SAN MARCOS 12

Pulhamacha'xan laj'ayaj k'atsaanin lapanakni yu ixtalhist'ak'a lakaat'un

(Mt. 21:33-46; Lc. 20:9-19)

1Tsukulhcha jaxa'alay wa laka pulhamacha'xani an Jesús, jajuniy:

―Pumatam lapanak ch'anlhi ix'uva chi kurralhnulhcha, chi ja'ajnalhcha tan kapach'itkana', chi ilhtulhcha la'atam torre, jamach'ixta'nilhcha tichi yu'uncha lapanakni, chi yucha ma'atcha alh. 2Walh akxni chilhcha ixpaku an ix'uva, makminchalhcha pumatam yu kamilh inini yu ixnawincha. 3Pero an yu ixjamalhistaknikanta wa talakasamalhi an yu ixmala'achakantachalh, pus wachuncha tamala'achacho'olh. 4An yu jamanawin a'tam mala'achapalhchalh pumatam ixma'tsuku, pero palaycha talakasamanilh, tamalakpak'atsanilh, chi stakcha tamamaxanilh. 5A'tam mala'achapalhchalh pumatam, walh tama'ninilh. Chi ali'incha yu ixjamala'achapalachalh, ixjama'ninikan chi ixjalaksamanikan. 6Xli'astan wa pumatamcha yu sawalh ixmapayniy ists'alhi ixlit'ajun, pus yuchacha makminchalh, mu ixnajun: “Ani mu kints'alh, kata'asmatniya'.” 7Walh an yu ancha ixtajalhistaknan talajuniy: “Yucha anicha jamanawin kajuncho'oya an lakaat'un. Kama'niw, walh ki'anuchak'ani kajuna'.” 8Pus tach'apachalh, tama'nilh, ma'spacha an tan ixtalhistakta lakaat'uni takimaj'alh.

9’¿T'asich'a lhiwilayat kalaya an yu jamanawin an tan ch'ankanta uvaja? Yucha kamina chi kajama'ni'oya an yu ixtajalhistaknan, ali'ini kajaxta'niya an lakaat'un an tan ixch'an ix'uva.

10’¿Jant'u p'unawt'at'iti tacha an najunta tan an ts'o'muk'akanta an la ixchiwinti Dios? Tan najun:

An chiwx an yu tala'amaj'alh an yu tayajuy cha'a,

apalij yucha palay lhitapalalh.

11Yucha an Diosi chuncha ilhtulh.

Chi lhi'a'niyawcha li chunchacha la'ts'inaw.

12Pus ixtach'apayawputuncha an Jesús, mu talhimacha'xalhi li yu'uncha jajuniy, pero wa tatalhanajlalh, mu lhilhuw, pus ta'ancho'olhcha.

Ixlimapalhlhi'anka tanlhun

(Mt. 22:15-22; Lc. 20:20-26)

13Tamala'achachalhcha ali'in fariseojnin chi yu ixt'apartidojnincha an Herodes an tan ixt'ajun an Jesús, para li tu'ucha kata'alh'a'taymalh. 14Tala'cha'alh tajuniy:

―Maestro, ijk'atsayaw li sawalhi an yu na'un chi li jant'u xamat'i t'alhamniy, mu uxint'i jant'u yu lhak'ap'up'in tani tasuycha xamati', uxint'i ts'ajwi masuy an ixtij Dios. ¿Oxi li akmapalhlhi'aniw tanlhun an ay xajamach'alhkat la'acha'an Roma u jantu?

15Walh yucha mu ixjak'atsaaniya li wa tajuniycha, pus jajuniy:

―¿Tasu li wa kilalhila'ts'intanuyawcha? K'alhit'at'it a'xtami an tumin, akla'ts'ina'.

16Pus talhicha'anilhcha chi jajuniy:

―¿Tisiyuchacha ani puwilh chi an ixta'a'ut?

Yu'uncha tajuniy:

―Ix'anu an ay xajamach'alhkat Roma.

17Pus yucha jajuniy:

―K'axt'a'nitcha yu ix'anu an ay xajamach'alhkat Roma, chi yu ix'anu Dios wach'uch'a k'axt'a'nit.

Pus sawalhcha talhi'a'nilh.

Lhasakminti tanischa kalhila'awcho'okana'

(Mt. 22:23-33; Lc. 20:27-40)

18An saduceojnin yu jantu takiklaka'iy li kala'awcho'okana tala'cha'alh, tajuniy:

19―Maestro, a Moisés kintats'o'nini an la ixchiwinti Dios li ma xamati niy ixt'ala'ajun chi li t'ajuni ixt'iwi, pero li jantu tu'u ixjas'at'an, ma tamcha ixt'ala'ajuni kat'atsukucho'olh, para li ma kat'ajamas'at'analhcha. 20Ixtat'ajun ixpumatujunk'an wa lhit'ala'awnin. An xa'aycha t'atsukukalhcha, walh nilh, jantu tu'u jamakawlh ixjas'at'an. 21Pus an yu ixt'ala'ajuncha yuchacha t'atsukucho'olh an t'aku', walh wachu niipalh, jantu tu'u ixjas'at'an jamakawpalh. Chi an ixlipumat'utucha t'atsukulh ixt'ala'ajunk'an wanajcha chun, niipalh. 22Sta tat'atsuku'olhi an ixpumatujunk'an an t'aku', chi talakni'olh, jantu tu'u tamakawlh ixjas'at'ank'an, xli'astan an t'aku wachucha niilh. 23Akxni kala'awcho'okana, mu an ixpumatujunk'an tat'atsuku'olhi an t'aku, ¿tisiyuchacha ixt'iwi kajuna'a?

24An Jesús ja'alhtaylh jajuniy:

―Wa xliyu jant'u k'ats'ayat an ixchiwinti Dios, chi li yucha layi ilhtu'ojoy watuchicha, walh o'palaj xliyu k'a'ilht'ut yu jantu oxi. 25Akxni kala'awcho'okana, jantu xamati katit'atsukukalh, mu tacha an angelhnini kajun'okana'. 26Chi li sna jant'u k'ats'ayat'iti li kala'awcho'okana, ¿ch'u jant'u p'unawt'at'iti an la ixlibro Moisés, tacha an xa'alalh Dios akxni ixla'xawt'ajun a'atam k'iw yu junkan zarza, tan junikalh a Moisés: “Kit'ini ixDios Abraham, chi Isaac, chi Jacob?” 27An Dios jantu ixDiosk'an janinin, ixDiosk'an yu tala'ajunta. Uxitnan sawalhch'a lhits'an'ayat.

Ay lhamap'a'sin

(Mt. 22:34-40)

28Pumatam xamaestro lhamap'a'sin jala'cha'alh, mu ja'alha'asmat'acha li talakikxtukuy, chi k'atsayi li oxi ja'alhtaylh an Jesús, pus lhisakmiycha, juniy:

―¿Tanyucha yu palay ay lhamap'a'sin?

29An Jesús juniy:

―Tan an najunta: “Israel, k'a'asmatt'i, an kiJamach'alhkatk'an Dios, wa pumatam. 30Chi k'amap'ayniya'a amiJamach'alhkat Dios, chux la mijalhunut, chux la mintakuwin, chux la mijatapast'ak'at chi chux la mintachaput. Yucha yu ay lhamap'a'sin.” 31Ixlitipat'uy wa ixt'atamcha lanan: “K'amap'ayniya'a mint'alapanak t'ach'a map'aynik'an mi'akstu”. Ani la'at'uy lhamap'a'sin yucha yu laj'ay, jantu tu'u atumpaj.

32Wachuncha an xamaestro lhamap'a'sin juniy:

―Chun sawalhi Maestro, t'ach'a an na'un li wa pumatami Dios, jantu tu'u t'awpalay sawalh, 33chi li kamapaynikalhi chux laka jalhunut, chi chux laka jatapast'ak'at, chi chux laka tak'atsaan, chi chux laka tachaput, sawalh. Chi li akmapayniwi kint'alapanakk'an tacha ikmapaynikanaw, palay lhitapalay, walh jantu masi chux tacha an jama'nikan jatapakxat chi jala'xawakancha tan ma'axta'kan lha'ulan.

34An Jesús, mu la'ts'incha li oxi tacha an ja'alhtayanalh, pus juniy:

―Jantu ma'ati t'a'un an la ixlich'alhkat Dios.

Wachuncha jantucha xamati k'is tapujucho'olh kalhisakmilh tu'u'.

¿Tisiyuchacha ists'alh an Cristo?

(Mt. 22:41-46; Lc. 20:41-44)

35Akxni ixmasuy an Jesús an laka tajtan ixjajuniy:

―¿Tasu li tanajuncha an xamaestrojnin lhamap'a'sin li an Cristo ists'alh Daviti? 36Pero mu an David yucha nawpalay akxni machiwinilh an ixtakuwin Dios, najun:

“An Jamach'alhkat Dios juniy an kiJamach'alhkat Cristo:

Tan oxicha kimpa'xti ak'imp'ikt'ut'a'ulh,

sta akxni ajkamama'oyacha la mijach'aja an yu wa taxkayan.”

37An David yucha najun li an Cristo ixJamach'alhkat, ¿tasicha li ists'alh a'tami?

Pus tacha an wanajcha lhilhuw ts'anaks ixlakyakalh sawalhcha ixta'achani ixta'alha'asmat'a an Jesús.

An Jesús ja'alhtasuy an xamaestrojnin lhamap'a'sin

(Mt. 23:1-36; Lc. 11:37-54; 20:45-47)

38Ixjamap'a'siy ixjajuniy:

―K'ajalajk'ats'anant'it, mu an xamaestrojnin lhamap'a'sin sawalhcha ta'achaniya tala'la'ch'iy la'lhman ixla'ch'itk'an, chi ta'achaniya kajala'axa'alakalh laka tiankis. 39Chi tan p'ulhnaja talaktawlhputunachalh an laka lakcha'a tan pulakta'ayxto'kan, chi tan alin k'atan tan lakwaykan. 40Yu'uncha yu wanajcha tamaxtuni'ojoy ixcha'ak'an an yu jantucha tu'u ixt'apapak'an t'akunin. Chi sawalhcha oxi lapanakni talay, panijnicha tatapayniy. Yu'uncha palay ay lhima'alh'ajna kajaxta'nikana'.

Ixla'ulan t'aku yu maticha ixt'apapa'

(Lc. 21:1-4)

41An Jesús sa'cha ixwilh lhilaxlakapu an caja tan ixtamujuy ixla'ulank'an an lapanakni, sa'cha ixjala'ts'in, ixpumalhuk'an an yu jamatuminin la'lhuwi ixtamujuy. 42Walh cha'alh pumatam jakilhpatinij t'aku yu maticha ixt'apapa, wachu mujulh a'xt'uy lakt'ikt'i ixtumin. 43Wachuncha an Jesús jaxa'alalhi an ixt'alhtanan, chi jajuniy:

―Ani jakilhpatinij t'aku yu jantucha tu'u ixt'apapa palay mujulh, walh jantu an ali'in. 44Mu yu'uncha wa xaxajnicha tamujulh, pero ani t'aku, masi wa ixkilhpatitcha muju'olhi yu ixch'apata, chux yu kaxlitamawwaylh.

Currently Selected:

SAN MARCOS 12: tpp

Highlight

Copy