Makụ 15

Jisọsu nọ l'iwhu Páyileti

(Mát. 27:1-2,11-14; Luk. 23:1-5; Jọn. 18:28-38)

1Chi sahụlewho, ndu ishi ndu l'agbajẹ ẹja nụ Chileke, whẹ lẹ ndu bụ ọgurenya mkpụkpu mẹe ndu o-zhi-iwu mẹe iwhe lile bụ ọgbo-ikpe ndu Ju gẹ whẹ hakọta bya achị-kebelekwawho idzu, e kee Jisọsu ẹgbu kpụta iya je akpụru ye Páyileti bụ ọ-chị-ọha whẹ l'ẹka. 2Páyileti jịlahaa ya ajị sụ: “?Ọo gụbedua bụ Eze ndu Ju ọbu?”

Jisọsu sụ iya: “Ọ kwa ghu whọ b'o shi l'ọnu.”

3Ndu ishi ndu l'agbajẹ ẹja nụ Chileke bya ekfushilahaa igweligwe iwhe-dụ-ẹji whẹ sụru l'o meru. 4Páyileti byakwa asụ Jisọsu: “?Tọ dụdu iwhe l'iikfu? ?L'ịinua igweligwe iwhe-dụ-ẹji whẹ l'ekfukaa l'i meru.”

5Jisọsu te ekfu okfu. Iwhe ono tụfu Páyileti ẹhu.

Eekpe Jisọsu nkfugbu

(Mát. 27:15-26; Luk. 23:13-25; Jọn. 18:39—19:16)

6Awha g'awha ha bẹ l'ọobuje, o -rwulewho l'ori-oge O-je-ghata, Páyileti ahaaru whẹ onye mkpọro lanụ t'ọ la. Mbụ-zhiawho onye whẹ sụru t'ọ haarụ whẹ. 7O nweru onye mkpọro lanụ, ẹwha iya bụ Barábasu. Nwoke ono bẹ lị lẹ ndu kwefuru ndu govumenti ike, gbua madzụ, a tụa whẹ mkpọro. 8Igwe-ọha bya aryọlahaa Páyileti t'o meeru whẹ iwhe l'oomejehawaru whẹ. 9Ọ sụ whẹ: “?Unu chọru tẹ mu haarụ unu Eze ndu Ju t'ọ la?” 10O noo l'o doru iya ẹnya l'ọo ẹnya-kfụrukfuru bẹ ndu ishi ndu l'agbajẹ ẹja nụ Chileke kwoberu kpụta Jisọsu kpụtaru iya.

11Ndu ishi ndu l'agbajẹ ẹja nụ Chileke kwarụ igwe-ọha ono ye tẹ whẹ kebe tẹ Páyileti hachiaru whẹ Barábasu. 12Páyileti sụ whẹ ọdo: “?Unu sụkwanuru tẹ mu me onye-e, unu sụ l'ọo Eze ndu Ju gụnu?”

13Whẹ chishia sụ: “Kpọpyabe iya l'oswebe.”

14Ọo ya bụ Páyileti sụ whẹ: “?Ọo gụnu bụ ishi iya? ?Ọo ẹgube ejo-iwhe dụ g'ọo gụnu b'o meru?”

Whẹ kanụ ọryashi ike: “Kpọpyabe iya l'oswebe.”

15Ọo ya bụ, Páyileti chọdenu tẹ ya mee iwhe dụ igwe-ọha ono ree, ọ haarụ whẹ Barábasu t'ọ la. Ọ kpụru ọwhube Jisọsu nụ ndu ojọgu tẹ whẹ chia ya ẹchachi. Whẹ chigee ya iwhe, ọ kpụru iya ye whẹ l'ẹka tẹ whẹ je akpọpyabe iya l'oswebe.

Ndu ojọgu l'eme Jisọsu iwhe iwhere

(Mát. 27:27-31; Jọn. 19:2-3)

16Ndu ojọgu ono bya akpụru Jisọsu bahụ l'eze-ụlo ọ-chị-ọha, bụ Páyileti. Whẹ kukota ndu ojọgu ibe whẹ, whẹ dzua. 17Whẹ chịta okpo-wula-wula uwe uswe yee ya, gude ogvu kpaa okpu-eze kpube iya. 18Whẹ l'ekele iya asụje: “Ndzụ ghu ndzụ ogologo, Eze ndu Ju.” 19Whẹ gude mkpụru kụkposhilahaa ya ishi, gbụshilahaa ya ọnu-mini, whẹ byishiru iya ikpere l'alị gẹ-woo lẹ whẹ l'akwabẹ iya ugvu. 20Whẹ megee ya iwhe ọchi ono, whẹ yefu iya uwe uswe ono, yee ya uwe nkiya, kpụta iya jeshia tẹ whẹ je akpọpyabe iya l'oswebe.

Aakpọpyabe Jisọsu l'oswebe

(Mát. 27:32-44; Luk. 23:26-43; Jọn. 19:17-27)

21Ọo ya bụ, whẹ tụgbua eje, whẹ whụa nwoke Sayiríni, ẹwha iya bụ Sáyịmonu g'o shi iwhe o jeru alwa. Ọo nwoke ono bẹ bụ nna Alẹguzánda yẹle Rúfọsu. Tọ dụ iya bụ lẹ whẹ eyebuta nwoke ono t'o vuta oswebe Jisọsu ono. 22Whẹ kpụru Jisọsu rwua ẹka ọbu l'eekuje Gọlugóta bụ iya bụ “Okpokoro Ishi.” 23Whẹ nụ iya mmẹe ọbu, a gwakọberu mẹru,#15:23 Ọgvu ọbu, l'eekuje mẹru bẹ l'emeje t'iwhe be eme ẹhuka shii. t'o kwe ngụta ya. 24Whẹ kpọpyabe iya l'eli oswebe l'ẹka ono, kekashia uwe iya l'ime onwowhe. Whẹ tụa ya ido tẹ whẹ marụ ọwhu onyenọnu l'a-hata. 25Nteke ono whẹ kpọpyaberu iya l'oswebe ono bụru nteke ẹnyanwu ụtsu ketawaru. 26Whẹ dee ejo iwhe ọbu whẹ sụru l'o meru l'eli oswebe ono, bụ iya bụ l'ọ bụ “EZE NDU JU”. 27Whẹ kpọpyabefua ụmadzu labọ l'ana nfụ lẹ mgburẹku iya whẹ ẹbo-ẹbo l'ẹka ono, onye lanụ l'ẹka-ụtara, onye ọwhu l'ẹka-ịcha. 28Tọ dụ iya bụ l'iwhe ọbu, e deru l'ẹkwo Okfu Chileke avụa, ọwhu kfuru sụ l'a gụru iya yeru ndu l'eme ejo iwhe.

29Ndu l'aghatakaa l'ẹka ono l'akụru iya hụu, atụ l'ishi l'ishi asụje: “Ẹheenu! Tọ dụ gụbe ọwhu ọbu sụru l'ii-mebyishi eze-ụlo Chileke tuwhu iya azụ l'ime ujiku ẹto? 30Dzọnua onwoghu nyizeta l'eli oswebe ono.”

31Ọ kwarụ whọ nno bụ gẹ ndu l'agbajẹ ẹja nụ Chileke mẹe ndu o-zhi-iwu tụkoru aja iya ewenu asụje: “Ọ dzọru ndu ọdo, tọ dụhekwanu ike dzọo onwiya. 32Ngwanụ! Tẹ Kuráyisutu ọbu, bụ Eze ndu Ízurẹlu nyizetanu l'eli oswebe ono ntaa, whẹ awhụkwanu iya, whẹ ekweta l'ọo ya whọ bụ Kuráyisutu ọbu.”

Unwoke ono, a kpakọru whẹ l'iya kpọpyabe l'akọkwa iya whọ ọnu.

Ọnwu Jisọsu

(Mát. 27:45-56; Luk. 23:44-49; Jọn. 19:28-30)

33Ẹnyanwu keleruwho l'ishi, chi jihu l'alị ono l'owhu, mgboko gbazhiawho tsụrikiti jeye l'okeswe urwẹnyashi. 34O belewho l'okeswe urwẹnyashi ono, Jisọsu chia mkpu sụ: “Eloyi! Eloyi! ?Lema sabakutani?” bụ iya bụ: “Chileke mu! Chileke mu! ?Ọo gụnu meru g'o gude ị haa ya nkụnyi mu?”

35Ndu harụ kfụ-geeru l'ẹka ono nụle iya whọ, whẹ sụ: “Unu gebeedaa, l'ọ dụkwa g'ọo Eláyija bẹ l'ọorya-ku.” 36Onye lanụ gbagbụru je ewota sapo tsẹe lẹ mmẹe, shihuru ụka, sapo ono ngụgoo mmẹe ono, o wota iya tsebe lẹ gbaragbara oshi, dụ ogologo mabẹru Jisọsu t'ọ ngụa, sụ tẹ whẹ ngabẹnu maadarụ ?Eláyija l'a-bya ekuzeta iya?

37Jisọsu chishia mkpu ike tubuhu ume.

38Ẹkwa, e gude gechia ime mkpu ẹka ẹnya ẹka eze-ụlo Chileke dụ shilewho l'ishi gbajahụ ẹbo tarakata je akpaa l'alị. 39Onye ishi ojọgu l'achị ndu ojọgu ụkporo ugbo ise, kfụru l'iwhu Jisọsu nteke ono, whụa gẹ Jisọsu chiru mkpu tubuhu ume nno; ọ sụ: “Ọo ezhi-okfu lẹ nwoke-e bụ Nwa Chileke.”

40O nweru ụnwanyi kfụkwaruwho otẹnya l'ẹka ono, ele tẹ whẹ whụkota iwhe l'eme nu. Méri onye Mágudala lị l'ụnwanyi ono. Méri, bụ ne Jósẹsu mẹe Jémusu nshịi lịru iya. Ọ lịkwaru iya whọ mbụ Salómi. 41Ụnwanyi ono, shi etsoje Jisọsu ejeru iya ozhi nteke ọ nọ lẹ Gálili mẹwaro igweligwe ụnwanyi ọdo, tso iya bya Jerúsalẹmu tụkokwaruwho dọru l'ẹka ono chịru ẹnya ye.

Eeli Jisọsu

(Mát. 27:57-61; Luk. 23:50-56; Jọn. 19:38-42)

42-43Nteke ono bụwaru urwẹnyashi. Ọo ya bụ, Jósẹfu onye Arimatíya jekfu Páyileti. Jósẹfu ono bụ onye ndu ikpe tụkoru eyeru ugvu. O shikwawho nteke teru ẹnya leta ẹnya nteke Chileke l'e-goshi l'ọo ya bụ eze. Ọo ya bụ, o gudelewho obu nwoke jekfu Páyileti je aryọo ya t'ọ haa tẹ ya pata odzu Jisọsu je elia, eshi-ọwhu mbọku ono bụwaa mbọku l'aakwakọbeje kwabẹru echile iya ono bụ mbọku ọotuta-ume ndu Ju. 44Ọ dụ Páyileti biribiri shii lẹ Jisọsu mewaru-a nno nwụhu-kebe. Ọ bya ekua onye ishi ojọgu ono jị iya: “?Ọo l'ezhi l'ọ nwụhuwaru?” 45Páyileti nụlewho l'ọnu onye ishi ndu ojọgu ono lẹ Jisọsu nwụhuwaru, ọ sụ Jósẹfu t'o jewaro je apata iya lia. 46Jósẹfu bya atụgbua je anmata ẹkwa ọcha bya apazeta odzu Jisọsu bya egude ẹkwa ọcha ono kwaa ya, je enyebe iya l'ilu, a tụhawaru l'eli eze-ẹwhuru. Ọ bya eswita agbụgaragbu ẹwhuru swichia ọnu ilu ono. 47Méri Mágudala mẹe Méri ne Jósẹsu nọdukwawho whụa ẹka ono, e nyeberu odzu Jisọsu.

Currently Selected:

Makụ 15: Ezaa

Highlight

Copy