Lud kar liq 1

Yer suq Khreq ve ha lehg che bon khuhd

1Tar ir yawz yan che Thawd phid luq-og, a nig awg khuhn awg cehg mag phehq jaw peg che awg lawn che ve teq pa haq chaw laex ghad buhq tuhz lar peg che yaog. 2Awg kawd maq thad loar, bon khuhd mar par teq pa i hehd mehz sir kha ter tear gha mawg lar che heh te lehq, a nig haq bon khuhd mar par teq pa saw koz ax lar vehr che yaog. 3Kheh te cheaq te lehq, ngag liz awg lawn che ve haq ted thaeg peg ted thaeg ghaq sawnr ghaq tehz ngawx lag lehq nawg awg pun sir sa tug buhq lar che yaog. 4Nawg gha hend lar haz peg che awg lawn u ve teq pa, awg cehg mag cawd che yaog, lehz gha sir tug awg pun ngag duhd ngawx lehq buhq lar che yaog.

Baz tiz sar pehar var Yod hanr pawag tug awg lawn

5Yud daq muhd mig jawd mawd Her roq ve awg co haq, Ar bid yaq ve awg mor khuhn chehd che Yar khar liq meh che Ghig sa ve paw khod te ghad cawg che yaog. Yawd ved awg mid ma awr lehr, Ar ronr ve awg ceng awg khad khuhn chehd che Id lid sar behq meh che yaog. 6Ghig sa ve mehz caz awg khuhn chaw che ni ghad awr lehr, Ghig sa ve awg lid tawd khuhd he lehq teh lar che awg lid awg khad haq kha nehax haq sax lehq te yaq kig mad cawg cheaq te lehq, ix mag haq chaw daq chaw thed te sawnr lar che yaog. 7Kheh liz ix mag awr lehr, mawd jad vehr liz yad mad cawg. Awg lawn ghod ver, Id lid sar behq chaw meh ma#1:7 chaw meh ma Yad mid ma yad ma cawg gha che. phehq che yaog.

8Yar khar liq ve awg mor kanx te tug awg yand gaeg lehq, Ghig sa mehz khuhd suhr yawd paw khod ve kanx haq geh te chehd-ag huh, 9Yer ruq sar lehnr bon yehg nux khuhn geh lehq sa huhx geh tox tand-eg tug, paw khod teq pa awg lid cawg lar che heh, nar bar kehx yug lehq yawd gha cawd che yaog. 10Sa huhx haq tox tand chehd che awg yand u ve khuhn, chaw awg mor nux liz awg bag huh chehd lar lehq bon lawg chehd che yaog. 11Ghig sa ve muhd nuh maq cuh yad te ghad tuhaz lehq, sa huhx tox tand kig huh laq yaq awr phawd awr hox chehd lawz che yaog. 12Yar khar liq muhd nuh maq cuh yad haq gha mawg lehq, tez mag nuh he lehq kuhz jad che yaog. 13Muhd nuh maq cuh yad koz che, “Yar khar liq-og, ta kuhz. Ghig sa nawg ved bon lawg khuhd haq gha kad vehr che yaog. Nawg mid ma Id lid sar behq yad par te ghad hu pawag tug yaog. Yawd haq Yod hanr lehd koz meh vid-oq. 14Nawg ha lehg duhd sa che haq gha lehq, yawd pawag cheaq te lehq chaw kha peh vad-ag ha lehg duhd sa che haq gha tug yaog. 15Awg lawn ghod ver, yawd Jawd mawd Ghig sa ve mehz caz awg khuhn chaw ir chaw muh te ghad gha te tug yaog. Yawd buhz vix che a pehx med ghig he lehq juhg teq pa ted cear liz mad dawg lehq, yawd awr ye ve ux peg khuhn chehd thad loar, Daq kehg che Awg ha phu kha nehax chehd che chaw yaog. 16Id sar rer laq chaw teq pa laex ghad haq sir lehq ni ma kawq pa vid lehq, i hehd ve Jawd mawd Ghig sa chehd lo kawq phuhz kawaq vid tug yaog. 17Yawd Ed lid yaq heh te Awg ha phu chehd lehq kand pax cawg che khuhn, Yer suq haq keh awg kawd kae lehq yawd awg tan tawd yaw tug yaog. Awr pa awg yad kawq cawd daq vid lehq, maq na yug vix che chaw teq pa kawq na yug lehq thed cawd che yaq kaw haq kawq siar tug, Ghig sa mehz khuhd suhr lo kae gag tug te tug yaog.” 18Yar khar liq muhd nuh maq cuh yad haq koz vid che, “Ngag khawd-ehg te awg cehg mag awg lehz sir gha hawg le. Awg lawn ghod ver, ngag mid ma awd nag liz mawd jad vehor.” 19Muhd nuh maq cuh yad u ve koz che, “Ngag awr lehr, Ghig sa mehz khuhd suhr huh hox chehd che Kar ber laq yaog. Ngag nawg haq tawd yawa lehq, ha lehg che tawd khuhd che ve ca koz ax pea che yaog. 20Kheh liz nawg ngag ved tawd khuhd haq maq yonr cheaq te lehq, awg lawn che ve teq pa mad phehaq ser che kheh ceh, nawg tawd yaw maq gha lehq chaw kar heh gha te chehd tug yaog. Awg ceng che ve teq pa, awg yand gaeg ver phehaq tug yaog.” 21Awg bag lo chehd lehq Yar khar liq haq law chehd che chaw teq pa ha mad lehg vehr che yaog. Awg lawn ghod ver, yawd Yer ruq sar lehnr bon yehg nux khuhn geh veh che muh jad vehr lehq, 22yawd tuhaz gha mehx, i hehd teq pa haq teq chaweh tawd yaw daq maq gha he lehq laq kuhar lehax te mar che yaog. Kheh te lehq, i hehd teq pa duhd che Yer ruq sar lehnr bon yehg nux khuhn awg hez ted ceng cear haq yawd gha mawg che yaog lehz duhd che yaog. 23Yar khar liq yawd kanx te tug awg tar pong vehr lehq, yawd yehg lo kawq veh che yaog. 24U ve khaz nuhr, awg mid ma Id lid sar behq yad hu vehr lehq har pa ngad mag kha gag ted kaer liz maq kae he lehq yehg khuha lehax chehd chehd che yaog. 25Yawd koz che, “A meha Ghig sa ngag haq che kheh tea gad che law. Ngag mehz khuhd maq gha lug lehq su haq maq gha yaq taw vid tug tea vehr che yaog.”

Yer suq pawag tug awg lawn koz vid che

26Id lid sar behq yad hu che har pa khuhq mag khuhn gaeg lehq, Ghig sa awr lehr, muhd nuh maq cuh yad Kar ber laq haq Gar liq lehd muhd mig Nar sar rehq med lo kae pe che yaog. 27Dar viq ve awg ceng awg khad Yod sehq meh che haq he tug te lar che yad mid hax Mar riq chehd huh lag che yaog. 28Muhd nuh maq cuh yad Mar riq chehd lo lag lehq koz che, “Awg bon ir che yad mid-og, Ghig sa nawg haq awg bon kha peh vad-ag naq ax lehq Ghig sa nawg haq lez yug che yaog.” 29Mar riq tawd khuhd u ve haq gha kad lehq ni ma khuhn duhd soq saq lehq khawd-ehg awr te lehq muhd nuh maq cuh yad ngag haq u kheh koz awg bon naq ax che lehq nar lehd duhd che yaog. 30Kheh te lehq, muhd nuh maq cuh yad kawq koz che, “Mar riq-og, ta kuhz. Awg lawn ghod ver, Ghig sa nawg haq ni ma cawd jad che yaog. 31Nawg yad hu lehq, yad par te ghad pawag tug yaog. Yawd haq Yer suq lehd koz gha meh vid che yaog. 32Yad par u ve awr lehr, chaw ir chaw muh te lehq, ir jad muh jad che Ghig sa ve Yad phu yaog. Ghig sa awr lehr, yad par u ve haq yawd awg pux nux Dar viq ve kaw jaw pid tug yaog. 33Kheh te lehq, Yar koq ve chaw ceng chaw khad teq pa haq yawd khar thad liz uq penr lehq yawd ved muhd mig awr lehr, co co taer taer awg leh med mad cawg hawg.” 34Mar riq muhd nuh maq cuh yad haq koz vid che, “Khawd-ehg te awg ceng che ve teq pa phehaq ghag le. Awg lawn ghod ver, ngag haw khaz geh mad yuhq jaw ser ehx-eh.” 35Muhd nuh maq cuh yad kawq koz che, “Daq kehg che Awg ha phu nawg thag huh yaq lehq, ir jad muh jad che Ghig sa ve kand pax nawg haq hoz beh lar tug yaog. Kheh te cheaq te lehq, pawag che yad u ve awr lehr, Ghig sa ve Yad phu cehg mag yaog. 36Ngawx lor, chaw meh ma lehd koz che nawg vix nawg nax Id lid sar behq heh mawd vehr liz, yad hu che har pa khuhq mag gag vehor. 37Awg lawn ghod ver, Ghig sa te maq gha che teq chaweh mad cawg hawg,” lehd koz vid che yaog. 38Mar riq koz che, “Ngag awr lehr, Ghig sa nawg ved awg ceg ma yaog. Nawg koz che heh ngag haq tea laoq.” U kheh te lar haz lehq, muhd nuh maq cuh yad yawd haq phaz daq veh che yaog.

Mar riq Id lid sar behq chehd lo ca gid-eg che

39Awg yand u ve khuhn, Mar riq har naq tu kae lehq Yud daq muhd mig khuhn kehaq lo cawg che med ted mag lo gaeg che yaog. 40Yawd Yar khar liq ve yehg khuhn gehe lehq, Id lid sar behq haq tawd yaw daq che yaog. 41Id lid sar behq Mar riq tawd yaw che khuhd haq gha kad che te yand, Daq kehg che Awg ha phu yawd khuhn chehd lehq yawd ux peg khuhn hu chehd che yad u ve liz phez ghawz che yaog. 42Id lid sar behq awg khuhd hehnd chawa kug lehq koz che, “Yad mid kheh ma ve awg khuhn lo nawg awr lehr, awg bon ir jad lehq nawg yad ux peg khuhn ve liz awg bon ir che yaog. 43Khawd-ehg te lehq ngag ved Jawd mawd Khreq ve awr ye ngag chehd lo lag che lehq nar lehd koz che yaog. 44Yawd ved tawd khuhd ngag ved nar puh khuhn gehag che te yand, ngag ved yad nehax ux peg khuhn chehd che liz ha lehg che khuhn phez ghawz che yaog. 45Ghig sa koz vid lar che tawd khuhd haq yonr che yad mid awr lehr, awg bon ir che yaog. Yawd haq Ghig sa kha koz vid lar che tawd khuhd teq pa phehaq tug yaog.”

46Mar riq koz che,

“Ngag ved ni ma awg tawg kha gag,

Jawd mawd Ghig sa haq tar ir chid muh che yaog.

47Kheh te lehq ngag ved co ha liz,

ngag ved thaer khuhq sehr phad Ghig sa haq ha lehg jad che yaog.

48Awg lawn ghod ver, ngag awg mig awg phond mad cawg che chaw

yawd ved awg ceg ma haq yawd ngawx ax vehor.

Yaq ni khaz nuhr ver, chaw teq co peg teq co ngag haq

awg bon ir che yad mid lehd koz tug yaog.

49Awg lawn ghod ver, kha peg khod-aq kand pax ir che phad ngag haq

yawd ved kanx ir jad che ted ceng tea peor.

Yawd ved awg meh liz daq kehg jad che yaog.

50Ghig sa haq yawz yan lehq, kuhz vix che chaw teq pa haq

yawd khar thad liz har kax vid che cawg che yaog.

51Ghig sa yawd ved laq kuhr kand pax ir jad che haq

yehd lehq te mar peor.

Ni ma ir ni ma muh che chaw teq pa haq

yawd te lug vid che yaog.

52Ghig sa awr lehr, awg mig awg phond cawg che jawd mawd teq pa ve a yad

yug kha lehq,

teq chaweh awg mig awg phond mad cawg lehq

a sug yawd awg ton haq tar nehg che chaw teq pa haq

yawd yug chid taz vid tug yaog.

53Meq che kaz che chaw teq pa haq

yawd daq che awg ceng kha buhz lehd car vid lehq,

paw sa che chaw teq pa haq

laq kuhr khuhn teq chaweh mad cawg vid lehq

kawq pe tug yaog.

54Ghig sa awr lehr, yawd ved chaw ceng haq

ga vid lehq

Id sar rer laq chaw te pa haq

yawd koz vid lar che heh, har kax vid che yaog.

55Ghig sa awr lehr, Ar brar hanr he lehq yawd ved awg yad awg dug teq pa haq

kar tiq te vid lar che heh te tug khar thad liz ma lend che yaog.”

56Mar riq awr lehr, Id lid sar behq geh har pa seh lehd chehd lar haz lehq, yawd ved yehg lo kawq veh che yaog.

Baz tiz sar pehar var Yod hanr paw che

57Id lid sar behq yad paw tug awg yand gaeg lehq yad par te ghad pawag che yaog. 58Ghig sa yawd haq ir jad che awg bon te vid che haq awg vix awg nax teq pa he lehq awg chawd teq pa gha kad lehq, yawd geh ga ha lehg che yaog. 59Hex ni gaeg lehq, yad nehax u ve haq awg gig med soer vid tug i hehd teq pa lag che yaog. Kheh te lehq, awr pa ve awg meh heh te lehq Yar khar liq meh vid-ag lehd te gha mehx, 60awr ye koz che, “Ma hez hawg. Yawd haq Yod hanr gha meh vid lawg,” lehd koz che yaog. 61I hehd teq pa yawd haq koz vid che, “Nawg ved awg ceng awg khad khuhn awg meh yix kheh koz meh che mad cawg hawg,” lehd koz vid che yaog. 62Kheh te lehq, yad nehax u ve haq awg meh a thoq meh vid tug awr pa haq chaw kar ve awg hez te na ngawx che yaog. 63Yawd buhq kig pehnr boz haq lawg lehq, “Yawd ved yad awg meh Yod hanr yaog,” lehd koz buhq teh vid lehq su and jad vehr che yaog. 64Teq pear lehax, yawd ved mawq kaw he lehq ha lez awg pir heh te kawq daq vehr lehq yawd tawd yaw lehq Ghig sa haq chid muh che yaog. 65Awg yand u ve khuhn, i hehd pad huh chehd che chaw teq pa kuhz jad che yaog. Awg lawn u ve teq pa Yud daq muhd mig khuhn kehaq lo awg kag gha lia lo buhg veh che yaog. 66Awg lawn cheaq kha gha kad che chaw teq pa, ni ma sir khuhn tawnd lar lehq duhd che, “Chaw yad nehax che khawd-ehg ve chaw lehq nar.” Awg lawn ghod ver, Ghig sa yawd geh chehd cheaq i hehd sir che yaog.

Yar khar liq tawd yaw lar che

67Yar khar liq yad nehax ve awr pa Daq kehg che Awg ha phu kha nehax chehd che khuhn, Ghig sa ve tawd khuhd yaw lehq koz che,

68“Id sar rer laq ve Ghig sa haq

chid muh-o.

Awg lawn ghod ver, yawd ved chaw ceng haq

ca ngawx-ag lehq ca thaer khuhq vid-ag che yaog.

69Yawd ved awg ceg var Dar viq ve awg ceng awg khad khuhn yawd

ngag hehd awg pun kand pax ir jad che Thaer khuhq sehr phad pawag vid che yaog.

70Awg ceng gha lia a mig thad lo Ghig sa yawd ved daq kehg che cuh kar var haq

cud lehq koz,

71A nig ved cand par teq pa haq

pong ax lehq,

a nig haq ngawx bawg che chaw teq pa ve laq khuhn

yug pong ax che yaog, lehd koz vid che yaog.

72Ghig sa yawd a nig ved a pux a pi teq pa haq

har kax vid cheaq te lehq

yawd ved daq kehg che kar tiq sax caz haq

duhd nuhd vid tug awg pun te che yaog.

73A nig ved a pux nux Ar brar hanr haq

yawd kar tiq sax caz te lar che yaog.

74A nig ved cand par laq khuhn

Ghig sa yug pong ax peg lehq,

a nig yawd ved kanx te che awg khuhn

teq chaweh kuhz tug mad cawg.

75A nig teq coaq Ghig sa ve mehz khuhd suhr huh,

daq che kehg che he lehq thed che cawd che kanx haq

te gha tug yaog.

76Yad par nehax-og, su nawg haq

ir jad muh jad che Ghig sa ve cuh kar var

lehd koz che yaog.

Awg lawn ghod ver nawg awr lehr, Yer suq-aq keh awg kawd kae

lehq yawd ved yaq kaw haq

gha te vid lar tug yaog.

77Ghig sa yawd ved chaw teq pa thaer khuhq che haq

gha tug awg lawn sir vid tug awg pun,

yawd i hehd haq

har kax vid lehq vend bax phehd kha vid che yaog.

78Awg lawn ghod ver, Ghig sa har kax vix cheaq te lehq,

muhd nuh kawag lo ve awg ghiz a nig thag lo thiag che yaog.

79Awg naz tud awg naz hoq te che khuhn chehd lehq,

suh tug awg khad khuhn mi chehd che chaw teq pa haq

awg ghiz paw vid lehq,

duhd sa ha lehg che yaq kaw awg khad a nig haq

sir mar ax che yaog.”

80Yad nehax u ve awg ton ir taz lehq, co ha phawd awr liz awg ghad cawg mad-ag lehq, Id sar rer laq chaw teq pa mehz khuhd suhr huh tuhz mawa thad kha gag, yawd heh pir khuhn awg god khehz awg nar nuh teag lo lehax chehd chehd tug yaog.

Currently Selected:

Lud kar liq 1: lhiNT

Highlight

Copy