YouVersion Logo
Search Icon

Imbombo 5

5
Nizya Ananiya nu Safila
1Kukabako umuntu yumo yuyo itabwa lyache akaba we Ananiya, yuyo poka nu muchi wache u Safila bakaghulizya umughunda wabo ghumo. 2Loli akivwana nu muchi wache nukusabulapo indalama zimo zizyo bakaghulizizya umughunda wabo nukubapa abatumiwa zizyo izyakusyala. 3U Pitala akamubuzya akati, “Nkimba Ananiya choni chicho ukamwitikizya u Satana ukuti injile mumoyo wako nukumuzimbula u Muzimu Umuzelu pakusabulapo indalama zimo zizyo ukaghulizizya umughunda wako? 4Bo utaghughulizizye, umughunda ghulaghula, nkimba ghutakaba wako? Sona bo waghulizya, nkimba indalama zitakaba zyako? Po choni chicho ukinong'ona pakubomba zinizi? Utakabazimbula abantu, loli wamuzimbula u Chala!” 5Panapo na panapo bo u Ananiya ivwa zinizi, akawa pasi nukufwa. Sona abantu bosi babo bakivwa zinizi ubogha bukabalema nkani. 6Abalumendo bakiza nukughunnyembetelela umuvimba wache na menda, bakaghunyamula nukubuka nagho pakughusyila.
7Bo pachila ama awala matatu, wepe umuchi akinjila mulamula ukusita ukuzimanya zizyo zikamubonekela umulume wache. 8U Pitala akamulalusya akati, “Mbuzya, nkimba izi zyo ndalama zyosi zizyo awe nu mulume wako mukaghulizizya umughunda?”
Akamula akati, “Eee, zyo zinizi.”
9Po u Pitala akamubuzya akati, “Nkimba choni chicho awe nu mulume wako mukivwana pakumuyela u Muzimu uwa Mwene? Abanavuli babo bakamusyila umulume wako losi ulu bali pamulyango, sona bakwiza pakukunyamula nawe!” 10Panapo na panapo akawila muvinama ivya Pitala nukufwa. Abalumendo bakinjila mulamula nukwennya ukuti afuye. Po bakamunyamula nukubuka nawe pakumusyila palubazu nu mulume wache. 11Ichipanga chosi, sona na banji bosi babo bakivwa zinizi ubogha bukabalema nkani.
Ivimanyilo ni viswigho
12Ivimanyilo ni viswigho ivyinji vikabombiwanga pakasi pabantu na batumiwa. Abitiki bosi bakabungana poka mu Ntanda iya Solomoni. 13Nayumo umuntu uwakuzi ukwa kabukatila kabo yuyo akajimba nkani ukwinjila mukabukatila kabo, loli abantu bakabapala nkani. 14Loli abantu abinji bakonjelelaghakonjelelagha ku kabukatila kabo—ichilundilo icha banavuli na bakolo babo bakasubilagha mwa Mwene. 15Pachifukwa icha zizyo abatumiwa bakabombagha, abantu ababine bakanyamuliwa pakubuka nabo mulubazu ulwa misebo, bakabalambalika pavitala napa vibonde, umwakuti bo u Pitala akudumusannya umuzyezye wache ghungabafikila bamo. 16Ivilundilo ivya bantu vikiza ukufuma mutwaya utukulu utwakupalamana nu Yelusalemu. Bakiza na babine, sona na babo bakaba ni mizimu imibibi mumwabo, po bosi bakapola.
Abatumiwa bakuvwimiwa
17Po umuputi usongo poka na bamanyani bache aba mukabukatila aka ba Sadukayi bosi bakaba na kabini na batumiwa, po bakinong'ona pakubombapo chimo. 18Bakabalema abatumiwa nukubighalila mujele. 19Loli ubusiku bulabula uwantumi uwa Mwene akighula imilyango iya jele, yikabafumizya kuzi abatumiwa nukubabuzya ukuti, 20“Bukagha mu Nyumba iya Chala nukubabuzya abantu zyosi nizya bumi ubupya ubu.” 21Abatumiwa bakivwila, po pandabindabi nkani bakabuka nukwinjila mu Nyumba iya Chala nukwanda pakumanyisya.
Umuputi usongo na bamanyani bache bakabitizya abalongozi aba Chiyuda ku lukomano ulwa balongi, po bakatuma abantu kujele ukuti bize nabo abatumiwa pamaso papabo. 22Loli bo abantu bala bafika kujele, batakabaghamo abatumiwa, po bakanyokela nukubabuzya abalongi ukuti, 23“Bo twafika kujele, tukagha yighaliliwe nkani, sona bope abalindilili bakaba maso pamilyango, loli bo twighula inyiyi, tutakamwaghamo nayumo umuntu!” 24Bo abaputi abasongo nu songo uwa basilikali aba Nyumba iya Chala bivwa zinizi, bakaswigha na zizyo zikababonekela abatumiwa. 25Po umuntu akiza nukubabuzya ukuti, “Ivwa kuno! Abantu babo mukabighalila mujele bali mu Nyumba iya Chala bakubamanyisya abantu.” 26Po usongo uwa basilikali aba Nyumba iya Chala akabuka poka na bantu bache pakubasenda abatumiwa. Loli batakabombezya amaka pachifukwa ichakuti bakanyilagha ukuti abantu bangabasumba na mabwe.
27Bakiza na batumiwa mulamula nukubimika pamaso pa balongi, po umuputi usongo akabalalusya akati, 28#Mat. 27.25“Tukabachinyintizya nkani ukuti mutakamanyisyanje mwitabwa ilya muntu uyu. Loli ennya zizyo mwabomba! Ubumanyisi bwinyu bwasata mu Yelusalemu mosi, po sona mukulonda ukuti ibanda ilya muntu uyu libanje papitu!”
29U Pitala na batumiwa bamo bakamula bakati, “Tubaghiye tumwivwile u Chala, nukuchila ukuti tubivwile abantu. 30Amwe mukamughogha u Yesu pakumukomela pachipinjika, loli u Chala uwa banyenya bitu akamuzyusya kubufwe. 31U Chala akamukwezya nukumubika munyobe izya nyobe yache indilo ukuti abanje Mulongozi nu Mupoki, pakubapa ulusako aba Izilayeli ukuti bapinduke nukuhobokeliwa imbibi zyabo. 32Aswe twe bakaboni aba vintu vinivi—aswe nu Muzimu Umuzelu, yuyo chabupi icha Chala icha bantu babo bakumwivwila.”
33Bo abalongi bivwa zinizi, bakakalala nkani mupaka nukulonda ukuti abatumiwa bala baghoghiwe. 34Loli mu Falisayi yumo yuyo akaba we Gamaliyeli, akaba mumanyisi uwa Ndaghilo sona akachindikiwa nkani na bantu bosi akimilila pamaso pa balongi. Akalamula ukuti abatumiwa babafumye kuzi pakabalilo akanandi bulo, 35po akababuzya akati, “Mwee ba Izilayeli, muchebaye na zizyo mukubabombela abantu banaba. 36Mukukumbuka ukuti kale u Teyuda akaboneka, akalondagha ukuti abanje muntu mumanyikwe, umwakuti abantu papipi 400 bakamukonka. Loli akaghoghiwa, sona abakonki bache bosi bakanyampana, po akabukatila kache kakamalila palapala. 37Pisinda pazinizi, u Yudasi uwamu Galileya akaboneka pakabalilo kako abantu bakabelengiwanga. Akabadeba abantu ukuti bamukonke. Loli wepe bulo akaghoghiwa, sona abakonki bache bosi bakanyampana. 38Po pachifukwa chinichi nkubabuzya ukuti mutakababombele nachimochimo abantu banaba. Mubaleke babukaye! Nanti vivyo babatika nukubomba nyinong'ono bulo izya bantu, bakwiza pakupotwa, 39loli nanti vikufuma kwa Chala, mutangabapota. Mukwiza pakwennya mwebene ukuti mukulwana nu Chala!”
Abalongi bakivwila zizyo u Gamaliyeli akanenagha. 40Bakabitizya abatumiwa bala ukuti binjile sona mulamula, bakabasyempa nukubachinyintizya ukuti batakanenele sona mwitabwa ilya Yesu, po bakabasatula. 41Bo abatumiwa bepapo pamaso pa balongi, bakahoboka pakuti u Chala akinong'ona ukuti babaghiye pakuyimba pachifukwa icha Yesu. 42Sona isiku ni siku bakendelela pakumanyisya nukulumbilila Amazyu Amiza mu Nyumba iya Chala na munyumba izya bantu ukuti u Yesu we Kilisitu.

Currently Selected:

Imbombo 5: LMBNT2016

Highlight

Share

Copy

None

Want to have your highlights saved across all your devices? Sign up or sign in