Yohanna 15
15
Gnai Gaiciya Nya
1Omi nu zhin anab wunuyi gaiciya nya, omi Dada nu zhin of wa-da woi zhin kwa ba. 2Wo zhin wa gbe abwala ya nɓa ta ga gyi-gyi m. Njesun wa zhin abwala manayi aba, ntu ge ɓa ga gyi-gyi ndudu. 3Wo la fye zhin aba nmi ɓeda yi, nmi da nfyei cici nyi. 4Fye sase fi nmi, omihin nfye mi. Ntu ge bwala ta mi kwa ga gyi-gyi to kwoi kpegyi n shinwan-gnai num. Fyehin ta mi fya ga gyi-gyi, to fyei sase fi nmi m.
5Omi nu zhin shinwan-gnai, fya zhin abwala. Oza nwo sase dna nmi, omihin ndna nwo, wo ɓa ga gyi-gyi nmwa, ntu ge ntna mi, fye ta mi fya zhin nyaho-nyaho yi m. 6Oza nwa kpeya nmi, a ɓa she wo ya ngye bwala ntna apma, nkwo zhin kwa wo akawu, abwala ye pya a zhin a ye ɓa zhin a dna ɓa ʼna, ɓa gyi ʼna. 7Ndei fye sase fi nmi, fyei vi mi aɓeda, fye nya nyaho-nyahoi ɓo nfye ye aɓa ga fye kwo. 8Omi abara gaiciya nya, zhin ɓa ga gyi-gyi dei-dei, Deye zhin kwa e Dada n latu yi.
9Mi ku fye ye, ngye shi Dada wa ye mi. Ntu ce nu fye ku sase fi nmi ye-ye. 10Esa fya vi mi aɓeda, fye sase fi nu nmi ye-ye, ngye shi mihin mi ye Dada mi-i sase dna nwo ye. 11Ma gna fye aɓo deye nabai, fya bwa omi agmada, efye agmada njesun ɓa nu. 12Mi ye fya ye najeyi, ngye shi mi ye fye nyi. 13Yeye dnagmayi to lo kwa du deye m, shi oza ga wohin wye-wyeyi ntu wo anugundo ɓo m; 14Fye zhin omi anugundo nu, ndei fya zhin ɓo nmi ye. 15Mi to yi fye lo ge afyenu m, ntu ge puwada to zhin wa zhin shaula nfyenu yim, Fye zhin mi anugundo nu, ntu ge mi ku aɓo gna fye vinya n Dada wa gna mi nyi.
16Ofye ye nu to kni mi m! Omi nakni fye! Nabai fya lo fye ga gyi-gyi manayi. Nabai nyaho-nyahoi nfya gyiwye dna nmi eye, Dada ɓa ga fye kwo. 17Mi cei pma fya ye najeyi. 18Ndei anyi wun fye nu, fye kpe ge a ku mi nu wunnu nnabye. 19Fye ɓo gna fye zhin anyi nya nu, ɓo ye nfyei, ama fye to zhin anyi nyanu m, ntu ge mi la fye kni nɓa. Ce nu zhin anyi ɓai wun fye nu. 20Fye pa ɓo lo nma gna fye nyi? Fyenu ta du wo puwa da m. Shi ɓa ku wahala ga mi nyi, kwo wu nu ge, ɓa ɓa ga fye wahala ce. Ɓa gna ɓa mi aɓeda gwo, ɓo la ofye aɓeda gwo. 21Aza n anyi ɓa ga fye wahala, ntu ge fye zhin oma nya nu, gama ɓa takpe Shekwoyi ye lo, nwa tnu nmi nyim.
22Mi to gna ma ɓe ma daɓo nɓa yim, to ɓo n laifi lo m. Ama nsayi ye, ɓa to nna gma kun yi lo, ntu ɓa laifi ɓom. 23Oza nwo wun mi nu, wo wun mi Dada nu lo ce. 24Mi to gna ma zhin aɓo wo-wo-yi, naza to shin zhin, to ɓo n laifi lo n. Ama ɓaku gye aɓo wo-woyi ye wye, ɓai du-du ɓai wun mi nu ɓedo nmi Dada yi. 25Deye ku ɓeda nu, n anabi ɓei da tu Masihu tukwo ge, ɓa ɓo wun mi nu ntna dalili.
26Ama nɓa tnu fye n Tnazhinyi, wato Zafun Gyi-gyi-yi, Wo ɓa gmi n Dada aba nu, Wo nu zhin Zafun gaiciya nya, Wo ɓo gna fye aɓo vinya n mi tukwo. 27Tile, fya gna zaho-zahoi omi nabari, ntu ge fye ku kunsun n miyi tunyi n kmisunyi.
Currently Selected:
Yohanna 15: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.
