Markus 5

PANČTO KAPITLO.

1Ta jon vejene vaver rikeste o baro paneste ani Gerazinesker them. 2Te vejeslo drani bero vri, vejes leske sik drani handakenge i dženo, kones his i čikelo mulo ani leste. 3Job čejes ani handakenge, ta kenkes našte bandeldes les či, ger i verkliende. 4But kopo vejeslo kliderdo ta bandlo i verklende, ta job cerdeslo o verklia, ta i kliderpenia, ta kenkes vejeslo kerdo lester. 5Ta ha, dives ta rati rikerdeslo pes ani handakenge ta ani brege pre, dejes godlo, ta kurdas pes i barenge. 6Ta dikheslo Jezuses duralester, našeslo apa leste, 7pejeslo lester tele, dejes godlo i zorelo bašester ta phenelo: Me kamau či tuter Jezu o baresker Devlesker čavo! Me dau tuke sovel paše Devel: dukhe man ger! 8Ta job kames ta phendes: Dža nikli kava dženester tu čikalo mulo! 9Job phučeslo nina: Her khare tu? Ta job phendes ape leste: Legion hi miro lab, mare hi but. 10Ta job mangdes les, ta tradelo les ger vri kava themester. 11His kote langs i brege i baro hufka bala, kole chanena. 12Ta i mule mangden les ta phenden: Bičervehe men ani kole balende, ta džahas ane lende drin. 13Ta job phendes: Vaške mange! Te kole čikele mule gejen pen vri, ta vejene ani bale drin; kova hufka našena sik i brego tele i baro godlenca ani baro pani, les hin dui šal, jon tasjen ani baro pani. 14Ta o balenger valete našjen ta phenden les ani foro ta api gabia, ta o džene gejene vri, ta dikhene ho dejes. 15Te jon vejene api Jezuseste ta dikhene koles kai vejes bengester dukdo, bešdo, ridlo ta gosvero, ta jon darene len pen. 16Kole kai dikden les, ginden lenge drin, her gejes koles kai his o benges, ta gejes o balenca. 17Jon mangden les, ta džal peske lo lender. 18Te štejeslo ani bero drin, mangdas kova, kav has o beng ano leste, ta ačelo paše leste. 19Job kamelo ger, ta phendeslo leste: Dža tuke an tiro kher paše tire, te phene lenge, ho kerdes o rai bares tuke, ta her kaideslo tuke. 20Job gejes ta rakerdes ani kole dešforia, ho kerdes bares o Jezus lehe, ta lauter kerdena bare jaka.

21Ta gejes Jezus papele prali baro pani ani bero, has but čel ketene paš leste, ta job his paš o baro paneste. 22Pala vela jek i moskerender i kangeriender, o labeste Jairus. 23Ta dikhes kova les, pejeslo tele lesker čangenca, mangdeslo les ta phendes: Miri čai hi api meripen. Vehe ta kere tiro vast ape late, ta veleli sasti ta džideli. 24Job gejes paše leste, ta but čel vejen les pale, ta gnobltes les. 25I romni, kai has dešedui berš i naslepen, ta hasli but naslepangere, joi štejes but dukhepen vri vaške lenge, 26ta dejes len laker celo love, ta vejesli bute ger sasto, gejes ha čilačeder. 27Ta šundesli o Jezusester, pale vejesli ta taperdesli palduno lesker ripen. 28Joi phendes: Ta taperau foni lesker ripen, pala vaua sasti. 29Ta sik hasli sasti laker naslepenester, ta joi hajerdes ano laker trupo, ta hi laker dukhedo nikli. 30Ta Jezus kai hajerdes sik ani leste ta gejes o zorelepen lester vri, riserdes pes lo o čelenge ta phendes: Kon taperdes mire kolenge? 31Ta lesker sikermangere phenden ape leste: Tu dikhe ta knoblvela tuke o čel, ta phenehe: „Kon taperdes man?“ 32Ta job dikhes trujum, ta dikhelo kola, kai kerdes les. 33Pala vejes i romni, joi dardes lake, džandeli mišto her gejes lake, pejesli glan leste tele, ta phendesli leske i celo čačepen. 34Job ta phendes ape late: Čai, tiro pacepen hilderdes tuke, ma traše tuke, ta vejal sasto tiri naslepenester!

35Her te rakerdeslo, pale vejene gadže i kangeriater moskerester ta phenden: Tiri čai mujes, hoske pharele tu o sikerpasker‐raieste. 36Her ta šundes Jezus o rakerpen her te phenden le, phendeslo api kangeriater moskereste: Ma traše tuke, pace foni. 37Job mekjeslo ger ta našeslo leske jekes pale, her Petrus, ta Jakobus, ta Johanes o phral o Jakobuseste. 38Ta jon vejene an o kangeriater moskerester kher, pala dikhes job o godlepen, ta her ta rondenle. 39Ta job gejes drin, ta phendes ap lenge: Hoske dejene tume keake godlo ta rondenes? O čai hi ger mulo, joi sovele! Ta jon sanden pen les vri. 40Job tradeslo hakene vri, andes o dadeste ta i dajake i čaiater, te kolen kai hin paše leste, ta gejes vrin, kai bašes i čai. 41Pala andeslo o čaiakr vast, ta phendes lake: Talitha kumi! kava kharela: Čai me phenau tuke: šte pre! 42Ta sik štejes i čai pre, ta gejesli trujum; joi has dešedui berš phuro. 43Ta jon kerdenele bare jaka. Job phendes lenge bisermaske, ta vele ger hajerdo, ta phendes, mo ta dejen lake ta chal.

Currently Selected:

Markus 5: SINT1912

Highlight

Copy