Matayi 24

U Yesu akunenela zila nizya kumongoliwa kwa Nyumba iya Chala

(Mlko. 13.1-2; Luk. 21.5-6)

1U Yesu akepamo mu Nyumba iya Chala. Bo akwenda, abamanyili bache bakiza kukwache pakumulanjizya akazengele aka Nyumba yila. 2U Yesu akati, “Ee, mwenelezye akiza vyosi ivi. Naloli inkubabuzya ukuti nalimolimo ibwe lilyo likwiza pakusyala pamwanya pa lyamwabo; lyosi likwiza pakugumuliwa.”

U Yesu akunenela zila nizya ntamyo nu kuvwimiwa

(Mlko. 13.3-13; Luk. 21.7-19)

3Bo u Yesu ikala pighamba ilya Misyunguti, abamanyili bache bakiza kukwache kulubazu. Bakamulalusya bakati, “Tubuzye, nkimba ivintu vyosi ivi vikwiza pakuboneka liyi? Nkimba choni chicho chikwiza pakuboneka ukulanjizya ukuti aka ko kabalilo kakwizila kwako nu bumalilo ubwa chisu ichapasi!”

4U Yesu akamula akati, “Mubanje maso, ukuti patakabepo nayumo umuntu uwakubazimbula. 5Pakuti abantu abinji bakwiza pakubombezya itabwa lyane nukuti, ‘Ane ne Kilisitu!’ sona bakwiza pakubazimbula abantu abinji. 6Mukwiza pakwivwa nizya nkondo papipi na kubutali, loli mutakanyilaye. Ivintu vinivi vibaghiye pakubombiwa, loli kute kokuti ubumalilo bwafika. 7Ichisu chikwiza pakulwana ni chinji, ubumwene bukwiza pakulwana nu bunji. Kukwiza pakuba izala nu tusenyenta posi na posi. 8Ivintu vyosi vinivi bo bwandilo bulo ubwa ntamyo izya mukolo pakusayiwa.

9 # Mat. 10.22 “Mukwiza pakulemiwa ukuti muvwimiwe nu kughoghiwa. Abantu bosi muvyisu vyosi bakwiza pakubabenga pachifukwa icha nene. 10Abantu abinji bakwiza pakutagha ulwitiko lwabo pakabalilo kanako; bakwiza pakulongelelana nukubengana. 11Po abalaghuzi abamyasi abinji bakwiza pakuboneka nukuzimbula abantu abinji. 12Uku kukwiza pakuba kusata kwa bubibi, umwakuti ulughano ulwa bantu abinji lukwiza pakukatala. 13#Mat. 10.22Loli umuntu wesi yuyo ajimba umoyo mupaka pabumalilo akwiza pakupona. 14Po Amazyu Amiza agha Bumwene ghakwiza pakulumbililiwa pachisu chosi ichapasi pakubikila ubwakaboni pakasi pa bantu aba inko zyosi, po ubumalilo bukwiza.

Nizya chinyazu Ichipalapala chicho chikunangannya

(Mlko. 13.14-23; Luk. 21.20-24)

15 # Dan. 9.27, 11.31, 12.11 “Mukwiza pakwennya Ichinyazu Ichipalapala chicho chikunangannya, chicho umulaghuzi u Daniyele akanena. Chikwiza pakwimilila mu Chipinda Ichizelu Ubuzelu.” (Umuntu yuyo akubelenga, ivwisye.) 16Po babo bali mu Yudeya bachimbililaye mumaghamba. 17#Luk. 17.31Umuntu yuyo ali pachisonje icha nyumba yache atakikaye nukusenda ivintu vyache munyumba. 18Umuntu yuyo ali mumughunda atakabwelaye kunyumba pakusenda inkazo yache. 19Kukwiza pakuba bupalapala nkani mumasiku ghanagho na bakolo babo bali ni nyanda, sona na bamayi babo bakonkezya abana! 20Mwiputaye kwa Chala ukuti mutakachimbile pachisiku pamo Pisiku Ilyakutuzya! 21#Dan. 12.1; Ubv. 7.14Pakuti intamyo izya masiku ghala zikwiza pakuba mpalapala nkani ukuchila zyosi zizyo zikabapo na kale, ukwandila ko kubwandilo, bo u Chala apela ichisu chapasi mupaka ilelo. Po zite zikaboneke nalumo. 22Loli u Chala akisyako kale ubwinji ubwa masiku ghala; nanti atakisyanga nayumo umuntu yuyo angapona. U Chala isizyeko amasiku ghala pachifukwa icha bantu bache abasaliwa.

23“Po nanti umuntu yumo akubabuzya ukuti, ‘Ennya, u Kilisitu ali pano,’ pamo ‘Yula ali pala,’ mutakazisubile. 24Pakuti abantu abinji abamyasi bakwiza pakuboneka nukuti bo abapoki abasaliwa, pamo abalaghuzi. Bakwiza pakupela ivyika ni viswigho ukuti nanti chingabombiwa babazimbule na basaliwa aba Chala bulo. 25Teghelezya! Imbabuzizye vyosi bo akabalilo katakwanite.

26 # Luk. 17.23-24 “Pamo, nanti abantu bakubabuzya ukuti, ‘Ennya, u Kilisitu ali munkolongo,’ mutakabukayeko, pamo nanti bakuti, ‘Ennya, akuvwama pano,’ mutakazisubile. 27Pakuti u Mwana uwa Muntu akwiza ngati ko kamesya kako kakumesya kumwanya ukwandila ko kubufumilo ubwizuba mupaka kubwinjililo bwache.

28“Posi papo pali ichintu ichifwe, amazwanga ghakubungana palapala.

Ukwiza kwa Mwana uwa Muntu

(Mlko. 13.24-27; Luk. 21.25-28)

29 # Yes. 13.10, 34.4; Ezk. 32.7; Yow. 2.10, 31, 3.15; Ubv. 6.12-13 “Nanti intamyo izya masiku ghanagho zyachila bulo, izuba likwiza pakuba muchisi, umwezi ghute ghukalame nalumo, intondwa zikwiza pakuwa kumwanya, sona ivintu ivya maka kumwanya vikwiza pakuyingana. 30#Dan. 7.13; Zek. 12.10-14; Ubv. 1.7Po ichimanyilo ichakwiza kwa Mwana uwa Muntu chikwiza pakuboneka kumwanya. Abantu bosi aba muchisu ichapasi bakwiza pakufwifwitila, bo bamwennya u Mwana uwa Muntu akwiza mumabingu na maka nu buchindamu ubukulu. 31Ipati likwiza pakwivwika, po akwiza pakubatuma abantumi bache kunkuto zyosi folo izya chisu ichapasi nukubungannya abantu bache abasaliwa ukwandila ko kubumalilo ubwa chisu ichapasi mupaka kubumalilo ubunji.

Ichimanyisyo icha chikuyu

(Mlko. 13.28-31; Luk. 21.29-33)

32“Mumanyilepo pachikuyu. Nanti mwennya bulo isamba zyache zyanda pakulemba, mukumanya ukuti ichisiku chili papipi. 33Umwakuyana bulo, nanti mukwennya ivintu vinivi vikuboneka, manya bulo ukuti u Mwana uwa Muntu ali papipi, pamulyango.#24.33 ali papipi, pamulyango: Pamo akabalilo kali papipi pakwanda. 34Naloli inkubabuzya ukuti ivintu vyosi vikwiza pakuboneka bo abantu abankulilo iyi batafuye bosi. 35Kumwanya ni chisu ichapasi vikwiza pakumala, loli amazyu ghane ghakwiza pakuba na maka bwila na bwila.

Nayumo umuntu yuyo akumanya isiku na kabalilo

(Mlko. 13.32-37; Luk. 17.26-30, 34-35)

36“Loli nayumo umuntu yuyo akumanya isiku pamo akabalilo, bate bantumi kumwanya, ate Mwana; #24.36 Amasimbo ghamo aghakale ghate nu ate Mwana. Utata mwene we yuyo akumanya. 37#Ubw. 6.5-6Ukwiza kwa Mwana uwa Muntu kukwiza pakuyana bulo na mumo vikabela pakabalilo aka Nowa. 38Mumasiku ghalaghala bo amizi ghatizuye, abantu bakalyanga nu kung'wela, bakasendanagha mupaka pisiku lilyo u Nowa akinjila mubwato. 39#Ubw. 7.6-24Loli batakamanyagha chicho chikabombiwanga mupaka amizi ghakiza nukubapyela bosi. Momumo kukwiza pakubela bo u Mwana uwa Muntu akwiza. 40Pakabalilo kalakala abantu babili bakwiza pakubombagha mumughunda, weka akwiza pakusendiwa, po uyunji yula akwiza pakulekiwa mulamula. 41Abakolo babili bakwiza pakusyanga palwala, weka akwiza pakusendiwa, po uyunji yula akwiza pakulekiwa palapala.

42“Po mubanje maso pakuti mutalimenye isiku lilyo u Mwene winyu akwizila. 43#Luk. 12.39-40Loli mumanye ukuti nanti umwenecho uwa nyumba akakamanyagha akabalilo kako umwiba akwizila, naloli ngali akuba maso umwakuti abiba batakapankule inyumba yache. 44Po namwe bulo mwiyannye pachifukwa chakuti u Mwana uwa Muntu akwiza pakabalilo kako mwiyekeye.

Uwambombo umusita luhobokelo

(Luk. 12.41-48)

45“Nkimba we wenu wambombo umusubiliwa nu wamahala? We yuyo u mwene wache akumubika pakuba we songo uwa vintu vyache vyosi nukubapa abambombo abanji ichakulya pakabalilo akiza. 46Musayiwa nkani uwambombo yula nanti u mwene wache abwelako, akumwagha akubomba zinizi. 47Naloli inkubabuzya ukuti umwene wache akwiza pakumubika uwambombo yula pakuba we songo uwa vintu vyache vyosi. 48Loli nanti uwambombo yula mubibi, akunena mwene ukuti, ‘U mwene wane akukaba nkani pakubwela.’ 49Po akwanda pakubakoma abambombo abanji, sona akulya nu kung'wela poka na baching'wela. 50U mwene uwa bambombo yula akwiza pisiku lilyo bo uwambombo yula iyekeye na pakabalilo kako atakamenye. 51U mwene yula akwiza pakumudumulannya#24.51 pakumudumulannya: Pamo pakusumbiwa kuzi. nukumusumbila mubuzilo bubo abazimbuli bakusungiwa. Mulamula bakwiza pakulila nu kusyeketula amino ghache.”

Currently Selected:

Matayi 24: LMBNT2016

Highlight

Copy