Yohanna 6
6
Yesu Wa Ga Aza Dubu Ngun Atnu Nyagyi
1Ndeye avun, Yesu wa piya lo Galili nuwan kma, wato Tibariya nuwan zundna. 2Aza yezhi nmwa begye ɓa vi wo lo, ntu ge-ɓa ɓo ku gye aɓo wo-woyi nwo ɓo zhin tu nanyasan-yi tukwo. 3Yesu wa gun lo ʼpe, wa sase tu ngnisun nwo abara yi. 4Sahi ɓo la wu vi n paska yi, wato a Yahudiyi nyagyi sa. 5Shi Yesu ɓo kpe awye shi wa gye aza yezhi nmwa begye, wa nya Filibbus ge, Yi ɓa bwa nyagyi nna ya si, ya ga aza yezhi yeʼa? 6Wo ɓei ye wa wo nya nu n Filibbus ɓa da, ntuge wo ɓei kpe ɓoye nwo ɓa zhin.
7Filibbus wa dna wo ɓegbe wa gna, Kwo yi si buredi naira tagyi ngun aba nya (₦200) ko ta kun ɓam.
8Andarawus, Bitrus zado, wa ci ge, 9Oɓiho gni lo ya n buredi yi shi ngun atnu, n abmiya yi ngun aba. Ama kwo ɓa zhin knihin nu n begye yeʼa?
10Yesu wa gna ɓa ge, ɓa gna aza ɓa ku sase. (Gbegbe ɓei nyi ɓo) aza vinya ɓa ku sase. Azanugbayi ɓei nyi adubu ngun atnu. (5,000). 11Yesu wa gwo buredihi, wa zhin godiya ga Shekwoyi wa ga aza. Wa je abmiya gwo wa je godiya zhin wa ga ɓa. 12Shi nubo ɓei ku ɓa fu, Yesu wa gna wo abara ge, “fye ye awyi-woyi zhi, to nyaho kwa wun yam.” 13Awyiwoyi-hi nɓa ɓei ce nyi, ɓa ɓei ku nu acekun ngun awocei-aba.
14Shi aza ɓo gye lonu, ɓa gna ge, “Behin-hin oza deye zhin anabi nu, n yi nwo awyetuyi nyi.”
15Shi Yesu ɓo ku kpe ge, ɓa ye lo ɓa wan wo ɓa dna wo ʼbe nna kala, wa laka wa gun lo ʼpe-sepa nwo gmanyi yi.
16Sanu wyeshe ɓo la she, owo abara ɓa lo ednagbe. 17Ɓa lo fi n ʼya, ntuge ɓa piya lo Kafarnahum. Sukwo kwa zhin, to Yesu woi ɓe ɓa abam. 18Ese ci nkalayi, har nuwan kwoi ce nya. 19Ɓa ɓei bwa zan-zan ngye milu ngun ata ko ngun anyi, ɓa gye Yesu woi ɓe, woi zan-zan tu nuwan woi ɓe ʼya ba. Ɓa ya edna wo. 20Yesu wa gna ɓa ge fye to wo dna m, Omi nu. 21Ɓa ye ɓa gwo wo dna eya, safyewyi ɓa piya kpe nkma.
22She ʼfye ɓei gyi, aza-yezhi ɓa gye eya ce shi gmanyi kawai, Yesu kwa to ɓo lo dna nwo abara yim, ama ɓa ɓei lo ɓahin-ɓahin nu. 23Aza ho ɓa kun n Tibariya, ɓa piya kpe vivi aba yi aza ɓai gyi buredi, n Dagayi ɓei tu kwo anabarka nyi. 24Shi aza-yezhi to ɓo gye Yesu ko owo abara fi n aya him, ɓa lofi aya ɓa lo Kafarnahum ɓai zan Yesu shin.
25Shi ɓa ɓei gye wo nkmahi, ɓa nya wo ge, “Male, ha ɓe ya n knisayi ya?” 26Yesu wa gna ɓa ge, “Ma gna fye gaiciya, fye ta zan mi shin ntu aɓo wo-woyi ɓo nu nfya gye nyim, ama ntuge fye ɓo ku buredi gyi lanubo ku fye fu. 27Fye to zhin tnu-tnu ntu nyagyi ɓo nkwo ɓa wun Iyam, ama ntu nyagyi wye-wyei nya ɓo, okwo nu n Oza Nugun ɓa ga fye. Ce na zhin Shekwyi Dada woi tnu n woi.” 28Ɓa nya wo ge, “Yi ɓa zhin nwuna ya zhin Shekwoyi ɓeyeʼa?” 29Yesu wa gna ɓa ge, “Shekwoyi ɓeye nu nyi ge, fye ga oza gaiciya nwa tnu n woi nyi.” 30Ɓa nya Yesu ge, “Ho ɓa zhin kni atuzeyi nu ntuge ya gye nabai ya ga ho gaiciya? Ho ɓa zhin knihi na? 31Littafi Gyi-gyi-yi, kwa gna ge, eyi Adada ɓei gyi manna n zhabui Wa ga ɓa buredi nkwo gmi n ʼshe.”
32Yesu wa gna ɓa ge, “Musa nu to ɓei ga ɓa buredi hi m. Omi Dada nu. Nsayi wo ga fye buredi gaiciya nya nkwo gmi n ʼshe nyi. 33Buredi gaiciya nya, okwo nu zhin oza n Shekwoyi wa tnu n woi dna anyi woi ga aza wye-wyei nyi.”
34Ɓa gna wo ge, Dagayi ga yi buredi ye fyegyi-fyegyi. 35Yesu wa gna ɓa ge, “Omi nu zhin buredi wye-wyeyi nya. Oza nwa ɓe mi aba mikun ta gun wo m, oza nwo ga mi gaiciya nuwan mikun ta wo wom.
36“Ama, ngye shi mi ku gna fye, fye ku mi gyewye, dudu lonu fye ta ga mi gaiciya lon. 37Aza n Dada ku gami nyi, tile ɓa ɓe mi aba. Mihin kwa mi ta nya ɓa yam. 38Mi to gmi n ʼshe mi-i ɓe ya ntu ge ma zhin mihin ɓeye num, ama ma zhin Shekwoyi ɓeye owo nu nwa tnu mi nyi. 39Shekowyi ɓeye nu nyi ge, To zaknayi wa bwi, dna n na aza n wa gami nyi m. Ama ma ku ɓa kala lo wye-wyeyi nyalo-nyalo nya, n nyipyei kmaknayi. 40Omi Dada ɓeye nu nyi ge, Zaho-zahoi nwa gye Nugun, wa ga wo gaiciya wo ɓa bwa wye-wyei nyalo-nyalo nya. Omihin n ɓei la wo kala n vingwo n nyipyei kmaknayi.”
41A Yahudiyi ɓa ya gunnu-gunnu da, shi ɓa ɓo wo Yesu woi gna ge, Omi nu zhin buredi nkwo gmi n ʼshe. 42Ce a wo ɓa ɓa gna, Kninyia! Yesu, Yusufu nugun nu to bwa gnin, owo dada nwo iya yi n yi kpe ye lo nyin. Knihi nu zhin woi gna ge wa gmi n ʼshe nuʼa?
43Yesu wa dna ɓa ɓo gbe, wa ci ge, “Fye ku fa gunnu-gunnu da ɓo shi ma da lo nu. 44Zaho-zahoi ta mi wa ɓe mi abam, sai Dada gna wo ge wo ɓe. Mihin mi ɓei la wo kala n vingwo n nyipyei kmaknayi. 45Alkawali kwo-kwoi ku da ge, ʼShekwoyi ɓo wu aza nya vinya, Oza n wa wo Dada ɓeda wo ɓa ɓe mi aba. 46Ozaho-zahoi to shin Dada wyegyem, sai dai emi nma gmi nwo aba nyi. 47Ɓehin-hin ma gna gye, oza nwa gami gaiciya wo wye-wyei nyalo-nyalo nya yi lo. 48Emi nu zhin buredi wye-wyeyi nya. 49Of ye azakwoyi ɓei gyi manna fi n zhabui, ama ɓa ɓo ku fi. 50Eminu zhin buredi n kwo gmi n ʼshe, nza gyi ko wo ta fim. 51Eminu zhin buredi wye-wyei nya, nkwo gmi nshe nyi. Ozaho-zahoi nwa gyi buredi ye wo ɓa bwa wye-wyei nyalo-nyalo. Buredi ye emi nayi nu, nmi ye ma ga kwo ntu anyi gni-gni ɓo nyi.”
52A Yahudiyi, ɓa ya aɓona na jei, ɓai gna, Oza deye ɓa mi nwuna wa ga yi owo nayi ya gyiʼa?
53Yesu wa gna ɓa ge, “Ɓehin-hin ma gna fye, nfye to gyi Oza Nugun nayi m, fyei sin owo amin, fye ta bwa wye-wyei dna nfye mim. 54Ama oza n wa gyi mi nayi, wa sin mi ami wo ɓa bwa wye-wyei, njesun mɓei lawo kala n vingwo n nyipyei kmaknayi. 55Omi nayi kwo zhin nyagyi nu ɓehin-hin omi ami njesun ɓa zhin nya sin-sin yi nu. 56Oza nwa gyi mi nayi, wa sin omi ami njesun, wo zhin ozanu nwo sase dna nmi mi, Emihin ndna nwo mi. 57Ngye shi Dada wye-wyei nya wa tnu n mi-i, mi n wye-wyei lo ntu wo ɓo. Elonu oza nwa gyi mi nayi wohin wo ɓa bwa wye-wyei ntu mi ɓo ce. 58Eminu zhin buredi gaiciya nya nkwo gmi n ʼshe; kwo to wu lo ngye odo nu nfye azakwoyi ɓo gyi fi n zhabui, ɓa fi nyim. Oza nwa gyi deye wo ɓa bwa wye-wyeyi nyalo-nyalo nya”. 59Yesu ɓo da aɓo deye dna n a Yahudiyi aduwa nyakun nu, n Kafarnahum. 60Shi ɓa ɓo wo deye, owo avi-yi nmwa begye ɓa gna, wu-wu ye dnaɓo lo, nyikanl ɓa mi wa gwo kwoʼa?
61Yesu wa ku kpe ge ɓa da gunnu-gunnu lo; wa nya ɓa ge, “Deye wun fye bugba ya lo? 62Fye ɓei zhin wuna, shi fye ɓo gye Oza Nugun woi jeze lo ʼsheʼa? 63Zafun Gyi-gyi-yi nu ga wye-wyeyi nyalo-nyalo nya, ama nayi nya ta ga za kwom. Mi ku wu fye shi fye ɓa bwa wye-wyeyi zafun nya. 64Ama azaho nfye mi, ta gami gaiciya lon.” (Ntuge Yesu ɓo kukpe oza n wo to ɓo ga wo gaiciyam, n za yi nwo ɓo kun wo.)
65Wa gyi abye wa gna, “Ntu cenu ma gna fye ge, ozaho to lo nwo ɓa mi wa ɓe mi abam, akpe Dada gni wo ɓe cei.”
66Nsahi, owo aviyi nmwa begye ɓa jeze nnavun yi to ɓa je wo vim.
67Yesu wa nya abara awo-cei-aba hi ge, fyehin ɓa lo ce?
68Siman Bitrus wa dna wo ɓegbe wa gna, “Dagayi, yi ɓa lo da nyika? Oho nu gmanyi nna ɓeda yi nɓa ɓa mi ɓa ga wye-wyeyi nyalo-nyalo nya, 69Njesun yi ku gaiciya ga yi kpe lo ge ho nu zhin Nugun gyi-gyi-yi Shekwoyi nya.”
70Yesu wa gna ɓa ge, Mi la fye kni awo-cei-aba, ama oza gmanyi zhin shaitan nu. 71Wo ɓo da Yahuda, Siman Iskariyoti nugun nu ɓo, gmanyi n awo-cei-aba hi, nwo ɓa kun Yesu nyi.
Currently Selected:
Yohanna 6: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
