SAN MARCOS 1

An Juan yu ixjama'paxanan

(Mt. 3:1-12; Lc. 3:1-9,15-17; Jn. 1:19-28)

1Aniya a'taynilh an laj'oxi chiwinti yu lhichiwiniy Jesucristo, isTs'alh Dios. 2An tan ts'o'muk'ata an Isaías, yu ma'anchacha ixlichiwiniy ixchiwinti Dios, najun, tan manawnilh an Dios:

P'ulhnaj akmak'ana yu ka'ana lhichiwiniy an kinchiwinti

para li kamala'asijnilhi min tij.

3Chiwijlakaminkani an tan jantu xamati wilh lakak'iwin, nawkan:

“K'ala'asijt'itcha, k'ala'oxit'itcha an ixtij an ay Jamach'alhkat,

oxich'a k'ats'uk'ut'it.”

4Pus an Juan, tsukulhcha jama'paxayi an lapanakni an lakak'iwin chi ixjalhixa'alaycha li katamakawlhcha ixtala'alhink'an para li an Dios kajamala'mixiynilhcha.

5Pus wanajcha lhilhuwi ixtala'cha'an yu ixtaminachalh xalakaat'un Judea chi la'acha'an Jerusalén. Ixtanajuncha tuchini ixtala'alhinchak'an pus ixjama'paxaycha, tanchun ayxkan junkan Jordán. 6An ixla'ch'it an Juan wa ixla'ach'awt camellojo ixla'oxiynikanta chi ixch'axpawilhcha a'xtam jaxt'a'an. Chi akxni xwajin wa t'axkat yu alin lakak'iwini ix'uy, chi sele'. 7Ixnajun:

―Xli'astan kamina pumatam yu palay alhp'asni, kit'in jantu k'is ixt'achun, yucha masi li wa akta'antalhcha ak'o'x'otnilh ixwarachi, jantu ikt'acha'an. 8Kit'in wa laka xkani iklama'paxayaw pero yucha katama'paxayan la ixTakuwin Dios.

Ix'a'paxat Jesús

(Mt. 3:13-17; Lc. 3:21-22)

9Walh la'atam wilhchan an Jesús minchalh la'acha'an Nazaret xalakaat'un Galilea. La'cha'alhcha an Juan, juniy:

―Ak'ima'p'axat'i.

Pus an Juan ma'paxalhcha an Jesús, an ayxkan tan junkan Jordán. 10Walh wa ixtakutt'ajunka an Jesús an lakxkan, la'ts'incha an lakt'iyan tati'alh, chi ta'alhtajulhcha wa tacha la'atam paloma, tan ixyalh, yucha an ixtakuwin Dios. 11Xli'astan chiwinkancha an lakt'iyan nawkan:

―Uxint'i kinTs'alhk'at'i, ikmapayniyan. Uxint'i k'ima'an'ach'ay.

Lhila'ts'intanukani an Jesús

(Mt. 4:1-11; Lc. 4:1-13)

12Wa chuncha watukan lhi'alhi an ixtakuwin Dios lakak'iwin, 13chi anchacha aklatsukuchalh t'up'uxam wilhchan, tan ta'alin ma'tilin. Chi an Satanás ixlila'ts'intanuycha an Jesús. Akxni makawlhcha an Satanás, tala'cha'alhcha an angelhnin chi ixtatapatsaniycha.

An Jesús a'taynilhcha ixtapatsat

(Mt. 4:12-17; Lc. 4:14-15)

14La'puslicha wilhchan akxni an Juan ixmalaklhchawkanta, an Jesús alh lhichiwiniy ixchiwinti Dios an xalakaat'un Galilea. 15Najun:

―Chilhcha panch'e'ex, an ixlich'alhkat Dios waniycha minta, k'ak'iklak'a'itcha an ixchiwinti Dios jant'uch'a ali k'a'ilht'ut'iti mintala'alhink'an.

An Jesús jat'asanilh ixt'at'ink'an ixch'apayawnan jatanti

(Mt. 4:18-22; Lc. 5:1-11)

16Akxni waniycha ix'antachalh ixpiktu xa'alamalh Galilea, an Jesús jala'ts'ilh ixt'uyunk'an ixch'apayawnan jatanti, wa lhit'ala'awnin. Yu'uncha an Simón chi Andrés. Ixtamujuy ixpaxo'tank'an an lakxkan. 17Jajuniy an Jesús:

―Akilat'a'awcha walh ixma'alhilanancha lapanakni akla'ilhtuyaw.

18Pus watukan tamakawlhi an ixpaxo'tank'an, chi tat'a'alhcha. 19Lanancha ma'ati ixta'antalh, an Jesús jala'ts'impalh an Jacobo chi an Juan, ists'alan Zebedeo, ixtalakch'it'ajun ixpaxo'tank'an laka barco. 20Jat'asanilh, pus tamakawchalhi an ixpayk'an Zebedeo laka barco ali an yu tat'atapatsay, chi tat'a'alhcha.

Pumatam lapanak yu ixlakpach'apata makxkay'un

(Lc. 4:31-37)

21Tacha'alhcha Capernaúm. Chi akxni jantu ixtapatsakan wilhchan ixmasuycha an Jesús an laka cha'a yu puta'ayxto'kan. 22Ixtalhi'a'niycha tacha an ixmasuy, mu yucha ixjamasuniy tachanu yu lhit'ajun lhich'alhkat, jantu wa tacha an xamaestrojnincha lhamap'a'sin. 23Walh an laka tajtan ixtanun pumatam lapanak yu ixlakpach'apata makxkay'un, t'asaycha, najun:

24―¡Jijwa! Jesús de Nazaret, ¿t'isunch'a la't'ant'a? ¿Wa kilamintawcha lalakt'ilhi'ulanin? Kit'in ikmispayan, uxint'i Stalan'a ixlapanak Dios.

25Pero an Jesús la'a'aymalh, juniy:

―¡Wa sa'cha! ¡Lasch'a k'amak'aw ani lapanak!

26Pus an makxkay'un p'ascha lakchikixli an lapanak, chi p'ascha t'asalh, chi makawlhcha an lapanak. 27Pus sawalhcha ixtalhi'a'niya an yu ancha ixtatanumanalh, ixtalajuniy:

―¿Tisuncha aniya? ¿Tisu sast'icha lhamap'a'sini li layi jalaj'aymay an makxkay'un chi ta'asmatniya?

28Watukan ta'a'pitsi'olhi an chiwinti chux Galilea.

An Jesús k'uch'ulh an ixput'icha'o'olh Simón

(Mt. 8:14-15; Lc. 4:38-39)

29Akxni tataxtulhcha an laka tajtan, ta'alhcha ixcha'a an Simón chi Andrés, ali an Jacobo chi Juan. 30Walh an ixput'icha'o'olh Simón wa ixmalhcha, stak ixch'apata alhp'asni iskakat, pus tajuniycha an Jesús. 31Wachuncha yucha la'alh chi ma'ch'apasaklhicha, walh watukan makawlhi an alhp'asni iskakat chi tsukulhcha jamaway.

Wanaj lhuwi tatak'uch'ulh akxni ta'aknuchalhcha an wilhchan

(Mt. 8:16-17; Lc. 4:40-41)

32Akxni tats'isilhcha wanaj lhuw ta'an'anini jalhicha'anikalh an Jesús chi yu wa ixtalakpachapay makxkay'un. 33Chux an lapanakni yu an tawilanalh an la'acha'an tacha'an'olhi an jatalakxtut. 34Pus tsukulhcha jak'uch'uyi an ta'an'anin, watuchicha ta'an'at ixtalhit'ajun, chi jak'uch'ulhcha wachu an yu wa ixtala'apaxto'ta makxkay'un, jantu ixjamakawniya katachiwinilh an lakmakxkay'un, mu ixtamispay.

An Jesús wats'isin tapayniy

(Lc. 4:42-44)

35Sawalhka wats'isin puts'istaka an Jesús ostayalh, taxtulhcha, alhcha tapaynini tan lakak'iwin. 36Walh an Simón ixpuxkajuycha chi an yu ancha ixtat'atamakajunta. 37Akxni tala'cha'alh tajuniy:

―Wanaj si tapuxkawyan.

38Yucha jajuniy:

―Ka'aw an tan wa lakwaniy lakwilakalh wachu aklhichiwinina ixchiwinti Dios, mu yucha ikla'minta.

39Pus ixlichiwiniycha an laka lakcha'a yu ixpula'ta'ayxto'kan, chux Galilea, chi ixjak'uch'uycha an yu wa ixtala'apaxto'ta lakmakxkay'un.

An Jesús lakak'uchulh pumatam lapanak yu ixlakap'uch'i'ojota

(Mt. 8:1-4; Lc. 5:12-16)

40La'cha'alh pumatam lapanak yu ixlakap'uch'i'ojotacha, an Jesús, tatso'ottanilhcha juniy:

―Li sna ak'ink'uch'up'ut'u, ak'ink'uch'ut'ika'.

41Pus mapayniycha an Jesús, lats'awalalhi an ixmaka chi lakpach'apachalhcha, juniy:

―Chun, k'at'ala'a'oxit'icha.

42Wachuncha junilh, watukan wak tala'a'oxilh. 43Xli'astan p'ascha watukani mala'achalh an Jesús. 44Juniy:

―Jant'u xamat'i tu'u k'a'un, wa k'ap'inchicha talakasunini an sacerdote. Chi k'ama'axt'a'a'acha milha'ulan ixlakata li t'ala'a'oxit'icha, tacha lhinawlh a Moisés para li katak'atsaalhi an sacerdotejnin.

45Pero yucha akxni alhcha, tsukulhcha laknajuni tani putapasalhcha, pus an Jesús xli'astan jantucha wanaj lay ixtanuyachalhi ixlitalakasun an la'acha'an, wa ma'atcha istsukuyachalh tan wa la'asa'nik'a, pero wa tanchuncha ixtalakminachalh ixtala'cha'an.

Currently Selected:

SAN MARCOS 1: tpp

Highlight

Copy