Yohani 13

U Yesu akusukuzya inyayo izya bamanyili bache

1Kukasyalako bulo isiku lyoka ukuti Ulusekelo ulwa Pasa lubombiwe. U Yesu akazimanyila zila ukuti akabalilo kache kakwana akakuti achileke ichisu chapasi nukubuka kwa Wise. Abaghanite nkani abantu bache aba muchisu ichapasi, sona akabaghana mupaka pisiku ilyabumalilo ilya bumi bwache pachisu ichapasi.

2U Yesu na bamanyili bache bakalyanga ichakulya icha pachamabwila. Po u Satana akabikamo kale mumoyo uwa Yudasi umwana uwa Simoni Sikaliyoti inyinong'ono izya kumubikila u Yesu munyobe izya balwani.#13.2 U SatanaPamo U Satana akinong'ona kale ukuti u Yudasi umwana uwa Simoni Sikaliyoti akwiza pakumubika u Yesu munyobe izya balwani. 3U Yesu akazimanya ukuti Uwise abikite vyosi munyobe zyache. Akazimanya sona ukuti afumite kwa Chala, po akunyokela kwa Chala. 4U Yesu akimilila po bakalyelagha, akavula inkazo yache nukuyibika palubazu, akapinya umwenda mumusana wache. 5Po akapungulila amizi musonta nukwanda pakusukuzya inyayo izya bamanyili bache nukuzipuputa nu mwenda ghugho akapinyilila mumusana wache. 6Akafika pa Simoni Pitala, yuyo akamulalusya ukuti, “Wee Mwene, nkimba ukulonda pakusukuzya inyayo zyane?”

7U Yesu akamula akati, “Pakabalilo aka utangachivwisya chicho nkubomba, loli ukwiza pakuchivwisya muntazi.”

8U Pitala akati, “Awe, ute ukansukuzyepo nalumolumo inyayo zyane.”

U Yesu akamula akati, “Nanti ntakusukuzya inyayo zyako, utakwiza pakubapo nalumolumo sona mumanyili wane.”

9U Simoni Pitala akamula akati, “Wee Mwene, utakansukuzye inyayo zyene, loli unsukuzye inyobe sona na kumutu bulo.”

10U Yesu akanena akati, “Umuntu wesi yuyo oghite kale mumubili ghosi, atakulonda pakogha sona, loli pakusukuzya bulo inyayo zyache zyene. Mwe bosi muswepite, loli ukwefyako weka.” 11U Yesu akamumanya kale umuntu yuyo akayanga pakumubika munyobe izya balwani, cho chifukwa akati, “Mwe bosi muswepite, loli ukwefyako weka.”

12 # Luk. 22.27 Bo u Yesu amala pakusukuzya inyayo zyabo, akavwala sona inkazo yache nukwikala pasi sona pakuti bakalyanga. Akabalalusya akati, “Nkimba mwachivwisya chicho nababombela? 13Amwe mukunyitizya ane ukuti, ‘Mumanyisi,’ sona ‘Mwene,’ chizapo pakubomba bunubu pakuti momumo imbeleye. 14Po nanti ane, u Mwene nu Mumanyisi winyu nabasukuzya inyayo zyinyu, namwe bulo mubaghiye pakusukuzannya inyayo zyinyu. 15Nabapa ichifwanikizyo ukuti namwe bulo mubombaye ukuyana na mumo nababombela. 16#Mat. 10.24; Luk. 6.40; Yoh. 15.20Naloli inkubabuzya ukuti umuzya atakubapo nalumolumo uwapamwanya ukumuchila u mwene wache, awe, sona umutumiwa atakubapo nalumolumo uwapamwanya ukumuchila yuyo akamutuma. 17Pakuti ilelo muzimenye zinizi, mwe basayiwa nanti mukuzibomba.

18 # Mas. 41.9 “Intakubanena mwebosi; ane imbamenye babo nabasala. Loli Amasimbo ghakwanilisiwe ghagho ghakuti, ‘Umuntu yuyo inkulya poka nawe ichibama, ansambukiye.’ 19Ilelo nkubabuzizya zila bo zichili pakuboneka, umwakuti bo zikuboneka musubilaye ukuti, ‘Ane Nene.’ 20#Mat. 10.40; Mlko. 9.37; Luk. 9.48, 10.16Naloli inkubabuzya ukuti umuntu wesi yuyo akumupokela yuyo inkumutuma, akumpokela nane bulo, sona umuntu wesi yuyo akumpokela ane, akumupokela wepe bulo yuyo akantuma.”

U Yesu akunenela zila ukuti akwiza pakubikiwa munyobe izya balwani

(Mat. 26.20-25; Mlko. 14.17-21; Luk. 22.21-23)

21Bo u Yesu anena zinizi, akayimba nkani mumoyo wache nukufumusya pabuzelu ukuti, “Naloli inkubabuzya ukuti umuntu weka pakasi papinyu akwiza pakumbika munyobe izya balwani.”

22Abamanyili bache bakanda pakwenannya nukuswigha nizya yuyo akamunenagha. 23Umumanyili weka, yuyo u Yesu akamughana nkani akikala papipi nu Yesu. 24U Simoni Pitala akamukopezya akati, “Umulaluzye, akumunena we wenu.”

25Po umumanyili yula akamweghamila u Yesu nukumulalusya ukuti, “Mwene, nkimba ukumunena we wenu?”

26U Yesu akamula akati, “Nanti nasazila akamenyu aka chibama mumbale nukumupa umuntu, umuntu yunuyu we yuyo.” Po akasenda akamenyu aka chibama, akasazila nukumupa u Yudasi, umwana uwa Simoni Sikaliyoti. 27Umwalubilolubilo bo u Yudasi apokela ichibama, u Satana akinjila mumwache. U Yesu akamubuzya akati, “Lubilolubilo, bomba zizyo ukulonda pakubomba.” 28Atakabapo nayumo umuntu pa bantu babo bakalyanga ichakulya yuyo akivwisya chicho u Yesu akang'anamula kukwache. 29Pakuti u Yudasi we yuyo akasungagha inyambi iya ndalama, abamanyili bamo bakinong'onagha ukuti u Yesu akumutuma pakughula ivyakulondiwa palusekelo, pamo pakubapa ivintu abapina.

30U Yudasi akapokela akamenyu aka chibama kala nukubuka umwalubilolubilo. Kakaba kabalilo aka busiku.

Ilamulo Ilipya

31Bo u Yudasi abuka bulo, u Yesu akati, “Losi ulu u Mwana uwa Muntu apokela ubuchindamu, sona ubuchindamu ubwa Chala bwabonekela ukwendela mumwache. 32Po nanti ubuchindamu ubwa Chala bwabonekela ukwendela mumwache, po ilelo u Chala akwiza pakulanjizya ubuchindamu ubwa Mwana uwa Muntu, po akwiza pakuzibomba umwalubilolubilo. 33#Yoh. 7.34Bana bane, ntakwiza pakuba namwe akabalilo akatali. Amwe mukwiza pakundonda, loli losi ulu inkubabuzya zizyo inkababuzya abalaghili aba Chiyuda ukuti, ‘Mutangabukako kuko nkubuka.’ 34#Yoh. 15.12, 17; 1 Yoh. 3.23; 2 Yoh. 5Po losi ulu nkubapa ilamulo ilipya ilyakuti mughananaye mwebene. Mughananaye, ukuyana na mumo inkabaghanila. 35Nanti mukughanana, po abantu bosi bakwiza pakumanya ukuti mwe bamanyili bane.”

U Yesu akunenela zila ukuti u Pitala akwiza pakumukana

(Mat. 26.31-35; Mlko. 14.27-31; Luk. 22.31-34)

36U Simoni Pitala akamulalusya akati, “Mwene, ukubuka kwiyi?”

U Yesu akamula akati, “Utangankonka losi ulu kuko nkubuka, loli ukwiza pakunkonka pisinda.”

37U Pitala akamulalusya akati, “Wee Mwene, nkimba choni chicho intangakukonka losi ulu? Ane niyanizye ukufwa pachifukwa icha wewe.”

38U Yesu akamula akati, “Nkimba naloli ukuti wiyanizye ukufwa pachifukwa icha nene? Naloli inkukubuzya ukuti bo ukolwe atakokolikite ukwiza pakunkana katatu ukuti utamenye.”

Currently Selected:

Yohani 13: LMBNT2016

Highlight

Copy