun, to wo mi wa zhin deye m.”
34Ɓa kni wo akmi, “Oho n ho zhin laifi da, ho nu ɓa wu yi?”
35Shi Yesu ɓei ku wo aɓo vinya nna ɓo zhin wo, wa gye wo wye, wa nya wo ge “Ho la gaiciya ga oza Nugun?”
36Wa nya Yesu ɓo ge, “Nkanu n woiʼa? Mi cei pma ma ga wo gaiciya.”
37Yesu wa ci wo ge, “Ho ku wo gye wye, owo nu daɓo n hoi.” 38Wa gna wo, “E, Dagayi mi la gaiciya ga,” wa ya shi wa ga wo mwa-mwa.
39Yesu wa gna wo ge, “Ma ɓe anyi ntuge ma ga aza wyeba gye Zafun nya. Aza nɓa gye lo ge ɓa gye wyeba lo, ma wu ɓa ge, ɓa zhin awyebuayi nu.”
40Afarisiyi nɓa ɓo zhi ɓo, ɓa wo ɓa nya ge, “Ho gna nu ge yi zhin awyebuayi nu?”
41Yesu wa gna ɓa ge, “Fye ɓo zhin awyebuayi nu, to fye n laifi yi lon. Ama fye gna ge fye gye wyeba lo, ntu cenu fye n laifi yi lo.”
Currently Selected:
Yohanna 9: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
