Yohanna 7
7
Aɓona Tu N Yesu Tukwo
1Ndeye avun, Yesu wa fa Yahudi ya wa lo Galili, woi zan nazhi aɓi-ɓi-yi, wo to ɓo ye wa dna n Yahudiya m, ntuge ɓa ɓo ye ɓa wu wo. 2A Yahudiyayi awyefan, alubui nyagyi nya ʼsa ɓei la ga si. 3Yesu amaje ɓa gna wo ge wo lo Yahudiya ntu awyefan ɓo. “Lo aba n aza lo, ntuge ho zhin aɓo wo-woyi nabai oho abara ɓa gye. 4Ndei ho ye a kpe ho ye, sai ha hohin gmi wu, to zhin aɓo n so-son, shi ho mi lo hoi zhin aɓoye nyi, wu hohin n anyi vinya aba.” 5Ntu ge ko owo amaje nɓahin, ɓa to ɓo ga wo gaiciya m.
6Yesu wa ci ɓa ge, “Omi sa to si kpam, ama nfye aba esaho-sahoi wu lo dei-dei. 7Anyi ta wun fye nu lom, ama ɓa ta ye mi lon, ntuge mi gna ge oɓa atnu-tnu zhin anukwoyi nu. 8Fye lo fye nya awyefanhi, shi esa si mi nʼɓa ɓe.” 9She wo ɓo ku da lo nu, wa wo nya ce dna n Galili.
10Esa nwo amaje ɓo ku lo, wa kma ɓa nya lo n so-so. 11Nna awye-fan ʼba a Yahudiyi ɓai zan wo shin ɓai nya ge, Zahi gni na? 12Aza ɓai da aɓeda gbo-gbo tu nwo tukwo, azaho ɓa gna, Wo zhin oza manayi nu, azaho ɓa gna, awo, Wo zhin aza-kwoce-dnayi nu. 13Ama zaho-zahoi to ɓo mi, wa da wo ɓo pei-pei m, ntuge ɓa wo a Yahudiyi edna.
14Dna n awyefan atan-tasin, Yesu wa lo dna nu aduwa-nyakun, wa ya ɓa nya wu. 15Ce awo a Yahudiyi, ɓa nya ge, “Oza deye wa bwa ɓeyekpe n na to woi lo makaranta ma?”
16Yesu wa gna ɓa ge, “Omihin ɓeyekpe nu to nmi wu fyem, ama Shekwoyi nya, owo nu n wa tnu mi nyi. 17Ndei oza la kni, wa zhin Shekwoyi ɓeye, wo ɓa kpe nya ye n mi wu nyi, ko kwo zhin Shekwoyi nya nu, ko omihin nya nu. 18Oza nwa da ɓeda ntu wohin tukwo ɓo, wo ye mwa-mwa n wohin ɓo nu, ama, oza nwo zhin tnu-tnu ntu oza latu ɓo nwa tnu wo nyi, wo nu zhin oza gaiciya da nza manayi. 19Musa to ɓo ga fye awyidnan? Zaho tolo n wo shi ɓa bwa lo nfyem. Knihi nu zhin fyei ye fya wu miʼa?”
20Begyehi kwa ci wo ge, “Tukwo laho pmiya! Nyika nu ye wa wu hoʼa?”
21Yesu wa dna ɓa ɓegbe wa ci ge, “Ma zhin ɓo wo-woyi gmanyi ca wo fye.” 22Musa ɓo gna fye ge fye zhin aɓi kaciya, (yi kpe lo dei ko to ya nwo sa num, kwa ya n yi azakwoi sa nu) ama fye ta kni Satiwyim. 23Ndei fye ɓa zhin kaciya n Satiwyi, ntuge fya nu Musa awyidna, ntu kniɓeyi nu fyei gyi minagyi ge, ma ka oza gna n Satiwyiʼa? 24Nfya dnawye peceye, fye ɓa gye, ma zhin ɓe manayi nu.
25Azaho nɓa fi n Urushelima mi, ɓa nya ɓo ge, “Ozaye nu to nɓa ye ɓa wu n? 26Ai wo gni nyi woi daɓo pei-pei, zaho-zahoi ta da nya ho lon. Kwo atukwoda ɓa ku kpe nu ge Wo nu zhin Kristiʼa? 27Ama yi kpe aba lo nzadeye gmi, esa Kristi ɓa ɓe, ai zaho-zahoi to ɓo kpe aba nwa gmim.”
28Yesu woi gni woi wu ɓa nya, wa ci ɓa ge, “E fye kpe mi ye lo, fye kpe aba lo nmi gmi njesun. Ama mi zhin tnu-tnuyi nu, oza nwa tnu mi nyi wo zhin gaiciya nu. Fye ta kpe wo ye lo m. 29Ama mi kpe wo ye lo, ntu ge ma gmi nwo aba nu, owo na tnu mi.”
30A Yahudiyi atukwoda ɓai ye ɓa wan wo, ama zaho-zahoi to ɓo to wo bwam, ntuge owo sa to ɓei sim.
31Ama aza nmwa begye n aduwa nyakunhi, ɓa ku gaiciya ga wo. Ɓa nya ge, “Esa n Kristi ɓa ɓe ncei, wo ɓo shan aɓo wo-woyi ho zhin ndu oza deye?” 32Esanu Afarisiyi ɓo wo lo nu, ɓa tnu adogagyi ntuge ɓa wan Yesu ɓe cei. 33Ama Yesu wa gna ɓa ge, “Esa ye mi ce lo fyewyi ma kun-sun nfyeyi, ma kpe je ze lo oza aba nwa tnu mi nyi. 34Fye ɓo zan mi shin ama fye to ɓei gye mi wyem. Fyei to ɓo mi fye ɓe aba nmi nyi m.”
35A Yahudiyi atukwoda ɓa nya aje ge, “Wo ye wa lo nna nu to ya gye wo wyem ma? Ko wo ye wa lo eyi azaje aba nu nɓa gnami fi nna abyedo, wo zhin abyedo waʼazi a? 36Kniɓeyi nu nwo dage, ʼFye ɓo zan mi shin ama fye to ɓo gye mi wyem, njesun ge, ‘Aba mi nyi, fye ta mi fya ɓem ma’?”
37N nyipyei kmaknayi awyefan nya, Yesu wa je ɓeda nazayi ge, Oza n nuwan mikun wo wolo, wo ɓe mi aba wa sin. 38Ntuge Littafi Gyi-gyi-yi ku da ge, oza nwo ga mi gaiciya, nuwan ɓa kpe nwo mi ngye dnapa. 39Wo ɓei da Zafun Gyi-gyi-yi nu ɓo, nna ɓa ga ozaho-zahoi nwa ga Yesu gaiciya nyi. Ama nsahi Zafun to ɓei ɓem, ntuge Yesu to ɓei jeze lo Dada aba n ʼshe min.
40Sanu ɓa ɓo wo woi da lo nu, azaho ɓa ci ge, “Oza deye zhin anabi nu ɓehin-hin.” 41Azaho ge, “Wo zhin Kristi nu.” Azaho ge. “Kristi ɓa gmi n Galili nu?” 42Ntu ge Littafi Gyi-gyi-yi ku da pei-pei ge Yesu ɓa gmi n Esu Dauda ebye nu n Baitalami aba naɓo ma Dauda nyi. 43Aza ɓo la gnaje ngun aba ntu wo ɓo. 44Azaho ɓai ye ɓa wan Wo, ama zaho-zahoi to ɓo to wo bwam. 45Adogagyi n na ɓei tnu, ɓa jeze ɓe ntna wo shi yi. Aduwa nyakun tukwoda ɓedo a Farisiyi ɓa nya ɓa ge, kninya zhin to fyei ɓe nwoi ma?
46Adogagyi-hi ɓei gna ge, ɓa to shin oza wo woi daɓo ngye shi Yesu da nyi m.
47Afarisiyi ɓa nya ɓa ge, “Aku fye dna kwoce nuce?” 48Atukwoda ho lo ko a Farisiyi, nɓa ku gaiciya ga ge, wo zhin Gni-yi nu? 49Aza nɓa ta kpe owa ye nyin, oɓa nu ku gaiciya ga, okni tu lo nɓa. 50Nikodimu, nwo ɓo lo Yesu aba n sukwoyi nyl, wo ɓo dna nɓa, wa nya ge, 51“Ko wu lo dei-dei a ga za laifi to ai da wo owa n?”
52Ɓa nya wo ge, “Hohin gmi n Galili nu ce? Lo ho shan Shekwoyi ɓeda baba, ho ɓa gye ge anabi to lo nwo ɓa gmi n Galili m.” 53Ɓa kuka, zaho-zahoi wa lo wo puwa.
Currently Selected:
Yohanna 7: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
