SAN MARCOS 4
4
Pulhamacha'xan jach'anana'
(Mt. 13:1-9; Lc. 8:4-8)
1A'tamcha tsukulh jamasunipalayi an Jesús la ixpiktu an lakxkan, walh wanajcha lhilhuwi ta'ayxto'palakalh pus tajulhcha lakatam laka barco anchacha sa' tawlhchalh chi chux an lapanakni ixpiktucha an lakxkani ixtayanalh. 2Lhuw tanlhuni jajunilh pulhamacha'xan, chi tu'ucha ixjapumasuniy, tacha ani jajunilh:
3―A'tamchacha pumatam lapanak alh jach'anana'. 4Walh akxni tsukulhcha ch'an, an ali wa laka tiji tamachalh, pus ta'usaklhi an ts'o'on. 5An ali laka chiwxini tamachalh, tan tutukancha lhiyalh t'un, pus wa tukancha la'awlh, mu jantu talhmani yu t'un. 6Akxni xajchilhcha an wilhchan, la'xlo'lhi chi lakxixli, mu jantu tu'u ixjataxiyak. 7An ali lakalhtukunani tamachalh, walh ta'ayalhi an jalhtukun, pus maxixilh, jantu tawk'anilhi xajatawk'at. 8Pero an ali tan oxi t'uni tamachalh, la'tampa'lhicha chi ta'ayalhcha. Tawk'anilhcha xajatawk'at, lhuwcha talhawalh. Wa la'atamin xatalhts'i alilhcha yu xta'cho'olhcha treinta chi sesenta chi tamcientojcha xatalhts'i. 9Chi jajuniy:
―Yu lhit'ajuni ixpa'asmatna ka'asmatlhi.
Tuchini lhima'lhtask'iniycha an pulhamacha'xan an Jesús
(Mt. 13:10-17; Lc. 8:9-10)
10Akxni wa ix'akstucha tamakawlh, an yu wa niy ixtayanalh chi an ixpumakawt'uyk'an ixt'alhtanan talhisakmiycha tuchini nawputuncha. 11Pus jajuniy:
―Uxitnan layi k'alhimach'a'xaya'it an yu jantu tasuy ixlich'alhkat Dios, pero an yu ma'spa tat'ajun wanaj wa laka pulhamacha'xani jajunkan, 12mu masi tajalakawanan, tachanu jantu tajalakawan chi masi taja'asmatnan tachanu jantu taja'asmatnan, pus jantu layi jamala'mixinikan ixtala'alhink'an mu jantu tach'a'o'ayi Dios.
An Jesús najuni tuchini jumputuncha an jach'anana'
(Mt. 13:18-23; Lc. 8:11-15)
13Chi jajuniy:
―¿Jant'u lhimach'a'xayat'iti an pulhamacha'xan klajuniw? ¿Chuncha tasicha k'alhimach'a'xaya'it an ali'i? 14An jach'anana yucha an yu lhichiwiniy ixchiwinti Dios, 15chi an yu wa laka tij tamachalh jach'ananti yu'uncha an yu jalhixa'alakancha, pero akxni ta'asmattacha, an Satanás jamak'ap'apalaycha la ixjalhunutk'an. 16Wanajcha chuni an yu wa laka chiwxin tatamachalh, mu masi sawalhcha ta'achani ta'asmat'a akxni jalhixa'alakan, 17jantu tajataxiyaklay, wa putamcha pants'ik'is, mu akxni lhima'anxkaycha talhiwilay u jalhich'a'o'akancha ixlakata an ixchiwinti Dios, tamakawcho'oycha. 18An yu lakalhtukunan tamachalh, yu'uncha an yu ta'asmat'acha, 19pero mu sawalhcha talhakapu'ani tacha an lak'alincha tanlhun chi lhuw tumini talhitsukuputun, pus chux ani tanlhun maksk'anjwacho'oyi an ixchiwinti Dios jantu tu'u ta'ilhtuy yu laj'oxi. 20An yu tan oxi t'un tatamachalh, yu'uncha an yu ta'asmat'acha ixchiwinti Dios chi takiklaka'iy, pus lhuwcha talalalhaway, wa pumatamjtamin, alincha yu treinta, sesenta chi cien xt'a'a ixjatawk'at.
Jantu tu'u yu jantucha katik'atsakalh yu jantu k'atsakan
(Lc. 8:16-18)
21Wachu jajumpalay:
―¿Chu sna li makilhnukan pumaklhku, a't'alh'ulakancha laka cajón u la ixtan'apuwcha putamati tamaknukan? ¡Jantu! Yucha muk'akancha tan oxicha kamapulhkulh. 22Jantu tu'u yu jantucha lay katik'atsakalh yu jantu ixk'atsakan, chi jantu tu'u yu jantucha katimalakasukalh tan putunku. 23Li xamati lhit'ajun ixpa'asmatna, ka'asmatlhi. 24Chi jajumpalay an Jesús:
―K'alhak'ap'up'it'iti an t'ach'a asmat'at, mu t'ani p'alhk'ananatcha, wach'u ch'uni k'ap'ulhk'ak'ana'it, ch'i p'alay k'alhimo'slanik'ana'it'iti uxitnan yu asmat'atcha. 25Mu an yu lhit'ajun palay kajama'lhtayanana', pero an yu jantu lhit'ajun, masi wa k'ischa kaxlitsukulh kamaxtuni'okana'.
Pulhamacha'xan tani lhita'ayaycha xatalhts'i tu'u'
26Ixnawpalay:
―An ixlich'alhkat Dios tacha xamati lapanak yu jach'ananan. 27Puts'ista lhtatay chi wats'isin ostayapalaycha. An yu ch'anta tamp'a'acha chi ta'ayaycha, pero yucha jantu k'atsayi tani lhita'ayaycha. 28An lakaat'un ix'akstucha ma'alay an jach'ananti, p'ulhnajcha taxtuniya xax'oy, p'a'acha xli'astan tawk'aniycha xajatawk'at. 29Chi li akxni li oxicha k'at'ata, p'uxacha an lapanak, mu ixpakucha chi cha'xmaj'ancho'oycha.
Pulhamacha'xan xatalhts'i mostaza
(Mt. 13:31-32; Lc. 13:18-19)
30An Jesús wachu jajumpalay:
―¿Tasicha lay aklalhimalakxtuniw an ixlich'alhkat Diosi? Chunchuni: 31Tachanu la'atam lakat'ikt'i xatalhts'i mostaza, masi yucha wanaj wa lakat'ikt'i, 32apalij yucha yu palay ay lhtinin ta'ayay, tan tamuk'aycha ixpamaj'ank'an an ts'o'on chi tapamalhk'iknincha.
Tuchini la'lhima'lhtask'iniycha an Jesús an pulhamacha'xan
(Mt. 13:34-35)
33Tamj tamjcha ixjajuniy pulhamacha'xan an Jesús, tacha lay ixtalhimacha'xaniy. 34Wa laka pulhamacha'xani ixjajuniy wa chuncha ixjaxa'alay. Pero li akxni wa la'stu an ixt'alhtanan ixtat'atawlay ixjajun'ojoy, mu yu'uncha ixtalhimacha'xay.
An Jesús sa' ulalh an p'as un chi xkan
(Mt. 8:23-27; Lc. 8:22-25)
35Akxni tats'isilhcha jajuniy an ixt'alhtanan:
―An ixtakilhtutamcha an lakxkani ka'aw.
36Pus jamakawyawlhcha tacha an lhilhuw ixlakyakalh, tatajulhcha an laka barco, ta'alhcha. Ali barco ixtach'a'o'alhi'anta. 37Walh tsukulh lay p'as un chi xkan, an xkan tsukulhcha putajuyi an barco, ixtalak'aknut'ajuncha. 38An Jesús ilhtatajtajumachalh la ix'istaj an barco, ix'a'ts'inta ix'a'ts'i. Mu sawalhcha ixtalaktalhanani an ixt'alhtanan tamakujulhcha, tajuniy:
―Maestro, talak'aknut'awnawcha uxint'i jant'u lhak'ap'up'in.
39Pus ostayalh, la'a'aymalhi an p'as un, chi an alamalh, juniy:
―Sa'ch'a k'at'a'ulh chi sa'ch'a k'ak'ilhu.
Pus wanaj sa' tawlhcho'olh. 40Chi jajuniy an ixt'alhtanan:
―¿T'asu li sawalhch'a lakt'alhananat'iti, ch'u jant'u jak'iklak'a'ininat?
41Pus sawalhcha ixtalaktalhanan, ixtalajumpaxay:
―¿Tisiyuchacha ani, li an un chi an xkan ta'asmatniya?
Currently Selected:
SAN MARCOS 4: tpp
Highlight
Share
Copy
Want to have your highlights saved across all your devices? Sign up or sign in
© 2015, Wycliffe Bible Translators, Inc. All rights reserved.
