Yohani 4

U Yesu nu mukolo uwa mu Samaliya

1Aba Falisayi bakivwa ukuti u Yesu akakabagha nu kubozya abamanyili abinji ukuchila u Yohani. 2(U Yesu mwene atakamozyapo nayumo umuntu, loli abamanyili bache bakozyanga.) 3Bo u Yesu ivwa zizyo zikaneniwanga, akepamo muchigaba icha Yudeya nukunyokela kuchigaba icha Galileya, 4pakudumusannya mu Samaliya.

5 # Ubw. 33.19; Yos. 24.32 Po akafika mukaya aka Sikali muchigaba icha Samaliya papipi nu mughunda, ghugho u Yakobo akamupa umwana wache u Yosefu. 6Mulamula mukabamo ichiziba icha Yakobo. Bo u Yesu alita nkani nu bulendo bwache, akikala pachiziba pala. Kakaba kabalilo bo izuba lili pamutu.

7Umukolo umu Samaliya akiza pakusemba amizi. Po u Yesu akamubuzya akati, “Umpeko amizi aghakung'wela.” 8(Pakuti abamanyili bache bakabuka mukaya akakulu pakughula ivyakulya.) 9#Ezk. 4.1-5; Neh. 4.1-2Umukolo yula akamwamula akati, “Awe we mu Yuda, ane ne mu Samaliya. Po ungandaba buli-buli amizi aghakung'wela?” (Pakuti aba Yuda naba Samaliya batakwangalilana.) #4.9 Aba Yuda naba Samaliya batakwangalilana: Pamo Aba Yuda batakabombezyanga imbako ni mbale zizyo aba Samaliya bakubombezya. 10U Yesu akamwamula akati, “Nanti wavimenye ivyabupi ivya Chala nu muntu yuyo akukulaba amizi aghakung'wela, ngali wamulabite amizi aghakung'wela, po ngali umwene akupiye amizi amapela bumi.” 11Umukolo akati, “Wee Mwene, ichakusembela ute nacho, sona ichiziba chibilite. Nkimba ungaghagha kwiyi amizi amapela bumi? 12Umunyenya witu u Yakobo we yuyo akatupa ichiziba chinichi, sona wepe na bana bache poka ni vitekiwa vyache akang'welaghapo panapa? Po nkimba awe we songo ukumuchila u Yakobo?” 13U Yesu akamwamula akati, “Umuntu wesi yuyo akung'wela amizi agha akwiza pakuba sona ni nyota. 14Loli umuntu wesi yuyo akung'wela amizi ghagho inkwiza pakumupa atakwiza pakubapo nalumolumo ni nyota. Amizi ghagho inkwiza pakumupa ghakwiza pakuba mumwache ngati yo mbwibwi iya mizi amapela bumi nukumupa ubumi ubwa bwila na bwila.” 15Umukolo akati, “Wee Mwene, umpeko amizi ghanagha kokuti ntakize numilwepo nalumolumo pamo pakusemba amizi panapa.”

16U Yesu akamubuzya umukolo yula ukuti, “Bukagha umwitizye umulume wako nukwiza nawe kuno.”

17Umukolo yula akamula akati, “Inte nawe.”

U Yesu akamula akati, “Wanena ubwanaloli bo ukunena ukuti ute nawe. 18Wasendiwa na banavuli fayivi, sona umwanavuli yuyo uli nawe pakabalilo aka ate mulume wako. Wambuzya ubwanaloli.”

19Umukolo akanena kwa Yesu akati, “Wee Mwene, losi ulu nazimanya ukuti we mulaghuzi. 20Abanyenya bitu bakamuchindikilagha u Chala pighamba linili, loli mwe ba Yuda mukuti mu Yelusalemu bo buzilo bubo abantu babaghiye pakumuchindikilamo.”

21U Yesu akamubuzya umukolo yula akati, “Wee mukolo unsubile, akabalilo kakwiza kako mutakwiza pakumuchindika Utata pighamba linili, pamo mu Yelusalemu. 22Amwe mwe ba Samaliya mutamumenye yuyo mukumuchindika, loli aswe twe ba Yuda tumumenye yuyo tukumuchindika pakuti ubupoki bukufumila mu ba Yuda. 23Loli akabalilo kakwiza, sona kizite kale pakuti babo bakumuchindika mubwanaloli bakwiza pakumuchindika Utata na maka agha Muzimu Umuzelu na mubwanaloli. Pakuti u Chala akubalonda abantu banaba pakumuchindika. 24U Chala we muzimu, po bosi babo bakumuchindika, bamuchindikaye na maka agha Muzimu Umuzelu na mubwanaloli.” 25Umukolo akanena nawe akati, “Inzimenye ukuti u Mesiya akwiza, po bo iza, akwiza pakutubuzya vyosi.” 26U Yesu akamwamula akati, “Yuyo ukunena nawe, we yuyo.”

27Pakabalilo kalakala abamanyili aba Yesu bakanyokako, bakaswigha nkani bo bamwagha akunena nu mukolo. Loli nayumo umuntu yuyo akanena nawe ukuti, “Nkimba ukulonda ichoni?” Pamo ukumulalusya ukuti, “Nkimba choni chicho ukunena nawe?”

28Umukolo yula akayileka isonta yache, akanyokela mukaya nukunena na bantu ukuti, 29“Twende mwennye umuntu yuyo akambuzya vyosi vivyo nabombagha. Nkimba yunuyu atangaba we Kilisitu?” 30Po bakepamo mukaya mula nukubuka kwa Yesu.

31Pakabalilo kanako abamanyili bache bakamulaba u Yesu bakati, “Wee Mumanyisi, lyangapo.”

32Loli u Yesu akamula akati, “Indi nacho ichakulya chicho mutachimenye.”

33Po abamanyili bakanda pakulaluzannya benebene ukuti, “Nkimba alipo yumo yuyo amwiziye ni chakulya?”

34U Yesu akababuzya akati, “Ichakulya chane ko kubomba ubwighane ubwa yuyo antumite nu kumalizya imbombo yiyo akampa. 35Amwe mukunena ukuti, ‘Kwasyalako bulo amezi folo ukuti akabalilo akakwinulila kakwane.’ Loli inkubabuzya ukuti ennya mumaghunda; ivibyalwa vyela, sona akabalilo akakwinulila kafikiye. 36Yuyo akwinula akupokela amalipilo ghache, sona akubungannya ivikomwa nukubuka nazyo ku bumi ubwa bwila na bwila, kokuti yuyo akubyala na yuyo akwinula basekelele poka. 37Zizyo abantu bakunena zyanaloli ukuti, ‘Yumo akubyala, uyunji akwinula.’ 38Inkabatuma pakwinula mumaghunda mumo mutakalimamo. Abantu abanji bo babo bakalimamo, loli amwe mwakabilapo bulo pambombo yabo.”

39Aba Samaliya abinji mukaya kala bakamusubila u Yesu pachifukwa icha mazyu ghagho umukolo yula akanena ukuti, “Ambuzya vyosi vivyo nabombagha.” 40Bo aba Samaliya biza kukwache bakamulaba ukuti ikale nabo, po u Yesu akikala kulakula amasiku mabili.

41Abinji bakamusubila pachifukwa icha mazyu ghache, 42po bakamubuzya umukolo yula bakati, “Tutakusubila pachifukwa icha vivyo utubuzizye, loli pachifukwa chakuti twiyivwila twebene kukwache, sona tumumenye ukuti uyu Mupoki uwa chisu ichapasi.”

U Yesu akumupozya umwana uwa likambala

43Bo ghachilapo amasiku mabili, u Yesu akabuka kuchigaba icha Galileya. 44#Mat. 13.57; Mlko. 6.4; Luk. 4.24Pakuti u Yesu umwenecho akati, “Umulaghuzi atakuchindikiwa mukaya kache.” 45#Yoh. 2.23Bo afika mu Galileya, abantu mulamula bakamupokela pakuti bakavyennya vyosi vivyo akabomba mu Yelusalemu pa Ulusekelo ulwa Pasa pakuti bope bakabapo pa Ulusekelo lula.

46 # Yoh. 2.1-11 Po u Yesu akanyokela mu Kana muchigaba icha Galileya, kuko akandula amizi pakuba we vinyo. Ikambala limo ilya mwene, lilyo umwana wache akabinagha mukaya aka Kapelinahumu likaba palapala. 47Bo lyivwa ukuti u Yesu izite mu Galileya ukufuma mu Yudeya, akabuka kukwache nukumulaba ukuti abuke nawe mu Kapelinahumu nukumupozya umwana wache yuyo akaba papipi pakufwa. 48U Yesu akanena nawe akati, “Nayumo umuntu mumwinyu yuyo akwiza pakusubila pene papo mwennya ivimanyilo ni viswigho.”

49Ikambala likamula likati, “Wee Mwene, twende twebosi bo nu mwana wane atafuye.”

50U Yesu akanena nawe akati, “Bukagha, umwana wako akwiza pakupola.”

Umuntu yula akasubila zizyo u Yesu akanena nukubuka. 51Bo ali muzila akubwela akakomana na bambombo bache nukumubuzya ukuti, “Umwana wako apolite.”

52Akabalalusya akabalilo kako umwana wache akapolela. Bakamwamula bakati, “Izegema yikamuleka mumabwila na kabalilo aka wanu koloko pamusanya.” 53Po uwise akakumbuka ukuti kakaba kabalilo kako u Yesu akamubuzya ukuti, “Umwana wako akwiza pakupola.” Po yuyo na bosi aba munyumba yache bakasubila.

54Ichi chikaba ichika ichabubili chicho u Yesu akabomba bo iza mu Galileya ukufuma mu Yudeya.

Currently Selected:

Yohani 4: LMBNT2016

Highlight

Copy