Markus 14

DEŠŠTARTO KAPITLO.

1Pala dui divese has kome i Devlesker divese ta i ciri kola bišutli marenge; ta o barorašaiende ta livro‐sikermangerende panderden, her našte taperen ta maren pen les lenger godsveropenester. 2Jon ta phenden: Foni gar ani kurko ta dela gar tela o čeles i godlopen.

3Her ta haslo ani Bethanien ani Simonester kher, kai has geralo, ta bešes o chamaskereske, vejes i romni i šuker korester, kai has kuči makepen drin, ta phagerdes kava koro, ta čidesli apo leskr šero. 4Jekender ta phenden midžik telavaverkend: Hoveske hi kava but maklopen kerdo. 5Bikerdomes kaia makapen buteder har trinšel betenge, ta dahas kava love o čorolenge. Ta jon čingerden prala late. 6Jezus ta phendes: Meken la! Hoske pharena tume la? Joi kerdes i lačo kerapen amande. 7Čorele hi tume ha paša tumende, ta kamenas, našte keren penge lačo; man hi tume gar hako ciro. 8Kaja kerdes ho naštela; joi makjes sikeder miro trupeste o paskerpeneske drin. 9Čačo me phenau tumenge, kai velo ani celo phub i sastobičerpen rakerdo, vela nina ho kerdesli gindo, laker nišeske.

10Ta Judas Ischariot o jek kola dešduiender gejes koi o barorašaiende, ta phukerelo api Jezuseste. 11Her ta hunden kala kava, dzivjen pen jon, ta ferrakerden pen les, ta dejen pen les love; job ta roderdes, her našte phukerelo apo leste.

12Ta ano ersto dives kala bišutle marenge, kai vel o passa‐ternobakro mardo, phenden o sikermangerenge apo leste: Kai kame tu, ta džahas men ta kerahas tuke o passa‐ternobakro ta chal? 13Pala bičerdeslo dui lesker sikermangerende ta phendes apo lenge: Džan tume ani foro, kote vela i dženo paša tumende, kai hidžerela i paneskerokoro, kandene les! 14Ta kai džalo job drin, phenena api rai o kherester: O sikermaskerrai mekel tuke ta phenel: Kai hi miro chamasker‐isma, kai chan me mer sikermangerenca o passa‐ternobakro? 15Ta job sikerel tumen i baro šuker chamasker‐isma, koleske kerena menge. 16Ta lesker sikermangerenge džejen koi ta vejenle ani foro, ta hacen pen les, her phendeslo lenge, ta keren pen o passa ternobakro.

17Kai vejes kome brevul, vejes job kola dešeduienca. 18Her ta bešenle paši chamaskero, ta chanele, phendes Jezus: Čačo me phenau tumenge: Jek tumender kai chala manca, phukerela apa mande. 19Jon ta kaiden pen le, ta phučen pen le jek i vaverester: Hom les me? 20Job ta phendes apo lenge: Jek kola dešaduiender, kai čivele manca lesker vast ani čaro drin. 21O dženengerčavo ta džala koi her lester čindo hi; dukedo kova dženeske, drucha vel o dženesker čavo phukerdo. Kaleske vejahas fededer, ta veles job gar phardo. 22Her ta chajenlen, lejes o Jezus o maro, priserdes les, phagerdes les, dejes les lende ta phendes: Len les koi, kava hi miro trupo. 23Job ta lejes nina o koro, parkerdes ta dejes lende; ta jon pijen lauter dran. 24Job phendes apo lende: Kava hi miro rat o bandlopenester, kai vela butenge ferčordo. 25Čačo me phenau tumenge: Me piaues buter gar kava mojater, džin kai kove dives, kai piaues ani devlesker them.

26Ta pala o šardogijepenester džejen pen le vri apo džeteskerbrego. 27Jezus ta phendes apo lenge: Tume lauter chojaren tumen amande kaja rati; hi les čindo: „Me kamau ta kuraues o beršero, ta o bakrenge velen drani vaverkend.“ 28Pala ta miri preštardopen, džau me tumenge glan vri pala Galilea. 29Petrus ta phendes apo leste: Mo ta chojaren pen nina lauter an tuke, pala ta kerau les me gar. 30Jezus phendas ap leste: Čačo, phenau me tuke, kaua dives ani kaja rati, ta dela o bašno dui moli godli, te tu man trin moli bochoste. 31Job ta rakerdes kome buteder: Ta hunte meraues nina tuhe, pala bochorela me tuke kome gar. Keake phenden len lauter.

32Ta jon vejen ani baromontaia, kai khardes Gethzemani, ta job phendes apo lesker sikermangerende: Bešen tume kai, keake raha ta priseraua. 33Ta job lejes o Petrus, Jakobus ta Johanes paša leste, ta job triserdes ta dares peske. 34Ta job phendes apo lenge: Miro dzi hi trašerdo džin ani merapen. Ačen kai ta džanglena. 35Ta job džejes bresla dureder, pejes api Phub tele, ta priserdes, ta našte veles, ta džala kaja kori glan leste pralnikli. 36Ta job phendes: Dad, tu našte kere lauter, le kava koro mander nikli! Kome gar, ho kamaua me, foni ho kame tu! 37Ta job vejes ta haceslo len sodes. Ta job phendes apo Petruses: Simon tu sovehe? Gar jek kori našte džange tu? 38Džangena ta priserena, ta perena tume gar ani midžiko kova. O mulo ta kameles, o mas hi bizorelo. 39Ta job džejes papele koi ta priserelo, ta phendes komoli kova lab. 40Her ta vejeslo papele pale, haceslo len komoli sodes, (ta lengre jake has len phare), ta jon džanden gar, ho ta phenen leske le. 41Ta job vejes o trinto kopo ta phendes apo lende: Sovena ta kinevena foni, hi les doha, i kori vejes! Dikehe, o dženenger čavo veles ani vast o došiender pralbičerdo. 42Štena pre, meken men ta džahas! Dikhehe kova kai phukerelo apa mande hi gar dur.

43Her ta rakerdeslo kome, vejes Judas Ischariot, jek kola dešduiender, ta i baro hufka paša leste i charenca ta i kaštenea, (bičerdo) o barorašaiender ta o livrosikermangerender ta phurjender. 44Lesker phukamaskero dejes lenge i boto ta phendes: Koles kai čumeraua, kova hi: taperen les ta anen les mišto. 45Her ta vejes job kai, štakerdes job sik paš leste ta phendes: Parkerdo hal, sikerpaskerrai! 46Ta job čumedes les. Jon ta čiden vast apo leste, ta taperden les. 47Jek ta kolender kai štejen kate, cerdes lesker charo ta kurdes o valeto i barorašaieske ta kurdes les i kan tele. 48Ta Jezus phendes apo lenge: Her api marepaskero cerden tume vri i charenca ta kaštenca, ta taperenes man. 49Hako dives homes me paš tumende ani kangeri ta sikerdomes ta tume taperdanes man gar. Tu hunte veles her ani činapen tardo hi. 50Ta mekjen les lauter, ta našen penge. 51Ta i raklo kandes les pale i pochtanester api nanges o trupo ridlo. 52Ta jon taperden les. Job ta vicerdes kaja pochtan pester, ta našes peske nanges lender.

53Ta jon anden Jezuses paša barorašaieste; ta o celo rašaienge, ta livrosikermangerenge, ta phurienge vejen ketene. 54Petrus ta gejes lehe, duralester džin ani trujel o montaiester o barorašaiester; ta job bešdes pes kola valetenca paši jak ta tacerdes pes.

55O barorašaienge kome, ta o celo baro buchli rodjen vaver čačopen o Jezusester, ta anen les i muleske, ta jon hacjen kenk. 56Ta but dejen vaver čačopen prala leste, ta kola čačopenenge his len hakerlai. 57Ta jekender štejen pre, ta čiden vaver čačopen prala leste tele, ta phenden: 58Me hundames ta phendeslo: „Me kamau ta phageraues kaja kangeri tela, kai hi kerdo i vastenca, ta ani trin dives keraues i vaver, kai hi gar kerdo o vastenca.“ 59Ta lenger čačopen has gar praldrin štimamen. 60Pala štejes o barorašai pre, štakerdes ani maškeral, phučes Jezuses ta phendes: Rakere tu prala kava či, ho vicerena kala tuke glan? 61Job ta has pokoni ta rakerdes či. Komoli phučes les o barorašai ta phendes apo leste: Hal tu Christus o Devlesker čavo, o barošardopaskero? 62Jezus phendes apo leste: Me homes; vela ta dikhen tume o dženengerčavo bešto paši čači o Devlesker zorelopen ta vela lo i felešnodenca o bolapenester. 63Pala cerdes o barorašai lesker kola ta phendes: Ho kamahas men kome čačopenengere. 64Tume hunden o Devlesker‐prasapen, ho bichena tume? Ta jon lauter plenerden (straften) les, ta job hi o muleske došvalo. 65Ta jekenge čungerden apo leste, čakerden lesker mui, kurden les lenger vastenca, ta phenden apo leste: Durkervehe! Ta i valete dejen les čamadinia.

66Her ta has Petrus tele ani montaia vejes jeka kola valetacender o barorašaiester. 67Her ta dikhes la, ta tacerdes pes Petrus, dikhes joi apo leste ta phendes la: Tu hales nina paša Jezus o Nazareno. 68Job ta chocherdes ta phendes: Me prinšarau les gar, ta džanau nina gar ho rakerehas tu; ta job gejes o montaiester vri, pala dejes o bašno godlo. 69Her ta dikhes les kola valetica, phendes joi apa kolenge kai tarden kate: Kava hi nina jek lender! 70Job ta chocherdes papele. Pala phenden kola kai tarden kate papele apo Petruseste: Tu hal čačopaha jek lender; tu hal nina i Galilearo! 71Job ta košes ta dejes sovel: Me prinšeraua kava dženes gar, kolester rakerena tume. 72Ta sik dejes o bašno o duito kopo godli. Petrus ta bichades o labeste her phendes Jezus apo leste: Sikeder, kai dela o bašno dui kopo godli chochervehas tu man trin kopo. Her ta bichedeslo pale, rondes job.

Currently Selected:

Markus 14: SINT1912

Highlight

Copy