Maliko 1

Ubulumbilili ubwa Yohani Uwalozyo

(Mat. 3.1-12; Luk. 3.1-18; Yoh. 1.19-28)

1Agha gho Mazyu Amiza, ghagho ghakunena nizya Yesu Kilisitu, u Mwana uwa Chala.#1.1 Amasimbo ghamo aghakale ghate nu Mwana uwa Chala. 2#Mal. 3.1Ghakanda ngati mumo umulaghuzi u Yesaya akasimbila ukuti,

“U Chala akati, ‘Nkwiza pakuyituma intumi yane kuntazi kukwako

pakukuyanizizya izila.’

3 # Yes. 40.3 Izyu ilya muntu yumo likukolomoka munkolongo likuti,

‘Yannya umusebo uwa Mwene,

gholosya izila ukuti endemo!’ ”

4U Yohani akaboneka munkolongo, akulumbilila nu kozya.#1.4 U Yohani akaboneka munkolongo, akulumbilila nu kozya: Amasimbo ghamo aghakale ghasimbite ukuti u Yohani Uwalozyo akaboneka munkolongo, akulumbilila. Akababuzya abantu akati, “Pinduka nukuzileka imbibi zyinyu nukoziwa, po u Chala akwiza pakubahobokela imbibi zyinyu.” 5Abantu bosi aba muchigaba icha Yudeya naba mu Yelusalemu bakiza kukwache. Bakilata imbibi zyabo nukoziwa nu Yohani mulusoko ulwa Yolodani.

6 # 1 Abm. 1.8 U Yohani akavwalagha amenda aghameya agha ngamila nu lamba uwikwela mumusana wache, po ichakulya chache chikaba we kanta nu buchi. 7Akalumbililagha akati, “Pisinda papane pakwiza yumo uwamaka ukunchila. Ane ntabaghiye napo panandi pakwinama nukusatula utupinyilo utwa nkwato zyache. 8Ane inkubozya na mizi, loli akwiza pakubozya nu Muzimu Umuzelu.”

Ukoziwa nu kuyeliwa kwa Yesu

(Mat. 3.13—4.11; Luk. 3.21-22, 4.1-13)

9Pakabalilo kalakala u Yesu akafuma mukaya aka Nazaleti muchigaba icha Galileya, po u Yohani akamozya mulusoko ulwa Yolodani. 10Bo u Yesu azubuka mumizi, akennya kumwanya kukwighuka, sona u Muzimu Umuzelu akamwikila ngati yo nkunda. 11#Ubw. 22.2; Mas. 2.7; Yes. 42.1; Mat. 3.17, 12.18; Mlko. 9.7; Luk. 3.22Po izyu likivwika kumwanya likati, “Awe we Mwana wane umughaniwa. Ihobokite nkani nawe.”

12Panapo na panapo u Muzimu Umuzelu akamusendela u Yesu munkolongo, 13mumo akikala amasiku 40, ukuyeliwa nu Satana. Ivinyamana ivya munkolongo vyope vikaba mulamula, loli abantumi aba kumwanya bakiza pakumwavwa.

U Yesu akubitizya abalobaswi folo

(Mat. 4.12-22; Luk. 4.14-15, 5.1-11)

14Bo u Yohani bamwighalila mujele, u Yesu akabuka mu Galileya pakulumbilila Amazyu Amiza agha Chala. 15#Mat. 3.2Akati, “Akabalilo kakwana, u Chala ali papipi pakwikazya Ubumwene bwache! Pinduka nukuzileka imbibi zyinyu nukwitika Amazyu Amiza!”

16Bo u Yesu akwenda mulubazu ulwa Nyanja iya Galileya akennya abalobaswi babili, u Simoni nu wamwabo u Andeleya, bakuloba iswi ni chilepa. 17U Yesu akati, “Nkonka, inkwiza pakubapela pakuba baloba bantu.” 18Umwalubilolubilo bakavileka ivilepa vyabo nukumukonka.

19Bo u Yesu enda panandi, akamwennya u Yakobo nu wamwabo u Yohani, abana aba Zebediya. Bakaba mubwato pakuyanizya zila ivilepa vyabo. 20Bo u Yesu abennya bulo, akabitizya. Bakamuleka uwise u Zebediya mubwato na bambombo bache nukumukonka u Yesu.

Umuntu uwa muzimu umubibi

(Luk. 4.31-37)

21U Yesu na bamanyili bache bakabuka kukaya aka Kapelinahumu. Pisiku Ilyakutuzya u Yesu akinjila munyumba iyakwiputilamo aba Yuda nukwanda pakumanyizya. 22#Mat. 7.28-29Abantu babo bakamwivwa bakaswigha nkani namumo akamanyizizya. Atakamanyizya ngati bo bamanyisi aba Ndaghilo, loli akamanyizya ngati we mwenecho uwa bulaghili.

23Panapo umuntu uwa muzimu umubibi akiza munyumba iyakwiputilamo nukukolomoka ukuti, 24“Wee Yesu uwa mu Nazaleti, ukulonda ichoni naswe. Nkimba wiza pakutunangannya? Inkumenye! Awe we ntumi izelu iya Chala!”

25U Yesu akaghulamula umuzimu umubibi ghula akati, “Banga myee, sona epamo mu muntu uyu!”

26Umuzimu umubibi ghukamuneng'ennya nkani nukukolomoka nukwepamo mumwache. 27Abantu bosi bakaswigha nkani, umwakuti bakanda pakunenezannya benebene ukuti, “Cho choni chinichi? Nkimba chimanyisyo ichipya? Umuntu uyu ali nu bulaghili pakulamula imizimu imibibi nukumwivwila!”

28Po ipangwi ilya Yesu likasata umwalubilolubilo posi na posi muchigaba icha Galileya.

U Yesu akubapozya abantu abinji

(Mat. 8.14-17; Luk. 4.38-41)

29U Yesu na bamanyili bache poka nu Yakobo nu Yohani bakepamo munyumba iyakwiputilamo nukubuka kunyumba iya Simoni nu Andeleya. 30Unyinavyala uwa Simoni akalambalala pachifukwa icha zekema. Bo u Yesu afika, bakamubuzya nizya bubine ubwa mukolo yula. 31U Yesu akabuka ku mukolo yula, akamulema inyobe nukumwavwa ukuti imilile. Akapola nukwanda pakubabombela.

32Pachamabwila bo izuba lyinjila, abantu bakiza na bantu ababine bosi poka na bantu babo bakaba ni mizimu imibibi. 33Abantu bosi mukaya mula bakabungana palubinjilo ulwa nyumba. 34U Yesu akapozya abantu abinji babo bakaba nu bubine ubwakulekanalekana nukwefya imizimu imibibi imyinji. Atakayitikizya ukuti yinene chimo, pachifukwa chakuti yikamumanya.

U Yesu akulumbilila muchigaba icha Galileya

(Luk. 4.42-44)

35Pandabindabi nkani, u Yesu akanyamuka nukwepapo panyumba pala. Akabuka kuzi kukaya kala, kubuzilo kuko kutakabako abantu nukwiputa. 36Loli u Simoni na bamwabo bakabuka pakumulondelezya, 37bo bamwagha bakati, “Abantu bosi bakukulonda.”

38Loli u Yesu akabamula akati, “Twende tubukaye mutwaya utunji tuto tuli papipi. Imbaghiye pakulumbilila mope pakuti cho chicho nkizila.”

39 # Mat. 4.23, 9.35 Po akenda muchigaba chosi icha Galileya pakulumbilila munyumba izyakwiputilamo nukwefya imizimu imibibi.

U Yesu akupozya umuntu uwa mambombo

(Mat. 8.1-4; Luk. 5.12-16)

40Umuntu yumo uwa mambombo akiza kwa Yesu, akamufughamila nukwanda pakumulaba ukuti, “Nanti ukulonda, unswefye ane.”#1.40 unswefye ane: Amambombo bukaba bubine, bubo bukamupelagha umuntu ukuti atakamwiputaye u Chala pachifukwa chakuti mubibi.

41Ichisa chikamulema u Yesu,#1.41 ichisa chikamulema: Amasimbo ghamo aghakale ghasimbite ukuti ubukali. akagholosya inyobe yache nukumupalamasya. Akamula akati, “Nkulonda, swepa!” 42Panapo na panapo amambombo ghala ghakamala nukumuleka aswepite. 43Po u Yesu akamusoka nkani nukumubwezya, 44#Lev. 14.1-32akamubuzya akati, “Ivwa kuno! Utakamubuzyepo nayumo umuntu. Loli bukagha wilanjizye ku muputi ukuti akupime ukuti abantu bosi bamanye ukuti wapola, ubike ichabupi chicho u Mozesi akalamula.”

45Umuntu yula akanyamuka nukwanda pakufumusya zizyo zikabombiwa kosi kuko akabukagha, umwakuti u Yesu akapotwa pakubuka pabuzelu mukaya kosi. Loli akikala kubuzilo kuko kutakabako abantu, po abantu bakiza kukwache ukufuma kosi na kosi.

Currently Selected:

Maliko 1: LMBNT2016

Highlight

Copy