Matayi 6

U Yesu akumanyizya nizya kubavwa abantu abapotwe

1 # Mat. 23.5 “Muchebaye, mutakabombaye imbombo zyinyu ingolosu pabuzelu ukuti abantu babapale. Nanti mukubomba bunubu mutakwiza pakupokela umuvwalo uwakufuma kwa Ghuso uwa kumwanya.

2“Nanti mukumupa chimo umuntu umupotwe, mutakifumusyanje ukuyana na mumo bakubombela abazimbuli munyumba izyakwiputilamo na muminalo. Bakubomba bunubu ukuti abantu babapale. Naloli inkubabuzya ukuti bapokelela zila umuvwalo wabo. 3Loli nanti mukumwavwa umuntu umupotwe, mutakazibombaye pabuzelu, umwakuti umumanyani wako uwa pamoyo atakazimanye. 4Po vivyo mwabomba vikwiza pakuba vya kubusyefu. Ughuso yuyo akwennya izyakubusyefu akwiza pakubapa umuvwalo.

U Yesu akumanyizya nizya nyiputo

(Luk. 11.2-4)

5 # Luk. 18.10-14 “Bo mukwiputa, mutakayane na bazimbuli! Bighanite pakwimilila nukwiputa munyumba izyakwiputilamo, na munkomano izya misebo ukuti abantu babennye. Naloli inkubabuzya ukuti bapokelela zila umuvwalo wabo. 6Loli bo mukulonda pakwiputa, mwinjile muchipinda chinyu, mwighalile umulyango nukwiputa kwa Ghuso, yuyo atakuboneka. Po Ughuso yuyo akwennya vivyo mukubomba kubusyefu, akwiza pakubapa umuvwalo.

7“Bo mukwiputa, mutakapyanizyanje amazyu ghoka-ghoka ukuyana na mumo bakubombela abantu abakuzi, babo bakwinong'ona ukuti u Chala akwiza pakwivwa inyiputo zyabo intali. 8Mutakabanje ngati bo babo pakuti Ughuso azimenye kale zizyo mukulonda bo muchili pakulaba. 9Bo mukwiputa mutinji,

‘Tata witu uwa kumwanya;

itabwa lyako lichindikiwanje.

10Ubumwene bwako bwizaghe,

ubwighane bwako bubombiwanje pachisu ichapasi pano

ukuyana na mumo kubeleye kumwanya.

11Utupe ilelo ichakulya icha isiku ni siku.#6.11 icha isiku ni siku: Pamo vivyo tukulonda, Pamo ivyandabi.

12Utuhobokele imbibi zyitu

ukuyana na mumo naswe bulo

tukubahobokela abantu babo bakutunangila.

13Utakitikizyanje ukuti tuwile munjelo,

loli utupoke kwa Satana, Umubibi yula.’ #6.13 Amasimbo ghamo aghakale ghonjelezya Pakuti ubumwene, na maka, sona nu buchindamu vyako bwila na bwila. Ameni.

14 # Mlko. 11.25 “Nanti mukubahobokela abantu abanji zizyo babanangila, Ughuso uwa kumwanya akwiza pakubahobokela imbibi zyinyu. 15Loli nanti mutakubahobokela abamwinyu, Ughuso wepe atakwiza pakubahobokela imbibi zyinyu.

U Yesu akumanyizya nizya kutuzya pakulya

16“Nanti mukutuzya pakulya mutakalanjizyanje ichitima ukuyana na mumo bakubombela abazimbuli. Bakulanjizya ukukalala pamaso ukuti abantu babennye ukuti bakutuzya pakulya. Naloli inkubabuzya ukuti bapokelela zila umuvwalo wabo. 17Loli nanti mukutuzya pakulya, sukusula ku maso nukupesa isisi zyinyu kumutu 18ukuti abantu batakazimanye ukuti mukutuzya pakulya, loli Ughuso mwene yuyo atakuboneka. Po Ughuso yuyo akwennya izyakubusyefu, akwiza pakubapa umuvwalo.

U Yesu akumanyizya nizya bukabi ubwa Kumwanya

(Luk. 12.33-34)

19 # Yak. 5.2-3 “Mutakilundikilaye ubukabi pachisu ichapasi, pakuti impezu nu lusima vikubunangannya, sona na biba bope bakupankula nukwiba. 20Loli mwilundikilaye ubukabi bwinyu kumwanya, kuko impezu nu lusima vitakubunangannya, sona na biba bope batangapankula nukwiba. 21Pakuti kuko kuli ubukabi bwako, ko kuko kuli nu moyo wako.

Ulukozyo ulwa mubili

(Luk. 11.34-36)

22“Amaso ghako yo nyale iya mubili wako. Nanti amaso ghako miza, kokuti nu mubili wako ghope ghukwiza pakuba mulukozyo. 23Loli nanti amaso ghako mabibi, kokuti nu mubili wako ghope ghukwiza pakuba muchisi. Po nanti ulukozyo mumwako lwipela pakuba chisi, ichisi chila chikwiza pakuba chakoghofya nkani.

U Chala nu bukabi

(Luk. 16.13, 12.22-31)

24“Atalipo uwambombo yuyo angababombela imbombo abamwene babili pakabalilo koka. Pakuti angamughana weka nukumubenga uyunji, pamo angamwivwila weka nukumusula uyunji. Utangabombela vyosi vibili akabalilo koka, u Chala ni ndalama.

25“Polelo inkubabuzya ukuti mutakapasyanje nizya bumi bwinyu ukuti mukwiza pakulya ichoni, pamo mukwiza pakung'wela ichoni, pamo nizya mabili ghinyu, ukuti mukwiza pakuvwala ichoni. Nkimba ubumi bute bwapamwanya ukuchila ichakulya? Nkimba umubili ghute wapamwanya ukuchila amenda? 26Ennya, iviyuni vitakupesa imbeyu, pamo ukwinula, pamo ukubika ivyakulya muntamba, loli Ughuso uwa kumwanya akuvilyesya. Nkimba mute mwe bapamwanya nkani ukuchila iviyuni? 27Nkimba alipo umuntu pakasi papinyu yuyo angonjelezya isiku#6.27 angonjelezya isiku: Pamo ghonjelezya ubutali ubwa mubili. lyoka ilya bumi bwache pakupasya?

28“Po choni chicho mukupasya nizya menda aghakuvwala? Ennya ubwezya ubwa muzi mumo bukukulila. Butakubomba imbombo, pamo ukwipangila amenda. 29#1 Abm. 10.4-7; 2 Imb. 9.3-6Loli inkubabuzya ukuti u Mwene u Solomoni nu bukabi bwache bosi, atakaba na menda amiza ghagho ghayanite bulo ni luba limo ilya agha. 30Nanti u Chala angaghavwika amasote, ghagho ghaliko ilelo nukughasumbila pamoto indabi, nkimba atangabavwika amwe. Mwe bantu aba lwitiko ulunandi amwe.

31“Polelo mutakapasyanje ukuti, ‘Tukwiza pakulya ichoni pamo, tukwiza pakung'wela ichoni, pamo tukwiza pakuvwala ichoni?’ 32Pakuti abantu abakuzi bo babo bakuvilonda ivintu vinivi. Ughuso uwa kumwanya avimenye ivintu vyosi vivyo mukuvilonda. 33Loli amwe, mulondaye tasi Ubumwene ubwa Chala nukubomba zizyo akulonda, po akwiza pakubapa ivintu vyosi vinivi. 34Mutakapasyanje nizya ndabi pakuti ivya ndabi vya ndabi. Isiku lili lyosi lili ni ntamyo izyakuyana nalyo.

Currently Selected:

Matayi 6: LMBNT2016

Highlight

Copy